ST. MARK 3
3
1Menuhwah dush kepeendega emuh ahnuhmeä‐weguhmigoong; kuhya dush ewede keähyah pazhik enene nabooweneenjeed.
2Oodahkahwahbuhmahwaun dush, kishpin wenooje-mooahnegwan aunwabe‐kezhegudenig, cheoonjeähnahmemahwaud.
3Oo‐oo dush oodenaun enewh nabooweneenjenejin enenewun, Puhsegween emuh nahwuhyeëeng.
4Oo‐oo dush oodenaun enewh Oonesheshin, enuh chemenoo‐doodahgang aunwabe‐kezheguk gamuh chemujje‐doodahgang, chebemahjewang gamuh cheneshewang? Kah dush ningood keëkedoosewug.
5Oogenishkahbuhmaun, keoonjekesahdandung azhemushkahwahnig oodaëwaun, oo‐oo dush oodenaun enewh enenewun, Umba zhebenekanin. Medush kezhebenekanid: kenoojemoomahgudene dush ooneenj debishkoo ewade pazhik.
6Egewh dush Phariseeg kesahgahumoog, bahbega dush keguhnoonendewug mahmahwe egewh Herodianug, ewh kaëzhechegawahpun wenesahwaud enewh Jesusun.
7Jesus dush keëzhah ewede ahgummeeng kuhya ookekenooähmahgunun; oogenoopenuhnegoon dush nebewah Galileeïng wanjebahnejin, kuhya Judeaïng.
8Kuhya Jerusaleming, kuhya Idumeäïng, kuhya ahgauming Jordan; kuhya dush egewh anduhnuhkeejig emuh jeguhyeëeng Tyre kuhya Sidon, kekeche‐meshenoowug, uhpe noonduhmoowaud eëwh azhekeche‐ahnookeed, oogepenaunzekahwahwaun.
9Oogeënaun dush enewh ookekenooahmahgunun, pashoo cheähgwindanig pazhik nahbequaunanse, cheoönje-sinsekahgoosig enewh waqueenoonejin ahneshenahban.
10Kemeshenoowun muh enewh kahnoojemooähjin; oogeähpeche‐sinsekahgoon wetaungenegood enewh kahmahnahdahpenanejin.
11Kuhya dush egewh wahnezejig muhnedoog, uhpe wuhyahbuhmahwaud, kepungeshinoog emuh anahsuhmenid, keähyahzhequawaud dush, oo‐oo keëkedoowaud, Keen kedoogwissemik owh Kesha‐Muhnedoo.
12Oogeähpeche‐aungwahmemaun dush chedebahjemegoosig.
13Ahmujjewa dush emuh wahjewing, oogenundoomaun dush enewh kahenanemahjin: medush goo kepeëzhenaunzekahgood.
14Oogewuhwanahbuhmahwaun dush metahswe‐ahshe‐neezh enewh kaweejewahjin, kuhya dush kaähnoonahjin chepahbah‐kuhgequanid,
15Kuhya chekushkeäwezenid chenoojemetoonid ahkoosewinun, kuhya chesahgeje‐wabenahnid enewh mujje‐muhnedoon:
16Enewh Simonun, Peter oogetuhgoo‐ezhenekahnaun;
17Enewh dush Jamesun, Zebedee oogwissun; kuhya enewh Johnun weejekewaün owh James; Boanerges dush oogeëzheweenaun oonoo, me suh ewh azhenesittootuming ahnemeke‐oogwissun:
18Kuhya enewh Andrewun, kuhya Philipun, kuhya enewh Bartholemewun, kuhya Matthewun, kuhya Thomasun, kuhya Jamesun Alpheus oogwissun, kuhya Thaddæusun, kuhya Simonun Zelotes.
19Kuhya Judas Iscariotun, mesuh enewh kahbahtahegoojin; kepeendegawug dush emuh wegewauming.
20Menuhwah dush kepemahwunjeëdewug egewh ahneshenahbag, kah dush kekushkeoosewug chewesenewaud.
21Uhpe dush oodenuhwamahgunun kahnoonduhmenid, kesahgahahmoog chetuhkoonahwaud: keëkedoowug muh, Kewuhnahdeze suh goo.
22Egewh dush oozhebeëga‐wenenewug Jerusaleming pahoonjebahjig oo‐oo keëkedoowug, Ookekishkahwaun enewh Beëlzebubun, kuhya dush oodoogemahmewaun egewh mujje‐muhnedoog oodoonjesahgeje‐wabenaun enewh mujje‐muhnedoon.
23Kahnundoomaud dush, oo‐oo oogeënaun emuh ahwajegawining, Ahneen kaëzhekushkeöopun owh Satan chesahgeje‐wabenaud enewh Satanun?
24Kishpin megahdezoomahguk oogemahwewin, kahween tahsoongekahbahwemahgussenoon ewh oogemahwewin.
25Kishpin dush wegewaum megahdezoomahguk, kahween ewh wegewaum tahsoongekahbahwemahgussenoon.
26Kishpin dush owh Satan megahdezood kuhya nanahwenind kahween kushkeoose chesoongekahbahwid, zhuhyegwah dush bahnahdeze.
27Kahween ahweyah kushkeöose chepeendegad emuh oowegewauming owh mashkahwezid enene, kuhya dush chemuhkummaud ooduhyeemun, bahmah netum keminjemahpenaud enewh mashkahwezenejin enenewun; me ewh uhpe kakushkeöod chemuhkummaud oowegewaum.
28Kagate kedenenim, Egewh enenewug oonejahnesewaun tahwabenahmahwahwug kuhkenuh mujjeëzhewabezewinun kuhya kuhkenuh mujje‐kezhwawinun kaëzhe-mujje‐kezhwawaud:
29Ahwagwan dush kamujje‐duhzhemahgwan enewh Keche‐oojechaugwun kahween wekah tahahbwayanemahse, chekahgega‐nahneboomind suh goo enandahgooze:
30Keëkedoowun muh, Ookekishkahwaun enewh mujje‐muhnedoon.
31Kepeëzhahwun dush wejekewaün kuhya oogeen ahgwahjeeng dush kenebahwewun, keähnookewun, chenundoomind.
32Enewh dush ahnishenahban kekewetah‐uhbetahgood oo‐oo dush keëgood, Benuh, kenundahwahbuhmegoog ahgwahjeeng keguh, kuhya kejekewaüg.
33Oogenuhquatuhwaun dush, oo‐oo keënaud, Ahwanan dush owh ninguh gamuh nejekewaüg?
34Kuhya dush oogenuhnahgahdah‐wahbuhmaun enewh kahkewetah‐uhbetahgoojin oo‐oo dush keëkedood, Mesuh oogoo ninguh kuhya nejekewaüg!
35Ahwagwan muh kadooduhmoogwan oodenanduhmoowin owh Kesha‐Muhnedoo, mesuh wah‐owh nejekewa, kuhya ninduhwamah, kuhya ninguh.
Currently Selected:
ST. MARK 3: OTW
Highlight
Copy
Compare
Share
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
