1 Timothy 5
5
1ကိုယ့်ထက်ကြီးသူတို့ကို ပြင်းထန်စွာ ဆူပူကြိမ်းမောင်းခြင်းမပြုနှင့်။ သို့သော် မိမိ၏ဖခင်သဖွယ် တောင်းလျှောက်လော့။ အသက်ငယ်သူများကို ညီအစ်ကိုကဲ့သို့ ပြုမူဆက်ဆံလော့။ 2အသက်ကြီးသော အမျိုးသမီးများကို မိခင်ကဲ့သို့လည်းကောင်း၊ အသက်ငယ်ရွယ်သော အမျိုးသမီးတို့ကို ညီအစ်မကဲ့သို့လည်းကောင်း စင်ကြယ်စွာ ပြုမူဆက်ဆံလော့။ 3အမှန်တကယ် ခိုကိုးရာမဲ့ဖြစ်သော မုဆိုးမများကို ရိုသေသမှုပြုကြလော့။ 4သို့သော် မုဆိုးမတွင် သားသမီးများ၊ မြေးများရှိလျှင် ထိုသားသမီးမြေးတို့သည် ဘာသာရေးဆိုင်ရာဝတ္တရားများဖြစ်သည့် အိမ်သူအိမ်သားများကို ကျွေးမွေးရန်နှင့် မိဘတို့ကို ကျေးဇူးဆပ်ရန် ဦးစွာသင်ယူကြရမည်။ အကြောင်းမူကား ဤသည်ကား ဘုရားရှင်အား နှစ်သက်စေသောကြောင့်ဖြစ်၏။ 5အမှန်တကယ်ခိုကိုးရာမဲ့ပြီး တစ်ဦးတည်းကျန်ရစ်သော မုဆိုးမသည် ဘုရားရှင်ကို မျှော်လင့်လျက် နေ့ညမပြတ် အသနားခံ၍ ဆုတောင်းတတ်၏။ 6သို့သော် အပျော်အပါးမက်သော မုဆိုးမမှာမူ အသက်ရှင်လျက်ပင် သေဆုံးသကဲ့သို့ ဖြစ်၏။ 7ထို့ကြောင့် မည်သူ့ကိုမျှ အပြစ်တင်စရာမရှိစေရန် လူတို့အား ဤအရာများကို ညွှန်ကြားလော့။ 8မိမိ၏ဆွေမျိုးသားချင်း၊ အထူးသဖြင့် မိမိ၏အိမ်သူအိမ်သားများကို ထောက်ပံ့ခြင်းမရှိသောသူသည် ယုံကြည်ခြင်းကို ငြင်းပယ်ခြင်းဖြစ်သဖြင့် မယုံကြည်သူများထက် ပို၍ ဆိုး၏။ 9အသက်ခြောက်ဆယ့်မကျော်လျှင် မုဆိုးမစာရင်းသို့ ထည့်သွင်းခြင်းမပြုရ။ သူမသည် မိမိ၏ လင်ယောင်္ကျားအပေါ်သစ္စာရှိသောသူဖြစ်ရမည်။ 10သူမသည် မိမိ၏သားသမီးများကို ပြုစုပျိုးထောင်ခြင်း၊ ဧည့်ဝတ်ကျေပွန်ခြင်း၊ မြင့်မြတ်သန့်ရှင်းသူတို့၏ခြေကို ဆေးပေးခြင်း၊ ဒုက္ခနှင့်ကြုံတွေ့နေသူများကို ကူညီခြင်း၊ အမျိုးမျိုးသောကောင်းမှုများကို ကြိုးစားလုပ်ဆောင်ခြင်း စသည့် ကောင်းမှုကုသိုလ်များကြောင့် နာမည်ကောင်းရသူဖြစ်ရမည်။ 11ငယ်ရွယ်သော မုဆိုးမများကိုမူ ထိုစာရင်းတွင်ထည့်သွင်းခြင်းမပြုနှင့်။ အကြောင်းမူကား သူတို့၏ ကာမဂုဏ်တပ်မက်ခြင်းသည် ခရစ်တော်ထံ ဆက်ကပ်ခြင်းထက် အားကြီးလာသောအခါ အိမ်ထောင်ပြုလိုစိတ်ရှိလာသောကြောင့် ဖြစ်၏။ 12ထိုသို့ပြုခြင်းဖြင့် သူတို့သည် မိမိတို့၏ ကနဦး ကတိသစ္စာကို ချိုးဖောက်သောကြောင့် ပြစ်ဒဏ်စီရင်ခံရကြလိမ့်မည်။ 13ထို့ပြင် သူတို့သည် တစ်အိမ်တက်တစ်အိမ်ဆင်း လှည့်လည်သွားလာကာ ပျင်းရိသောအကျင့် ရှိလာကြ၏။ ထိုသို့ပျင်းရိသည်သာမက အတင်းအဖျင်းပြောလျက် သူတစ်ပါး၏ကိစ္စတွင် ဝင်ရောက်စွက်ဖက်တတ်ကြ၏။ 14ထို့ကြောင့် ငယ်ရွယ်သောမုဆိုးမတို့သည် အိမ်ထောင်ထပ်ပြုခြင်း၊ သားသမီးများယူခြင်း၊ အိမ်မှုကိစ္စများထိန်းသိမ်းခြင်းဖြင့် ရန်သူအား ကဲ့ရဲ့ပြစ်တင်ခြင်းအခွင့်ကိုမပေးရန် ကျွန်ုပ်အကြံပေးလို၏။ 15အချို့မုဆိုးမတို့မှာမူ လမ်းလွဲ၍ စာတန်နောက်သို့ လိုက်ပါသွားကြပြီ။ 16အကယ်၍ ယုံကြည်သူအမျိုးသမီးများ၏ မိသားစုတွင် မုဆိုးမများရှိပါက အသင်းတော်အတွက် ဝန်ထုပ်ဝန်ပိုးမဖြစ်စေရန် သူတို့ကိုယ်တိုင် ထိုမုဆိုးမများကို ကူညီထောက်ပံ့သင့်၏။ သို့မှသာ အမှန်တကယ်ခိုကိုးရာမဲ့ဖြစ်နေသော မုဆိုးမများကို အသင်းတော်က ကူညီထောက်ပံ့နိုင်လိမ့်မည်ဖြစ်၏။ 17အသင်းတော်ကို ကောင်းမွန်စွာ ဦးဆောင်စီမံသောအကြီးအကဲများ၊ အထူးသဖြင့် တရားဟောခြင်းနှင့် သွန်သင်ပေးခြင်းအမှုကိုပြုနေသောသူများသည် နှစ်ဆသောဂုဏ်ပြုခြင်းကို ရယူထိုက်၏။ 18အကြောင်းမူကား ကျမ်းစာ၌ “သီးနှံ့နယ်နေသည့် နွား၏နှုတ်ကို ပါးချုပ်မတပ်နှင့်” ဟူ၍လည်းကောင်း၊ “အလုပ်လုပ်သူသည် အခကြေးငွေကို ရထိုက်၏”ဟူ၍လည်းကောင်း ဆိုထားသောကြောင့်ဖြစ်၏။ 19သက်သေနှစ်ဦး၊ သုံးဦးမရှိလျှင် အကြီးအကဲအပေါ် စွပ်စွဲခြင်းကို လက်မခံနှင့်။ 20အပြစ်ကျူးလွန်သောသူတို့ကို လူအများရှေ့တွင် ဆုံးမလော့။ သို့မှသာ အခြားသင်းအုပ်တို့သည်လည်း အပြစ်ကျူးလွန်ရန် ကြောက်ရွံ့ကြလိမ့်မည်။ 21မျက်နှာလိုက်ခြင်း၊ ဘက်လိုက်ခြင်းမရှိဘဲ ဤညွှန်ကြားချက်များကို လိုက်နာဆောင်ရွက်ရန် ဘုရားရှင်နှင့် ယေရှုခရစ်တော်တို့ ရှေ့၌လည်းကောင်း၊ ရွေးကောက်တော်မူသောနတ်ဒေဝါတို့၏ရှေ့၌လည်းကောင်း သင့်ကို ကျွန်ုပ်အလေးအနက် မှာကြားလို၏။ 22လက်တင်ခြင်းအမှုကို အလျင်စလိုမပြုကြနှင့်။ အခြားသူတို့၏အပြစ်၌လည်း ပါဝင်ခြင်းမရှိကြနှင့်။ သင့်ကိုယ်သင် စင်ကြယ်စေလော့။ 23သင်၏သင်၏အစာအိမ်ရောဂါနှင့် မကြာခဏနာမကျန်းဖြစ်ခြင်းတို့အတွက် ရေကိုသာမသောက်ဘဲ စပျစ်ဝိုင်အနည်းငယ်ကိုလည်း သုံးဆောင်လော့။ 24လူတချို့၏ အပြစ်များသည် တရားမစီရင်မီကပင် သိသာထင်ရှား၏။ လူတချို့၏ အပြစ်များသည် နောက်မှ ပေါ်လာတတ်၏။ 25ထိုနည်းတူ ကောင်းမှုများသည် သိသာထင်ရှား၏။ မသိသာမထင်ရှားသော ကောင်းမှုများသည်ပင် ဖုံးကွယ်၍ ရမည်မဟုတ်။
Currently Selected:
1 Timothy 5: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
