1 Peter 1
1
1ယေရှုခရစ်တော်၏သာဝကပေတရုဖြစ်သော ကျွန်ုပ်သည် ပုန္တုပြည်၊ ဂလာတိပြည်၊ ကပ္ပဒေါကိပြည်၊ အာရှပြည်နှင့် ဗိသုနိပြည်များရှိ နေရာအနှံ့အပြားတွင် ဧည့်သည်များအဖြစ်နေထိုင်လျှက်ရှိသော ဘုရားရှင်ရွှေးချယ်တော်မူသော လူများထံသို့ စာရေးလိုက်ပါသည်။ 2ထိုသူတို့မှာ အဖဘုရားရှင်၏အရာအားလုံးကို သိမြင်နိုင်တော်မူသော ဉာဏ်တော်အရ ဉာဏ်အလင်းတော်၏ သန့်ရှင်းစေခြင်းအားဖြင့် ရွှေးချယ်တော်မူခြင်းခံထားရသူများဖြစ်သည်။ ဤသို့ရွှေးချယ်တော်မူခြင်းမှာ ယေရှုခရစ်တော်ကို သင်တို့နာခံစေရန်နှင့် သင်တို့အား အသွေးတော်ဖြင့် ပက်ဖျန်းခြင်းခံရ၍ စင်ကြယ်စေရန်ဖြစ်သည်။ ဘုရားရှင်၏ကျေးဇူးတော်နှင့် ငြိမ်သက်ခြင်းသည် သင်တို့၌တိုးပွားပါစေသော။ 3ကျွန်ုပ်တို့၏ အရှင်ဖြစ်တော်မူသော ယေရှုခရစ်တော်၏ အဖဘုရားရှင်ဂုဏ်အား ချီးမွှမ်းကြပါစို့။ အဖဘုရားရှင်၏ မဟာကရုဏာတော်ကြောင့် ကိုယ်တော်ယေရှုအား သေခြင်းမှအသက်ပြန်ရှင်စေခြင်း အားဖြင့် ကျွန်ုပ်တို့အား အသစ်တစ်ဖန်ပြန်လည်မွေးဖွားခြင်းဟူသော မျှော်လင့်ချက်တို့ကို ရှင်သန်စေသည်။ 4ထို့အပြင် ပျက်စီးယိုယွင်းခြင်း၊ ညစ်ညူးခြင်း၊ မညှိုးနွမ်းစေတတ်သော အမွေကိုလည်း ရရှိစေတော်မူသည်။ အဖဘုရားရှင်သည် ဤအမွေအား သင်တို့အတွက် ရွှေမြို့တော်၌ ထိန်းသိမ်းထားတော်မူသည်။ 5သင်တို့သည် ဘုရားရှင်အား ယုံကြည်သည့်အတွက် နောက်ဆုံးသောကာလ၌ ဖော်ပြရန် အသင့်ရှိသော ကယ်တင်ခြင်းကို ရရှိခံစားနိုင်မည့် အချိန်တိုင်အောင် ဘုရားရှင်သည် သင်တို့အား မိမိ၏တန်ခိုးတော်ဖြင့် ကာကွယ်စောင့်ရှောက်လျက်ရှိသည်။ 6သင်တို့သည် အမျိုးမျိုးသော ဆင်းရဲဒုက္ခအပေါင်းတို့အတွက် ခဏတာမျှဝမ်းနည်းကြေကွဲရသော်လည်း ယခုပင် ဤအကြောင်းအရာများကြောင့် ဝမ်းမြောက်ပျော်ရွှင်ကြပါ။ 7ဤဆင်းရဲဒက္ခအမျိုးမျိုးကိုခံရခြင်းသည် သင်တို့၏စစ်မှန်သည့် ယုံကြည်ခြင်းကို ဖော်ပြရန်ဖြစ်သည်။ ပျက်စီးနိုင်သော ရွှေကိုပင်လျှင် မီးဖြင့်သန့်စင်၍ စစ်ဆေးရသည်။ စစ်မှန်သည့်ယုံကြည်ခြင်းသည် ထိုရွှေထက် များစွာ ပိုအဖိုးတန်သည်။ ထို့ကြောင့် သင်တို့၏ယုံကြည်ခြင်းသည် စစ်မှန်လျှင် ယေရှုခရစ်တော်ကြွလာသောအချိန်တွင် ချီးမွမ်းခြင်းခံရလျက် ဘုန်းအသရေနှင့် ဂုဏ်အသရေကို ရရှိကြလိမ့်မည်။ 8သင်တို့သည် ကိုယ်တော်အား မမြင်ဘူးသော်လည်း ချစ်ခင်မြတ်နိုးကြသည်။ ယခုအချိန်ထိ ကိုယ်တော်အား မမြင်ဖူးသော်လည်း သူ့အား ယုံကြည်ကြသည်။ ထို့အပြင် သင်တို့သည် ဖော်ပြ၍မရသော ဘုန်းအသရေနှင့် ပြည့်စုံသည့် ဝမ်းမြောက်ပျော်ရွှင်မှု ရှိကြသည်။ 9အကြောင်းမူကား ယခုအခါတွင် ကိုယ်တော်ယေရှုအား သင်တို့၏ယုံကြည်ခြင်း အကျိုးရလာဒ်အဖြစ် ကယ်တင်ခြင်းကို လက်ခံရရှိနေပြီဖြစ်သောကြောင့်ပင်ဖြစ်သည်။ 10သင်တို့ခံစားရမည့် ကျေးဇူးတော်အကြောင်းကို ကြိုတင်ဟောကြားခဲ့သော အရိယာသူတော်စင်များသည် ကယ်တင်ခြင်းအကြောင်းအား သေချာစွာ စူးစမ်းရှာဖွေခဲ့ကြသည်။ 11သူတို့သည် ခရစ်တော်၏ဉာဏ်အလင်းတော်ဆိုသည်မှာ မည်သည့်အချိန်နှင့် မည်သည့်အခြေအနေတွင် သူတို့အား ဟောပြောလာမည်ကို စူးစမ်းရှာဖွေခဲ့ကြသည်။ ကိုယ်တော်ယေရှုသည် ဒုက္ခဝေဒနာများ ခံစားရပြီးနောက် ဘုန်းတန်ခိုးတော်များ ထွန်းတောက်လာမည့်အကြောင်းအား ဉာဏ်အလင်းတော်က သူတို့အား အမိန့်တော်ထားခဲ့သောကြောင့်ဖြစ်သည်။ 12ထိုသူတို့ ဤအကြောင်းအရာများကို ဟောပြောကြသည်မှာ မိမိတို့ကိုယ်တိုင်အတွက်မဟုတ်ဘဲ သင်တို့အတွက်ဖြစ်သည်။ သင်တို့ထံသတင်းကောင်းအား ဟောပြောသောသူတို့သည် ရွှေမြို့တော်မှစေလွှတ်တော်မူခြင်းခံရသော ဉာဏ်အလင်းတော်၏တန်ခိုးတော်ဖြင့် ဤအရာများအား ပြောခြင်းဖြစ်သည်။ နတ်ဒေဝါများပင်လျှင် ဤအရာများကို သိရှိနားလည်လိုကြသည်။ 13ထို့ကြောင့် သင်တို့၏စိတ်နှလုံးသား ကို သမ္မာသတိဖြင့် ဆင်ခြင်သုံးသပ်၍ ယေရှုခရစ်တော် ကြွလာတော်မူသောအခါ သင်တို့ခံစားရမည့် ကျေးဇူးတော်ကို အပြည့်အဝစောင့်မျှော်လျက်နေကြပါ။ 14သင်တို့သည် ဘုရားရှင်၏စကားကို နားခံသောသားသမီးများဖြစ်သောကြောင့် သင်တို့မသိနားမလည်ခဲ့စဥ်က မိမိတို့၏စိတ်ဆန္ဒအလျောက်ပြုကျင့်သကဲ့သို့ ဆက်လက်၍မပြုကျင့်ကြလေနှင့်။ 15သင်တို့အား ရွေးကောက်တော်မူသော အရှင်သည် မြင့်မြတ်တော်မူသကဲ့သို့ သင်တို့သည်လည်း အရာရာအား ကျင့်ကြံပြုမူရာ၌ မြင့်မြတ်စွာ ပြုမူကြပါ။ 16အကြောင်းမူကား ကျမ်းစာတော်တွင်”ငါဘုရားသည် မြင့်မြတ်သကဲ့သို့ သင်တို့သည်လည်း မြင့်မြတ်ရမည်” ဟု ရေးသားဖော်ပြထားသောကြောင့်ဖြစ်သည်။ 17ထို့ကြောင့် တစ်ဦးချင်းစီ၏ အပြုအမူပေါ် အခြေခံ၍ သမာသမတ်ဖြင့်စီရင်တော်မူသော ထိုဘုရားရှင်အား သင်တို့သည် “အဖ”ဟုခေါ်သောကြောင့် သင်တို့သည် ဤလောက၌ ဧည့်သည်အဖြစ်နေထိုင်ရသော နေ့ရက်များတွင် ထိုအရှင်အား ကြောက်ရွံ့ရိုသေကြပါ။ 18သင်တို့၏ ဘိုးဘေးတို့ထံမှ ဆက်ခံရရှိခဲ့သော အချည်းနှီးသောဘဝမှ လွတ်မြောက်စေရန်အတွက် ရွှေ၊ ငွေဥစ္စာအစရှိသည့် ပျက်စီးတတ်သောအရာများနှင့် ရွေးနှုတ်ခြင်းမဟုတ်ကြောင်းကို သင်တို့သိကြသည်။ 19အပြစ်အနာအဆာနှင့် အစွန်းအထင်းကင်းစင်သည့် သိုးသငယ်ကိုကဲ့သို့သော ယေရှုခရစ်တော်၏ အဖိုးထိုက်တန်သော အသွေးတော်ဖြင့် သင်တို့အား ရွေးနှုတ်တော်မူခဲ့လေပြီ။ 20ဤကမ္ဘာကြီးကို မဖန်ဆင်းမီကတည်းက ဘုရားရှင်သည် ကိုယ်တော်အား ရွေးချယ်ပြီးသားဖြစ်သည်။ သို့သော် နောက်ဆုံးသောကာလရောက်သောအခါတွင် ဘုရားရှင်သည် ကိုယ်တော်အား သင်တို့ထံတွင် ထင်ရှားပေါ်ထွန်းစေတော်မူပါလိမ့်မည်။ 21ကိုယ်တော်အား သေရာမှအသက်ပြန်ရှင်စေ၍ ဘုန်းအသရေကိုပေးတော်မူသော ဘုရားရှင်ကို သင်တို့သည် ခရစ်တော်အားဖြင့် ယုံကြည်ကြသည်။ သို့ဖြစ်၍ သင်တို့သည် ဘုရားရှင်အားယုံကြည်၍ မျှော်လင့်ကြသည်။ 22သမ္မာတရားတော်ကို နာခံလိုက်လျှောက်၍ သင်တို့၏ စိတ်နှလုံးသားကို ဖြူစင်စေရန်ပြုမူကြပါ။ ထိုသို့ပြုမူစေခြင်းမှာ သင်တို့၏ညီအစ်ကိုမောင်နှမများကို စိတ်ရင်းမှန်စွာ ဖြူစင်သောစိတ်နှလုံးသားဖြင့် အကြွင်းမဲ့ ချစ်ခင်ကြလော့။ 23သင်တို့သည်အသစ်တစ်ဖန်မွေးဖွားခဲ့လေပြီ၊ သို့သော် ပျက်စီးစေတတ်သော မျိုးစေ့မှ တစ်ဖန်မွေးဖွားခြင်းမဟုတ်ဘဲ မပျက်စီးနိုင်သောမျိုးစေ့ဖြစ်သည့် ထာဝစဉ်တည်မြဲသော ဘုရားရှင်၏နှုတ်ကပတ်တော်အားဖြင့် မွေးဖွားရှင်သန်ခြင်းပင်ဖြစ်သည်။ 24ထို့ကြောင့် ကျမ်းစာ၌ “လူသားတို့သည် မြက်ပင်နှင့်တူပြီး သူတို့၏ဘုန်းကျက်သရေတို့သည်လည်း တောပန်းနှင့်တူသည်။ မြက်ပင်သည် ညှိုးနွမ်းခြောက်သွေ့ တတ်ပြီး၊ တောပန်းများသည်လည်း ကြွေကျ သွားတတ်သည်။ 25သို့သော် အရှင်၏နှုတ်ကပတ်တော်သည်ကား ထာဝရတည်တံ့ခိုင်မြဲ၏” ဟူ၍ ဖော်ပြထားသည်။ ထို နှုတ်ကပတ်တော်သည် သင်တို့ကို ကြေညာဟောပြောသော သတင်းကောင်းပင်ဖြစ်သည်။
Currently Selected:
1 Peter 1: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
