Kuitīr Ngāi Sinthō 25
25
Paul Festa Matona
1Hava rama ei hong ni anthum suole han, Festa chu Kaisaria khuo nātā Zerusalem khopuia a sē na. 2Hankēng chāizūng ulian ngāi lē Zehudi ngāi ruoipū lian ngāi chu ama kōma Paul a chunga chong āsia a mantung u na. 3Festa kōma amāni malung do anga Paul a chunga athō ranga achān ei va mathēm u. Amāni ei zōt u chu, Paul Zerusalem khopuia a kui a, lampuia lamruong athōna a lei āthat ranga ei mansūk u. 4Tenchu Festa'n a masang a, Paul chu Kaisaria khuona kēng ei ānkhum. Hasikhan koi um anrapa āsē rang kā ni zei. 5“Hasikhan,” amā'n, “Na kār una ningneipū ngāiin na hong zī u sela, amana han ei diknōkna a om ten, ama chu hong nōn rase,” a tī na.
6Amāni bila ni sōm nēka a om suole han Festa chu Kaisaria khuona a sē na. Hatuka zīngkhuovāra a ruirilna sutmuna ansuta Paul amā'n kui a. 7#Mk 15:3; Lk 23:2, 10Ama chu a vā suok le, Zerusalem ātā āhong Zehudi mi ngāi chu a kōla ānding u na, a takchunga chong āsia atampā a hong ril u na, tenchu abul arēl ei mandang thei khat ngal om u mak. 8Hankēng Paul chu ama ei ānzōkna rang chong a ril a: “Zehudi ngāi dān ruia mo a ni, ole Pathian biak-in takchunga mo a ni, rēng Kāisar a chunga mo a ni, ītē kei masialna om mak,” a tī na. 9Tenchu Festa'n Zehudi ngāi malung do chang anga sin athō ranga ei nuom a ni. Hasikhan Paul a kōma a masang a: “Zerusalem khopuia son a sē na, na chunga hiva rui ngāi dōra hi ka kōma hong āndinga āril ranga nā zōt mo?” a tī na. 10Paul-in a masang a: “Kāisar ruirilna sutmun ansāng matona a hong ānding kā ni. Hiva hin kēng ka rui nei na rilpē ranga. Zehudi ngāi chunga ītē kei masialna ei bui hi nangin anthiang vanga na riat a. 11Masial kei thō a om ten hanūk chu thīna rang tenpeia kei thō a om ten, āthi ranga annar mak ung. Tenchu hiva chong āsia ei hong chōia ei na thō una ngāi ītē abul arēl ei bui sika tūtē'n amāni kōma a nā'n betōk thei rang om mak. Kāisar kōma ruirilna azong kā ni,” a tī na. 12Hatuka Festa chu ruiril ulian ngāi le han anrilpui suole han Paul a masang a: “Kāisar kōma ruirilna nei zong sika, Kāisar kōma kēng nei sē rang,” a tī na.
Festa'n Agripa kōma Paul a Rui ei Rilna
13Nikhuo alaktē suole han rēng Agripa lē Berniki chu Kaisaria khuona a hong ātung u na. Festa kōma chubai a hong būk u na. 14Nikhuo tampā hava han ei om u sika Festa'n Paul a rui chu rēng kōma a ril a: “Felix-in mī khat ei sūr a, ei khum a om a. 15Zerusalem khopuia kā om lāi han Zehudi ngāi chāizūng ulian lē pātar ngāiin ama takchunga chong āsia ei hong chōi u. Amānī'n hava mī a rui kei masatpē ranga ka kōma ei hong zong u,” a tī na. 16Tenchu koiin ka masang a: “Ama kōma havan tina āthō ha Rōm mi ngāi ei thō u dān ni mak. Asik chu chong āsia a hong āchōi ngāi lē āsia āthōpū chu antong bak luia ānsiat ranga anbetōk thei ngāi mak. Tenchu a rui andarna hēr apēk ngēt ei nāng kēng ka tī na. 17Hatuka hivan hin ka kōm a hong ātung u le sōt rei luia zīng khuovāra ruirilna ka pāi len a. Hatuka hava miring chu ruirilnāna a hong āruoi ranga arung ngāi chong ka pēk a. 18Ama chunga chong āsia a hong āchōi ngāi āchong ranga ānding u na, tenchu kei sabei anga a chunga ītē arilruo riat u mak. 19#Kui 18:15; 23:29Tenchu amāni Pathian andonna rui tete ngāia ankhalna ei dōn u. Hatuka a raming Isuo a tī na mī khat ruia ei ānkhal u. Hava mī ha a thi suo, tenchu Paul-in chu a hong ādam rēt, ti ha kēng āsia ei thō u a ni. 20Hiva ngāi rui ka riata koiin andonna chang riat mak ung a. Hava sika han Paul Zerusalem khopuia a sē na hava han ama a rui chu avā ril ranga ei zōt le ei zōt nōk chu ka rakel a. 21Tenchu Rēnglian Augusta'n ama a rui chu ei manriat theina ranga Paul-in Zerusalem khopuia ei sē nōkna rang a zong a. Hankēng Kāisar kōma ka mathuon thei māseng chu ārung ranga ārung ngāi kōma chong ka pēk a,” a tī na. 22Hatuka Agripa chu Festa kōma: “Koi um ka theia hiva miring kōma ātā a chong ariat rang kā zōt,” a tī na. Hatuka Festa hān: “Nangtūk a kōm ātā chong rangāi bō ta ni,” a tī na.
Paul Rēng Agripa lē Berniki Matona
23Zīng khuovāra Agripa chu Berniki le han anlian lē anlal sabaka a hong u na. Sipai ruoipu ulian ngāi le khopuia ruoipū ulian ngāi chu ruirilna anchunzōla a lūt u na. Hatuka Festa'n chong a pēk le chu Paul a hong ruoi u na. 24Hatuka Festa'n: “Rēng Agripa lē hiva muna koini bila ālian arāng a hong ānchel ngāi dōra, hiva mī hi mu u ta ro! Hiva mī a ruia hin Zehudi mipuiruol dōrā'n alom una ka kōma a na hong mathēm u na. Zerusalem khopuia le hiva muna āom Zehudi ngāi dōrā'n hiva mī hi chu dam lāi nō rase a tī na ei ānkhēk u. 25Tenchu thīna rang tenpeia ītē masial ei thō om mak a tī na ka mū. Tenchu Rēnglian Augusta ngēt kōma avā suok rang ei pūt sika ātīr ranga kei masuk a ni zei. 26Tenchu ka ulian kōma a rui andang siaka ītē anziak ruo riat mak ung a. Hava ha nangni ngāi kōma kei hong masuokna asik chu a ni. Aliaktēna, Rēng Agripa nang na makunga kei hong masuok. Ama na radēk suole han ama a ruia anziak ruo dōn ka ti. 27Asik chu chong āsia ei matung u na, asik andang siaka riatluia ankhit chuchunga a hong ātīr hi anhuia riat mak ung,” a tī na.
Bible in Ranglong, © Bibles International, the Bible society of Baptist Mid-Missions, 2024.