1 Peter 4
4
1ထို့ကြောင့် ခရစ်တော်သည် ကိုယ်ခန္တာ၏ ဆင်းရဲဒုက္ခကို ခံစားခဲ့ရသောကြောင့် သင်တို့သည်လည်း တူညီသော ခံယူချက်မျိုးကို ကိုင်ဆောင်ထားရန်လိုအပ်သည်။ အဘယ်ကြောင့်ဆိုသော် ကိုယ်ခန္တာ၏ ဆင်းရဲဒုက္ခကို ခံစားရသောသူတို့သည် အပြစ်မကျူးလွန်ရန် ဆုံးဖြတ်ထားသောကြောင့်ဖြစ်သည်။ 2ဤသည်ကား လောက၌ အသက်ရှင်နေထိုင်ရမည့် ကျန်ရှိသောအချိန်များအတွက် လူသားများ၏အလိုဆန္ဒအတွက် အသက်မရှင်တော့ဘဲ ဘုရားရှင်၏အလိုတော်အတိုင်းသာ အသက်ရှင်နိုင်ရန်ဖြစ်သည်။ 3အကြောင်းမူကား သင်တို့သည် ဘုရားရှင်အား မယုံကြည်သောသူများကဲ့သို့ ကာမဂုဏ်လိုက်စားခြင်း၊ တပ်မက်ခြင်း၊ မူးယစ်ခြင်း၊ ပွဲလုပ်/ပျော်ပါးခြင်း၊ သောက်စားခြင်း၊ ပညတ်တော်နှင့်မညီသည့် ရုပ်တုကိုးကွယ်ခြင်းတို့အား ပြုမူ၍ အချိန်အတန်ကြာ နေထိုင်ခဲ့သောကြောင့်ဖြစ်သည်။ 4ယခုအချိန်မှာ သင်တို့သည် ထိုသူတို့နှင့်အတူ သောက်စားမူးယစ်ပြီး အပျော်အပါးမလိုက်စားသည့်အတွက် ထူးဆန်းအံ့ဩလျှက် သင်တို့အား ကဲ့ရဲ့စော်ကားသော စကားများပြောဆိုကြလိမ့်မည်။ 5ထိုသူတို့သည် အသက်ရှင်သောသူတို့နှင့် သေသောသူတို့ကို တရားစီရင်ရန် အသင့်ရှိတော်မူသော ဘုရားရှင်ထံ၌ ဖြေရှင်းချက်ပေးရလိမ့်မည်။ 6ဤအကြောင်းရင်းကြောင့် သေလွန်သူတို့သည် သတင်းကောင်းကို ကြားခဲ့ကြသောကြောင့်ဖြစ်သည်။ သူတို့၏ကိုယ်ခန္တာသည် လူ့စံနူန်းအားဖြင့် တရားစီရင်ခြင်းကို ခံရသော်လည်း ဝိညာဥ်၌မူကား ဘုရားရှင်အားဖြင့် အသက်ရှင်နိုင်ရန် ရည်ရွယ်၍ သေလွန်သောသူတို့ကိုပင် သတင်းကောင်းဟောပြောကြရန်ဖြစ်သည်။ 7အရာအားလုံးအတွက် နောက်ဆုံးသောအချိန်သည် နီးကပ်လာပြီဖြစ်သည်။ ထို့ကြောင့်သင်တို့ ကောင်းစွာဆုတောင်းနိုင်ရန်အတွက် မိမိတို့စိတ်နှလုံးသားကို ချုပ်တည်းလျက် သတိရှိကြလော့။ 8အရာအားလုံးတို့ထက် အချင်းချင်း မေတ္တာထားရမည်။ အဘယ်ကြောင့်ဆိုသော် မေတ္တာသည် အပြစ်အမျိုးမျိုးကို ဖုံးအုပ်စေနိုင်သောကြောင့်ဖြစ်သည်။ 9သင်တို့သည် မညှဉ်းမညူဘဲ အချင်းချင်း ဧည့်ဝတ်ကျေပွန်ကြပါ။ 10သင်တို့တစ်ဦးချင်းစီတွင် ဘုရားရှင်ထံမှ ချီးမြှင့်ပေးသော ဆုကျေးဇူးတစ်မျိုးစီ ရရှိထားသူဖြစ်သဖြင့် ထိုဆုကျေးဇူးကို အသုံးပြု၍ အချင်းချင်း ကူညီဆောင်ရွက်ကြလော့။ 11ဟောပြောသောသူတို့သည် ဘုရားရှင်၏နှုတ်ကပတ်တော်အတိုင်း ဟောပြောရမည်။ ဘုရားရှင်၏အစေခံနိုင်သူဖြစ်လျှင် ဘုရားရှင်ပေးထားသော အစွမ်းသတ္တိအတိုင်း လုပ်ဆောင်ပါ။ ဘုရားရှင်၏ ဘုန်းအသရေ ထင်ရှားစေသောအမှုမှန်သမျှကို စွမ်းစွမ်းတမံ ဆောင်ရွက်ကြပါ။ ယေရှုခရစ်တော်၏ ဘုန်းတန်ခိုးတော်သည် အမြဲထာဝရ ထွန်းတောက်ပါစေသတည်း။ အာမင်။ 12ချစ်မိတ်ဆွေတို့၊ သင်တို့အား စမ်းသပ်ရန်အတွက် ယခု သင်တို့ထံကျရောက်လာသည့် ဆင်းရဲဒုက္ခမီးကို ထူးဆန်းသောအရာ ဖြစ်ပျက်လာသကဲ့သို့ ထင်မှတ်ကာ မအံ့ဩကြနှင့်။ 13ထိုသို့အံ့ဩနေမည့်အစား သင်တို့သည် ခရစ်တော်ခံစားခဲ့ရသော ဆင်းရဲဒုက္ခကို မျှဝေခံစားကြရသည့်အတွက် ဝမ်းမြောက်ပျော်ရွှင်ကြပါ။ ခရစ်တော်၏ တန်ခိုးတော် ပေါ်လွင်ထင်ရှားစေသည့်အတွက် လည်း ဝမ်းမြောက်ဝမ်းသာစွာဖြင့် ပျော်ရွှင်ကြပါ။ 14သင်တို့သည် ခရစ်တော်၏နာမတော်ကြောင့် ကဲ့ရဲ့ပြစ်တင်ခြင်းခံရလျှင် မင်္ဂလာရှိကြသည်။ အဘယ်ကြောင့်ဆိုသော် ဘုန်းအသရေနှင့်ပြည့်စုံသော ဘုရားရှင်၏ဝိညာဥ်တော်သည် သင်တို့၌ ကိန်းဝပ်တော်မူသောကြောင့်ပင်ဖြစ်သည်။ 15သင်တို့ ဆင်းရဲဒုက္ခခံရလျှင်ပင် မည်သူတစ်ဦးတစ်ယောက်မျှ လူသတ်မှု၊ ခိုးမှု၊ ရာဇဝတ်မှု၊ သို့မဟုတ် သူတစ်ပါး၏ကိစ္စတွင် ပါဝင်ပက်သက်မှုတို့ဖြင့် ဒုက္ခမခံစားရပါစေနှင့်။ 16သို့သော်လည်း ခရစ်ယာန်ဖြစ်၍ ဆင်းရဲဒုက္ခခံစားရပါက ရှက်ကြောက်စရာမလိုဘဲ ခရစ်ယာန်ဖြစ်ခြင်းအတွက် ဘုရားရှင်၏ ဘုန်းတော်အပေါင်းတို့ကို ချီးမွမ်းပါ။ 17အကြောင်းမူကား တရားစီရင်တော်မူသောအချိန်သည် ကျရောက်လာပြီဖြစ်သောကြောင့် ဘုရားရှင်၏လူမျိုးတို့သည် ပထမဦးစွာ ခံကြရမည်။ ကျွန်ုပ်တို့သည် ဦးစွာ တရားစီရင်ခြင်းခံရလျှင် ဘုရားရှင်၏သတင်းကောင်းကို မနာခံသောသူတို့၏ အဆုံးသတ်သည် မည်သို့ဖြစ်မည်နည်း။ 18ထို့ပြင် ကျမ်းစာ၌ “ဖြောင့်မတ်သောသူတို့ပင် ကယ်တင်ခြင်းခံရရန် ခက်ခဲလျှင် ဘုရားတရားမဲ့သော အပြစ်ဒုစရိုက်သမားတို့အတွက် မည်သို့ဖြစ်လာမည်နည်း” ဟူ၍ ဖော်ပြထားသည်။ 19ထို့ကြောင့် ဘုရားရှင်၏အလိုတော်အရ ဒုက္ခဆင်းရဲခံရသူတို့သည် သစ္စာရှင်ဖြစ်တော်မူသော ဖန်ဆင်းရှင်ဘုရားထံ၌ မိမိတို့၏စိတ်ဝိညာဥ်ကိုအပ်နှံ၍ ကောင်းမှုကို ဆက်လက်၍ပြုသင့်သည်။
Currently Selected:
1 Peter 4: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
