Kuitīr Ngāi Sinthō 12
12
Ankhumna-in ātā Boidongkhapa Peter ei Zōkna
1 #
Zn 15:20
Hatuka hava hun dām lāi han rēng Herod chu kuibing ngāi kār ātā senkhat pēngsōm athō ranga kut anlek rang a thō na. 2#Mt 4:21; Mk 10:39Hatuka Zohan a paruol Zakob chu khendāi le a that a. 3#Ant 12:15Hava ei thō ha Zehudi ngāi a rāi asān u tī a riat a, Peter um a va mansūr a. Hava lāitaka nikhuo ngāi ha cholanchellui vāipōltāp pānta nikhuo a ni. 4#Zn 11:55Hatuka Peter chu a va mansūr suole ankhumna-ina a va khum a. Sipai manlī senga sipai raphom manlī'n arung ranga a betōk a. Asik chu Kallēn Pāntā ansuo le han mipui vāntāng matona anlang ranga a derdīn a ni. 5#Rōm 15:30-31; Efe 6:18Hasikhan Peter chu ankhumna-ina a khum chian a. Tenchu kuibing ngāiin ama ranga malung munkhata Pathian kōma zār a lei zongpē u na.
6Hatuka Herod han mipui matona a hong masuok rang tianga zāna han Peter chu sipai anni kongkāra zīngzir le ankhita a ina, hatuka ama arung ngāi um ni sela makot kōla a om a, ankhumna-in chu ei rung chian u a ni. 7#Sām 107:14Tenchu entā, Puma vānpalāi khat a kōla anlāiseka a hong anlang a, ankhumna-in chu raāngin a hong ēl a. Vānpalāiin Peter a kāng a hong vit a, a mathui a. Vānpalāiin a kōma, “Anthui lilīp ro,” a tī na. Hatuka zīngzir ngāi chu a kut ātā a chul zit len a. 8Vānpalāiin a kōma: “Na kōngkhit tānla, na puon ngāi rasila na kekok bun ta ro,” a tī na. Hatuka hava anga a thō na. Hatuka vānpalāiin a kōma: “Na kultāi puon rasil tān, ka nūk na hong zī ro,” a tī na. 9Hatuka Peter asuoka vānpalāi nūk chu a va zī na. Tenchu vānpalāiin ei ti le ei thō ngāi dōra ha ataktak kēng a tī na riatthei mak, anrālna ei mu anga a la mandon a. 10Hatuka a mānsāna ārung lē annināna ārung ngāi a khēl suo u le khopui suokna thīr makot chu a vā suok u na, hava ha a nininga anlongpē u na. Hatuka a suok u na, lampui khat azī suo u le chu vānpalāiin anlāiseka a māk rak a. 11#Sām 34:7; Dnl 3:28; Lk 15:17; 2Ko 1:10; 2Pe 2:9Hatuka Peter a hong āhian suole chu: “Atun lam chu ka riat tatak zei, Puma kēng a vānpalāi a hong tīr a, Herod a kut ātā lē Zehudi ngāi dōra derdīn ātā a na hong ānzōk a ni zei,” a tī na.
12 #
Kol 4:10; 2Ti 4:11; Flm 1:24; 1Pe 5:13 Hatuka hava ha a riat vang suole han Mark āntī Zohan a nū Mari ina a sē na. Hava han mī tampā zār azonga a lei ānkhōm u lāitak a ni. 13#Zn 18:16-17Peter-in suokkhār chu a hong ātōk a, nupang sanāitē khat a raming Roda'n a hong masang a. 14#Lk 24:41Hatuka amā'n Peter a rōl kēng tī ei riat phingle a rāi asān rahei a, makot malong luia insūng tiang atān rēt a: “Peter kēng makota a hong ānding chian,” a tī na a va ril a. 15#Mt 18:10Tenchu amānī'n, “Āchāng kēng nā ni zei hile,” a lei ti u na. Tenchu amā'n, “Ama ngēt kēng,” a tī rēt a. Hanōkten chu: “Ama a rathā kēng ei ni rang,” a tipē u na. 16Tenchu Peter-in suokkhār a lei ātōk chian a, hatuka a va malong u na, ama chu a mū u na, achālaka a boi a dong u na. 17Hatuka amā'n ādāirek ranga a kut le han a zāp a. Amāni kōma Pumā'n ankhumna-in ātā ei maruoi zia a ril a. Hatuka amā'n: “Sē u tānla, Zakob le ūnāi ngāi kōma hiva thang hi va ril u ro,” a tī na. Hatuka ama chu asuoka mun ateia a sē na.
18Hatuka zīng khuovāra chu sipai ngāi kāra anbuoina rahupuipā a suok a, Peter chu hon tiang mo ei om a ni zei ti andonna chang riat u lāi mak. 19Hatuka Herod hān asadima a ravān a, hanum ni sela, tok lāi mak. Hasikhan arung ngāi chu achālaka a radēk suole han athat kiar ranga chong a pēk a.
Herod ei Thina
Hatuka Herod chu Zudāi ram ātā Kaisaria khuona a sē na, hava han a vā om tot a. 20#1Rē 5:9, 11; Izk 27:17; Mt 11:21Hatuka Herod chu Tura lē Sidon khuona mi ngāi chunga achālaka a tak asī na. Tenchu hava ngāi ha lōkōna chong khat anruola a kōma a hong u na, hatuka rēng zālmun arungpū Blasta chu amāni ranga mal a sin u na. Asik chu rēngin aram ātā amāni rama anēk asāk rang ei va zon chachak a ni, hasikhan a kōma anngoina a va zong u na.
21Hun anruot nikhuona Herod chu a rēng raliang antianga, rēngchōmphānga ansuta, mipui ngāi kōma chong a ril a. 22Hatuka hava lāitak han mipui ngāi chu anring sabak a: “Hiva rōl chu Pathian rōl kēng, miring ni lāi mak!” a tī na ankhēk u na. 23#1Sa 25:38; 2Sa 24:16-17; 2Rē 19:35Hankēng Pathian kōma anlianna ei pēk nōk sik han anlāiseka Puma palāi khatin a hong zēm a, hatuka rūlrukutin asāka, ei thi len a ni.
24 #
Heb 4:12
Tenchu Pathian chong chu ansōna a pung riam a.
25Hatuka Barnaba le Saul chu a sinthō u rang azui u le Zerusalem khopui ātā a kīr u na. Amāni bila Mark āntī Zohan chu a ruoi u na.
Bible in Ranglong, © Bibles International, the Bible society of Baptist Mid-Missions, 2024.