Kuitīr Ngāi Sinthō 24
24
Paul a chunga Zehudi Pātar ngāiin ei Nō'n una
1Ni rangā suole han chāizūng ulian khīt Anania chu Kaisaria khuona a sē na. Pātar senkhat le dān ariatpū khat a raming Tertula chu a bila a sē u na. Paul a chunga chong āsia ei matung una dōra, ramoppū kōma a chōi u na. 2Paul chu anpāia om suona, Tertula'n ei nōnna chong chu āril a phut a, amā'n, “Nang na zāra kēng phūkdāi sabaka nei om a ni. Nei na kiavāngna zāra hiva nam chunga takanchangna ei tung tī na mū thei a. 3#Lk 1:3Felix āsa khīt, ahun tina lē mun tina rāisān taka na pom. 4Tenchu na ranga ning chial akāi rang hi zōt mak mē na. Na lungkhamna le koini na chongbāi khat dak anā'n ngāipē ranga nei na mathēm. 5Hiva miring hi mī'n buoi sabak a ni ti nei riat kēng. Maniapūra Zehudi āom ngāi dōrā'm ei mansel chachak kēng, hanūk chu ama hi Nazaret mi ulian khīt khat a ni. 6Hanūk chu Pathian biak-in um ānnim rang ei val a ni, hatuka amāni hi nei sūr a, koini na dān anga ama rui hi āril ranga nei zōt. 7Tenchu sipai ulian Lusia hong āsuok a, hatuka ranak ruma koini na kut ātā ei ruoi tap a ni. 8Paul āsia antung ngāi chu na kōma āhong ranga chong ei pēk, hasikhan nang na pumin hiva ngāi rui hi asadima radēk tānla aloma ei dikna dōra chu riat zit in na ti. Ama chunga bādō nei thōna ngāi riatthei na ti,” a tī na.
9 #
1Th 2:16
Hatuka Zehudi ngāiin ei maham u nōkna hi ādik kēng a ti u na.
Feliks Matona Paul ei Ānrungna
10Hatuka a ramoppū hān Paul ei manchongna ranga a kut le a zāp a. Paul-in a masang a,
“Kum asōtpā nangin hiva nam ngāi rui nei hong rilpē a ni tī ka riata rāisān taka kei sat le kei siatna na ril ka ti. 11Zerusalem khopuia Pathian ābiak ranga kei sē hi avian tena hin ni sōmleianni la kāi mak ung. Hava tak han ei diknōkna chu riatthei na ti. 12Tempula tūtē le ankhal ngāi mak ung a. Sinagog-a mo ole khuo sūnga mo angkhat pei mi kei mathoka kei manbuoi a na mū om mak. 13Atun um ka chunga āsia ei na mantung una hi na kōma anthiang vanga mandang thei u nō ni. 14Tenchu hiva rui hi na kōma puong ka ti: ‘Koi hi Iamna Lampui āzī ngāi, mī'n phom atei ngāi ei ti u āzī kā nī na, hava ang dān taka koini na chipui ngāi Pathian a biak kā ni. Alom pumpuia dān dōra lē deari ngāi lekhabūna anziak dōra a iam kā nī na. 15#Mt 25:46Hava mi ngāiin ei pom u anga koi um Pathian asa dōn kā ni. Pathianin midik ngāi le midiklui ngāi āthī nātā mathui in ti tī ka iam a. 16Hiva sika hin Pathian tiang le miring kōmā'm demnabuia mandon ānthiang ādōn ranga kei pūt chian a ni,’ a tī na. 17#Rōm 15:25-28; 1Ko 16:1-4, 15; 2Ko 8:1-4; Gal 2:10Atun, kum atampā suole han ka nam ngāi atuonga dāli dar ranga kei sē a ni. 18Tenchu Zehudi mī senkhat Asia ram ātā a hong u na. Hiva ngāi ka thō lāi han Pathian biak-ina ei na mu u. Ruitāng azī lama anthiang vang kā ni. Mipui manbūm mak ung a, buoina rahū'm thō mak ung. 19Amāni ngāi ha kei siatna a om ten, na kōma ei hong chōi u rang kēng a ni zei. Na kōma chong āsia ei hong mantung u rang a ni. 20Hanōkten chu hivana āom ngāi len hin ril u rase. Ruirilzōla kā'n dinglāi han hong zāt kei diknōkna mo ei mū u? 21Hiva chongkam khat rong kēng ei ni rang a ni zei, amāni lāia kā'n ding a anringpāna: ‘Thīna nātā athi anthuirētna ruia avian nangni matona ka rui ei ānril a ni zei,’ kei ti,” a tī na.
22Hatuka Feliks hān hiva rui a riat suole chu a lei siak tot a. Asik chu Lampui ānti rui chu asa a ni tīna ei riat vang sika amā'n: “Sipai ruoipu ulian Lusia a hong tikle na rui chu la sat bō ning,” a tī na. 23Hatuka Feliks hān sipai razaruoipū kōma Paul chu arung ranga chong a pēk a: “Ama ei nuom anga man-om ro. A mal a ruol ngāiin ei nāng anga ānkiavāng ranga khār nō ro,” a tī na.
24Nikhuo asē miei suole Feliks a thāinū Drusila le han a hong u na. Drusila chu Zehudi nupang khat a ni. Amā'n Paul chu a kui a, Khristā Isuona iamna ruia Paul-in a ril a, a rangāi sabak a. 25#Zer 36:16; Gal 5:23; 1Th 5:6; 1Pe 4:7; 2Pe 1:6Paul-in dikna rui, a ninga anrēngtheina rui le ruirilna ei la hong rang rui a rilpē na. Hankēng Feliks chu a rathāta sika han: “Atuna ranga chu a hun zei, sē pei ta ro. Hun kā'n hēr tik, na pāi rēt bō ning,” a tī na. 26Amā'n ei mazōk theina ranga Paul-in sum na pēk bō ni tīna asa ei thō a ni. Hasikhan ei pāi rēt ei pāi rēta ei chongpui chachak. 27Tenchu kum anni suole han, Porkia Festa'n Feliks a sutmun chu a luo na. Feliks chu Zehudi ngāiin nā dit u rase ei ti sika Paul chu ei khuma ei siak chian a ni.
Bible in Ranglong, © Bibles International, the Bible society of Baptist Mid-Missions, 2024.