Aba Filipi 4

Ukubalayizya

1Polelo bakamu bane, imbaghanite, sona nkubasamba nkani. Amwe mwe buhobosu bwane, sona ni mpumpu yane yiyo nkwituvikizyamo. Po baghaniwa bane, mwimaye nkani mwa Mwene.

2Nkukulaba awe Yudiya nu Sintike ukuti muyezye pakwivwana pakuti mwe bakamu mwa Mwene. 3Eee, nkukulaba nawe bulo, we mubombi wamwitu umusubiliwa, ukuti ubavwe abakolo aba, pakuti bakabomba nkani poka nane pakufumusya Amazyu Amiza, poka nu Kelementi, sona na babombi abamwitu bosi, babo amatabwa ghabo ghasimbiwe mwibuku ilya bumi.

4Muhobokaye mwa Mwene utubalilo tosi. Nkupyanizya sona ukuti, “Muhobokaye!”

5Akabalilo kosi mubanje bololo na bantu bosi. U Mwene ali pamulyango. 6Mutakapasyanje nizya chintu chimo, loli munyiputo zyinyu zyosi, mumulabe u Chala ivyakusobelwa vyinyu nu moyo uwakupalizya. 7Po umutende uwakufuma kwa Chala ghugho ghuchilite akivwisizye kosi aka muntu ghukwiza pakusunga akiza amoyo ghinyu, sona ni nyinong'ono zyinyu pakumamatilana poka nu Kilisitu u Yesu.

8Mwee bakamu bane, pabumalilo nkubabuzya ukuti mubikayepo umoyo pavintu vyosi vivyo vyiza nkani, sona ni vichindamu ivi: Ivyanaloli, ni vichindamu, ni vigholosu, ni vizelu, ni vighaniwa, sona ni vyamuchizi. 9Bombezya imbombo vyosi vivyo mwamanyila pamo ukupokela, pamo ukwivwa kukwane, pamo vivyo mwavyennya mumwane. Po u Chala umwenecho uwa mutende akwiza pakuba namwe.

U Pabuli akubapalizya pachifukwa icha vyabupi vyabo

10Nahoboka nkani mubumi bwane ubwakumamatilana poka nu Mwene ukuti pabumalilo mwandapo sona pakulanjizya ukuti mukunkumbuka. Intakung'anamula ukuti mukaleka pakunkumbuka, awe, loli mutakabanga bulo na kabalilo akakulanjizizya. 11Intakunena bunubu pachifukwa ichakuti nasobelwa, awe, pakuti namanyila ukwikutisiwa ni vintu vivyo indi navyo. 12Pakuba mupina nkumenye, sona pakuba mukabi kope bulo nkumenye. Pakuti namanyila ubusyefu ubwakwikutisiwa na vivyo indi navyo, manyi pakuba ni vyakulya ivyinji, manyi pakuba nizala, manyi indi navyo ivyinji, manyi nkusobelwa. 13Ningabomba ichintu chosi ukwendela mumwache yuyo akumpa amaka.

14Loli chikaba chiza nkani ukuti amwe mugabane nane muntamyo zyane. 15#2 Kol. 11.9Amwe mwe ba Filipi mwenemwe muzimenye akiza nkani ukuti bo nafuma ku Makedoniya mumasiku aghakwanda aghakulumbilila Amazyu Amiza, chitakabako ichipanga nachimochimo chicho chikanyavwa pafundo iya ndalama, loli mwenemwe bulo. 16#Imbo. 17.1Bo indi mu Tesalonika, mukantumilagha ubwavwilizi pipipipi, pakunyavwa muvyakusobelwa vyane. 17Kute kokuti nkubika umoyo wane pavyabupi vyinyu vivyo mukampa, awe. Loli chicho nkulonda chakuti mupokele ulusayo pachifukwa icha chisa chinyu. 18#Ukf. 29.18Naloli napokela vyosi, sona indi navyo ivyinji. Ilelo indi navyo vyosi ivyakusobelwa, pakuti u Epafulodito ampiye vivyo mukantumila. Viyanite bulo ni chakwiyipa ichamunusi umwiza, ghugho ghukumuhobosya nkani u Chala. 19U Chala wane akwiza pakubapa ivyakusobelwa vyinyu vyosi ukuyana nu bukabi bwache ubwabuchindamu mwa Kilisitu Yesu. 20Ubuchindamu bubanje kwa Chala u Tata bwila na bwila! Ameni.

Ukulamuka ukwabumalilo

21Mubalamuke abantu bosi abazelu aba Chala mwa Kilisitu u Yesu. Abakamu babo bali poka nane kuno bakubalamuka. 22Abantu bosi abazelu aba Chala kuno, nkaninkani abamunyumba iya Kesale bakubalamuka. 23Ichisa icha Mwene u Yesu Kilisitu chibanje namwe mwebosi bwila na bwila.

Currently Selected:

Aba Filipi 4: LMB2024

Highlight

Copy