Rōm 8
8
Ratha Zāra Damna
1Hasikhan atun chu Khristā Isuona āom ngāi dōra chu āsia anlōna om lāi mak. Taksa dān anga ni luia, ratha dān anga āom ngāi ranga chu. 2#Zn 8:32, 36; 1Ko 15:45Asik chu Khristā Isuona āom damna Ratha dān le han koi chu āsia thōna le thīna dān ātā ei na mazōk kēng kā ni zei. 3#Gal 5:24; Fil 2:7; Heb 2:14, 17; 7:18Taksā chu ei rāt nōk sika dānin ei thō thei nōk ha Pathianin ei hong thō a ni. Ama a Nāipasal ngēt ha masialabui taksa mēl anputa, āsia thō sika anbōlna rang anga ei hong tīra hin āthī thei taksā le han āsia thōna chu ei hong ratan a ni. 4#Gal 5:16Asik chu koini ngāi nunchanga Pathian lampanga dān ngāi dōra ei kip theina ranga lē koini na taksā ei zōt anga ni mak, tenchu Rathā ei zōt anga kal nei chōi theina ranga ei hong tīr a ni. 5#Gal 5:19-21, 25Asik chu taksa zōtdāna āom ngāi chu taksa ruia kēng malung ei pēk u. Tenchu Rathā zōtdāna āom ngāi chu Ratha ruia kēng malung ei pēk u. 6#Gal 6:8Asik chu taksa mandon chu thīna a ni, tenchu ratha mandon chu damna lē phūkdāina a ni. 7#Zak 4:4Asik chu taksa mandon chu Pathian le rālduina a ni. Hava chu Pathian dān thuoia om mak a, om um thei mak. 8#Gal 5:24Hanūk chu taksa zōtdāna āom ngāi chu Pathian rāi mansān thei u mak.
9 #
Zn 14:17; Kui 16:7; 1Ko 6:19; Gal 5:24; 2Ti 1:14; 1Zn 4:13 Tenchu Pathian Rathā chu nangni sūngrīla ei hong om sika han taksa mi ni u lāi mak chē na, Ratha zōtdāna om kēng nā ni u zei. Tenchu tūkareng Khristā Rathā dōnlui tak chu ama tā ni mak. 10#Ant 29:45; Zn 14:20, 23; 2Ko 13:5; Gal 2:20; Efe 3:17; Kol 1:27; Anl 3:20Tenchu Khristā chu nangni sūngrīla āom ei ni sika han āsia thō sika na taksā u chu athi suo kēng a ni zei. Hanum ni sela, Rathā chu ādik ei ānlō sika han damna ei dōn a ni. 11#Kui 2:24Pathianin āthi ngāi bil ātā Isuo chu ei hong mathui a ni. Hatuka hava Pathian Rathā ha nangni ngāi sūngrīla āom a ni. Hasikhan āthi ngāi bil ātā Khristā a hong ānthuirēt pū Rathā ha nangni ngāi kōma a om ten hava Ratha zāra athi thei na taksā u ha athara hong dam rēt in ti.
Ratha Zāra Nāi Changna
12 #
Gal 5:24
Hava sika han ūnāi ngāi, āntāng kēng nā ni, tenchu taksa zōtdāna āom ranga taksa kōma āntāng ni mak mē. 13#Gal 6:8Asik chu taksa zōtdāna nei om u sika han nei thi ngēt u rang a ni. Tenchu taksa sinthō ngāi dōra aloma Ratha zāra nei that zit u sika han dam u'n na ti. 14#Mt 5:9; Gal 3:26; Anl 21:7Asik chu Pathian Rathā le anruoi ngāi dōra chu Pathian nāi a ni u na. 15#Mk 14:36; Gal 4:5-6; 2Ti 1:7Asik chu nangnī'n anchi rētna ranga suok changna rathā ni mak nei man u, tenchu a nāi manchangna Rathā kēng nei man u. Hava Rathā ngēt le han koinī'n “Abba, Pā” a tī na nei pāi a ni. 16#Zn 1:12; Efe 1:13Rathā lenin koini ngāi rathā le han Pathian nāi nei chang tī hi ei na manriat a ni. 17#Kui 20:32; 2Ko 1:5; Gal 3:29; Efe 3:6; 2Ti 2:12; Tit 3:7; 1Pe 4:13Hasikhan atun chu nāi nei ni sika han dōng āluopū nā ni zei. Hatuka Pathian ātā dōng āluopui nei ni sika hin Khristā bila dōng āluopū nā ni zei. Havan tin han ama bila antak nei tiarpui sika han ama bila anliannā'm chang in ti.
Antakna nāta Anlianna
18 #
2Ko 4:17; 1Pe 4:13 Atun hunlāi taka antakna koinī'n nei tiar hi chu nangkana anlianna koini na ranga alā hong anlang rang le chu ankhīruo ngal ni mak. 19Ānsin ngāiin Pathian nāi ngāi ei hong anlang u rang chu phām taka a lei ngāk u. 20#Aph 3:17-19Asik chu ansin ngāi dōra hi anzuia ei la om u nōkna ranga amā'n ei siak kiar a ni. Hava ansin ngāi ha amāni ei zōt ang taka ni mak tenchu ama ei zōt ang taka āsinpū hān ei man-om a ni. 21#Kui 3:21; 2Pe 3:13; Anl 21:1Tenchu ansin ngāi ngēt um ni sela Pathianin āsiat thei suok ātā azōka, Pathian nāi ngāi ranga anlianna zōknāna ālūt ranga ei mangang chian a ni. 22#Zer 12:4Asik chu ānsin ngāi pumpui chu ankūia lē nāihā nā anga atun ten anruola ei la tiar u tī hi nei riat a ni. 23#2Ko 5:5; Gal 5:5Hava duoi ha ni mak, tenchu koini Ratha marā mānsa āman ngāi um ni sela na sūngrīl tianga nei ānkūi a ni. Hatuka koinī'n a nāi changna rang le na taksā ratanna chu nei ngāk chian a ni. 24#1Th 5:8; Tit 3:7Asik chu ansabei sika hin sandamna nei man a ni. Tenchu mita mu thei ansabei chu sabei ni thei mak. Asik chu mita ei mu thei chu ichanga mo nei la sabei chian rang a lā ni? 25#Sām 37:7Tenchu mita nei mū thei nōk na sabei ten a diar chunga nei ngāk chian rang a ni.
26 #
Efe 6:18
Havan tin han, koini ngāi nei rātnōknāna Rathā'n um ei na hong san chachak a ni. Asik chu zār nei zong rang anga āzong ha koinī'n riat mak mē. Tenchu Rathā'n arilna chang abuia ankūia koini rathūla niai ei na thōpē chian a ni. 27#Anl 2:23Asik chu Pathian, sūngrīl dōra aloma asun chit theiin, Ratha malung vong chu imo, amā'n a riat a. Asik chu amā'n Pathian zōtdān ang taka mīnthiang ngāi ranga niai ei zongpē a ni.
28 #
1Ko 1:9; Gal 1:6, 15; Heb 9:15; 1Pe 2:9 Asik chu Pathian andit ngāi le amā'n ei mansūk ang taka ei kui ngāi ranga alompeia anruol chianga amāni ei sa thei una ranga Pathian sinthō kēng ti nei riat a ni. 29#Efe 1:5, 11; Kol 1:18; 1Pe 1:2Aphāmān ātā amā'n a lei riat zēt ngāi chu, ama a nāipasal mēlruong anput ranga aphāmān ātā a lei ruot zēt kēng. Asik chu ūnāi atampā kāra ama chu nāi atontīr tī ei chang theina ranga. 30#Efe 1:5, 11Aphāmān ātā amā'n a lei ruot zēt ngāi chu amā'n ei kui um len a ni. Hatuka amā'n ei kui ngāi chu ādik um ei manlō len a ni. Hanūk rēt chu ādik ei manlō ngāi chu ei manlian um len a ni.
Pathian Tāituon Anditna
31 #
Sām 56:9; Hag 1:13; Heb 13:6 Hiva chunga hin imo nei ti rang? Asik chu Pathian koini na tianga a kop ten tū mo koini anā dui thei rang? 32#Aph 22:13; Zn 3:16Pathianin a nāipasal len manar thak luia koini ngāi na loma ranga ei hong betōk a ni, hasikhan ama bila alompeia phal taka na hongpē kiar nō ni mo? 33#Isa 50:8-9Pathian a mi ruot ngāi chunga tū mo āsiat anlō thei rang? Asik chu Pathian lenin ādik ei manlō a ni. 34#Isa 53:12; Mk 16:19; Kui 2:24; Heb 7:25Tū mo siatanlō rang? Khristā chu a hong āthī na, tenchu a hong ānthui um rēt zei a. Atun hin ama chu Pathian chang tianga a vā om zei a, hanūk chu koini ngāi rathūla niai ei thō a ni. 35#1Ko 4:11; 2Ko 11:26Khristā anditna nātā hong zāt mo a nā'n sen thei rang? Antakin mo? Lunghāng-in mo? Pēngsōmnā'n mo? Māitāmin mo? Sāikorongin mo? Anchinā'n mo? Khendāiin mo ei na mansen thei rang? 36#1Ko 4:9; 2Ko 4:11Ei ānziak anga,
“Nang na sika koini chu sūnsōt anthata nā om chachak.
Koini chu bera ānthat ranga om anga ānbē kēng nā ni zei,” (Sām 44:22) tī a ni.
37 #
1Ko 15:57; Gal 2:20; Efe 5:2; Anl 1:5 Tenchu hiva ngāi dōra chunga koini anā'n ditpū zāra ārāt khīt nēka ārāt sabaka nei om a ni. 38#1Ko 3:22; Efe 1:21; 1Pe 3:22Asik chu anchang maia kei iam a ni, thīna mo, damna mo, vānpalāi ngāi mo, anlalna ngāi dōra mo, thōtheina ngāi mo, atuna huna āom sa ngāi mo, nangkan huna a la hong āom rang ngāi mo. 39Ansāng lam mo, anthūk lam mo, atei ansin ngāi dōrā'n koini na Puma Khristā Isuona āom Pathian maditna nātā ītē rengin na mansen thei mak.
Bible in Ranglong, © Bibles International, the Bible society of Baptist Mid-Missions, 2024.