GENESIS 45
45
1Joseph dush kahween oogekushketooseen chemuhwesig anahsuhmenid kuhkenuh enewh waujekahbahwetahgoojin; anegook dush kekekedoo, oo‐oo keëkedood, Mahnoo kuhkenuh tahsahguhuhmoog oonje emuh ahyahyaun. Kah dush ahweyah enenewun oogeweejekahbahwetahgooseen, magwah Joseph waunduhmahwaud wekahnesun ewh uhyahwid:
2Kekezhewa dush kemuhwid: kenoonduhmoog dush egewh Egyptianug kuhya egewh dabandahgoozejig emuh Pharaoh oowegewauming.
3Joseph dush oo‐oo oogeënaun enewh wekahnisun, Nindow suh Joseph; kayahbe nuh bemahdeze noos? Kah dush kekushketoosewun wekahnisun chenuhquatahgood; kemegooskahdanduhmoon mah ween oonje.
4Joseph dush oo‐oo oogeënaun enewh wekahnisun, Pashoo peëzhahyook kepahgoosaneminim: Pashoo dush kepeëzhahwun. Oo‐oo dush keëkedoo, Nindow Joseph keshemaëwah kahahtahwayag chepeëzhewenegooyaun oomah Egypting.
5Kagoo dush kushkandunkagoon, kagoo kuhya nishkanindezookagoon, ewh keähtahwayag neyow oomah chebeëzhe-wenegooyaun: ningeëzhenahzhahoog mah Kesha‐Muhnedoo oomah chebwah kenuhwah tuhgwishenag, cheöonjebemahjeëwayaun.
6Zhuhyegwah suh neezhoopepoonuhgud akoo‐pukkudda-kummeguk emuh uhkeeng: kahyahbe dush tahnahnoo‐pepoo-nuhgud, menik kapemeboojegaseeng kuhya kakishkushkezhegaseeng emuh uhkeeng.
7Kesha‐Muhnedoo dush ningeëzhenahzhahoog oomah chebwah kenuhwah tuhgwishenag cheöonje‐bemahdezewaud kenejahnesewaug emuh uhkeeng, kuhya chebemahjeënuhgoog kechebemahjeëgooyag:
8Kahween kenuhwah kegepeëzhenahzhahooseem oomah, Kesha‐Muhnedoo suh: ningepuggedenuhmaug dush cheöoyoosemid Pharaoh, kuhya cheöogemahkunduhmaun anegookwahnig Pharaoh oowegewaum, kuhya anegookookummegaug Egypting duhzhe uhkee.
9Waweeb mahjaug, ezhahyook noos, oo‐oo dush enik, Oo‐oo ekedoo kegwis Joseph, Kesha‐Muhnedoo ningeënahkoonig cheöogemahkunduhmaun anegookookummegaug Egypting duhzhe uhkee: penaunsekahweshin, kagoo kenooazh ewede duhnezekan:
10Kegahduhnuhkee dush emuh Goshening, cheguhyëe ahyahyaun kegahduhniz, keen, kuhya kenejahnesug, kuhya koosheshaüg, kuhya kemahnishtahnishemug, kuhya kepezhekeemug, kuhya kuhkenuh ayahwudjig.
11Ewede dush kegahahshummin; kayahbe mah nahnoo‐pepoon tahpukkuddakummegud; koonemah keen, kuhya egewh emuh kewegewauming dabandahgoozejig, kuhya kuhkenuh ayahwudjig, kedahketemahgezeem.
12Benuh dush kishkinzhegoon ahyooyag, kuhya neshema Benjamin ooshkinzhegoon ahyood, kewahbundahnahwah neen nindoon guhnoonegooyag.
13Kegahtebahjemootuhwahwah suh noos kuhkenuh azhekechetwahwandahgoozeyaun oomah Egypting, kuhya kuhkenuh uhyeëen kahwahbunduhmagoon; kegahwaweebetaum chenahnag noos.
14Oogenuhwuhdenaun dush Benjamin ooshemaün, kemuhwe dush; kuhya oogenuhwuhdenegoon Benjaminun, kemuhwenid emuh ooquagunaung.
15Kuhya oogeöojemaun kuhkenuh wekahnesun, kuhya kemuhwe uhpe nawuhdenaud: nahgujeesh dush oogeguhnoonegoon wekahnisun.
16¶ Kenoondahwahwug dush Pharaoh oowegewauming egewh oo‐oo kahekedoojig, Ketuhgwishenoon Joseph wekahnisun: keminwandum dush Pharaoh kuhya oobuhmeetahgunun.
17Pharaoh dush oo‐oo oogeënaun Josephun, Oo‐oo kegahenaug kekahnisug Oo‐oo ezhechegag; pemoonduhik kedoowuh-kaunewaug, ezhaug edush ewede Canaaning duhzhe uhkeeng;
18Kuhya oodahpenik koosewah kuhya egewh ayahjig kewegewaumewaung, penaunzekahweshig dush: kegahmeenenim dush enewh wanesheshingin emuh Egypting duhzhe uhkeeng, kegahmeejenahwah dush ewh kache‐weeninoowung emuh uhkeeng.
19Noongoom suh dush kekuhgaunzoomegoom oo‐oo cheëzhechegayag; oodahpenuhmahzooyook tatebesa‐ootahbaunun emuh Egypting duhzhe uhkeeng chenahnindwah dush kenejahnesewaug, kuhya nahnik koosewah peëzhaug dush.
20Kagoo kuhya buhbahmandunkagoon keduhyeëmewaun; anahsuhmeyag mah duhgoomahgud anegookwaug Egypting duhzhe uhkee.
21Medush oo‐oo kahezhechegawaud Israel oonejahnesun: Joseph dush oogemeenaun ootahbaunun, debishkoo kahekedoogoobunan Pharaoh, kuhya oogenuhwuhpoonaun.
22Kuhkenuh anduhchenid enenewun oogemeenaun ahgwewinun kaöonjeähyaunjekoonuhyanid, oogemeenaun dush ween Benjaminun niswauk‐dus‐wahbik shooneaun, kuhya ahgwewin nahning menik cheäunjekoonuhyanid.
23Oogeëzhenahzhahuhmahwaun dush oosun oonoo; metauswe mamaungishaün pamoonduhmenid wanisheshingin emuh Egypting, kuhya metauswe equa‐mamaungishaün pamoonduhmenid mundahmin kuhya buhquazhegun oosun kameejenid uhpe buhbahmahdezenid.
24Me dush kemahjenahzhahwaud enewh wekahnisun, kemahjahwun dush: oo‐oo dush oogeënaun, aungwahmezeg suh chekekaundesewag emuh meekunaung kaneëzhahyag.
25¶ Egypting dush keöonjemahjahwug, ketuhgwishenoog dush emuh uhyahnid enewh oosewaun Jacobun emuh Canaaning duhzhe uhkeeng.
26Oogeweenduhmahwahwaun dush, oo‐oo keënahwaud, Kayahbe bemahdeze Joseph, oodoogemahkundaun dush kuhkenuh anegookwaug Egypting duhzhe uhkee. Keüngoooguhna dush Jacob, kahmah oogedabwatuhwahseen.
27Oogeweenduhmuhwahwaun dush kuhkenuh oodekedoowinun owh Joseph, kahegoowaud: uhpe dush kahwahbuhmaud enewh ootahbaunun kahpeëzhenahzhahuhmahgoojin Josephun emuh ween chepoozid, nayaub kemenoodaä Jacob.
28Israel dush oo‐oo keëkedoo, Me menik, ningwis Joseph kayahbe bemahdeze: ningahahwewahbuhmah chepwah nebooyaun.
Currently Selected:
GENESIS 45: OTW
Highlight
Copy
Compare
Share
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
