St Matthew 12
12
1Me ewh uhpe keühneëzhaud owh Jesus aunwabe‐kezhegudenig, emuh buhquazhegunushkoo‐ketegauning; kepuhkuddawun dush ookekenooahmahgunun, oogemahje‐cheshuhnukkebetoonahwah ewh buhquazhegunushk, kemeejewaud dush.
2Uhpe dush egewh Phariseeg wuhyahbuhmahwaud, oo‐oo oogeënahwaun, Benuh, kekekenooähmahgunug ezhechegawug ewh anandahgussenook cheëzhechegangebun ewh aunwabe‐kezheguk.
3Oo‐oo dush oogeënaun, Kah nuh kedoonjeähginduhsenahwah ewh kahezhechegad owh David, uhpe kepuhkuddad kuhya enewh kahwejewegoojin;
4Kepeendegad emuh Kesha‐Muhneedoo oowegewauming, kuhya keäumwaud enewh wahbundahewawine‐buhquazhegunun, kaäumwahsigoobun ween kuhya enewh kahwejewegoojin, sahsahgewejega‐wenenewug atuh aumwahwaud.
5Kah nah dush kuhya kedoonjeähginduhsenahwah emuh tebahkoonegawining, ewh azhebahnahjetoowaud ewh aunwabe‐kezhik egewh sahsahgewejega‐wenenewug emuh Keche‐ahnuhmeä‐weguhmigoong, kah dush oosettahwanemahsewug?
6Kedenenim dush, Oomah suh ahyah pazhig ahwahshema apetandahgoozid apetandahgwuk ween ewh keche‐ahnuhmeä‐weguhmig.
7Keshpin kekanduhmagoobun azhenessettootahgwuk ewh ekedoowin, Nenundahwandaun shahwanendewin, kahween ewh sahsahgewejegawin, kahween kedahgebahtahmahsewaug egewh majeëzhechegasegoog.
8Owh muh Enene oogwissun oodoogemahkundaun ewh aunwabe‐kezhik.
9Uhpe dush kahuhnemahjaud ewede, kepeendega emuh oodahnuhmeä‐weguhmigoowaung.
10Benuh dush, keähyah pazhik enene naboowenikad. Oogekuhgwajemahwaun dush, ekedoowaud, Oonesheshin nuh chenoojemooëwang aunwabe‐kezheguk? cheoonjebahtahmahwaud.
11Oo‐oo oogeënaun, Ahwanan owh enene kenuhwah anduhcheyag, ayahwaud pazhig enewh mahneshtahneshun, keshpin dush pungeshenenid emuh wahnekauning magwah aunwabe‐kezheguk, kah nuh ween oodahnuhwuhdenahseen, chewekoobenahpun dush?
12Kah nuh ween ahwahshema ahpetandadgoozese owh enene owh dush ween mahneshtahnish? Ahneesh! oonesheshin suh chemenoo‐doodahgang aunwabe‐kezhegukin.
13Medush oo‐oo enaud enewh enenewun, Zhebenikanin. Kezhebenikane dush; medush goo kahezhekahyundahwenekad, debeshkoo goo ewh ahzhahwenik.
14Egewh dush Phariseeg uhpe kahsahgahumoowaud, mahmahwe kekekedoowug ewh kaëzhechegawaud, chenesahwaud.
15Uhpe dush Jesus kahkekandung, ewede keöonjemahjah: oogenoopenuhnegoon dush nebewah enewh ahneshenahban, oogenoojemooäun dush kuhkenuh;
16Oogeäungwahmemaun dush chedebahjemegoosig.
17Cheoonjedebishkoosag ewh kahekedoopun owh Esaias aunwahjega‐wenene, oo‐oo keëkedood.
18Benuh, nenbuhmeetahgun kahwuhwanahbahmug, owh suhyahgeüg, enewh kache‐menwanemahjin owh ninjechaug; Ningahahtahwah nenjechaug, oogahwahbundahaun ewh quuhyuk‐ezhewabezewin enewh mayuggezenejin.
19Kahween tahmegahzoose, kah kuhya tahpepahgese; kah kuhya ahweyah oogahnoondunseen ewh oodenwawin emuh meekunaung.
20Mahyahkushkuk ahsahgunushk kahween oogahpookoobetooseen, kuhya paquananig sasuhbaub kahween oogahahtaünseen, nahnauzh egoo keshinguhdanahzhuhung ewk quuhyukwahdezewin chemahmauzheëwamahguk.
21Egewh dush mayuggezejig oogahahpanemoonahwah ewh oodezhenekahzoowin.
22Medush uhpe, kepeetahwind pazhik wamujje‐muhnedoomid, kakepeengwad, kuhya natuh‐kekedoosig: oogenoojemooäun dush, me dush goo owh kakepeengwad kuhya natuh‐kekedoosig kekekedood kuhya kewahbid.
23Kekeche‐mahmahkahdanduhmoog kuhkenuh egewh ahneshenahbag, oo‐oo dush keëkedoowaud, Kah nuh ween wah‐owh David oogwissun ahwese?
24Uhpe dush egewh Phariseeg kahnoonduhmoowaud, oo‐oo keëkekoowug, Kahween oosahgejewabenahseen enewh mujje‐muhnedoon, enewh suh ween Beëlzebubun oodoogemahmewaun mujje‐muhnedoog oowedookahgoon.
25Jesus dush oogekekanemaun ewh ananduhmenid, oo‐oo dush oogeënaun, Anduhching oogemahwewin papukkaun‐anendezoomahguk neshwuhnahdud; kuhya anduhching ewh oodanah gamuh ewh wegewaum mahgahdezoomahguk kahween tahsoongekahbahwemahgussenoon:
26Keshpin owh Satan sahgechewabenaud enewh Satanun, megahdezoo suh: ahneen dush kaëzhesoongekahbah-wemahgudenig ewh oodoogemahwewin?
27Keshpin dush neen, owh Beelzebub wedookahwid sahgeje‐wabenugwah mujje‐muhnedoog, ahwananun nungwahnah dush ween wedookahgoowaud egewh kegwissewaug sahgeje‐wabenahwaud? me dush egewh katebahkoonenagoog.
28Keshpin dush neen wedookahwid Kesha‐Muhnedoo Oojechaugwun sahgeje‐wabenugwah egewh mujje‐muhnedoog, zhuhyegwah kedoodessegoonahwah ewh oodoogemahwewin owh Kesha‐Muhnedoo.
29Ahneen dush ahweyah kaëzhekushketoopun chepeendegad emuh oowegewauming owh mashkahwezid enene, chemuhkummaud dush enewh ooduhyeëmene? bahmah atuh keminjemahpenaud mashkahwezenejin, medush uhpe chemuhkummahpun enewh ooduhyeemene emuh oowegewaumening atanegin.
30Owh wahjewesig nemegahnik; kuhya owh wahdookahwesig uhpe mahyahwunjechegayaunin, suhswawabenega suh.
31Mesuh oo‐oo wanjeënenuhgoog, Kuhkenuh ahnooj denoowun mujjeëzhewabezewinun kuhya mujje‐kezhwawinun tahwabenahmahwahwug egewh enenewug; mujje‐duhzhemind atuh owh Keche‐oojechaug kahween tahwabenahmahwahsewug egewh enenewug.
32Ahwagwan dush kamujje‐duhzhemahgwan enewh Enene oogwissun, tahwabenahmahwah; ahwagwan dush ween mujje‐duhzhemahgwan enewh Keche oojechaugwun, kahween tahwabenahmahwahse, oomah uhkeeng, gamuh ewede katuhgweshenoomahguk uhkee.
33Keshpin ooneshesheäg owh metik, tahoonesheshin ewh azhemenewid; gamuh keshpin mujje‐metekooäg, mesuh kaëzhemujjeuhyeëeweshewung oomenewin; azhemenewid suh me owh metik wanjekekandahgoozid.
34Kenuhwah mujje‐kenabegoong wandahdezeyag, ahneen kaëzhekushketooyag magwah mujje‐ezhewabezeyag chemenoo‐kekedooyag? anushkenag muh oodaëmah mesuh azhekekedoomahguk oodoonemah.
35Owh menoo enene emuh wanesheshing ahsunjeguning oodaëmah oodoondenaun enewh wenesheshingin; owh dush majeëzhewabezid enene emuh mujje‐ahsunjeguning oodoondenahnun enewh mujje‐uhyeeweshun.
36Kedenenim suh dush, Anduhching kuhkebahje‐kekedoowin ewh azhekekedoowaud egewh enenewug, tahahgindahmahwahwug tebahkoonewawine‐kezheguk.
37Me muh enewh kedekedoowinun kaöonjemenwanemegoozeyun, kuhya enewh kedekedoowinun kaöonjenah-neboomegooyun.
38Medush uhpe kenuhquatahgood ahnind enewh Phariseen kuhya oozhebeëga‐wenenewun, oo‐oo keëgood, Kakenooähmahgayun nenundahwandahmin chewahbunduhmaung kekenoowahjechegun.
39Oogenuhquatuhwaun dush, oo‐oo keënaud, Majeezhewabezejig kuhya pazhikwahdezejig bamahdezejig oonundahwandahnahwah kekenoowahjechegun: kah dush kuhnuhga kekenoowahjechegun tahmeenahsewug, ewh atuh ookekenoowahjechegun owh aunwahjega‐wenene Jonas:
40Debishkoo muh nesoo‐kezhik kuhya nesoo‐tebik keähyaud owh Jonas emuh oomesudaung owh mesahmag; me nahsaub kuhya ween owh Enene oogwissun nesookezhik kuhya nesoo‐tebik cheähyaud emuh oodaëwung ewh uhkee.
41Nineveh duhzhe enenewug oogahweejepuhsegwemahwaun uhpe tebahkoonewang oonoo noongoom bemahdezenejin, oogahnahneboomahwaun dush; keäunwanindezoowug muh kahkuhgekemegoowaud enewh Jonasun; benuh dush ween, ahwahshema apetandahgoozid oomah ahyah owh dush ween Jonas.
42Shahwunoong duhzhe oogemahqua oogahweejepuhsegwemaun oonoo noongoom bamahnezenejin, oogahnahneboomaun dush; ewede muh wuhyaquahkummegaug uhkee kepeöonjebah chebebezindung ewh oonebwahkahwin owh Solomon; benuh dush ween, ahwahshema apetandahgoozid oomah ahyah owh dush ween Solomon.
43Uhpe suh owh wahnezid muhnedoo kahsahguhungin emuh eneneeng, pahbahmoosa emuh anduhzhe‐nebekahsenook, nundoonaüng ewh aunwabewin, kah dush oomekunseen.
44Me dush uhpe ekedood, Nindahwauj nengahezhekewa emuh newegewauming kahpeoonjesahguhumaun; uhpe dush tagweshing, oomekaun pezheshigwahtanig, cheguhduhegahdanig, kuhya wahwazhechegahdanig.
45Uhnemahjaud dush, oodoodahpenaun neezhwahswe bakahnezenejin muhnedoon ahwahshema majeähyahah-weshewenejin ween dush azheähyaud, kuhya peendegawug, dahwug dush emuh; ewh dush eshquauj azhewabezid owh enene ahwahshema kuhgwahnesuggandahgooze ewh ween azheähyahpun wuhyashkud; me suh kaëzheähyahwaud oogoo noongoom bamahdezejig maje‐ezhewabezejig.
46Magwah kahguhnoonaud enewh ahneshenahban, benuh, oogeen kuhya weejekewayun ahwahjeeng kenebahwewun, nunduhwanemegood ewh cheguhnoonegood.
47Pazhik dush oo‐oo oogeëgoon, Benuh, keguh kuhya keejekewayug ahgwahjeeng nebahwewug, kenundahwanemigoog weguhnoonikwah.
48Oogenuhquatuhwaun dush enewh kahwahweendahmahgoojin, oo‐oo keënaud, Ahwanan nenguh? kuhya ahwananug neejekewayug?
49Kezhebenekatahwaud enewh ookekenooähmahgunun, oo‐oo keëkedood, Mesuh oogoo nenguh kuhya nejekewayug!
50Ahwagwan suh kaëzhechegagwan ewh oodenanduhmoowin owh Noos keche‐kezhegoong ayaud, mesuh owh nekahnis, kuhya nindahwamah kuhya ninguh.
Currently Selected:
St Matthew 12: OTW
Highlight
Copy
Compare
Share
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
