Kuitīr Ngāi Sinthō 5

Anania lē Safira

1Tenchu mī khat a raming chu Anania a ni, a thāinū Safira le han a ram u a zuor u na. 2#Zos 7:11Hatuka a thāinū um ariat uoma hava a man tuk ātā ituk mo chu a ipa ei khāi a, kuitīr ngāi kekunga a hong siak a. 3#Dān 23:21; Mt 4:10; Zn 13:2, 27Hatuka Peter-in a kōma: “Anania, ichang mo Rathā Ānthiang takchunga milak athō ranga Setan-in na malung ei manbit? Asik chu na ram nei zuorna man ha asen chu nei ipa nei khāi a ni. 4#Lev 6:2; Dān 23:22Na zuor mān ātā na tā zēt ni mak mo? Na zuor suonā'm na ningneina anga nei mang thei ni mak mo? Hanle ichang mo havan tina malung nei vong? Milak nei thō hi miring kōma ni mak, tenchu Pathian kōma thō kēng nā ni hile,” a tī na. 5#Sām 5:6Hatuka Anania'n hava chong a riat suole anluoi raka a thi len a. Tūkareng hava rui ariat dōra chu achālaka a rathāta u na. 6#Zn 19:40Hatuka ruothar ngāi a suok u na, Anania a ruok chu āzuola a razōn u na, a va phūm u.

7Hatuka dar anthum dām a theng suole han a thāinū chu ruitāng ītē riatluia a hong ālūt a. 8Hatuka Peter-in a lei rakel a: “Na manthei ta, hiva tuk le hin mo ram chu nei zuor u?” a tī na. Hatuka amā'n: “O hanle, hava tuk le han a ni,” a tī na. 9Peter-in a kōma: “Ichang mo Puma Rathā ansinna ranga chong khata nei ānruol u? Entā, na tangsā avā phūm ngāi a kē u so makot hong āsuok phing u zei. Nang um atun na razōna na ruoi u'n ti,” a tī na. 10Hatuka Peter a matona anraptēna anluoia a thi len a. Ruothar ngāi a hong ālūt u na, ei thī a hong mū u na. Hatuka a razōn u na, a tangsā kōl tak dēna a va phūm u na. 11Hatuka chu kuibing aloma lē hava rui ariat ngāi dōra chu achālaka a rathāta u na.

Kuitīr ngāiin Mī Tamtak ei Mandam una

12 # Zn 4:48; 10:23 Hantin han kuitīr ngāi chu Pathianin a mang a, mipui kāra sinsiana le tichangbui sin tamtak a thō u na. Hatuka āiam ngāi chu lōkōna malung munkhata Solomon tuomāia ankhōm babang u chachak a. 13Hanum amāni chu mī'n a manpāk sabak u nā'm ni sela tūtē amāni bila anchel ngam om u mak. 14Tenchu āiam ngāi chu nupang le pasal tamtak Puma kōma a hong ānsap tir a. 15Hasikhan, a na ngāi um ni sela a hong razōn u lampuia ei siak u. Zāmun le munpha ngāi amanga ei manzāl u a ni, asik chu Peter ei ānlōināna a ralīm luo'n chu a chung una ei del theina ranga ei manzāl u a ni. 16#Mt 8:16; Mk 16:17Hantin han Zerusalem khopui kōl dāma khuo ngāi ātā mipui ādam nōk le rathā ānnimin ei sinsak chachak ngāi ha a hong ruoi u na. Hatuka Pathianin alom una a lei mandam a.

Kuitīr ngāi Ansinsakna

17Hatuka chāizūng ulian khīt lē a bila om alōm ngāi (amāni chu Sadukāi phoma mī a ni u na) le han anding u na, achālaka a tak asi u na. 18Hasikhan kuitīr ngāi chu a sūr u na, mipui vāntāng ankhumna-ina a va khum u na. 19#Aph 16:7; Ant 3:2; Sām 34:7; Mt 1:20; 28:2; Lk 1:11; Zn 20:12Tenchu zāna Puma vānpalāi khatin ankhumna suokkhār dōra a hong malong a, a hong mazōk zit a. 20#Zn 6:63, 68Vānpalāiin amāni kōma a tī na: “Sē u tānla, tempula vā'n dinga, mi ngāi kōma hiva damna chong ngāi hi va ril u ro,” a tī na. 21#Mt 5:22Hava ha a riat u na, ārkhuon chunga tempula a vā lūt u na, a va manchū u na.

Chāizūng ulian khīt lē a bila om ngāi ei hong tung u le, amānī'n ruirilnaphom ngāi lē Israel nāi ngāi kāra pātar ngāi dōra a manbūm zit u na. Kuitīr ngāi ankhumna in ātā avā lāk ranga mī a tīr u na. 22Tenchu ankhumna-in a vā suok u le mīsūr ngāiin kuitīr ngāi chu va mu u lāi mak. Hasikhan mīsūr ngāi chu a kīr rēt u na, a va manthei u na. 23“Ankhumna-in ha adet sabaka ānkhār a ni, arung ngāi um chu suokkhār kōl taka ānding chiana om na va mu na. Tenchu suokkhār na malong le chu asūnga tūtē va mu mak mē,” a ti u na. 24Hava chong ngāi ha chāizūng ulian le biak-in arung ulian lē atei chāizūng ulian ngāiin a riat u na, hong zāt mo ei ni rang a ni zei a tī na andon sabak u na. 25Hava lāitak han pasal khat a hong a, hiva thang hi a hong ril a: “En u ta, ankhumna-ina nei khum u ngāi ha Pathian biak-in tuomāia andinga mī a va manchū rēt u zei,” a hong tī na. 26Hatuka biak-in arung ulian le a lōm atei mīsūr ngāi chu a sē u na, kuitīr ngāi chu a hong ruoi u na. Tenchu mipuiin lung ei dēng u rang ei chi u sika han anrum rahei u mak.

27 # Mt 5:22 Hatuka a hong ruoi u na, ruirilna ansāng matona a manding u na. Hatuka chāizūng ulian khītin a kōma a rakel a: 28#Mt 23:35“Hiva mī a raminga hin chong ril thak u lāi nō ta ni a tī na chong ankhir sabaka nei na pēk kēng hale? Hanum ni sela, en u ta, Zerusalem khopui pumpui mi nei manchū u na, a sip zit zei hile. Hanūk chu hiva miring thisen hi koini na chunga ānsul ranga nei val u,” a tī na. 29#Ant 1:17Hankēng Peter le atei kuitīr ngāiin a masang a: “Miring chong nēk ten, Pathian chong kēng atel ei nāng uol. 30#Gal 3:13Nangnī'n thingkunga nei makhāia nei that u Isuo ha, koini na chipui ngāi Pathianin a hong mathui rēt a. 31#Mk 1:4; 16:19; Lk 2:11; 24:47Ama ngēt hi Pathianin Rēng lē Sandampū āchang ranga a chang tianga ei mansāng a ni. Pathianin Israel ngāi malung ankhīrna apēka āsia anduolna ei manthei una ranga ei mansāng a ni. 32#Lk 24:48; Zn 15:26Hiva ngāi dōra aloma āriatpui ngāi chu koini hi nā ni zei. Hanūk rēt chu Pathian hē tel ngāi kōma ei pēk Rathā Ānthiang um hiva ngāi a nā riatpui kēng,” a tī na.

Gamaliel Huongvārsakna

33Hava chong ngāi ha a riat u na, achālaka a tak asi sabak u na, āthat ranga a val u na. 34#Lk 2:46Tenchu hava lāi han ruirilna ansānga rui aril ngāi bila mī khat, a raming Gamaliel, Farisāi ngāi bila mi anding a. Ama hi dān ariatpū a ni hanūk chu mi tinin lalchi ei thō u a ni. Amā'n hava kuitīr ngāi ha chomokhat bak tuolpanga ansuok ranga chong a pēk a. 35Hatuka amā'n a kōm u na: “Nangni Israel mi ngāi, hiva mi ngāi chunga athō ranga nei val u hi asadima mandon u ro. 36Asik chu tianlāi um ni sela Theuda'n milian khat kā ni ei ānti a ni. Ama bila miring 400 dām ei kop a ni. Tenchu ama chu mī'n a that a, ama anūk azī ngāi dōrā'm aloma anthek rak u na, ītē om mak. 37#Lk 2:1-2Hatuka hava mī a theng suole han, raming anziak hunlāi han, Galili mī khat Zuda a tī na a hong āom rēt a. A tianga mī tampā a rakuoi a, tenchu ama chu a thī na, anūk azī ngāi dōrā'm ni sela anthek rak u na, ītē om rēt mak. 38#Mt 15:13Kei na tī a ni u zei, hiva mi ngāi ātā ankhāi u tānla, amāni chu māk rak u ro. Hiva derdīn lē sin hi miring ātā a ni ten, ītē hong ni nō ni. 39#2Kh 13:12; Chn 21:30; Isa 46:10Tenchu Pathian ātā asuok a ni ten, nangnī'n manbāng thei u nō ta ni. Hanūk chu Pathian le āndui um na chang ving thei,” a tī na. 40#Mt 10:17Hatuka a chongril chu lōkō a zōt a, kuitīr ngāi a va mankui u na, a manzēm u. Hanūk chu hava pang Isuo raminga chong aril lāi nōkna ranga chong anriat chunga a mazōk u na. 41#Mt 5:12; Zn 15:21Tenchu kuitīr ngāi chu ruirilna ansāng ulian ngāi maton ātā a suok u na. Asik chu Pathianin Isuo raminga muolphui ansak ruona ei āntet u sika a rāi asān u na. 42Hatuka anikhuo'n tina Pathian biak-ina le in tina anchun u chachak a. Hantin han Isuo Khristā thangahui aril chu bāng pial u mak.

Currently Selected:

Kuitīr Ngāi Sinthō 5: RNL

Highlight

Copy