HEBREWUN 3
3
1Benuh dush, pahnezeyag wejekewaëmahdoog, kahnundoomegooyag ewh keche‐kezhegoong oonje nundoongawin, nahnahgahdahwanemik Christ Jesus Apostleewid kuhya kache‐sahsahgewejega‐wenenewid emuh kedezhetwahwinenaung;
2Owh kahmenoo‐ahnookeetuhwaud enewh kahahnoonegoojin, debishkoo owh Moses kahezhemenoo‐ahnookeed emuh kuhkenuh oowegewauming.
3Wah‐owh mahween keënanemah ahwahshema chekeche‐ahpeetandahgoozid dush ween Moses, menik ahwahshema keche‐ahpeetandahgoozid owh kahoozhetood wegewaum dush ween ewh wegewaum.
4Ahweyah keöozhegad keöonje‐oozhechegahdanoon kuhkenuh wegewaumun; Kesha‐Muhnedoowe suh owh kahoozhetood kuhkenuh gagoo.
5Kagate keminwaweze Moses emuh anegookquahnig oowegewaum, ewh kebuhmeetahga‐wenenewid, chedebahdoodung enewh uhyeëen nahguj wahwahweenjegahdagebuneen,
6Christ dush ween debishkoo owh wagwissemind wagemahkundung tebenuhwa oowegewaum; oowegewaum suh kenuhwind kedahwemin, kishpin minjemanduhmung ewh ahpanemoowin kuhya ewh mwahjegandahgwuk nunduhwanduhmoowin nahnauzh ishquah‐bemahdezeyung.
7Benuh dush (debishkoo kahekedood owh Pahnezid Oojechaug, Noongoom kezheguk kishpin wenoonduhmag ewh oodinwawin,
8Kagoo mushkahwetookagoon kedaëwaun, debishkoo emuh nishkeëdewining, kuhya uhpe kekuhgwatebaningawine‐kezheguk emuh buhgwuhduhkummig;
9Uhpe koosewahbuneeg kekuhgwatebanemewaud, kuhya kekuhgwa‐kekanemewaud, kuhya kewahbunduhmoowaud nindahnookeewinun nemeduhnuh duhsoo kekenoonoowinun.
10Me ewh kahoonje‐nishkanemugwah oogoo ahnishenahbag, oo‐oo dush keëkedooyaun, Moonzhug wuhneshenoog emuh oodaëwaung; kah dush oogekekanduhsenahwah nemeekunun.
11Mesuh kahoonje‐mushkahwe‐kezhwayaun magwah kenishkahdezeyaun, oo‐oo keëkedooyaun, Kahween tahtapeendegasewug emuh nindaunwabewining.
12Ahkahwahbeyook, nejekewaëdoog, koonemah ahweyah kenuhwah anduhsheyag oodahgeähyaun ahyahgoonwatahmoomahguk mujje‐oodaëmah chegenuhguhnaud enewh bamahdezenejin Kesha‐Muhnedoon.
13Anduhsoo kezheguk kuhgekindeyook, magwah ekedoong noongoom kezheguk; koonemah ahweyah menik anduhsheyag tahgemushkahwedaäshkahwah oonje wuhyazhingashkemahguk mujje‐ezhewabezewin.
14Kenuhwind mahween kemeenegoomin chedebandahgoozeyung emuh Christing, kishpin minjemanduhmung ewh kedahpanemoowinenaun netum kahahpanemooyung nahnauzh ishquah‐bemahdezeyung;
15Ewh dush ween oo‐oo keëkedoong, Noongoom kezheguk kishpin noonduhmag oodinwawin, kagoo mushkahwetookagoon kedaëwaun, debishkoo emuh nishkeëdewining.
16Ahwananug dush egewh uhpe kahnoonduhmoowaud kahnishkeëwajig? Kah nuh ween kuhkenuh egewh kahoonje‐sahgechewenegoojig enewh Mosesun emuh Egypting?
17Ahwananun dush enewh kahnishkanemahjin nemeduhnuh kekenoonoowinun? kah nuh ween egewh kahmujje‐ezhechegajig, ooweyowewaun kepungesinnenig emuh buhgwuhduhkummig?
18Ahwananun dush enewh kahenahjin uhpe kemushkahwe‐kezhwad chepeendegasenid emuh oodaunwabewining? kah nuh ween egewh kahdabwayanduhsigoog?
19Mesuh dush wahbunduhmung ewh kekushketoosigwah chepeendegawaud oonje ewh kedabwayanduhsigwah.
Currently Selected:
HEBREWUN 3: OTW
Highlight
Copy
Compare
Share
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
