James 5
5
1ချမ်းသာသောသူတို့၊ နားထောင်ကြလော့။ သင်တို့အပေါ်တွင် ကျရောက်လာမည့် ဒုက္ခဝေဒနာများအတွက် ဝမ်းနည်းပူဆွေး၍ ငိုကြွေးကြလော့။ 2သင်တို့၏စည်းစိမ်ဥစ္စာများသည် ပျက်စီး၍၊ သင်တို့၏ဝတ်ကောင်းစားလှများသည်လည်း ပိုးကိုက်ဖြတ်စားသုံးကြလိမ့်မည်။ 3သင်တို့၏ရွှေ၊ငွေတို့သည်လည်း အကြေးအညှိတက်လျက် ပျက်စီးဆုံးရှုံးလာလိမ့်မည်။ ထိုအကြေးအညှိသည် သင်တို့အားတရားခွင်၌ စွပ်စွဲမည့် သက်သေဖြစ်ပြီး သင်တို့၏ကိုယ်ခန္ဓာအား မီးကဲ့သို့ လောင်ကျွမ်းစေလိမ့်မည်။ သင်တို့သည် နောက်ဆုံးသောနေ့ရက်များအတွက် အချည်းနှီးသောဥစ္စာဓနတို့အား စုဆောင်းနေကြလေပြီ။ 4သင်တို့၏ လယ်ကွင်း၌ရိတ်သိမ်းပေးသည့် အလုပ်သမားများအား သင်တို့သည် လုပ်ခလစာမပေးဘဲနေသောကြောင့် ထိုအလုပ်သမားများသည် အော်ဟစ်ကြလေသည်။ ထိုအလုပ်သမားတို့၏ အော်ဟစ်ငိုကြွေးသံကို အနန္တတန်ခိုးတော်အရှင်ဖြစ်တော်မူသော ဘုရားရှင်ကြားသိတော်မူသည်။ 5သင်တို့သည် လောကစည်းစိမ်များကိုခံစားလျက် ပျော်မွေ့နေကြသည်။ အသတ်ခံကြရမည့်နေ့အတွက် မိမိကိုယ်ကို ဆူဖြိုးအောင် ကျွေးမွေးကြပြီ။ 6သင်တို့သည် သင်တို့အားဆန့်ကျင်ခြင်းမရှိသော ဖြောင့်မတ်သောသူတို့အား အပြစ်ရှိသည်ဟု သတ်မှတ်၍ သတ်ကြသည်။ 7ညီအစ်ကိုမောင်နှမတို့၊ ကိုယ်တော်ယေရှုကြွလာမည့်အချိန်အား သည်းခံစိတ်ရှည်၍ စောင့်မျှော်ကြပါ။ လယ်သမားများကို ကြည့်လိုက်ပါ။ သူတို့၏ အဖိုးတန်အသီးအနှံကို ဖြစ်ထွန်းစေသော မိုးဦးနှင့်မိုးနှောင်းကို စိတ်ရှည်စွာ စောင့်မျှော်တတ်ကြသည်။ 8ကိုယ်တော်ယေရှုကြွလာမည့်အချိန် နီးကပ်လာပြီဖြစ်၍ သင်တို့လည်း သူတို့ကဲ့သို့ စိတ်ရှည်သည်းခံကြပါလော့။ သင်တို့၏စိတ်နှလုံးအား ခိုင်ခံ့မြဲမြံကြစေလော့။ 9ညီအစ်ကိုမောင်နှမတို့၊ အပြစ်စီရင်ခြင်းမခံရရန် တစ်ဦးပေါ်တစ်ဦး အပြစ်တင်၍ မညည်းတွားကြလေနှင့်။ တရားစီရင်သောအရှင်သည် တံခါးဝ၌ရပ်လျက်နေတော်မူပြီဖြစ်သည်။ 10ညီအစ်ကိုမောင်နှမတို့၊ အရှင်၏နာမတော်ဖြင့် ဟောပြောသော အရိယာသူတော်စင်တို့ကို စံနမူနာယူကြပါ။ သူတို့သည် ဆင်းရဲဒုက္ခရောက်သောအခါ စိတ်ရှည်သည်းခံခဲ့ကြသည်။ 11စိတ်ရှည်သည်းခံသောသူတို့သည် မင်္ဂလာရှိသည်ဟု ကျွန်ုပ်တို့ယူဆကြသည်။ ယောဘ၏သည်းခံခြင်းကို သင်တို့အားလုံး ကြားကြရပြီ။ အဆုံးတွင် အရှင်သည် သနားကြင်နာခြင်းနှင့် ကရုဏာအပြည့်ရှိသောကြောင့် ယောဘအား မည်သို့ကြည့်ရှုသည်ကိုလည်း သင်တို့သိကြပြီ။ 12ကျွန်ုပ်၏ညီအစ်ကိုမောင်နှမတို့၊ တိုင်တည်၍ကျိန်ဆိုခြင်းမပြုကြပါနှင့်။ ရွှေမြို့တော်ကိုဖြစ်စေ၊ မြေကြီးကိုဖြစ်စေ၊ အခြားအရာတစ်ခုခုအားဖြစ်စေ တိုင်တည်၍ မကျိန်ဆိုကြပါနှင့်။ သင်တို့စကားပြောသည့်အခါ ဟုတ်လျှင်ဟုတ်သည်၊ မဟုတ်လျှင်မဟုတ်ကြောင်း ပြောဆိုပါ။ သို့မှသာ အပြစ်စီရင်ခြင်းနှင့် ကင်းလွှတ်နိုင်မည်ဖြစ်သည်။ 13သင်တို့တွင် ဆင်းရဲဒုက္ခခံရသူရှိလျှင် ဆုတောင်းပါ။ ဝမ်းသာပျော်ရွှင်သူရှိလျှင်လည်း ချီးမွမ်းသီချင်း သီဆိုကြပါ။ 14သင်တို့တွင် နေမကျန်းဖြစ်သူရှိလျှင် အသင်းတော်ခေါင်းဆောင်ကိုခေါ်စေ။ သူတို့သည် အရှင်၏နာမတော်အား အမှီပြု၍ လူနာအား သံလွင်ဆီဖြင့်လိမ်းကာ ဆုတောင်းစေပါ။ 15ယုံကြည်ခြင်းဖြင့် ဆုတောင်းခြင်းသည် လူနာအား ကျန်းမာစေ၍ အရှင်သည် သူ့အား နာလန်ထစေတော်မူလိမ့်မည်။ ထိုသူသည် အပြစ်ဒုစရိုက်အား ကျူးလွန်ခဲ့ပါကလည်း သူ့အား ခွင့်လွှတ်ပေးတော်မူပါလိမ့်မည်။ 16ထို့ကြောင့် ကျန်းမာခွင့်ရရန် သင်တို့အချင်းချင်း မိမိတို့၏အမှားများကိုဝန်ခံ၍ တစ်ဦးကိုတစ်ဦး ဆုတောင်းကြပါလော့။ ဖြောင့်မတ်သောသူ၏ဆုတောင်းခြင်းသည် အလွန်တန်ခိုးကြီး၍ ထိရောက်မှုရှိသည်။ 17ဧလိယသည် ကျွန်ုပ်တို့ကဲ့သို့ပင် သာမာန်လူသားတစ်ယောက်ဖြစ်သော်လည်း မိုးမရွာစေရန် စိတ်အားထက်သန်စွာ ဆုတောင်းသောကြောင့် သုံးနှစ်နှင့်ခြောက်လတိုင်တိုင် မြေပေါ်၌ မိုးမရွာဘဲနေလေသည်။ 18တစ်ဖန် သူသည် ပြန်လည်၍ဆုတောင်းသောအခါ ကောင်းကင်မှ မိုးရွာချသည့်အတွက် မြေသည် အသီးအနှံများကို ဖြစ်ထွန်းစေလေသည်။ 19ကျွန်ုပ်၏ညီအစ်ကိုမောင်နှမတို့၊ သင်တို့ထဲမှ တစ်ဦးဦးက သမ္မာတရားလမ်းမှ လွဲသွားလျှင် အခြားသူတစ်ဦးမှ သူ့အား လမ်းမှန်သို့ရောက်ရှိစေရန် ပြန်လည်ခေါ်ဆောင်လာလျှင် 20ထိုသို့အပြစ်ရှိသောသူအား မှားယွင်းသောလမ်းမှ ပြန်လည်ခေါ်ဆောင်လာသောသူသည် ထိုသူ၏စိတ်ဝိဉာဥ်ကို သေခြင်းမှ ကယ်တင်၍ သူ၏များစွာသောအပြစ်တို့အား ဖုံးအုပ်ပေးမည်ဖြစ်ကြောင်း သိမှတ်ကြပါစေ။
Currently Selected:
James 5: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
