Antelna 4
4
Kohat a Nāipasal ngāi Thōruo
1Hatuka Zehova'n Mōsi lē Aron chu a chongpui a, a kōm u na, 2#Ant 30:12“Levi nāi ngāi ātā Kohat a nāipasal ngāi chu, a insūngkuo le a pā insūngkuo anga tel tānla. 3#Atl 4:23, 30, 35, 39; 1Kh 23:3; Ezr 3:8Kum 30 chunglam ātā kum 50 tenpei, Antongna Puon-ina sin āthō ranga ālūt ngāi dōra chu tel tānla.
4“Hiva hi Antongna Puon-ina, mun anthiang khīta Kohat a nāipasal ngāi dorbōndom rang chu a ni. 5#Ant 26:31, 33; 1Kh 23:26A riabuk khuor u nātā anzin u rang tikle, Aron lē a nāipasal ngāi hong u'n tia, amānī'n anhīpna puonrīn chu masum u'n tia, hava le han Riatpuina Bōm chu makhū u'n ti. 6#Ant 25:5, 13-15; 1Rē 8:7; 2Kh 5:8Hatuka hava ha mevun annui ankhūna le han mankhū u'n ti, puon adum le han a thuom biang u'n ti; hatuka ankotna ngāi chu ron u'n ti.
7 #
Ant 25:30; 39:36; Lev 24:6; Zer 52:19 “Vāipōltāp Anthiang Dōkham chunga puon adum phā u'n tia, hava chunga han khēng ngāi, makhete ngāi, bāngtok ngāi lē ābuong dāli leina rang tikola ngāi chu siak tānla, hava chunga han Vāipōltāp Anthiang chu om rase. 8#Ant 26:26-28Amānī'n hava ngāi chunga senduk puon chu phā u'n tia, hava dēna han mevun annui ankhūna le han mankhū u'n ti; hatuka ankotna ngāi chu ron u'n ti. 9#Ant 25:38Amānī'n puon adum chu lāk u'n tia, raāng ranga lēmchuongna, a lēm ngāi, a chāiche ngāi, a besīng ngāi lē sariak kok ngāi dōra dorbō ei ādom una ngāi chu mankhū u'n ti. 10Hatuka amānī'n hava lēmchuongna le a tinratuo ngāi dōra chu mevun annui le a zuol u'n tia, hatuka hava ha ankotna chunga siak u'n ti.
11 #
Ant 30:1, 4 “Rāngkachak māichām chunga puon adum phā u'n tia, mevun annui ankhūna le han makhū u'n tia; hatuka amānī'n ankotna chu ron u'n ti. 12Hatuka mun anthianga dorbōndomna ranga ei mang u tinratuo ngāi dōra lāk u'n tia, hava ngāi chu puon adum le a thuom u'n tia, hava ngāi ha mevun annui ankhūna le han makhū u'n tia, hatuka hava ngāi chu ankotna chunga siak u'n ti. 13#Ant 27:1-8; Lev 1:16Māichām ātā ravut hā'm rathial u'n tia, hava chunga han puon dumaduk chu phā u'n ti. 14#Ant 27:3, 6; 31:9; 1Kh 28:17; 2Kh 4:8, 11; Zer 52:18Hava chunga han māichām dorbōndomnāna ei mang u tinratuo ngāi dōra, besīng ngāi, thīrkut ngāi, belcha ngāi, bāngtok ngāi lē māichāma tinratuo ngāi dōra chu siak u'n tia; hava chunga han mevun annui ankhūna chu phā u'n tia, ankotna ngāi chu ron u'n ti. 15#Ant 28:43; 2Sa 6:6-7Aron lē a nāipasal ngāi mun anthiang lē mun anthianga tinratuo ngāi dōra a makhū suo u le, riabuk akhuor ngāi āsē rang ānsin suo a ni u ten, Kohat nāipasal ngāi chu hava ngāi ankot ranga hong u'n ti. Amānī'n neinun anthiang ītē tōn u nō rase, hanōkten ei thi u rang kēng. Hiva ngāi hi Antongna Puon-ina Kohat a nāipasal ngāiin ei rakot u rang ngāi chu a ni.
16 #
Ant 25:6; 29:41; Lev 6:14-23; 10:6 “Chāizūng Aron a nāipasal Eliazar a sinthō rang chu raāng ranga sariak, marimhui, ni tin sahūm dāli, sariak anthī, biakbūk sūng dōra, hava sūnga om ngāi dōra, mun anthiang le a tinratuo ngāi dōra ākiavāngpū ei ni rang,” a tī na.
17Hatuka Zehova'n Mōsi lē Aron a chongpui a, a kōm u na, 18“Levi nam ngāi bil ātā Kohat pānchī insūngkuo ngāi chu manpei nō tānla; 19tenchu neinun anthiang khīt ngāi a hong dēp u le, ei dama ei thi u nōkna rang, amāni rang hiva hi thō ro: Aron lē a nāipasal ngāi chu va lūt u'n tia, hatuka a dorbōndom u rang le a lupuok u rang chu va thangpē u'n ti. 20#Ant 19:21Tenchu, neinun anthiang ngāi a mankhū u lāi chu a lei va lūt a, a lei va en u rang ni mak a, hanōkten a thi ving u'nle,” a tī na.
Gerson Nāipasal ngāi Thōruo
21Hatuka Zehova'n Mōsi a chongpui a, a kōma, 22“Gerson a nāipasal ngāi a pā insūngkuo anga, a insūngkuo u anga tel tānla. 23Kum 30 chunglam ātā kum 50 tena, tūkareng dorbōndom sin āthō rang le Antongna Puon-in sin āthō ranga a hong ālūt dōra chu tel tānla. 24Gerson mi ngāi insūngkuo ngāiin, dorbōndom lē ānkot lampang hi a sinthō u rang chu a ni. 25#Ant 26:14, 36; 27:10-18Biakbūka puonkhār ngāi lē Antongna Puon-in ankhūna le han, hava chunga mevun annui ankhūna, Antongna Puon-in suokkhār puonrīn ngāi chu razōn u'n ti. 26#Ant 27:9, 16Tuomāi rapalsuokkhār puonrīn, biakbūk le māichām anhīl vinga puonrīn lē a ri ngāi, a sinthō una ranga tinratuo ngāi dōra lē hava ranga ānsin ngāi dōra chu a sinthō u rang a ni.
27“Aron lē a nāipasal ngāiin Gerson mi ngāi nāipasal ngāi sinthō dōra, ei thō u rang dōra lē a dorbōndom u rang dōra chu āthangpē rase. A sinthō u rang dōrāna a lupuok u ngāi a thangpē tānla. 28#Ant 6:23; Atl 4:33Hiva hi Antongna Puon-ina Gerson mi ngāi nāipasal ngāi insūngkuo ngāi dorbōndomna chu a ni. A sinthō ngāi chu chāizūng Aron a nāipasal Ithamar a ningneina thuoia om in ti.
Merari a Nāipasal ngāi Thōruo
29 #
Aph 46:11; Ant 30:12 “Merari a nāipasal ngāi chu a insūngkuo u ngāi anga le a pā u ngāi insūngkuo anga tel tānla. 30Kum 30 chunglam ātā kum 50 tenpei mi Antongna Puon-ina sinthō ranga ālūt dōra chu tel kiar tānla. 31Antongna Puon-ina a dorbōndom una rang hiva ngāi hi ei chōi u rang a ni: biakbūk thingpēk ngāi, a talkhang ngāi, a chopui ngāi, akoveng ngāi, 32tuomāi anhīl vinga chopui ngāi akoveng ngāi le han, kunthu ngāi lē, a ri ngāi, a tinratuo ngāi dōra lē a dorbōndom una ngāi dōra; nangin raming achina ei chōi u rang ngāi chu a thangpē chip tānla.
33 #
Ant 38:21
“Hiva hi Antongna Puon-ina Merari a nāipasal insūngkuo ngāi dorbōndomna, chāizūng Aron a nāipasal Ithamar ningneina thuoia a sinthō u rang chu a ni,” a tī na.
Levi Pānchi ngāi Antelna
34Hatuka Mōsi, Aron le mipui ruoipū ngāiin Kohat a nāipasal ngāi a insūngkuo u anga le a pā u ngāi insūngkuo anga a tel u na. 35Kum 30 ātā achunglam kum 50 ten, Antongna Puon-ina dorbōndomna sinthō ranga ālūt ngāi dōra a tel u na. 36A insūngkuo u anga ei tel u ngāi chu 2,750 a ni. 37Hiva ngāi hi Antongna Puon-ina dorbōndom sinthō ranga Kohat ngāi a insūngkuo anga āntel ngāi chu a ni, Mōsi a kut manga, Zehova chongpēk anga, Mōsi lē Aron-in ei tel ngāi chu a ni.
38 #
Aph 46:11
Gerson a nāipasal ngāi chu a insūngkuo lē a pā insūngkuo anga āntel ngāi chu, 39kum 30 ātā achunglam kum 50 ten, Antongna Puon-ina dorbōndom sinthō ranga ālūt ngāi dōra a tel u na. 40A pānchī u lē a pā u ngāi insūngkuo ang chipa ei tel u ngāi chu 2,630 a ni. 41Hiva ngāi hi Antongna Puon-ina dorbōndom sinthō rang Gerson a nāipasal ngāi a insūngkuo u anga āntel ngāi chu a ni, Mōsi a kut manga, Zehova chongpēk anga, Mōsi lē Aron-in ei tel ngāi chu a ni.
42Merari a nāipasal ngāi a insūngkuo anga le a pā u ngāi insūngkuo anga āntel ngāi chu, 43kum 30 ātā achunglam kum 50 ten, Antongna Puon-ina dorbōndom sinthō ranga ālūt ngāi dōra a tel u na. 44A insūngkuo anga ei tel u ngāi chu 3,200 a ni. 45Hiva ngāi hi Merari a nāipasal a insūngkuo anga āntel ngāi chu a ni, Mōsi a kut manga, Zehova chongpēk anga, Mōsi lē Aron-in ei tel ngāi chu a ni.
46Mōsi, Aron le Israel ruoipū ngāiin Levi mi ngāi a insūngkuo u anga le a pā u ngāi insūngkuo anga ei tel u ngāi chu a ni. 47Kum 30 ātā chunglam kum 50 ten, Antongna Puon-ina dorbōndom sinthō ranga ālūt ngāi dōra a tel u na. 48Ei tel u ngāi dōra chu 8,500 a ni. 49Mōsi a kut manga, Zehova chongpēk anga, amāni chu āntel a ni u na, mī dōra a dorbōndom anga, a lupuok anga āntel a ni u na. Hantin han, Zehova'n Mōsi kōma chong ei pēk anga amāni chu āntel a ni u na.
Bible in Ranglong, © Bibles International, the Bible society of Baptist Mid-Missions, 2024.