1 Aba Kolinti 11

1 # 1 Kol. 4.16; Efe. 3.17 Munyeghelelaye ane ngati mumo nane nkumweghelela u Kilisitu.

Nizya kuvwala kumutu pakwiputa

2Nkubapala amwe pakuti mukunkumbuka muvintu vyosi, sona mukukonka ivimanyisyo vivyo nkabalekela. 3Loli nkulonda mumanye ukuti u Kilisitu we mutu uwa mwanavuli wesi, umwanavuli wepe we mutu uwa mukolo, sona u Chala wepe we mutu uwa Kilisitu. 4Umwanavuli wesi yuyo akuvwala chimo kumutu wache, bo akwiputa pamo bo akulaghula, akumusamula u Kilisitu, yuyo mutu wache. 5Loli nanti umukolo akwiputa pamo akulaghula ukusita ukuvwala chimo kumutu wache, akumusamula umulume, yuyo mutu wache, pakuti ichi chiyanite bulo nu mukolo yuyo amwiye ulupala. 6Pakuti nanti umukolo atakuvwala chimo kumutu wache, chizapo ukuti amwanje isisi zyache, sona nanti umukolo ali ni soni pakumwa isisi zyache, pamo pakumwa ulupala, po avwalaye chimo kumutu wache. 7#1.26-27Umwanavuli atakavwalaye chimo kumutu wache, pakuti we chifwani icha Chala, sona akulanjizya ubuchindamu ubwa Chala. Loli umukolo bo buchindamu ubwa mwanavuli, 8#Ubw. 2.18-23pakuti umwanavuli atakapeliwa ku mukolo, loli umukolo weyuyo akapeliwa ku mwanavuli. 9Sona umwanavuli atakapeliwa pachifukwa icha mukolo, loli umukolo weyuyo akapeliwa pachifukwa icha mwanavuli. 10Polelo umukolo avwalaye chimo kumutu wache pachifukwa icha bantumi pakulanjizya ukuti ali pasi pabulaghili ubwa mulume wache. 11Loli mumbatiko izya Mwene, abakolo batangikala bene ukusita banavuli, umwakuyana bulo, bope abanavuli batangikala bene abasita bakolo. 12Pakuti umukolo akafuma ku mwanavuli, momumo wepe umwanavuli akapapiwa mu mukolo. Loli ivintu vyosi vikufuma kwa Chala.

13Mulonge mwebene: Nkimba zibaghiye pakuti umukolo amwiputaye u Chala, bo atavwalite chimo kumutu wache? 14Mukikalile kitu aka isiku ni siku, nkimba chitakukozya isoni ukuti umwanavuli alimbike isisi? 15Nkimba tutakumanyila ukuti nanti umukolo alimbikite isisi intali, kukwache gho muchizi? Pakuti apeghiwe isisi intali ukuti chibanje chakuvwala kumutu wache. 16Loli nanti yumo akulonda pakususya chinichi, ane nkubabuzya ukuti aswe pamo ivipanga ivya Chala tute nu lwiho nalumolumo ulunji mumwitu.

Ichakulya icha Mwene

(Mat. 26.26-29; Mlko. 14.22-25; Luk. 22.14-20)

17Pali ifundo yimo yiyo intakulonda pakubapala nayo pakuti inkomano zyinyu zikupapa ububibi ukuchila u bwiza. 18Ichintu ichakwanda chakuti, nkwivwa ukuti, bo mukukomana poka muchipanga, muli ukugabinkana pakasi papinyu, umwakuti nkusubila ukuti muli ubwanaloli bumo. 19Pakuti pabaghiye pabepo ukugabinkana pakasi papinyu, umwakuti babo banaloli baboneke pabuzelu. 20Bo mukukomana poka, chite chakulya icha Mwene chicho mukulya. 21Pakuti bo mukulya, umuntu wesi akuchimbilila pakulya ichakulya chache, umwakuti bamo bali nizala, kuno abanji bakolizwe nkani. 22Nkimba mute ni nyumba izyakuti mungalyelamo nukung'welelamo? Pamo nkimba mukulonda ukuchisamula ichipanga icha Chala nukubakozya isoni abantu babo bakusobelwa? Fwandi, mukulonda ukuti imbabuzye choni? Nkimba imbapale amwe pazinizi? Awe, napo panandi.

23Pakuti u Mwene akampa ichimanyisyo chicho nane nkabamanyisya amwe ichakuti: U Mwene u Yesu, ubusiku bubo akabikiwa munyobe izya balwani, akasenda ichabama. 24Akamupalizya u Chala, po akachimenyannya nukuti, “Ughu gho mubili wane, ghugho wapeghiwa pachifukwa icha mwemwe. Mubombaye ichi ukuti munkumbukilayepo.” 25#Ukf. 24.6-8; Yel. 31.31-34Umwakuyana bulo, bo bamala pakulya, akasenda ulubako nukuti, “Ulubako ulu lo lufingo ulupya ulwa Chala mwibanda lyane. Mubombaye bunubu akabalilo kosi kako mukung'wela ukuti munkumbukilayepo.”

26Pakuti akabalilo kosi kako mukulya ichibama ichi, sona nukung'wela ulubako ulu, po mukufumusya ubufwe ubwa Mwene mupaka ukwiza kwache. 27Polelo umuntu wesi yuyo akulya ichabama pamo ukung'wela ulubako ulwa Mwene mubusita pakubaghila, akwiza pakuba ninongwa iyakughunangila umubili uwa Mwene ni banda lyache. 28Umuntu ipime tasi mwene, bo ataliye ichibama nukung'wela ulubako. 29Pakuti nanti umuntu akulya ichibama nukung'wela ulubako ukusita kumanya iching'anamulo icha mubili uwa Mwene, akwisendela bulo mwene ubulongi bo akulya nukung'wela. 30Ichi cho chifukwa abinji mumwinyu badedebazu, sona babine, sona abinji bafuye kale. 31Loli nanti tukipimagha twebene umwakufikapo ngali tutakulongiwa. 32Loli pope bo u Mwene akutulonga nukutufunda, akutumanyisya amahala, umwakuti tutakasusyiwe poka na bantu aba muchisu ichapasi.

33Polelo bakamu bane, bo mukukomana poka pakulya ichakulya icha Mwene, mulindililanaye. 34Nanti yumo ali nizala, alyanje kunyumba, umwakuti mutakalongiwe nu Chala, bo mukukomana poka. Ivintu ivyinji vivyo visyalite, vyo nkwiza pakubalingannya bo niza.

Currently Selected:

1 Aba Kolinti 11: LMB2024

Highlight

Copy