Mathāi 15
15
Ānthiang lē Ānnim
Mk 7:1-13
1Hatuka Zerusalem ātā Farisāi ngāi lē dānmīnchūpū ngāi chu, Isuo kōma a hong u na. 2“Ichang mo na zolāi ngāiin pātar ngāi rītī ei khēl u? Asik chu kut ansūk luia sāk a sāk u,” a ti u na. 3Isuo'n a kōm u na, “Ichang mo nangnī'm tiana na rītī u sika, Pathian chongpēk chu nei khēl u? 4#Efe 6:2Asik chu Pathianin, ‘Na nū lē na pā ton ro. A nū mo ole a pā mo khomāk asam tak chu, ei thi ngēt rang,’ (Ant 20:12; 21:17; Dān 5:16; Lev 20:9) a tī na. 5Tenchu nangnī'n, ‘A nū mo ole a pā kōma mo, “Ka kōm ātā nangin ii na lei man dōra ha, Pathian kōma andar suo zei,” a ti takpei in, 6a nū mo ole a pā mo aton nāng lāi mak,’ na ti u chachak a. Hantin han nangnī'n tiana na rītī u sika Pathian chongpēk ngāi chu akorong nei manchang u chachak. 7Nangni phuozekām ngāi, deari Isaia'n na rui una dēchong a lei ril hi ādik kēng:
8“ ‘Hiva mi ngāiin a mūr le a na dēp u na, a ner le a na ton u.
Tenchu a malung u chu ka kōm ātā ālā kēng.
9 #
Mal 2:2; Kol 2:20-22 Akoronga a na biak u na,
A mi manchū una chu miring chongpēk anchūna ngāi māi kēng,’ ” (Isa 29:13) a tī na.
10Isuo'n mipui ngāi chu a kōma a pāi a, a kōm u na, “Rangāi u tānla, riatthei u ro. 11#Kui 10:14-15Bāia ālūtin miring mannim mak. Tenchu mūr ātā āsuokin ke miring ei mannim a ni,” a tī na. 12Hatuka a zolāi ngāi chu a kōma a hong u na, “Farisāi ngāiin hiva chongbāi hi a riat a, a malung ei dō u nōk zia hi na riat mo?” a ti u na. 13#Isa 60:21Tenchu Isuo'n a masang a, “Thing tin anvāna ka Pā'n ei ling nōk tak chu, anphōi in ti. 14#Lk 6:39; Rōm 2:19Amāni chu ei om balama om u rase. Amāni chu ācho ngāi ruoipū āchō a ni u na. Āchō'n āchō a maruoi ten, aninīn u khurthuopa chul rit u'n ti” a tī na. 15Peter-in a masang a, a kōma, “Hiva ankhīna-chong nei ril ngāi omzia hi na manthiang ro,” a tī na. 16Isuo'n amāni kōma, “Nangni um atun ten riatthei luia mo nei la om u? 17Bāia ālūt tak chu, von sūnga a lūt a, nōmruonga ei ānpei chachak, tī hi riat u mak che mo? 18#Lk 6:45; Zak 3:6Tenchu mūra a hong āsuok hi, malungrīl ātā a hong āsuok a ni. Hava ngāi ke miring ānnim chachak. 19#Gal 5:19-21Malungrīl ātā kēng mandon salui, mithatna, uirēna, nōtizuorna, anrūna, milak riatpuina, mī siatrilna ngāi ei hong suok a ni. 20#Rōm 14:14Hiva ngāi ke miring annim chachak. Tenchu kut ansūk luia nēksāk a thō'n miring mannim mak,” a tī na.
Kanān Nupang Iamna
Mk 7:24-30
21Hatuka Isuo chu hava nātā a suok a, Tura lē Sidon rampera a sē na. 22Entā, hava ram ātā Kanān mī nupang khat a kōma a hong a, a hong ānkhēk a, “O Puma, David Nāipasal, ka chung lungkham na mu ro! Asik chu ka nāinupang raluoiin ei sūr a, a tiar sabak zei,” a tī na. 23Tenchu amā'n bāi khat ngal masang mak a. A zolāi ngāi chu a kōma a hong u na, a hong mathēm u na, “Ama hi mansē ta ro, asik chu koini nunūka ankhēk chian zei hile,” a ti u na. 24#Rōm 15:8Tenchu amā'n, “Israel nam bera ānpei ngāi kōma rong nōka chu, tūtē kōma antīr mak ung,” tīna a masang a. 25Nupang chu a hong a, a hong ā mōk a, “Puma, na san ro,” a tī na. 26Amā'n a masang a, “Nāipang ngāi vāipōltāp a lāk a, ui ngāi kōma āpei chu sa mak,” a tī na. 27Nupangin, “A ni, Puma. Tenchu ui ngāiin um a puma dōkham ātā nēksāk anek anōi āchul ngāi chu a sāk u chachak do,” a tī na. 28Hatuka Isuo'n a masang a, a kōma, “O, nupang, nei iamna hi alian sabak! Nei zōt ang taka na chunga hong tung rase,” a tī na. A nāinupang chu hava dārkār taka a lei dam a.
Isuo'n Mipui a Mandam
Mk 8:1-10
29Hava nātā Isuo chu anphet a, Galili tīndīl ravēla a hong ātung a, muola a vā kal a, hava han a ansut a. 30Hatuka mipui atampā chu a kōma a hong u na, a bil una ākhor, āchō, chongtheilui, bāngansam lē atei ātampā chu anchel u na. Isuo ke bula a hong manzāl u na. Amā'n hava ngāi chu a lei mandam a. 31Hantin han chongtheilui ngāi a chong thei u na, bāngansam ngāi a dam u na, ākhor ngāi kal a chōi thei u na, āchō ngāi a mū thei u na, hiva hi mi ngāiin ei mū u na, a boi a dong u na. Israel ngāi Pathian chu a manpāk u na.
Mipui 4,000 a Vāi
32Hatuka Isuo'n a zolāi ngāi chu a kōma a pāi a, “Hiva mipui ngāi chu riangvāi ka mū u, asik chu amāni hi nīnthum a ni zei ka bila ei om u, ītē āsāk rang dōn u mak a. Anchām chunga kei mansē u rang hi zōt mak ung a, hanōkten lampuia anvuoi u'n ti,” a tī na. 33Hankēng a zolāi ngāiin a masang a, “Hidōr peia mipui khopna ranga vāipōltāp chu, hon tiang ātā mo koinī'n hiva mibuirama hin nei man rang?” a ti u na. 34Isuo'n amāni kōma, “Vāipōltāp ituk mo nei dōn u?” a tī na. Amānī'n, “Sari lē ngā āsīnte ngāi alaktē,” a ti u na. 35Hatuka amā'n mipui chu phila ānsut ranga chong a pēk a. 36Amā'n vāipōltāp pēk sari lē ngā chu a lāk a, rāisānchong a mantung a, a zolāi ngāi kōma a pēk a. A zolāi ngāiin mipui ngāi kōma a pēk u na. 37Alom una a nēk u na, a khop u na. Amaniang abong abūi kok sari ābit a la rūt u na. 38Ānēk ngāi chu nupang lē nāipang telluia pasal duoi 4,000 a ni u na. 39Hatuka amā'n mipui ngāi chu a mansē na. Ama chu rakuonga a chuong a, Magdala rampera a hong a.
Bible in Ranglong, © Bibles International, the Bible society of Baptist Mid-Missions, 2024.