1 Peter 2
2
1ထို့ကြောင့် သင်တို့သည် မကောင်းမှုဒုစရိုက်အမျိုးမျိုး ၊လှည့်စားမှုအမျိုးမျိုး ၊သူတော်ကောင်းယောင်ဆောင်မှုများ၊ မနာလိုမှုများ နှင့် ဆဲရေးတိုင်းထွာမှုများကို ပယ်ရှားလိုက်ပါ။ 2မွေးကင်းစကလေးငယ်များကဲ့သို့ ဝိညာဥ်ရေးဆိုင်ရာနို့ရည်အစစ်ကို လိုလားတောင့်တကြလော့။ သို့မှသာ သင်တို့သည် ကယ်တင်ခြင်းအား အပြည့်အဝခံစားရမည့်အချိန်တိုင်အောင် ကြီးထွားလိမ့်မည်။ 3ဘုရားရှင်သည် သင်တို့အပေါ် သနားကရုဏာသက်တော်မူကြောင်းကို သင်တို့ကိုယ်တိုင် သိထားပြီးဖြစ်သည်။ 4လူတို့၏ငြင်းပယ်ခြင်းအား ခံရသော်လည်း ဘုရားရှင်ရွှေးကောက်တော်မူသော အဖိုးတန်သောအရာအဖြစ် အသက်ရှင်သောကျောက်ဖြစ်သည့် ခရစ်တော်ထံသို့ သင်တို့လာကြသည်။ 5သင်တို့သည်လည်း ယေရှုခရစ်တော်အားဖြင့် ဘုရားရှင်နှစ်သက်တော်မူသော ဝိညာဉ်ရေးရာ ပူဇော်စရာများကို ပေးဆောင်သော မြင့်မြတ်သော ပုရောဟိတ်များဖြစ်ရန်အတွက် အသက်ရှင်သောကျောက်ကဲ့သို့ ဝိညာဉ်ရေးဆိုင်ရာအိမ်တော်အဖြစ် တည်ဆောက်ခြင်းအားခံကြလော့။ 6အဘယ်ကြောင့်ဆိုသော် ကျမ်းစာတွင် “ကြည့်ရှုလော့။ ငါသည် အဖိုးတန် ကျောက်တစ်လုံးကိုရွေးချယ်၍ ဇိအုန် တောင်ပေါ်မှာ ထောင့်ချုပ်ကျောက်အဖြစ်ချထားသည်။ မည်သူမဆို ထိုအရှင်ကို ယုံကြည်သောသူမည်သည်ကား ရှက်ကြောက်ခြင်းသို့မရောက်”ဟု ဖော်ပြပါရှိထားသောကြောင့်ဖြစ်သည်။ 7ထို့ကြောင့် ယုံကြည်သူတိုင်းအတွက် ဤကျောက်သည် ဂုဏ်သရေဖြစ်သည်။ မယုံကြည်သောသူတို့အတွက်မူကား “ဆောက်လုပ်သူများ ပစ်ပယ်ထားသော ကျောက်တုံးသည် အရေးကြီးသောထောင့်ချုပ်ကျောက်ဖြစ်လာပြီ” ဟု ဆိုသည်။ 8ထို့အပြင် ကျမ်းစာ၌ “ထိုကျောက်သည် ဆူးငြောင့်ခလုတ်ဖြစ်သော ကျောက်၊ တိုက်မိ၍ ပြိုလဲစေသော ကျောက်ဖြစ်သည်” ဟူ၍ ဖော်ပြထားသည်။ သူတို့သည် နှုတ်ကပတ်တော်ကို မနာခံသောကြောင့် ခလုတ်ထိမိ၍ လဲကြရသည်။ ဤသည်ကား ထိုသူတို့အတွက် ကြိူတင်သတ်မှတ်ထားသောအရာဖြစ်သည်။ 9သင်တို့မူကား ရွေးကောက်ခံရသောလူ၊ တော်ဝင်ပုရောဟိတ်၊ မြင့်မြတ်သောလူမျိုး၊ ဘုရားရှင်ပိုင်ဆိုင်သော လူမျိုးဖြစ်သည်။ ထို့ကြောင့် သင်တို့အား အံ့ဖွယ်အမှုတော်များကို ကြွေးကြော်နိုင်စေရန် အမှောင်ထုမှ အံ့ဖွယ်ကောင်းသော အလင်းတော်သို့ ခေါ်ထုတ်တော်မူသည်။ 10တစ်ချိန်က သင်တို့သည် ဘုရားရှင်၏လူမျိုးမဟုတ်သော်လည်း ယခု သင်တို့သည် ဘုရားရှင်၏လူမျိုးဖြစ်ခဲ့ကြသည်။ ယခင်က သင်တို့သည် ဘုရားရှင်၏ကရုဏာကို မရရှိခဲ့ရသော်လည်း ယခုမူကား သင်တို့သည် ဘုရားရှင်၏ကရုဏာတော်များကို ခံစားကြရပြီ။ 11ချစ်သောမိတ်ဆွေတို့၊ သင်တို့သည် ဤလောကတွင် ဧည့်သည်အဖြစ်ဖြင့်နေကြသည့်အတွက် သင်၏စိတ်ကိုဆန့်ကျင်တိုက်ခိုက်သော လူ့ဗီဇအလိုအားမလိုက်ရန် ကျွန်ုပ်တိုက်တွန်းသည်။ 12သင်တို့သည် ဘုရားရှင်အား မကိုးကွယ်သူများကြားတွင် ကောင်းမွန်စွာ ပြုမူနေထိုင်ကြလော့။ ထိုသို့ဆိုလျှင် ထိုသူတို့သည် သင်တို့အား မကောင်းမှုပြုသူများဟု ပုတ်ခတ်ပြောဆိုကြသော်လည်း သင်တို့၏ကောင်းသော အမှုတို့ကိုမြင်၍ ဘုရားရှင် ကြည့်ရှုစီရင်တော်မူသောနေ့၌ ကိုယ်တော်၏ဘုန်းတော်ကို ချီးမွမ်းကြလိမ့်မည်။ 13အရှင်၏မျက်နှာတော်ကိုထောက်၍ သင်တို့သည် အာဏာပိုင်တို့၏ အုပ်ချုပ်မှုကို နာခံကြပါ။ အကြီးဆုံးသော အာဏာပိုင်ရှင်ဘုရင်၏အုပ်ချုပ်မှုကိုဖြစ်စေ၊ 14ရှင်ဘုရင်ခန့်ထားသည့် ဘုရင်ခံတို့ကိုဖြစ်စေ နာခံကြလော့။ ထိုဘုရင်ခံများသည် လူဆိုးများကို အပြစ်ပေးရန်နှင့် လူကောင်းတို့ကို ချီးမြှင့်မြောက်စားရန် ခန့်ထားခြင်းခံသူများဖြစ်သည်။ 15အကြောင်းမူကား သင်တို့သည် ကောင်းသောအမှုကို ပြုခြင်းအားဖြင့် မိုက်မဲသောသူတို့၏ အသိဉာဏ်ကင်းမဲ့မှုကို ငြိမ်ဝပ်စေရန် ဘုရားရှင် အလိုတော်ရှိတော်မူသည်။ 16သင်တို့သည် လွတ်လပ်သူများကဲ့သို့ နေထိုင်ပြီး မကောင်းမှုပြုရန် ထိုလွတ်လပ်မှုကို ဆင်ခြေအဖြစ် အသုံးမချဘဲ ဘုရားရှင်၏အစေခံအဖြစ် ပြုမူနေထိုင်ကြလော့။ 17လူသားအားလုံးကို လေးစားပါ။ ယုံကြည်သူ ညီအစ်ကိုချင်း ချစ်ခင်ကြလော့။ ဘုရားကိုကြောက်ရွံ့ပါ။ ရှင်ဘုရင်ကို ရိုသေပါ။ 18အစေခံတို့၊ ကြောက်ရွံ့ရိုသေသော စိတ်အပြည့်အဝဖြင့် သင်တို့၏သခင်များကို နာခံကြလော့။ စိတ်သဘောထားကောင်း၍ ညှာတာတတ်သော သခင်များကိုသာမက ရက်စက်ကြမ်းကြုတ်သော သခင်များကိုလည်း နာခံကြလော့။ 19အကြောင်းမူကား တစ်စုံတစ်ဦးသည် မိမိမခံထိုက်သော ဆင်းရဲဒုက္ခအား ခံရသောအခါ ဘုရားရှင်၏မျက်နှာတော်ကိုထောက်၍ သည်းခံလျှင် ဘုရားရှင် နှစ်သက်ဖွယ်ဖြစ်သည်။ 20မိမိတို့အမှားအတွက် အပြစ်ဒဏ်ခံရ၍ကျေကျေနပ်နပ် အပြစ်ဒဏ်ခံခြင်းသည် ချီးမွမ်းစရာမကောင်းသော်လည်း မိမိတို့သည် အမှန်တရားကိုပြုသော်လည်း အပြစ်ဒဏ်ခံရသည်ရှိသော် မညည်းမညူဘဲကျေကျေနပ်နပ် ပေးဆပ်လျှင် ဘုရားရှင်ကောင်းချီးပေးပါလိမ့်မည်။ 21ခရစ်တော်သည် သင်တို့အား ဤနည်းကိုကျင့်သုံးစေရန် ခေါ်တော်မူခြင်းဖြစ်သည်။ အဘယ်ကြောင့်ဆိုသော် သူကိုယ်တိုင် သင်တို့၏အပြစ်များအတွက် ဒုက္ခဝေဒနာများခံစားရသူဖြစ်ခဲ့သည်။ သူ၏ခြေလှမ်းကိုလိုက်လျှောက်နိုင်ရန် စံနမူထားခဲ့ခြင်းဖြစ်သည်။ 22ကိုယ်တော်သည် မည်သည့်အခါမျှ အပြစ် မကျူးလွန်ခဲ့သလို လိမ်ညာမုသားစကားကိုလည်း မပြောခဲ့ပေ။ 23ကိုယ်တော်သည် မိမိအား ပုတ်ခတ်ပြောဆိုသူများကို တုံ့ပြန်ပြောဆိုခြင်းမရှိပေ။ သူ ဒုက္ခခံစားရသည့်အချိန်တွင်လည်း ပြန်၍ခြိမ်းခြောက်ခြင်း မရှိခဲ့ဘဲ ဖြောင့်မှန်စွာ တရားစီရင်တတ်သော ဘုရားရှင် ၏လက်တော်သို့ မိမိကိုယ်ကို အပ်နှံတော်မူလေသည်။ 24ကျွန်ုပ်တို့၏အပြစ်ဒုစရိုက်များ ပြေပျောက်စေခြင်းငှာလည်းကောင်း၊ ဖြောင့်မတ်ခြင်းဖြင့်အသက်ရှင်နေထိုင်ရန် အလို့ငှာ ကိုယ်တော်သည် သူ၏ကိုယ်ခန္ဓာကိုကိုယ်တိုင် သယ်ဆောင်၍ လက်ဝါးကပ်တိုင်ပေါ်တွင် သူ၏အသက်ကိုစွန့်လွှတ်ခဲ့လေသည်။ 25သင်တို့သည် ယခင်က လမ်းလွဲသော သိုးသငယ်ကဲ့သို့ဖြစ်သော်လည်း ယခုအချိန်တွင် သင်တို့၏စိတ်ကို ထိန်းသိမ်းစောင့်ရှောက်သော သိုးထိန်းထံသို့ ပြန်ရောက်ကြပြီဖြစ်သည်။
Currently Selected:
1 Peter 2: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
