Mathāi 14
14
Baptispū Zohan a Lū Antan
Mk 6:14-29; Lk 9:7-9
1 #
Mk 8:15; Lk 3:1, 19; 9:7-9; Kui 4:27 Hava hunlāi han rēng ramzobāk rēng#14:1 ramzobāk rēng: Grika tetrak tīna anziak a. Herod-in Isuo a rui chu a lei riat a. 2A suok ngāi kōma, “Ama chu Baptispū Zohan a ni, āthi nātā anthuirēt a, hasikhan kēng hiva sinthōtheina ngāi chu amāna ei la om,” a tī na. 3#Lk 3:19-20Herod-in a nāipā Filip a thāinū Herodia sika, Zohan chu a sūr a, a khit a, ankhumna-ina a lei khum a. 4#Lev 18:16; 20:21Asik chu Zohan-in a kōma, “Hiva nupang nei lāk hi dān ni mak,” a tī na. 5Amā'n Zohan chu āthat rang azōtā'm ni sela, mipui ā chī na, asik chu mī'n ama ha deari khat tīna ei bē u a ni. 6Tenchu Herod ei ānzirna phāmnāna, Herodia a nāinupang chu amāni matona a lām a, Herod chu a rāi asān a. 7Hasikhan, amā'n ei zong tak āpēk ranga, chong a tin a. 8Ama chu a nū'n kūrbut ei pēk anga, “Hiva khēnga hin Baptispū Zohan a lū na pēk ro,” a tī na. 9Rēng chu a malung a nā na. Hanum ni sela, a khomāk ansam lē ei ānsutpui ngāi sika, hava ha āpēk ranga chong a pēk a. 10Mī a tīr a, Zohan a lū chu ankhumna-ina a vā mantan a. 11A lū chu khēnga a hong chōi a, nupangtē kōma a hong pēk u na. Amā'n a nū kōma a chōi a. 12#Kui 8:2Hatuka a zolāi ngāi chu a hong u na, a ruok chu a hong lāk u na, a phūm u na. Hatuka a sē u na, Isuo kōma a va manthei u na.
Isuo'n Mī 5,000 a Vāi
Mk 6:30-44; Lk 9:10-17; Zn 6:1-14
13Isuo'n hava ha a riat le han, hava nātā rakuonga achuonga mibuirama athei daka a sē na. Tenchu mi ngāiin a riat u le, khopui ātā kal achōia a nūk a zī u na. 14Isuo chu tāngkōla a kal suole, mipui ātampā a mū na. Amāni chu riangvāi a mū na, āna ngāi a mandam a. 15Khului a hong ānī le, a zolāi ngāi chu a kōma a hong u na, “Hiva mun hi mibuirama ni, zān um a hong āzīng rang a ni zei. Mipui ngāi chu a ninga u ranga asākruo ei va rachōk thei una rang, khuo ngāia son mansē ta ro,” a ti u na. 16Tenchu Isuo'n a kōm u na, “Amāni chu a sē nāng u mak. Nangnī'n hongtē mo asākruo pēk u ro,” a tī na. 17Amānī'n a kōma, “Hiva hin vāipōltāp rangā lē ngā anni bak nā dōn,” a ti u na. 18Amā'n, “Hava ngāi chu ka kōma hong chōi u ro,” a tī na. 19#1Sa 9:13; Mk 8:6; Lk 9:16; Kui 2:42; 1Ko 10:16; 1Ti 4:4Hatuka amā'n mipui chu chiak chunga ānsut ranga chong a pēk a. Amā'n vāipōltāp rangā lē ngā anni chu a lāk a, anvān tiang a tang a, bōr a pēk a. Vāipōltāp chu a khiak a, a zolāi ngāi kuta a pēk a. A zolāi ngāiin mipui ngāi kōma a sem u na. 20Hatuka alom una a sāk u na, a khop tang u na. A zolāi ngāiin amaniang abong abui ei mankhōm u na, kok sōmleianni a lā bit a. 21Āsāk ngāi chu nupang lē nāipang telluia, pasal duoi hi 5,000 tāng a ni u na.
Isuo Ti Chunga Kal a Chōi
Mk 6:45-52; Zn 6:15-21
22Isuo'n a zolāi ngāi chu rakuonga achuonga, son tiang varāla a matona a lei vā'n kā'n len u ranga a tī na. Hava bibila han amā'n mipui ngāi a lei mathān a. 23#Lk 3:21Mipui a mathān suole, zārzong ranga athei daka muolpuia a vā kal a. Zān azīng tenpei, athei daka hava han a om a. 24Tenchu hiva hun taka hin rakuong chu tipui malāia a lei om zei a. Rakuong chu tiduarin a suk a, thīnthī dui changa ei om sika. 25Isuo chu khuovār rang tiang#14:25 khuovār rang tiang: Ch.M. dār 3-6. tipui chunga kal a chōi a, amāni tiang a hong pan a. 26#Lk 24:37A zolāi ngāiin tipui chunga kal ei chōi a mū u na, a rathā a ta u na, “Raluoi ke sole,” a ti u na. Anchi tuora ankhēk u na. 27#Dnl 10:12; Lk 1:13, 30; Kui 18:9; 23:11; Anl 1:17Tenchu Isuo'n amāni chu a chongpui len a, “Anngam u ro! Koi kēng kā ni, āchi u nō ro,” a tī na.
28Peter-in a masang a, “Puma, nang ngēt nā ni ten, ti chunga kal achōia na kōm āhong ranga chong na pēk ro,” a tī na. 29Isuo'n, “Hong ro,” a tī na. Peter chu rakuong ātā a hong āchum a, ti chunga kal achōia Isuo a va pan a. 30Tenchu thīnthī chu a mū na, a rathā a tā na, ānning ei phut le, “Puma, na san ta ro!” tīna, ankhēk a. 31Isuo'n a kut chu a sōn lena, a sūr a, a kōma, “O, nang iamna tōm, hong sik mo malung songankharna nei dōn?” a tī na. 32Rakuonga ei chuong suo u le, thīnthī chu a mong a. 33#Mt 4:3Hankēng rakuonga āom ngāi chu a hong u na, “Taktaka, nang hi Pathian Nāipasal kēng nā ni,” tīna, ama chu ā mōk u na.
Genesaret-a ei Mandamna
34Son tiang varāl ankān suo u le, Genesaret rama a hong ātung u na. 35Hava muna mi ngāiin a mēl a lei riatthei u le chu, hava ravēla ram tina mī a tīr u na. Āna ngāi dōra chu a kōma a hong ruoi u na. 36Amānī'n a puon mērtē duoi ngal ātōn ranga a mathēm u na. Ātōn ngāi dōra pei chu a dam u na.
Bible in Ranglong, © Bibles International, the Bible society of Baptist Mid-Missions, 2024.