1 John 3
3
1ကျွန်ုပ်တို့သည် ဘုရားရှင်၏သားသမီးဖြစ်ခွင့်ရသည်အထိ ဘုရားရှင်သည် ကျွန်ုပ်တို့အပေါ် မေတ္တာထားတော်မူသည် ကိုဆင်ခြင်ကြလော့။ သို့ရာတွင် ယခုအချိန်ထိ ဤလောကီလူသားများသည် ဘုရားရှင်အား မရိုသေသည့်အပြင် ဘုရားမသိသူများဖြစ်သည့်အတွက် ကျွန်ုပ်တို့ကိုလည်း မည်သို့သောသူများဖြစ်ကြောင်း သူတို့မသိရှိကြချေ။ 2ချစ်ခင်ရသောမိတ်ဆွေတို့၊ ယခု ကျွန်ုပ်တို့သည် ဘုရားရှင်၏သားသမီးများဖြစ်ကြပြီး နောင်အနာဂတ်များတွင် မည်သို့မည်ကို သေချာစွာ သိခွင့်မရသေးပေ။ သို့သော် ကိုယ်တော်ယေရှုပြန်ကြွလာတော်မူသောအခါ ကိုယ်တော်အား ပကတိအတိုင်း တွေ့မြင်ကြရမည်ဖြစ် ကျွန်ုပ်တို့သည်လည်း ကိုယ်တော်နှင့်ထပ်တူဖြစ်ကြောင်းကိုလည်း သိကြ၏။ 3ထို့ကြောင့် ကိုယ်တော်ယေရှုအပေါ် ထိုကဲ့သို့မျှော်လင့်ချက်ထားရှိသောသူအပေါင်းတို့သည် ကိုယ်တော်သန့်ရှင်းဖြောင့်မှတ်တော်မူစေသည့်အတိုင်း မိမိကိုယ်မိမိ သန့်ရှင်းဖြောင့်မတ်စေကြ၏။ 4ဒုစရိုက် အပြစ်ကျူးလွန်သူတိုင်းသည် ဘုရားရှင်၏ ပညတ်တရားတော်တို့ကို ချိုးဖောက်သူပင်ဖြစ်သည်။ 5ခရစ်တော်သည် ဒုစရိုက်အပြစ်များကို ကင်းစင်ပပျောက်စေရန် ကြွလာတော်မူသည်ကို ကျွန်ုပ်တို့သိရှိ ရပေမည်။ ခရစ်တော်သည် အပြစ်တရားတို့မှကင်းစင်သူ ဖြစ်၏။ 6ထိုနည်းတူခရစ်တော်နှင့် တစ်စိတ်တစ်ဝမ်းတည်း ရှိနေသောသူသည် ဒုစရိုက်အပြစ်များကိုထပ်မံမကျူးလွန်တော့ပေ။ဒု စရိုက်အပြစ်များကိုထပ်ကာထပ်ကာကျူးလွန်သူတို့သည် ခရစ်တော်အား ဘယ်သောအခါမှ မသိမမြင်ဖူးသူများသာ၏။ 7ချစ်ခင်ရပါသောသားသမီးတို့၊ သင်တို့လိမ်လည်လှည့်ဖျားခြင်းမခံရပါစေနှင့်။ ခရစ်တော်သည် ဖြောင့်မတ်သောသူဖြစ်သကဲ့သို့ သင်တို့လည်းဖြောင့်မတ်သောသူများဖြစ်စေလော့။ 8ဒုစရိုက်အပြစ် များကိုထပ်ခါတလဲလဲ ကျူးလွန်သောသူသည် မာရ်န်နှင့်တူ၏။ မာရ်န်နတ်သည် အစဦးကတည်းကပင်ထာဝစဉ်အပြစ်များပြုခဲ့သဖြင့် ဘုရားရှင်၏သားတော်သည် ထိုအပြစ်များအား ချေမှုန်း ဖျက်ဆီးပစ်ရန်ကြွလာခြင်း၏။ 9ဘုရားရှင်၏သားသမီးတို့သည် ဒုစရိုက်အပြစ်တို့ကိုထပ်တလဲလဲမကျူးလွန်တတ်ကြပေ။ ဘုရားရှင်၏ သားသမီးတို့တွင် ဘုရားရှင်၏ မြင့်မြတ်တော်မူသောဘုရားဝိညာဉ်တော်ကို ခံယူထားကြသဖြင့် အပြစ်တရားတို့ကိုဆက်လက်မကျူးလွန်တော့ပေ။ 10ဘုရားရှင်၏သားသမီးနှင့် မာရ်န်သားသမီးတို့ကို ခွဲခြား၍သိနိုင်၏။ ပညတ်တရားတော်နှင့်အညီ မနေထိုင်သောသူသည် ဘုရားရှင်၏သားသမီးမဟုတ်နိုင်ပေ။ တစ်ဦးနှင့်တစ်ဦးမေတ္တာမရှိသောသူသည် ဘုရားရှင်၏သားသမီးများမဟုတ်ပေ။ 11“ကျွန်ုပ်တို့အချင်းချင်း ချစ်ခင်ရမည်” ဟူသော ဤပညတ်တရားသည် အစအဦးကတည်းကပင် သင်တို့ ကြားသိခဲ့ရသောအရာများဖြစ်၏။ 12မာရ်နတ်၏ဘက်တော်သားဖြစ်ပြီး မိမိ၏ညီကို သတ်သောသူဖြစ်သော ‘ကာဣန ကဲ့သို့မဖြစ်စေနှင့်။ ‘ကာဣန သည် အဘယ်ကြောင့် မိမိညီကို ကိုသတ်ခဲ့သနည်း။ အကြောင်းမှာ သူ၏အကျင့်သည် ဆိုညစ်၍ ညီဖြစ်သူ၏ အကျင့်မှာ ဖြောင့်မတ်မှန်ကန်သောကြောင့်ဖြစ်၏။ 13ထို့ကြောင့် မိတ်ဆွေတို့ လောကလူသားတို့သည် သင်တို့ကို မုန်းတီးလျှင် မအံ့ဩကြပါနှင့်။ 14ကျွန်ုပ်တို့သည် အချင်းချင်းမေတ္တာထားကြသောကြောင့် သေခြင်းတရားမှ လွှတ်မြောက်၍ ထာဝရအသက်ရှင်ခြင်းသို့ ကူးပြောင်းသည်ကို ကျွန်ုပ်တို့သိကြ၏။ မိမိ၏ ညီအစ်ကိုကို မချစ်သောသူသည် သေခြင်း၏အရိပ်အောက်မှ လွှတ်မြောက်မည်မဟုတ်။ 15တစ်ဦးအပေါ်တစ်ဦးမလိုမုန်းထားပြုနေကြပါက သင်တို့သည် လူသတ်သမားနှင့်တူပေလိမ့်မည်။ ထိုလူသတ် သမားများကဲ့သို့မေတ္တာတရားမရှိသောသူသည် ‘နိစ္စထာဝရအသက်’ကို မရရှိနိုင်ကြောင်းကို သင်တို့သိကြ၏။ 16ကျွန်ုပ်တို့အတွက် မိမိအသက်ကိုဇီဝိတဒါနအဖြစ်စွန့်လှူတော်မူခဲ့သော ခရစ်တော်၏ မေတ္တာတရားကို သိကြရမည်။ ထို့ကြောင့် ကျွန်ုပ်တို့ယုံကြည်သူအချင်းချင်းသည်လည်း တစ်ဦးအပေါ်တစ်ဦး မိမိတို့၏အသက်ကိုပင် ပဓါနမထားဘဲပေးဆပ် အနစ်နာခံကြရမည်ဖြစ်၏။ 17ဤလောကတွင်ကျွန်ုပ်တို့အတွက်လိုအပ် သည့်အရာများပြားလှ၏။ယုံကြည်သူအချင်းချင်း အကူအညီတောင်းခံလာပါက သနားဂရုဏာထား၍တတ်စွမ်းသရွေ့ကူညီပေးရမည်။ ထိုကဲ့သို့ သနားဂရုဏာစိတ်မရှိ သောသူသည် ဘုရားရှင်ကို မြတ်နိုးကိုး ကွယ်သူဟုပြော၍ မရနိုင်ပေ။ 18ချစ်ခင်ရသော သားသမီးတို့၊ ကျွန်ုပ်တို့သည် နုတ်ဖြင့်သာ ချစ်နေကြသည်မဟုတ်ဘဲ လက်တွေ့ ချစ်ခြင်းမေတ္တာတရားထားကြပါစို့။ 19ဤနည်းဖြင့် ကျွန်ုပ်တို့သည် တစ်ဦးအပေါ်တစ်ဦးမေတ္တာထား၍ ယေရှုခရစ်တော်၏နှုတ်ကပတ်တော်တရားများအတိုင်း နေထိုင်ကြလျှင် ဘုရားရှင်၏ရှေ့တော်မှောက်တွင် ယုံကြည်စိတ်ချမှုရှိကြမည်ဖြစ်၏။ 20သို့ဖြစ်၍ ကျွန်ုပ်တို့အပြစ်ရှိသည်ဟု ခံစားရလျှင် ဘုရားရှင်သည် ကျွန်ုပ်တို့၏ခံစားမှုထက် ကြီးမြတ်တော်မူသောကြောင့် အရာအားလုံးကို သိမြင်တော်မူ၏။ 21ချစ်လှစွာသောမိတ်ဆွေတို့၊ ကျွန်ုပ်တို့သည် “အပြစ်ရှိသည်” ဟုမခံစားရလျှင် ကျွန်ုပ်တို့သည် ဘုရားရှင်၏ရှေ့တော်မောက်သို့ စိတ်ချယုံကြည်မှုအပြည့်ဖြင့် လျှောက်လှမ်းနိုင်ကြမည်ဖြစ်၏။ 22ကျွန်ုပ်တို့သည် ဘုရားရှင်၏ပညတ်တော်များအတိုင်းလိုက်နာ၍ ဘုရာရှင်နှစ်သက်တော်မူသောအရာကို လုပ်ဆောင်ကြသောကြောင့် မိမိ၏တောင်းလျှောက်သမျှတို့သည်လည်း ဘုရားရှင်ဖြည့်စည်းပေးတော်မူလိမ့်မည်။ 23တစ်ဦးအပေါ်တစ်ဦးမေတ္တာတရားထားရှိခြင်း၊ ဘုရားရှင်၏ သားတော် ယေရှုခရစ်တော်အား ယုံကြည်ခြင်းတို့သည် အဖဘုရား၏ပညတ်တော်များပင်ဖြစ်သည်။ ဘုရားရှင် ပညတ်ထားတော်မူသည်မှာ သားတော်ဖြစ်သော ယေရှုခရစ်တော်၏ အမည်နာမတော်ကို ယုံကြည်၍ ကျွန်ုပ်တို့ကို ပညတ်ထားတော်မူသည့်အတိုင်း အချင်းချင်း ချစ်ခြင်းမေတ္တာထားကြရန်ဖြစ်၏။ 24ဘုရားရှင်၏ ပညတ်တရားတော်တို့ကို လိုက်နာသောသူတို့သည် ကိုယ်တော်ယေရှုနှင့် တစ်ပေါင်းတစ်စည်းတည်းဖြစ်၍ ကိုယ်တော်သည်လည်း ထိုသူတို့နှင့် တစ်ပေါင်းတစ်စည်းတည်ဖြစ်လိမ့်မည်။ ဘုရားရှင်သည် ကျွန်ုပ်တို့နှင့် တပေါင်းတစည်းတည်းဖြစ်တော်မူသောကြောင့် ကျွန်ုပ်တို့အတွက် ပေးအပ်တော်မူသော ဉာဏ်အလင်းတော်အားဖြင့် ကျွန်ုပ်တို့သိကြ၏။
Currently Selected:
1 John 3: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
