Kuitīr Ngāi Sinthō 21
21
Paul Zerusalem ei Panna
1Hava suole chu hintin hin a nī na, amāni ngāi le nā'n sen suole han rakuonga nā'n tola, andīn zata nā sē na, Kōs muolanlāna na vā tung a. Hatuka zīng khuovāra Rodos muolanlāna na va suok rēt a, hankēng hava nātā Patara khuona na vā suok a. 2Hava han Foiniki rama āpan rang rakuong khat na va mū na, hava han nā chuonga na pan tir a. 3#Lk 2:2Hatuka Saipras muolanlān na va mū le chu sim tiang chang na rakān a, Suria ram ātā nā sē na, Tura khuona na hong āchum a, asik chu hava han rakuonga neinun ngāi ansum rang a ni. 4Hava han zolāi ngāi chu na va mu le chu amāni bila ni sari nā om a. Rathā Ānthiangin amāni manga, Paul a kōma Zerusalem khopuia āsē nōk ranga ei manthei u a ni. 5#Lk 22:41Tenchu koini na nikhuo a hong āhek a, nā'n sen rang tiang na lampui na pan han ūnāi ngāi dōra chu a nungāk le a nāi u ngāi le khopui a khēl raka a na hong thak u na. Hatuka hava han tipui rakhama khūksabila lōkōna zār na zong a. 6Hatuka chong ahui le nā'n thān suole han rakuonga na vā chuong a, amāni chu ina a kīr u na.
7Hatuka Tura khuo nātā rakuonga antol nā'n suole han Tolemais khuona na hong āsuok a, ūnāi āom ngāi chu chubai na va thō na, amāni bila nikhat nā om a. 8#Efe 4:11; 2Ti 4:5Hatuka zīng khuovāra na suoka Kaisaria khuona na vā tung a, thangahui aril chachak Filip a ina na vā lūt a. Ama hi kuitīr sari ngāi bila angkhat a ni, ama ina nā om a. 9#Ant 15:20; Rui 4:4; Neh 6:14; Lk 2:36; 1Ko 11:5Amā'n nāinupangin la nei lui nūngāktē ānthiang manlī a dōn a. Hava ngāiin deari anga chong a ril u chachak a. 10Hava han nikhuo sōtpā nā om a. Hava lāi han Zudāi ram ātā a raming Agaba a tī na deari khat a hong āsuok a. 11#1Rē 22:11; Isa 20:2-4; Zer 13:1-11; Mt 20:19Ama chu koini na kōma a hong a, Paul a kōngkhit chu a lāk a, a nininga a kē lē a kut ngāi chu a khit a: “Hivan tin hin Zerusalem khopuia Zehudi ngāiin hiva kōngkhit ādōnpū hi ei khit u rang, hanūk chu namtei ngāi kuta ei betōk u rang. Hiva hi Rathā Ānthiangin ei na ril,” a tī na. 12Koini lē havana āom ngāi dōrā'n na riat a, Paul chu Zerusalem khopuia a sē nōkna ranga na mathēm a. 13#Zn 15:21Tenchu Paul-in a masang a: “Ichanga mo hintina nei om u hi? Nei chap u sika hin ka malung asiata ka riat a. Puma Isuo raming sika Zerusalem khopuia ānkhit rong ni mak kei ānphal tenchu thīna tenpeia kei ānphal kēng,” a tī na. 14#Rūt 1:18; Mt 26:39Hatuka: “Puma ei zōt ang taka ni ta rase,” na tī na.
15Hava suole han āsē ranga aloma nā'n sin vang suole han Zerusalem khopui chu na pan a. 16Koini bila Kaisaria khuona zolāi ngāi bila senkhat um a sē u na. Manason ina atung ranga a na ruoi u na. Ama hi zolāi mānsa ngāi bila mi le Saipras muolanlāna mī a ni.
Zerusalem-a Paul-in Zakob ei Āntongpuina
17Zerusalem khuo na va tung le ūnāi ngāiin rāisān taka a na lei phām u na. 18Hanūka nikhuona Paul chu koini na bila Zakob a ina nā lū a. Hava han kuibing pātar ngāi dōrā'm a lei om kiar u na. 19Hatuka Paul-in amāni kōma chubai a va thō suole han Pathianin sin ei thō ngāi dōra a dōn tena a ril a. Hanūk chu Paul, ama len amanga Pathianin namtei ngāi kāra a sinthō ngāi a ril kiar a. 20#Rōm 10:2; Gal 1:14; Fil 3:6Hava chong ngāi a riat u na, Pathian a manpāk u na, hatuka Paul a kōma: “Entā paruol, Zehudi ngāi kāra ituk zāt mo a iam ei tam a ni u zei, hanūk chu dān lampangā'm alom una achālaka a tepannēl u a ni. 21#1Ko 7:18-19Mī'n nang na ruia hiva hi ei ti u: ‘Namtei ngāi kāra Zehudi āom ngāi dōra chu Mōsi dān āmāk ranga mī ei manchū kēng a ni zei. Hava rong ni mak, a nāi u ngāi um sertan lelē nāng mak hanūk chu namdān ngāi azī nāng mak, a tī na ei manchū,’ a ti u na. 22Hasikhan atun koinī'n imo nei thō rang a ni zei? Asik chu nei hong tung hi amānī'n ei riat ngēt u rang a ni. 23#Atl 6:2, 5, 18Hasikhan koinī'n nei na tī anga nei thō rang a nāng zei a. Koini bila Pathian kōma khomāk ansam pasal manlī nā dōn a. 24Hava mi ngāi ha ruoi tānla, amāni bila nang len um dān ang taka ānthiang ranga vā'n chel ro. Hatuka a sam ei manvūi una ranga sum nei thām rang a ni. Hatuka nang na ruia lōkō'n mī'n ei ti ha ādik ni mak a tī na manriat u'n ti. Hanūk chu nang len um dān atela ādik taka nei om ti ha manriat u'n ti. 25Tenchu namtei ngāi kāra āiam ngāi kōma adetrapa rui nei rila hintin hin nei maziak kēng a ni zei: Miramīl kōma āndar dāli, thisen abuong, tōkbopa ānthat mē hanūk chu hurna lama ankhār u rase,” a ti u na. 26#Atl 6:13-20Hatuka zīng khuovār le chu Paul-in pasal ngāi a ruoi a, amāni bila a vā'n thiang a, Pathian biak-ina a vā lūt a, dān anga anthiangna hun ei hekna a va puong a, hatuka hava hun taka han dān anga anbōlna dāli ei dar chip u rang a ni.
Paul Tempula ei Ānsūrna
27 #
Zer 26:8; 1Th 2:16 Hankēng ni sari nikhuo chu a hek rang vit le han Asia rama om Zehudi ngāiin Paul chu biak-ina a va mū u na, mipui dōra a mathok u na, ama chu a va sūr u na. 28#Mt 24:15Hatuka amānī'n ankhēk a: “Israel mi ngāi, na hong san u ta ro, asik chu hiva mī'n koini na mi ngāi kōma le mun tina mitin kōma dān ruia le hiva biak-in ānthiang ruia ādik nōka kēng ei manchū a ni zei. Ama bila han Pathian biak-ina Grik mī ei hong lūtpui a hiva mun ānthiang hi ei hong mannim kēng a ni zei hile,” a ti u na. 29#2Ti 4:20Hava mān beta han khopui sūnga Efesi mī Trofima chu Paul a bila om a ei mu u a ni. Ama chu Paul nī'n ti Pathian biak-ina a hong āruoi a tī na ei iam u a ni. 30Hasikhan khuo pumpui achālaka anbuoia alum sabak zei a. Mipui chu kil tin ātā a hong ātān u na, Paul chu a hong sūr u na, Pathian biak-in ātā ei kei a, ei rasuo u a ni. Anrarapa khopui ankhārna makot ngāi dōra chu a khār zit u na. 31Hatuka āthat ranga tīna ei val u thang ha sipaiphom ruoipu ulian kōma a hong āsuok a, amā'n Zerusalem khopui pumpui anbuoi sabak zei tī a lei riat a. 32Hatuka ama len sipai razaruoipū senkhat lē sipai senkhat a ruoi a, a tān u na. Hatuka sipai ruoipu ulian lē sipai ngāi a lei mu u na, Paul ei zēm chu among u na. 33#Efe 6:20; 2Ti 2:9Hatuka sipai ruoipu ulian chu a kōla a hong pan a, Paul chu a hong sūr a, hatuka zīngzir anni le ākhit ranga chong a pēk a. Hatuka ama hi tū mo ei ni, hong zāt mo ei thō tī a rakel a. 34Hatuka mipui ngāi chu angkhatin angkhat chong a ril a, angkhatin atei chong a ril a, a omzia tatak riatthei mak. Hasikhan ama chu sipai omna insūng apinga āruoi ranga chong a pēk a. 35Hatuka sirbī suok le chu mipui taksitna sika han ama chu sipai ngāiin adianga a maruoi u na. 36#Lk 23:18; Zn 19:15Asik chu mipui ngāiin anūk azī u na: “Ama chu pei u ro,” a tī na ankhēk u na.
Paul-in Mipui kōma Chong ei Rilna
37Paul chu rakul sūnga avā lūtpui u rang vita sipai ruoipu ulian kōma: “Na kōma chong mo ka ril lak thei?” a tī na. Amā'n, “Grik chong mo nā thei?” a tī na. 38#Mt 24:26“Aphāmān beta, āsel ruol anthoka miring 4,000 mibuirama a ruoi a, avā thatpū Āigupta mī ha ni mak chē mo?” 39Tenchu Paul-in, “Zehudi nama mī lē Kilikia rama Tarsa khopuia mi le khopui anthanga mi kā nī na. Na kōma kei na mathēm zōt khat chu: ‘Mipui ngāi kōma chong na manril lak ro ba,’ ” a tī na. 40#Zn 5:2Hatuka sipai ruoipū'n aphala Paul chu a kalna sirbīna andinga mipui ngāi dōra ādāi chīt ranga a kut le a zāp a. Hatuka amā'n Hebrāi chonga chong a ril a.
Bible in Ranglong, © Bibles International, the Bible society of Baptist Mid-Missions, 2024.