1 Peter 3
3
1ဇနီးမယားတို့သည် မိမိခင်ပွန်းတို့၏ စကားကိုနာခံရမည်။ ခင်ပွန်းအချို့သည် နှုတ်ကပတ်တော်ကို မယုံကြည်သော်လည်း ဘုရားရှင်၏အလိုတော်အတိုင်း နေထိုင်သော ဇနီးမယားတို့၏ အပြုအမူကို ကြည့်၍ စကားဖြင့်ပြောစရာမလိုဘဲ ဘုရားရှင်ကို ယုံကြည်လာကြပါလိမ့်မည်။ 2သူတို့သည် ဇနီးမယားတို့၏ ဖြူစင်သောစိတ်ထားနှင့် ဘုရား၊တရားရိုသေကိုင်းရှိုင်းသည်ကိုမြင်၍ လေးစားလာကြလိမ့်မည်။ 3သင်တို့၏တန်ဆာဆင်ခြင်းသည် ဖီးလိမ်းပြင်ဆင်ခြင်း၊ ရွှေငွေလက်ဝတ်ရတနာများဝတ်ဆင်ခြင်း၊ ဝတ်ကောင်းစားလှများဝတ်ဆင်ခြင်း စသည့် အပြင်ပန်းအလှဆင်ခြင်းများနှင့်အချိန်မကုန်စေဘဲ 4နူးညံ့သိမ်မွေ့၍ တည်ငြိမ်ခြင်းကိုဖြစ်ပေါ်စေသည့် မပျက်စီးနိုင်သော အတွင်းစိတ်အလှတရားများဖြင့်သာ အလှဆင်ကြလော့။ ဤအရာသည် ဘုရားရှင်၏ရှေ့တော်မှောက်တွင် အလွန်တန်ဖိုးရှိစေသောအရာဖြစ်သည်။ 5အကြောင်းမူကား ဘုရားရှင်ကို မျှော်လင့်သည့် ရှေးယခင်က မြင့်မြတ်သောမိန်းမတို့သည် ခင်ပွန်းတို့၏အုပ်ထိန်းမှုကို နာခံခြင်းအားဖြင့် မိမိတို့ကိုယ်ကို တန်ဆာဆင်ကြသည်။ 6ဤနည်းဖြင့် စာရာသည် အာဗြဟံ၏စကားကို နာခံပြီး သခင်ဟု ခေါ်ခဲ့သည်။ သင်တို့သည် ဆင်းရဲဒုက္ခကို မကြောက်ဘဲ ကောင်းသောအကျင့်ကိုကျင့်လျှင် စာရာ၏သားသမီးများဖြစ်ကြသည်။ 7ထိုနည်းတူ ခင်ပွန်းသည်တို့၊ ဇနီးသည်သည် သင်တို့ထက် အားနည်းသော မိန်းမသားဖြစ်သည်ကို သိရှိနားလည်၍ အသက်နှင့်ဆိုင်သော ကျေးဇူးတော်ကို အတူတကွအမွေဆက်ခံသူအဖြစ် တန်ဖိုးထား ပေါင်းသင်းကြလော့။ ဤသည်ကား သင်တို့၏ဆုတောင်းခြင်းအား အတားအဆီးမရှိစေရန်ဖြစ်သည်။ 8နောက်ဆုံးအနေဖြင့်ဆိုရလျှင် သင်တို့အားလုံး တစ်စိတ်တစ်ဝမ်းတည်း နေကြပါ၊ တစ်ဦးကိုတစ်ဦး ညီအစ်ကိုမောင်နှမသဖွယ် ချစ်ကြလော့။ စာနာထောက်ထားပြီး နှိမ့်ချဆက်ဆံကြပါ။ 9အဆိုးကိုအဆိုးဖြင့်လည်းကောင်း၊ ကဲ့ရဲ့ခြင်းကို ကဲ့ရဲ့ခြင်းဖြင့်လည်းကောင်း မတုံ့ပြန်ဘဲ ကောင်းချီးကိုသာပေးကြလော့။ အဘယ်ကြောင့်ဆိုသော် ဘုရားရှင်သည် သင်တို့အား ကောင်းချီးမင်္ဂလာခံစားရစေရန် ရွေးကောက်တော်မူခဲ့သောကြောင့်ဖြစ်သည်။ 10ထိုအကြာင်းအရာတို့ကို ကျမ်းစာတော်ထဲတွင် “မိမိဘဝကို ချစ်မြတ်နိုး၍ စီးပွားချမ်းသာကို အလိုရှိသူသည် မိမိ၏ နှုတ်ထွက်စကားကို မညစ်ညမ်းစေရန် ထိန်းသိမ်းရမည်။ လိမ်လည်လှည့်ဖျားမှုကင်းရမည်။ 11မကောင်းမှုဒုစရိုက်ကို စွန့်ပစ်၍ ကောင်းမှုပြုရမည်။ ငြိမ်းချမ်းစွာနေထိုင်ရန် တောင့်တ၍ ငြိမ်းချမ်းခြင်းအတွက် ကြိုးစားအားထုတ်ရမည်။ 12အကြောင်းမူကား အရှင်သည် ရိုးသားဖြောင့်မတ်သူတို့ကို ကြည့်ရှုစောင့်ရှောက်၍ ထိုသူတို့၏ ဆုတောင်းသံတို့ကို နားထောင်တော်မူပြီး မကောင်းမှုဒုစရိုက်ပြုသူတို့အား လက်မခံဘဲ ငြင်းပယ်တော်မူ၏” ဟူ၍ ဖော်ပြထားပေသည်။ 13သင်တို့သည် ကောင်းမှုလုပ်ရန် စိတ်အားထက်သန်လျှင် မည်သူသည် သင်တို့အား ထိခိုက်နစ်နာစေမည်နည်း။ 14သို့သော် သင်တို့သည် ရိုးသားဖြောင့်မတ်သဖြင့် ဆင်းရဲဒုက္ခခံစားခဲ့ရလျှင် သင်တို့သည် မင်္ဂလာရှိကြသည်။ လူတို့၏ ခြိမ်းခြောက်မှုကို မကြောက်ကြပါနှင့်။ မထိတ်လန့်ကြပါနှင့်။ 15သင်တို့၏စိတ်နှလုံးထဲ၌ ခရစ်တော်ကို အရှင်အဖြစ် ရိုသေကိုင်းရှိုင်းကြလော့။ တစ်စုံတစ်ယောက်သည် သင်တို့၌ရှိသည့်မျှော်လင့်ခြင်းအကြောင်းနှင့် ပတ်သက်၍မေးမြန်းလျှင် ထိုသူအားရှင်းလင်းဖြေဆိုရန် အမြဲတမ်းအသင့်ရှိကြလော့။ 16သို့သော် ထိုသို့တစ်ခြားသူတို့အား ရှင်းပြသောအခါ မိမိကိုယ်ကို နှိမ့်ချပြီး လေးလေးစားစား ရှင်းပြပါ။ ခရစ်တော်ကိုယုံကြည်သော သင်တို့အား ကဲ့ရဲ့ရှုတ်ချကြသောသူတို့သည် သင်တို့၏ကောင်းမြတ်သည့် စိတ်သဘောထားနှင့် အပြုအမူကိုမြင်ရ၍ အရှက်ရကြစေရန် သင်တို့၏စိတ်အား ကြည်လင်ကြစေလော့။ 17ဘုရားရှင်၏အလိုတော်ဖြစ်သော ကောင်းမှုပြု၍ ဆင်းရဲဒုက္ခခံရခြင်းသည် မကောင်းမှုပြုခြင်းထက်ပို၍ ကောင်းသည်။ 18အကြောင်းမူကား ခရစ်တော်ကိုယ်တိုင်ပင်လျှင် ကျွန်ုပ်တို့၏အပြစ်များအတွက် တစ်ကြိမ်တည်းနှင့် အပြီးအပိုင် အသေခံတော်မူခဲ့သောကြောင့်ဖြစ်သည်။ သင်တို့အား ဘုရားရှင်ထံသို့ပို့ဆောင်ရန် ဖြောင့်မတ်သောအရှင်သည် မဖြောင့်မတ်သောသူတို့ကိုယ်စား အသေခံတော်မူသည်။ သူသည် ကိုယ်ခန္တာအားဖြင့်သေသော်လည်း ဝိညာဥ်အားဖြင့် အသက်ပြန်ရှင်တော်မူသည်။ 19ထို့နောက် ကိုယ်တော်သည် ဝိညာဥ်အားဖြင့်အကျဥ်းကျနေသော သူများထံသို့သွား၍ ဟောပြောတော်မူလေသည်။ 20ထိုဝိညာဉ်အားဖြင့် အကျဥ်းကျနေသောသူများဆိုသည်မှာ နောဧသည် သင်္ဘောတည်ဆောက်နေစဥ် ဘုရားရှင်သည် စိတ်ရှည်စွာ စောင့်ဆိုင်းတော်မူသော်လည်း နောင်တမရသည့် မယုံကြည်သူများဖြစ်သည်။ ထိုအချိန်တွင် သင်္ဘောထဲမှ အနည်းငယ်ဖြစ်သော လူရှစ်ဦးကိုသာ ရေထဲမှကယ်တင်နိုင်ခဲ့သည်။ 21ဤသို့ ရေထဲမှကယ်တင်သည်ဟုဆိုရာတွင် ရေနစ်မင်္ဂလာခံယူခြင်းနှင့် အဓိပ္ပါယ်တူသည်။ ရေနစ်မင်္ဂလာခံယူခြင်းသည် ကိုယ်ခန္ဓာအညစ်အကြေးကို ဆေးကြောခြင်းမဟုတ်ဘဲ ဘုရားရှင်၏ရှေ့မှောက်တွင် မိမိတို့၏ကောင်းမြတ်သောစိတ်နှလုံးသားဖြင့် ကတိသစ္စာပြုခြင်းပင်ဖြစ်သည်။ ခရစ်တော်၏ သေခြင်းမှအသက်ပြန်ရှင်ခြင်းကို အကြောင်းပြုရ၍ ယခုအခါ သင်တို့သည် ရေနစ်မင်္ဂလာခံယူခွင့်ရကြရပြီဖြစ်သည်။ 22ခရစ်တော်သည် ရွှေမြို့တော်သို့ ကြွတော်မူ၍ နတ်ဒေဝါများ၊ အာဏာပိုင်များ၊ တန်ခိုးရှင်များကို မိမိလက်အောက်၌ ထားရှိလျက် ဘုရားရှင်၏လက်ယာတော်ဘက်၌ ထိုင်တော်မူလေသည်။
Currently Selected:
1 Peter 3: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
