Mathāi 13
13
Sachīnthekpū le han Ankhīna
Mk 4:1-12; Lk 8:4-10
1Hava nikhuo dēn han Isuo chu in ātā a suok a, tipui kōla a vā'n sut a. 2#Lk 5:3Mipui ātampā a kōma a hong ānbūm u na, ama chu rakuong khata a chuong a, a vā'n sut a. Mipui chu ti kōla ānding u na. 3Hatuka ankhīna-chong le amāni kōma chong ātampā a ril a, “En u ro, sachīnthekpū chu sachī ānthek ranga a suok a. 4A vā thek lāi han, sachī senkhat chu lam sīra a chul a. Va ngāi a hong a, a hong sāk hiam u na. 5Senkhat chu lung bila philtak ei buina muna a chul a. Hava ngāi chu philtak ei tam nōk sika anrapa amōng u na. 6Tenchu anī a suok le, a raem a, a chār biang a. Razung ei dōn nōk sika a thēm a. 7Senkhat chu raling bila a chul a, raling chu a hong ālian a, hava ngāi chu a dīp khap a. 8#Aph 26:12Tenchu atei chu phil asāna a chul a, sapār a hong āvui a: asen chu mun 100, asen mun 60, asen mun 30 sapār a hong masuok a. 9Tūkareng anngāina kuor ādōnin rangāi rase,” a tī na.
Ankhīna-chong Derdīn
10A zolāi ngāi chu a kōma a hong u na, “Ichang mo ankhīna-chong le amāni kōma chong nei ril?” a ti u na. 11#1Ko 2:10, 14; Kol 1:27; 1Zn 2:20, 27Isuo'n a masang a, a kōm u na, “Vān rēngrama chong anthup ngāi chu nangni ngāi riat ranga anpēk kēng a ni zei, amāni kōma chu anpēka om mak a. 12Asik chu ādōnpū chu anpēk riam in tia, ātampā dōn in ti. Tenchu dōnluipū chu, ei dōn seleptē ngal anpota om in ti. 13#Dān 29:4; Zer 5:21; Izk 12:2Hasikhan ankhīna-chong le a kōm una chong kei ril chachak, asik chu a mū ngong u nā'm mu thei u mak a, a rangāi u nā'm riatthei u mak a, riattheina um u dōn u mak. 14Amānīna hin deari Isaia'n dēchong a lei ril ha a hong ākip a, a lei tī chu:
“ ‘ “Rangāi u na tia, tenchu riatthei u nō ta ni.
En u na tia, tenchu tuāk thei u nō ta ni.”
15 #
Zn 12:40; Kui 28:26-27; Rōm 11:8 Hiva mi ngāi malung chu āīt kēng a ni zei,
Anngāina ranga a kuor u āsēt kēng a ni zei,
A mit a masīng u na.
Hanōkten, a mit u'n mu in tia, a kuor u'n riat in tia,
A malung u le riatthei u'n tia, hong kīr u'n ti.
Hatuka amāni chu lei mandam u ka ting.’ (Isa 6:9-10)
16Tenchu na mit u ngāiin a mū thei a, na kuor u ngāiin a riatthei a, rāvān asa u kēng. 17#Zn 8:56; Heb 11:13; 1Pe 1:10-12Taktaka kei na ril a ni u zei, deari ngāi lē midik tamtak ngāiin, nangni nei mu u ngāi hi āmū rang a zōt u na, mu thei u mak a. Nangni nei riat u ngāi hi āriat ranga a zōt u na, riatthei u mak a.
Sachīnthekpū Ankhīna-chong Omzia Anthiangna
Mk 4:13-20; Lk 4:11-15
18“Hasikhan sachīnthekpū ankhīna-chong a omzia chu rangāi u ro. 19Tūkareng rēngram rui ei rangāi a, a omzia āriatthei nōk chu, misaluipā#13:19 misaluipā: Setan tīna a ni. a hong a, a malunga chong antū sachī chu a hong lākpē na. Hiva hi lam sīra sachī chul chu a ni. 20Tenchu tūkareng chong ariata, rāisān taka āpom len hi lung chunga sachī chul chu a ni. 21Amā'n razung dōn mak a, hun atōmtē a dorōi a. Chong sika antaknapui mo ole ansinsakna mo a suok le, a chul len chachak a. 22#1Ti 6:9-10, 17Raling bila sachī chul chu, tūkarengin chong a rangāi a, maniapūr andonna lē neinung ningōlnā'n chong chu a dīp khap a, marā dōnluia a om chachak. 23Phil āsāna sachī chul chu, tūkareng chong chu arangāia āriatthei mī hi a ni. Ama chu marā a rasuo na, asen chu mun 100, asen mun 60, asen mun 30 marā a masuok a.”
Gōm lē Chiakrunei le han Ankhīna-chong
24 #
Mk 4:26, 30 Amāni kōma atei ankhīna-chong khat a ril a, “Vān rēngram chu, mī khatin a phāia sachī sā a vā tū ang a ni. 25Tenchu mi ngāi chu a in u lāitak, a rāldui chu a hong a, gōm ngāi kāra chiakrunei a tū na, a sē na. 26Gōm a hong mōng a, a vūi a, hatuka chiakrunei um a hong anlang a. 27A puma suok ngāi chu a hong u na, a kōma, ‘Ka pū, na phāia son sachī āsā ni mak mo nei vā tū? Hanle hon tiang ātā mo chiakrunei ngāi ei hong mōng?’ a ti u na. 28Amā'n a kōm u na, ‘Hiva chu rālduiin ei thō a ni,’ a tī na. Suok ngāiin a kōma, ‘Nei sēna nei va phōi rang mo nei zōt?’ a ti u na. 29Tenchu amā'n, ‘Hē-e, chiakrunei nei phōi u bibila, gōm um nei phōi u rang kēng. 30Sāngāt hun tenpei munruola lei lian u rase, sāngāt huna sāngātpū ngāi kōma, “Mānsāna chiakrunei ngāi chu rasuong u tānla, āhāl ranga a lōna khita siak u ro. Tenchu gōm chu ka sasiara manlūt u ro,” la ti rong,’ a tī na.”
Hoiro Rū Ankhīna
Mk 4:30-32; Lk 13:18-19
31 #
Lk 17:6
Atei ankhīna-chong khat a kōm una a ril a, “Vān rēngram chu, mī'n hoiro rū ei lāka, phāia ei tū ang a ni. 32#Sām 104:12; Izk 17:23; Dnl 4:12Hiva hi chimuru dōra bila āsīn khīt a ni. Tenchu a hong ālian le chu sūlbuo atei ngāi nēka alian a, thingkung a hong āchang a. Chunga va ngāi a hong u na, a bāk ngāia rabū a hong phan u chachak,” a tī na.
Chol le Ankhīna
Lk 13:20-21
33 #
Aph 18:6; Gal 5:9 Atei ankhīna khat a kōm una a ril a, “Vān rēngram chu, nupang khatin chol ei lāka, vāipōldi kok#13:33 kok: Grika saton a ni. Ei chāk chu litār 7.3 a ni. anthum ei manpola chol a chang māsenga ei āsūn rap ang a ni,” a tī na.
Dēchong lē Ankhīna-chong
34 #
Zn 16:25
Hiva ngāi dōra hi Isuo'n ankhīna-chong le han mipui ngāi kōma a ril a. Ankhīna-chong ni luia a kōm una ītē ei ril om mak a. 35#Rōm 16:25-26; 1Ko 2:7; Efe 3:9; Kol 1:26Dearī'n a lei ti ngāi chu ei kipna rang a ni,
“Ankhīna-chonga ka mūr chu malong ka ting,
Maniapūr ansin len ātā ii ānthup ngāi chu ril ka ting,” (Sām 78:2) a tī na.
Chiakrunei Ankhīna-chong Omzia Anthiangna
36Hatuka Isuo'n mipui ngāi chu a mansē na, ama chu ina a lūt a. A zolāi ngāi chu a kōma a hong u na, “Phāia chiakrunei ankhīna-chong omzia chu na rilmanthiang ro,” a ti u na. 37Amā'n a masang a, “Sachī sā ātūpū chu Miring Nāipasal a ni. 38#Zn 8:44; 1Zn 3:10Phāi chu maniapūr hi a ni. Sachī sā chu rēngrama nāi ngāi a ni. Tenchu chiakrunei ngāi chu misaluipā nāi ngāi a ni u na. 39#Zol 3:13; Anl 14:15Hava rāldui a hong ānthekpū ha diabol a ni. Sāngāt chu maniapūr ei hekna rang hun a ni, sāngātpū ngāi chu vānpalāi ngāi a ni u na. 40Hasikhan chiakrunei ngāi chu ei ānbūm a, moia ei ānhāl anga, hun hek tika chu la hong nī'n ti. 41Miring Nāipasalin a vānpalāi ngāi chu hong tīr in tia, amānī'n a rēngram sūnga anbāna tin rēng lē, dān akhēl ngāi dōra chu la rasuong u'n ti. 42Hava ngāi chu moikundūna pei u'n ti. Hava han chapna lē rakam anrialna om in ti. 43#Dnl 12:3Midik ngāi chu a Pā u rēngrama anī anga ēl u'n ti. Riatna ranga kuor ādōnin, lei riat rase!
Vānram Rēngram le han Ankhīna-chong
44 #
Fil 3:7-8
“Vān rēngram chu phāia rochon anthup ang a ni. Hava chu mī'n a mū na, a thup a. A rāisān raheia a sē na, ei dōng ngāi dōra a zuor a, hava phāi chu a rachōk a.
Lunglū le han Ankhīna-chong
45“Hanūk chu, vān rēngram chu sadāipū'n rochon alu sabak ei ārok ang hi a ni. 46Amā'n rochon aman alu a va man a, a sē na, ei dōng ngāi dōra a va zuor a, hava lunglū chu a rachōk a.
Lēn le han Ankhīna-chong
47“Hanūk chu, vān rēngram chu tipuia lēn a kei a, ngā chi tin rēng āluok ang hi a ni. 48Lēn a bit le chu, tānga a hong nuk u na. Ansut u na, ngā āsā dōra chu koka a thāl u na, tenchu ngā siat dōra chu a pei u na. 49Maniapūr a hek tika chu hantin anga la nī'n ti. Vānpalāi ngāi chu la hong u'n tia, midik ngāi kār ātā misalui ngāi chu la khāi u'n ti. 50Amāni chu moikundūna la pei u'n ti. Hava han chapna lē rakam anrialna om in ti,” a tī na.
51Isuo'n a kōm u na, “Hiva rui ngāi dōra hi na riat mo thei u?” a tī na. Amānī'n, “Puma, na riatthei zei,” a ti u. 52Amā'n a kōm u na, “Hasikhan dānmīnchūpū, vān rēngram ruia ānchū suo ngāi chu, in pumā'n a sumduk ātā neinun athar lē amaruo ansuokpū ang hi a ni,” a tī na.
Lalchi Man Lui Deari
Mk 6:1-6; Lk 4:16-30
53Isuo'n hava ankhīna-chong ngāi a ril suole, hava nātā anphet a. 54Ama ei omna khuo ngēta a hong āsuok le chu, a sinagog una amāni chu a manchū na, amāni chu a boi a dong u na, “Hiva mī'n, hon tiang ātā mo hianna lē tichangbui sinthōtheina hi ei man? 55#Lk 3:23; Zn 6:42Hiva mī hi thingthiampū nāipasal ha ni mak mo? Mī'n a nū chu Mari ei ti ha ni mak mo? A paruol ngāi chu Zakob, Zosef, Simon lē Zuda ngāi ni u mak mo? 56A sarnū ngāi, amāni ngāi dōra chu koini ngāi bila āom ni u mak mo? Hanle hiva mī'n, hon tiang ātā mo hiva ngāi dōra hi ei man?” a ti u na. 57#Lk 4:24; Zn 4:44; 6:61Hasikhan, ama chunga malungdō luia a om u na. Tenchu Isuo'n amāni kōma, “Deari chu a khuo lē a in rong nōka chu, mun ateia lalchi manluia om ngāi mak,” a tī na. 58Amānī'n iamna ei dōn u nōk sika, hava muna han tichangbui sin ātam thō lāi mak a.
Bible in Ranglong, © Bibles International, the Bible society of Baptist Mid-Missions, 2024.