Kuitīr Ngāi Sinthō 20
20
Paul Makedonia lē Grika ei Ānzinna
1Hava rahupui ansuo le han, Paul-in zolāi ngāi a kui a, lungngamna asaka chong ahuia anthānpui a. Hatuka Makedonia rama sē ranga a suok a. 2Hava rama ngāi dōra chu ā chīl kiar a, chong atampā le zolāi ngāi lungngam a sak a. Nukhōn khīta chu Grik rama a vā tung a. 3#Lk 2:2; 2Ko 11:26; 1Th 2:16Hatuka hava han thānthum a mang suole han Suria rama rakuonga āsē rang vit le han Zehudi ngāiin a khit rang a val u na. Hava sika han Makedonia ram tianga āsē ranga a masuk rēt a. 4#Efe 6:21; Kol 4:7; 2Ti 4:20; Tit 3:12Hiva ngāi hi a bila a sē u: Beroia khuona mī Sopater, Thesalonika khuona mi Aristarka lē Sekunda, Derbe khuona mi Gaia lē Timothi, hanūk chu Asia rama mi Tukika lē Trofima ngāi a ni u na. 5Amāni ngāi hi koini na matona a lei sē u na, Troas khuona a na lei va ngāk u na. 6Koini chu cholanchellui vāipōltāp pānta nikhuo a hek suole han Filipi khuo nātā rakuonga nā'n tol a, ni rangā suole han Troas khuona na vā'n tongpui a, hava han ni sari nā om a.
Eutuka Āthi nātā ei Ānthuina
7 #
Mt 14:19; 1Ko 16:2; Anl 1:10 Hatuka hapta sūnga nikhuo mānsa khīt nikhuona vāipōltāp ākhiak ranga nā'n khōm a, hatuka Paul chu zīng khuovāra āsē rang ei ti sika, zānchim tenpei amāni kōma chong a ril a. 8ina tadan ansānga nei ānkhōmna muna han lēm ātampā a om a ni. 9Hatuka hava han a raming Eutuka a tī na ruothar khat tukver sūng tiang ansut a. Hatuka a mit a lei khu sika a lei in zei a. Paul-in asōtpā chong ei ril sika mitkhū lei diar lāi mak, in thār anthum ātā a chul ving a, athi chunga a va rūt u na. 10#1Rē 17:21; 2Rē 4:34; Mt 9:23-24Tenchu Paul thuoia a vā chum a, a chunga a bok a, a vā kuo na: “Na rathā manta u nō ro, asik chu a phūk a lā om,” a tī na. 11#Mt 14:19Hava suole han Paul chu chunga a vā kal rēt a, vāipōltāp a khiak a, a sāk a. Amāni kōma khuovār vita chong a ril suole han ei sē a ni. 12Hatuka ruothartē chu adam vanga a ruoi u na, achālaka lungngamna a dōn u na.
Paul-in Efesi-na Ūpa ngāi ei Ānthānpuina
13Koini chu maton nā'n sā na, Asos khuo tenpei rakuonga nā sē na. Sovā nātā Paul chu rakuong lian sūnga ānchuong ranga nei pūt a ni, asik chu ama chu ke tianga āsē ranga ngal ei mansūk a ni. 14Hatuka Asos khuona na hong āsuok le han Paul chu rakuonga na makhal a, Mitulini khuona nei sē a ni. 15#2Ti 4:20Hava nātā rakuong dēna nā sē rēt a, zīng khuovāra chu Kios muolanlān kōla na vā suok a. Hatuka hanūk nikhuo rēta Samos muolanlāna na vā suok a. Hatuka hava nātā hanūk nikhuo rēta han Trogulion khuona na vā suok a. Hatuka hanūk zīng khuovār rēt le kēng Miletos khuona nei va suok a lā ni. 16Paul chu Asia rama hun asōtpā ei mang zōt nōk sika Efesi khuo chu rakuonga ākhēl vat ranga ei zōt a ni. Asik chu athei ten, Pentikos nikhuo ngēt avā mang ranga, Zerusalem khopuia āsē ranga ānnot a ni.
17Hatuka Miletos khuo nātā Efesi khuona mī a tīr a kuibinga pātar ngāi chu a va mankui a. 18Hatuka a kōma a hong u le amāni alom u ranga a tī na,
“Asia ram ka hong āthin mānsa nikhuo len ātā na bil una kā om sūnga ka omdān ngāi chu na riat kiar u na. 19#Sām 6:6Alompeia omannuoi lē mitrathī zān chunga, hanūk chu ka chunga Zehudi ngāi āsiat valna antak atiar chunga Puma hasō kei ādom a ni. 20#Sām 40:10; Zer 26:2; 42:4Nangni ngāi nei tak una rang ītē ipluia, na kōm una kei puong a ni. Vāntāng lāia lē in tina ka na manchū u na. 21#Efe 1:15; Kol 2:5; Flm 1:5Zehudi le Grik mi ngāi kōma Pathian tianga malung ankhīra, koini na Puma Isuo Khristā ei iam thei una ranga asadima kei manriat u a ni. 22Hanūk chu en u ro, atun hin Rathā Ānthiangin ei tīr hi telluia om thei mak ung a, hasikhan Zerusalem khopuia a sē ka nāng. Sovā son ka chunga imo kei va chang rang chu riat mak ung a. 23Tenchu Rathā Ānthiangin ei na ti: ‘Ankhitna le antaknā'n ei ngāk chian,’ a tī na khuo tina ei na manthei rong hi kei riatthei a ni zei. 24#2Ko 4:1; Gal 1:1; 2Ti 4:7; Tit 1:3Hanum ni sela, hiva ngāi dōrā'n angkhat ngalin na manbuoi thei nō ni. Kei damna hi ka ranga ītēna bē mak ung. Tenchu kei tānna hi rāisān taka āsuo rang le Puma Isuo kōma kei man Pathian lungkhamna thangahui arilna dorbō rong hi āsuo ranga kei zōt a ni zei. 25#Mt 4:23Hanūk chu en u ro, nangni kār ātā Pathian ram ruia tāng kei hāi tira kei sē hin na lom una ka mēl na mu u lāi nō ta ni tī ka riat a. 26#Izk 3:17-19Hava sika han lōko thisen ātā anthiang kēng kā ni tī hi avian na lom una kei na manriat u a ni zei. 27Nangni kōma Pathian mandon ngāi dōra aloma a nā'n thei u ranga annar ngal mak ung. 28#Zn 21:16; Rōm 3:25; 1Ko 6:20; 10:32; 1Ti 3:1Hasikhan nangni ngāi hi anrēng chip u ro. En u ro, Rathā Ānthiangin beraruol ngāi chunga arung ranga ei na phun u kēng. A thisen le ei rachōk, Pathian kuibing a chōm ranga ei na phun u a ni. 29#Izk 34:5; Mt 7:15Ka na māk suo u le en u ro, nangni bila ngelang anchiruo ngāi hong lūt u'n tia bera ngāi hōi ngal pial u nō ni. 30Nangni ngāi bil ātā ngēt um ni sela a leko tianga chong arila, a tiang una zolāia ākei ranga la suok u'n ti. 31Hasikhan rangāi u ro, nangni bila kum anthum pei mitrathī zān chunga asūn azāna kei na manchū u ha riattit u ro. 32#Mt 25:34; Efe 1:4; Kol 1:12; Heb 9:15; 1Pe 1:4Atun chu ūnāi ngāi, Pathian kōma le a lungkhamna chonga ka na betōk u, hava ngēt le han nangni ngāi nei ānding thei una rang le Pathianin ei manthiang ngāi bila dōng ei na manluo thei una rang a ni. 33#1Sa 12:3; 1Ko 9:12; 2Ko 2:17; 1Th 2:5Koiin tūtē tā rāngkachak, sumrū le puonpāi ningōl mak ung a. 34A ni lelē kēng, hiva ka kut ngēt le hin sin kei thōna koi lē ka bila āom ngāi ei nāng u dōra chu kei zon chachak ti ha nangnī'n na riat u na. 35Havan tin han āchuoi ngāi āpōng lē āsōl ngāi kōma nei zon thei una ranga alompeia kei thō dōra chu kei na manmu kiar u a ni. Asik chu Puma Isuo a chongril ngāi ha mandon tit u ro: ‘Ālāk nēka apēka hin bōrsāng tungna kēng,’ ” a tī na.
36 #
Lk 22:41
Hatuka hava chong ngāi dōra a ril suole chu mankhūk a bila lōko bila zār a zong a. 37#Lk 15:20Hatuka alom una a chap u na, Paul chu ā kuo u na, a biang a tum u na. 38Asik chu hava pang a mēl mu u lāi nō ni a tī na chong ei ril sika achālaka a malung ei manna khīt una a ni. Hatuka rakuong omna mun tenpei a sēpui u na.
Bible in Ranglong, © Bibles International, the Bible society of Baptist Mid-Missions, 2024.