1 Aba Kolinti 12

Ivyabupi ivya Muzimu Umuzelu

1Mwee bakamu bane, ilelo nkulonda ukuti mumanye akiza nizya vyabupi ivya Muzimu Umuzelu. 2Muzimenye ukuti, bo muchili mwe bantu abakuzi, bakabasobezya ukuti mwiputaye ivifwani vivyo vitakunena. 3Polelo nkulonda ukuti muzimanye ukuti umuntu yuyo akulongoziwa nu Muzimu uwa Chala atanganena ukuti, “U Yesu aghuniwanje.” Sona umuntu yuyo atakulongoziwa nu Muzimu Umuzelu atanganena ukuti, “U Yesu we Mwene.”

4 # Lom. 12.6-8 Vilipo ivyabupi ivyakulekanalekana, loli u Muzimu Umuzelu ali weka mpela. 5Bulipo ububombeli ubwakulekanalekana, loli u Mwene ali weka mpela. 6Ghalipo amaka aghakulekanalekana aghakubombela imbombo, loli u Chala alipo weka mpela, yuyo akumupa umuntu wesi amaka aghakubombela imbombo. 7U Muzimu Umuzelu akumupa umuntu wesi ichabupi, umwakuti chibavwanje abantu bosi. 8U Muzimu Umuzelu akumupa umuntu yumo ichabupi ichakunenela amazyu aghamahala, po uyunji akumupa ichabupi icha mazyu agha bumanyi, 9nu Muzimu weka mpela akumupa ichabupi icha lwitiko, po uyunji akumupa amaka aghakupozezya ububine ubwakulekanalekana, 10yumo akumupa amaka aghakupelela ivyika, po uyunji ichabupi icha bulaghuzi. Umuntu yumo akumupa ichabupi ichakupaghulannya imizimu, uyunji akumupa ichabupi ichakunenela mundimi injeni, sona uyunji akumupa ichabupi ichakusanusya indimi injeni. 11Loli zyosi zinizi akuzibomba we Muzimu Umuzelu weka mpela, yuyo akumupa umuntu wesi ukuyana nu bwighane bwache.

Umubili ghoka, loli ivigaba vyinji

12 # Lom. 12.4-5 Pakuti ukuyana namumo umubili ghubeleye ghoka, sona ghuli ni vigaba ivyinji, po ivigaba vyosi vya mubili ghoka, napapo vyinji, vili mubili ghoka, po momumo zibeleye nu Kilisitu. 13Pakuti aswe twebosi, manyi mu Yuda, pamo umuntu yuyo ate mu Yuda, manyi muzya, manyi musatuke, tukoziwa mu Muzimu Umuzelu weka ukuti tubanje mubili ghoka, sona twebosi tupeghiwe u Muzimu weka ukuti tung'wele.

14Pakuti umubili ghute chigaba choka, awe, loli ghuli ni vigaba ivyinji. 15Nanti ichinama chikuti, “Pakuti ane inte ne nyobe, ane inte ne chigaba icha mubili,” ichi chitangaba chifukwa icha kukanizizya pakuba chigaba icha mubili, awe. 16Sona nanti ikutu likuti, “Pakuti ane inte ne lyiso, ane inte ne chigaba icha mubili,” ichi chitangaba chifukwa ichakukanizizya pakuba chigaba icha mubili, awe. 17Nanti umubili ghosi ghukabanga lyiso, nkimba po ngali ghukwivwa bulibuli? Sona nanti umubili ghosi ghukabanga likutu, nkimba po ngali ghukunusya bulibuli? 18Loli ukuyana namumo zibeleye, u Chala akabika ichigaba chosi ichakulekanalekana mu mubili ukuyana namumo akalondela ukuti zibelaye. 19Nanti umubili ghosi ghukabanga chigaba choka, ngali kute umubili. 20Ukuyana namumo zibeleye, ivigaba vilipo ivyinji, loli umubili ghuli ghoka.

21Ilyiso litangayibuzya inyobe ukuti, “Intakukulonda.” Sona umutu ghutangavibuzya ivinama ukuti, “Intakukulonda.” 22Awe, mute momumo, loli ivigaba vivyo vikuboneka pakuba videdebazu nkani, vyo vivyo vikulondiwa nkani, 23sona ivigaba vivyo tukwinong'ona ukuti vite ni mbombo nkani, vyo vivyo tukubikapo umuchizi nkani. Po ivigaba ivya mubili vivyo vitakuboneka akiza vikupeghiwa umuchizi uwapamwanya nkani. 24Loli ivigaba ivya mubili vivyo vikuboneka akiza nkani vitakulonda pakupeghiwa umuchizi, awe. U Chala akavipatinkannya ivigaba ivya mubili ukuti ivigaba vivyo vitakuchindikiwa, vipokele umuchizi umukulu nkani. 25Sona nukuti patakabeko ukugabinkana mumubili, loli ukuti ivigaba vyosi vipazikizannyanje. 26Nanti ichigaba choka chikwivwa ukubaba, ivigaba vyosi vikwivwila poka ukubaba nacho. Nanti ichigaba choka chikuchindikiwa, ivigaba vyosi vikuhobokela poka nacho.

27Ilelo amwe mwebosi mwe mubili uwa Kilisitu, sona wesi uwa amwe, we chigaba icha mubili ghulaghula. 28#Efe. 4.11Muchipanga ichakwanda u Chala akasala abatumiwa, ichabubili abalaghuzi, ichabutatu abamanyisi, pisinda pache babo bakupela ivyika, sona babo bali ni chabupi ichakupozezya ububine, pamo babo bali ni chabupi ichakubavwa abanji, pamo babo bali ni chabupi icha bulongozi, pamo babo bali ni chabupi ichakunenela mundimi injeni. 29Nkimba bosi bo batumiwa? Fwandi, bosi bo balaghuzi? Nkimba bosi bo bamanyisi? Fwandi, bosi bali na maka aghakupelela ivyika? 30Nkimba bosi bali ni chabupi ichakupozezya ububine? Fwandi, bosi bali ni chabupi ichakunenela mundimi injeni? Nkimba bosi bali ni chabupi ichakusanusya indimi injeni? 31Loli bikapo umoyo winyu pa vyabupi ivyapamwanya nkani.

Polelo nkwiza pakubalanjizya ichintu ichizapo nkani.

Currently Selected:

1 Aba Kolinti 12: LMB2024

Highlight

Copy