ST. MARK 4
4
1Menuhwah dush kemahje‐kekenooahmahga emuh cheguhyeëeng ewh kechegumme, kuhya dush kepenaunzekahgood enewh kache‐ooquenoonejin, kaguhpe dush kepooze emuh nahbequauning, kenuhmuhduhbe dush emuh kechegummeeng, kuhkenuh dush egewh ahnishenahbag keähyahwug emuh chegebeeg.
2Kuhya dush nebewah oogeëzhekekenooahmahwaun emuh ahwajeguning, emuh dush ookekenooahmahgawining oo‐oo oogeënaun,
3Bezinduhmook; Benuh, pazhik suhswa‐wabenega‐wenene kesahguhum saswa‐wabenung ewh menekaun:
4Keëzhewabud dush, magwah suhswa‐wabenegad, ahnind menekaunun kepungesinoon emuh mahyahwekunah, kepeëzhahwug dush egewh kezhegoong duhzhe penasheyug, kekedaumwahwaud dush.
5Menuhwah dush ahnind kepungesinoon emuh ahsinekummegaung, kazhetena dush kesahguhkemahgud, kah muh gwach keühkeekahsenoon:
6Uhpe dush kahmookesad owh kezhike‐kezis, kechahgedamahgud kuhya kenebooda; kah muh keoojebekahwunsenoon.
7Menuhwah dush ahnind kepungesinoon emuh magwa‐menasuhgahwunzhekaug, kesahguhkewun dush enewh menasegahwunzheen, newoogindahnahwah dush, kah dush ketamenewunsenoon.
8Ahnind dush kepungesinoon emuh oonesheshing uhkee, kesahguhkemahgud dush, kuhya kemahjegin, kemekoogin dush, ahnind nesemeduhnuh, ahnind ningoodwahsoo‐meduhnuh, kuhya ahnind ningoodwauk.
9Oo‐oo dush oogeënaun, Ahwagwan watuhwuggahgwan chebezindung mahnoo tahbezindum.
10Uhpe dush kahnezhekawezid oogepeguhgwajemegoon enewh waujewegoojin kuhya enewh metauswe‐ahshe‐neezh ookekenooahmahgunun, azhenesittootahgwuk e‐ewh ahwajegun.
11Oo‐oo dush oogenaun, Kenuhwah kemeenegoom chekekanduhmag ewh nebwahkahwin emuh Kesha‐Muhnedoo oodoogemahwewining anduhgoog: egewh ahgwahjeeng ayahjig emuh ahwajegawining ezhekekenooahmahwahwug:
12Wahbewaud chewahbunduhmoowaud, chekekanduhsigwah dush; kuhya dush noonduhmoowaud chenoonduhmoowaud, chenesetootunsigwah dush; mahgahshah goomuhpe tahgequak‐ezhewabezeähwug cheoonjewabenuhmoowindwah dush oomujjeëzhewabezewinewaun.
13Oo‐oo dush oogeënaun, Kah nuh ween kekekanduhsenahwah maunduh ahwajegawin? ahneen dush kaëzhekekanduhmag kuhkenuh enewh ahwajegawinun?
14Owh saswa‐wabenegad oosuhswa‐wabenaun ewh ekedoowin.
15Oogoo dush mahyahwekuhnah ayahjig, anduhzhe‐ahchegahdag ewh ekedoowin; uhpe dush kahnoonduhmoowaud, bahbega peëzhah owh Satan, mahjetood dush ewh ekedoowin emuh oodaëwaung kahahjegahdanig.
16Oogoo dush emuh ahsinekummegaug kahahsindjig; uhpe kahnoonduhmoowaud ewh ekedoowin bahbega moojegezewaud oodoodahpenahnahwah;
17Kah suh dush oojebekesewug peenjenah, me suh wanebik atuh aungwahmezewaud; nahgujeesh dush uhpe pahgummishkahgoowaud ewh sunnuggezewin gamuh kooduggeëgoowin oonje ewh ekedoowin, bahbega wuhsittahwanduhmoog.
18Oogoo dush ween emuh magwa‐menasuhgahwunzhekaug kahduhzhe‐suhswa‐wabenegahzoojig, mesuh oogoo nwaundungig ewh ekedoowin,
19Azhebahbahmanduhmoowaud maunduh uhkee, kuhya azhewuhyazhemegoowaud wahnuhdezewin, kuhya oonzaum‐anduhmoowaud ahnooj gagoo pakaunukin uhyeëen noonda‐oondoomeëgoonahwah, medush neboodamahgudenig ewh ekedoowin, kah dush menewunsenoon.
20Oogoo dush emuh oonesheshing uhkee kahduhzhe‐suhswa‐wabenegahzoojig; mesuh oogoo nwaundungig ewh ekedoowin, kuhya wadahpenungig, menewewug dush, pazhik nesemeduhnuh, menuhwah pazhik ningoodwahsoo‐meduhnuh, menuhwah dush pazhik ningoodwauk.
21Oo‐oo dush oogeënaun, Oonjepejegahda nuh ewh wahsuhkoonanjegun emuh ahnaume‐tebaheguning cheähchegahdag, gamuh ahnaume‐nebahguning? kah nuh ween emuh wahsuhkoonanjegun‐ahtikoong cheähchegahdag?
22Kah muh gagoo kahjegahdasenoon, me atuh kamezheshuhwejegahdag; kah kuhya gagoo emuh kemoodezeewining ahchegahdasenoon, me atuh emuh wahsayahzewining cheähtag.
23Ahwagwan watuhwugahgwan chebezindung mahnoo tahbezindum.
24Oo‐oo dush oogeënaun, Nahnahgahdahwanduhmoog enewh nwaunduhmagoon, azhetebahegayag kegahezhetebahahmahgoom: kenuhwah dush nwaunduhmag nahwuj nebewah kegahmenegoom.
25Owh muh ayaung tahmeenah: owh dush ayaunsig tahmuhkummah pooch ewh ayaung.
26Oo‐oo dush keëkedoo, Kesha‐Muanedoo oodoogemahwewin ezhewabud debishko enene kahahtood enewh menekaunun emuh uhkeeng;
27Nebah dush kuhya oonishkah tabekudenig kuhya kahzhegudenig, sahguhkewun dush enewh menekaunun, kuhya mahjegenoon, kah dush ween ookekanduhseen nuhmunj azhewabudoogwan.
28Ewh muh uhkee tebenuhwa mahjegechegamahgud; netum ewh mezhushk, menuhwah dush ewh ahkunauk, eshquauch edush ewh wuhyahbetag mezemin emuh ahkunahkoong.
29Uhpe dush kahmenewid bahbega oodahyoon ewh kishkushkezhegun‐ahbik, ahzhe muh oojechesane ewh uhpe kakushkezhkezhegangebun.
30Keëkedoo dush, Ahneen kaëzheähwatooyung oodoogemahwewin owh Kesha‐Muhnedoo? gamuh ahneesh ahwajegun kaëzheähwatooyung?
31Debishkoo suh ezhewabud ewh pazhegoomenug wazahwuhnushkuk menekaun, uhpe ahjegahdag emuh uhkeeng mahmahwe ahgahsin menik ahduhchiug kuhkenuh uhkeeng duhzhe menekaunun:
32Uhpe dush kahahjegahdag, mahjegin kuhya dush mahmahwe mechahkooze menik anduhswahkoosewaud egewh metikoonsug, kuhya suhsugetekquaunuhgeze, penasheyug dush peähgahwahtashemoonoowug ahnahmebemug.
33Nebewah dush oonoo denoowun ahwajegunun oogeëzhedebahdoomahwaun ewh ekedoowin, azhekushketoonid chebezinduhmenid.
34Pwah‐ahwajegad dush kahween oogeguhnoonahseen: uhpe dush nazhekawezewaud, oogeweenduhmoowaun ahnooj gagoo enewh ookekenooähmahgunun.
35Ewh dush egoo kezhegudenig uhpe aneöonahgooshenig, Oo‐oo oogeënaun, Umba ahgahming ezhetuhkumoodah.
36Uhpe dush kahmahje‐nahzhahwahwaud enewh ahnishenahban, megoo azhepooseähwaud debishkoo azheähyahnid, emuh nahbequauning. Ahnind dush nahbequaunansun oogeweejewegoonahwaun.
37Kepuhgummahnemudene dush, kekechenootenenig keëzhepukketayaushkahwug egewh tegoowug emuh nahbequauning, zhuhyegwah dush mooshkenabegoobun.
38Ween dush emuh oodahkauning duhzhe‐nebahgoobun ahpahquashemoowining; kahahmuddenahwaud dush, oodenahwaun, Kakenooahmahgayun, kah nuh kebahbahmanduhse wenebooyaung?
39Kahoonishkaud dush, oogenuhneebekindaun ewh noodin, oo‐oo keëdung ewh kechegumme, Pezaun‐ahyaun. Kepoonahnemud edush, kuhya kekeche‐aunwahtin.
40Oo‐oo oogeënaun enewh kekenooahmahgunun, Ahnishwin oo‐oo ezhesagezeyag? Wagoonash wanjedabwayanduhsewag?
41Kekeche‐sagezewug dush, oo‐oo dush keëzheguhnoonedewaud, Ahwananedoog wah‐owh? oobezindahgoon suh ewh noodin kuhya ewh kechegumme?
Currently Selected:
ST. MARK 4: OTW
Highlight
Copy
Compare
Share
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
