Rōm 9
9
Israel-in Khristā ei Hengna
1 #
Sām 15:2; 2Ko 11:10; Gal 1:20; 1Ti 2:7 Khristā-na om kei ni sika hin chongtak kei ril, milak ril mak ung. Ka takchunga sia le sa riatna āom len um ni sela Rathā Ānthiang le han koi anā riatpui a ni zei. 2Ka sūngrīla hin achālaka lunghāngna le bāng theilui lungnāna kei tiar a ni. 3#Ant 32:32; Kui 22:5; 1Ko 12:3Asik chu ka ūnāi ngāi, taksa tianga ka phung ngāi rathūla Khristā kōm ātā ansena khomāk atung rang khop peia kei zōt a ni zei. 4#Aph 17:2; Ant 4:22; Dān 7:6; Kui 3:25; Gal 3:16; Heb 9:5Amāni ngāi ha Israel mī a ni u na, Pathian nāi changna ranga ningneina ādōn, anlianna, Pathian le dān ankhitna thar, dān ngāi, biak-ina Pathian dorbōndom lē chongtin ngāi dōra ha amāni ta kiar a ni. 5#Mt 1:1-16; Kol 2:9Na chipui ngāi dōra amāni tisuon a ni u na, hanūk chu amāni chi nātā a hong ānzir Khristā'm ātā u a ni. Ama ha alompei chunga Pathian a ni. Tāituon tāituona ama chu anpāka om rase. Amen.
Israel-in ei Hengna lē Pathian Derdīn
6 #
Gal 6:16
Pathian chong chu akorong kēng a ni zei tīna ni mak. Asik chu Israel chi nātā mī senkhat anzir ngāi hi Israel mi tatak ni kiar mak. 7#Heb 11:18Havan tin dēn han, Abraham a chī ei ni duoi sika han aloma ama a nāi tatak kiar ni u mak. Tenchu, “Isak ātā kēng nang na chī ei lā'n ti rang,” (Aph 21:12) tī ha a ni. 8#Gal 3:16Hava ti omzia chu, taksa balama anzir ngāi ha Pathian nāi ni u mak, tenchu chongtin ātā anzir nāi ngāi rong kēng Pathian nāi a tī na ei āntel rang. 9#Aph 18:10, 14Asik chu hiva hi chongtinna chongkam, “Nakum hiva hun dēna hong kīr rēt ka ting, hatuka Sara'n nāipasal khat nei in ti,” (Aph 18:10, 14) tī hi a ni. 10#Aph 25:21Hava duoi la ni mak, tenchu Rebeka hā'm ni sela pasal khat koini na chipui Isak le han nāi anphīr a vong a. 11Asik chu hava nāitete ngāi a la hong ānzir u mān ātā hanūk chu āsia le asa ītē a la thō u mān ātā Pathianin Rebeka kōma chong a ril a. Hava ha ama a sinthō sika ni mak, tenchu āpāipū malung zōt ang taka, Pathianin ei thangna a derdīn chu ei dettit ranga kēng. 12Rebeka kōma, “Ulianin nāipang dorbō chu ādom in ti,” (Aph 25:23) antī na. 13Lekhabū anthianga anziak anga, “Zakob chu kei madit a ni, tenchu Esau chu ka mūmāk a,” (Mal 1:2-3) ti chong ha a ni.
Israel ei Hengna lē Pathian Ruirilnadik
14Hanle hong zāt mo koinī'n nei ti rang a ni zei? Pathian chu dik mak mo nei ti rang a ni zei? Ni pial mak. 15Asik chu Pathianin Mōsi kōma, “Lungkham kei mū zōt pū chu lungkham mu ka ting, riangvāi kei mū zōt pū chu riangvāi mu ka ting,” (Ant 33:19) a tī na. 16#Efe 2:8; Tit 3:5Hasikhan mī'n ei zōt sika mo ei pūt sika mo ni thei mak tenchu lungkham anā mūpū Pathian takchunga zita kēng. 17#Sām 76:10Asik chu Pathian lekhabū'n Faro kōma, “Nang amanga hin kei rātna ngāi kei manlang theina rang lē phil pumpuia ka raming ei ānpuong theina rang sika hin dingmun ansānga kei na siak a ni,” (Ant 9:16) a tī na. 18#Ant 4:21; Dān 2:30; Zos 11:20Hava sik han amā'n ei zōt takpei chunga lungkham a mū na, hanūk chu ei zōt takpei chunga malung a mankhirpē na.
19 #
2Sa 16:10; 2Kh 20:6; Dnl 4:35; 1Ko 15:35; Zak 2:18 Hava taka han nangin nei na ti rang chu, hanle ichanga mo āsia ei na la sūr chian? Asik chu tū mo Pathian ei zōtdān aduia ātuor tor thei ranga āom? 20#Zōb 1:22; Isa 64:8; Zer 18:6O miring, nang tū mo nā ni Pathian chong ansang thei rang? “Ansin neinunin āsinpū kōma han ichang mo hivan tin hin nei na sin, a ti mo thei ngāi?” (Isa 29:16; 45:9) 21#2Ti 2:20Hanūk rēt chu bēl abuokpū'n philpok takchunga ningneina dōn mak mo? Asik chu bephil khat ātā arēng uol zāt khēng le arēng nōk uol zāt khēng hi ei sin thei ni mak mo? 22#Chn 16:4Pathianin a taksitna a manlang zōta hanūk chu mi ngāi kōma ei rātna a manriat zōt a. Hanum ni sela, Pathian a taksitna āchang ranga ānruotsa ngāi chunga achālaka dūk a diar a. 23Asik chu Pathianin ama ei ānlianna anchong chu a lungkham mu bēl ngāi chunga ei manriat theina rang a ni. Tiana han Pathianin hava bēl ngāi ha anlianna ranga ei ruotsā a ni. 24Hava ha koini ngāi hi nā ni zei. Hava ngāi ha Zehudi nam rong ātā ni mak ei kui tenchu namtei ngāi kārā'm ei kui a ni. 25#1Pe 2:10Deari Hosea'n ei tī anga,
“Ka mi ni lui ngāi chu, ‘ka mi,’ ti u ka tinga.
Hanūk chu kei madit nōknū chu, ‘kei maditnū,’ ti ka ting,” (Hos 2:23) a tī na.
26 #
Mt 16:16
“Hintin hin nī'n tia, ‘Nangni chu ka mi ni u mak chē,’ ei tina muna,
Hava muna han amāni chu, ‘Pathian adam nāi,’ anti u'n ti.” (Hos 1:10)
27 #
Aph 22:17; 2Rē 19:4; Zer 44:14; Hos 1:10; Zol 2:32 Deari Isaia'n Israel ruia hiva chong anringpāna ei ti, “Israel nāi ngāi chu tipui siatsāi anga ātam ngal ni sela, amaniang ngāi rong kēng sandama ā om u rang. 28Asik chu Pumā'n leilung chunga a sin chu dikna le han anrap sabaka hong kīm in ti.” (Isa 10:22-23) 29#Aph 19:24-29; Isa 13:19; Zer 50:40Isaia'n aphāmān ātā a lei ril anga,
“Āthōtheikiarpū Pumā'n chī na mākpē nō sela chu,
Koini chu Sodom anga ni zei ma ni ba,
Koini chu Gomora anga ni zei ma ni ba.” (Isa 1:9)
30 #
Gal 2:16; Fil 3:9; Heb 11:7 Hong ti u ma ni? Dikna zī lui namtei ngāiin dikna a man suo u zei a, hava ha iamna sika dikna a ni. 31#Dān 6:25; Isa 51:1; Gal 5:4Tenchu Israel ngāi dikna ranga dān a zī u nā'm ni sela hava dikna dān ten ngal va suok thei u lāi mak. 32#1Pe 2:8Imo asik? Asik chu amānī'n iamna le niluia, tenchu sinthō le kēng ei thūn u. Amāni chu anbāna lunga han anbā u na. 33#1Pe 2:6, 8A lei ānziak anga,
“Entā, Zion-a anpalna lung lē anbāna lungpui chu ka siak zei.
Ama āiam tak chu muolphui ansak nō ni.” (Isa 8:14; 28:16)
Bible in Ranglong, © Bibles International, the Bible society of Baptist Mid-Missions, 2024.