GALATIANUN 6
6
1Nejekewaëdoog, kishpin ahweyah enene uhdemenegood ewh mujje‐ezhewabezewin, kenuhwah kakishkahwag owh Keche‐Oojechaug, nayaub ezhekewawenik emuh shahwanjegawin‐oojechaugoomaung; nahnahgahdahwanindezoon koonemah kuhya keen kegahkuhgwatebanemegoo.
2Nahdahmahdeyook mamashquaud uhpe pwahyah‐wunayag, me suh kaëzheguhnuhwanduhmag Christ ootebahkoonegawin.
3Kishpin suh enene enanindezood ningood cheähpeetandahgoozid, uhpe ningood ahpeetandahgoozesig, wuhyazhindezoo.
4Mahnoo anduhshid enene oogahnahnahgahdahwandaun tebenuhwa oodahnookeewin me dush kaöondenung moojegezewin emuh tebenuhwa ooweyowing atuh, kahween bakahnezenejin ooweyowening.
5Anduhshid muh enene oogahpemoondaun tebenuhwa oomewunekaun.
6Mahnoo owh kakenooahmahwind ewh ekedoowin oogahmeenaun enewh kakenooähmahgoojin kuhkenuh wanisheshingin uhyeëen.
7Kagoo wuhyazhindezookagoon; kahween Kesha‐Muhnedoo enandahgoozese chebahpenoodahwindebun: wagoodoogwan enene kaketegahduhmoogwan, mesuh ewh kasuggukkenung.
8Owh muh kategahdung ewh azhenunduhwanduhmoomahguk ooweyaus, weyausemaung oogahoondenaun ewh nishewahnahdezewin; owh dush kategahdung ewh azheminwandung owh Oojechaugoomah, Oojechaugoomaung ogahooondenaun ewh kahgega bemahdezewin.
9Kagoo kuhya ahnezheetunsedah emuh menoo‐dooduhmoowining: uhpe muh debiskoosag chekishkezhegayungoobun kegahkezhkezhegamin, kishpin ahnezheetunsewung.
10Umba dush, menik kushketooyung menoo‐doodahwahdwahnig kuhkenuh enenewug, mamwach edush egewh dabandahgoozejig emuh dabwayanduhmoowining.
11Kewahbundahnahwah azhemechaug mahjebeëgun tebenuhwa neneenjeeng kahmahjebeühmoonenuhgoog.
12Kuhkenuh menik nanduhwandungig menoo‐ezhewabezing cheëzhenahgoozewaud emuh weyausemaung, ketwa kekuhgaunzoomegoowaug chekekenoowahje‐kishkezhegahzooyag, me atuh cheöonje‐kooduggeähsewindwah oonje ewh oodahzhedayahtikoom owh Christ.
13Kah suh dush wenuhwah kakenoowahje‐kishkezhegahzoojig ooguhnuhwanduhsenahwah ewh tebahkoonegawin; kenunduhwanemegoog dush chekekenoowahje‐kishkezhegahzooyag ewh chemuhmequahzoowaud oonje enewh keweyausewah.
14Kah bahpish neen ningahoonje‐muhmequahzoose gagoo, me atuh oodahzhedayahtegoom Tabanemenung Jesus Christ, owh wanje‐netummahgooyaun ewh uhkee kuhya neen wanje‐netooyaun uhkee.
15Kah muh emuh Christ Jesusing ningood enahbuttussenoon ewh kekenoowahje‐kishkezhegahzoowin, gamuh kekenoowahje‐kishkezhegahzoosewin, ewh atuh aunje‐bemahdezewin.
16Menik edush kadishk oo‐oo enahkoonegang anoosajig, mahnoo oogahahyahnahwah ewh pezaunewawin, kuhya shahwanjegawin, kuhya kuhkenuh oodIsraelemun Kesha‐Muhnedoo.
17Kagoo dush menuhwah ahweyah ningahmegooshkahjeëgoose, nepahbahmewetoonun muh emuh neyowing ootahahpissahbahwawinun Tabaningad Jesus Christ.
18Nejekewaëdoog, ooshahwanjegawin Tabanemenung Jesus Christ kegahweejewegoonahwah emuh kejechaugoowaung. Amen.
Currently Selected:
GALATIANUN 6: OTW
Highlight
Copy
Compare
Share
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
