Kuitīr Ngāi Sinthō 15
15
Zerusalem-a Ruirilphom
1 #
Gal 2:12; 5:2-3 Hatuka Zudāi ram ātā pasal senkhat Antiok khuona a sē u na: “Mōsi dāna ei na tī anga, ser na mantan u nōk ten sandam ni thei u nō ta ni,” a tī na ūnāi ngāi kāra ei hong manchū u. 2Hatuka Paul lē Barnaba chu anngoi u mak achālaka ankhal sabak u na. Kuibing hān Paul, Barnaba lē a bil una ūnāi senkhat hava anbuoina ruia Zerusalem khopuia kuitīr ngāi lē pātar ngāi kōma āsē ranga ā ruot u na. Hatuka kuibingin amāni ngāi chu a tīr u na. 3Foiniki lē Samari ram ei va pal u balama namtei ngāi Pathian tianga ei hong kīr rēt u rui chu a ril u na. Havan han ūnāi ngāi dōra rāi a mansān sabak u na. 4Zerusalem khopui atung u le kuibing ngāi, kuitīr ngāi hanūk pātar ngāiin a lei phām u na. Hatuka Pathianin amāni manga sin ei thō ngāi dōra a ril u na. 5#Mt 3:7Tenchu, Farisāi phoma āiam ngāi bila mī senkhat anding u na: “Namtei ngāi sertan u rase, hanūk chu Mōsi dān ngāi um ei tel zit u ranga chongpēk in ti,” a ti u na.
6Hatuka kuitīr ngāi le pātar ngāiin hava ruia andon ranga anchun u na. 7Asōtpā ankhal suo u le Peter andinga a kōm u na: “Paruol le ūnāi ngāi, namtei ngāiin ka mūra ātā thangahui a riat a, ei iam una ranga Pathianin mān ātā nangni kār ātā ei na ruot ha nangnī'n na riattit u na. 8#Anl 2:23Hatuka malung āriatpū Pathianin amāni ei poma koini kōma Rathā Ānthiang ei na pēk anga amāni chungā'm Rathā Ānthiang ei pēka hin amāni kōma ama rui ei manriat a ni. 9Iamnā'n a malung u ei manthiang sika amā'n koini lē amāni na mantei lāi mak. 10#Mt 23:4; Gal 5:1Hatuka, koini na pī na pū ngāi le koinī'n nei pēl thei nōk rīngkol ha atun zolāi ngāi rīnga anput ranga ichanga mo hantin han Pathian nei mansin u? 11#Rōm 3:24; Gal 2:16; Efe 2:5-8Tenchu hantin han ni mak, amāni ei iam u anga koinī'm Puma Isuo Khristā lungkhamna zāra iama sandama nei om kēng,” a tī na.
12 #
Zn 4:48
Hatuka mipui dōra chu a dāi chīt u na. Barnaba le Paul hān Pathianin amāni manga namtei ngāi kāra sinsiana le boidongkhap sin ei thō u ngāi rui a ril u na, a rangāi u. 13#1Ko 15:7; Gal 1:19Hatuka, amāni chong aril among suole han Zakob-in chong a ril rēt a: “Paruol le ūnāi ngāi, ka chong na rangāipē u ro. 14#2Pe 1:1Pathianin mānsa chu a mi ngāi a hong thūn a, ama a raming anput ranga namtei ngāi ei āthangna rui chu Simon-in a ril zei a. 15Hava rui le deari ngāi chongril chu ānsūk thap a ni.
16“ ‘Hava suole han kīr rēt ka tī na,
David a puon-in a chiam chu manding rēt ka ti,
Ei siatna ngāi dōra manliang rēt ka ti.
Hiva ngāi dōra āthōthei Pumā'n manliang rēt ka ti.
17Nam tin chi tin dōrā'n Puma ei rok thei una ranga manding rēt ka ti.
Ka raming anput namtei ngāi dōrā'n Puma ei rok thei una ranga manding rēt ka ti.
Hiva ngāi dōra āthōthei Pumā'n ei tī a ni. (Am 9:11-12)
18 #
Isa 45:21
Tianlāi ātā Puma a sinthō ngāi dōra a hong ānril kēng a ni zei,’ ” a ti u na.
19Hava sika han hintin hin kei masat: “Namtei ngāi bila Pathian tianga ānhoi ngāi chu manpōn u lāi nō rei. 20#Aph 9:4; Lev 3:17; Dān 12:16, 23; 1Ko 8:7-13; 10:7-8; Anl 2:14, 20Tenchu a kōm una lekhā maziaka mathuon in ti. Amānī'n miramīl anmōk, ānnim abuong, hurna lē to-ōk adēna āthi mē sāk lē athī buong ātā ei bāng thei una ranga mathuon in ti. 21#2Ko 3:14-15Asik chu tianlāi ātā Mōsi chong rui aril titir mi khuo tina a om u a ni. Hanūk chu Sabat nikhuo kipa Sinagog ngāia ama chu ansiar chachak a,” a tī na.
Namtei Āiampū ngāi kōma Ruirilphom Lekhamathuon
22 #
2Ko 1:19; 1Th 1:1; 1Pe 5:12 Hatuka chu kuitīr ngāi le pātar ngāi kuibing pumpui anruol u na, ei pom u, hatuka Paul lē Barnaba bila Antiok khuona āsē rang amāni bila mi āthang u na. Ūnāi ngāi bila ulian anni āthang u na, hava ngāi ha Barsaba āntī Zuda le Sila a ni u na. 23#Lk 2:2; Zak 1:1Amānī'n hiva lekhamathuon hi a maziak u na. Kuitīr ngāi, pātar ngāi lē paruol ngāiin, nangni Antiok khuona, Suria lē Kilikia-na āom namtei ūnāi ngāi kōma chubai a na thō u. 24#Gal 1:7; 5:10Koinī'n na lei riat anga, koini ngāi bila mī senkhat na kōm una a hong a, chong le ei na hong manbuoi u, na malung sōk ei na manchāpē u a ni. Amānī'n, “Ser nei tan ngēt u na, dān nei zī u rang a nāng,” a ti u na. Amāni kōma han havan tin han chongpēk mak mē na. 25Hasikhan koinī'n malung munkhat achōia, ūnāi andit Barnaba lē Paul ngāi a bila mī senkhat nei thang ngāi ātīr hi asa ranga nei mandon a ni. 26#1Ko 15:30Puma Isuo Khristā raming sika ei dam una ānchān ngam mī a ni u na. 27Hasikhan Zuda lē Sila hi na kōm una nei hong tīr. Amānī'n hava ngāi rui dōra a mūr u nam na manthei u'n ti. 28Rathā Ānthiang le koinī'n um asa a tī na nei madon a ni, hiva anāng sabak rui ngāi rong nōk chu atei puok arikpā ngāi na manput u nō rei. 29Ramīl anmōknāna mē āndar asāk, thisen abuong, to-ōk andēna mē sāk le hurna nātā nei bāng u rang hi a ni. Hiva ngāi dōra nātā nā'n rung thei u ten āsā nā ni u zei. Hi tuk hin ni rase. Koinī'n na manhek zei.
30Hantin han ānthān suo u le Antiok khuona a sē u na, mipui ātampā a manchū u le hava lekhā ha a manlōn u na. 31Lekhā chu a siar u na, hatuka hava ha phūkdāina chong ei ni sika a rāi asān sabak u na. 32Zuda lē Sila, amānī'm deari a ni u na, chong atampā lē ūnāi ngāi lungngam asaka a manrāt a. 33#1Sa 1:17; Mk 5:34; Lk 7:50; 1Ko 16:11Hatuka nikhuo ho zet mo a om suo u le kuitīr ngāi kōma a kīr rēt ranga ūnāi ngāi chu phūkdāi taka anthānpui u na. 34Tenchu Sila chu hava han alā om chian ranga a zōt a. 35Tenchu Paul lē Barnaba chu Antiok khuona a om u na, Puma a chong ngāi lē thangahui chu atei atei mī tampā kōma a manchū u na, a ril u na.
Paul lē Barnaba ei Ānsen una
36Hatuka nikhuo ituk suole han mo chu Paul-in Barnaba kōma ei ti: “Tho, khuo tina Puma chong nei va ril suona ūnāi āom ngāi kōma sē rēta va en rei ba, hon titin mo ei om a ni u zei,” a tī na. 37Barnaba'n Mark āntī Zohan chu amāni bila aruoi ranga ei masuk a ni. 38Tenchu ama hi Pamfulia rama a bil una sin athō sē luia a lōm ngāi a māk rak a ni. Hasikhan havan tina miring aruoi chu Paul-in manchā lāi mak. 39Hantin han amāni le amāni ei ānkhal u sika ei ānsen u a ni. Barnaba'n a bila Mark a ruoi a, Saipras muolanlān tiang ei sēpui a ni. 40Tenchu Paul-in Sila ā thang a. Hatuka ūnāi ngāiin Puma a lungkhamnāna a betōk u na, ei sē u. 41#Lk 2:2Hatuka Suria ram le Kilikia rama vā chei a, kuibing ngāi dōra chu a va manchū u na.
Bible in Ranglong, © Bibles International, the Bible society of Baptist Mid-Missions, 2024.