โรม 8
8
ซือมืองัจ นะ ตูฮัด บรี ฮีโดะ นู ซือนัง ซือลามัจ
1กะฆีเตอ_ โซะ ลูมอฮ ซือมียา นู ลือกัจ บือซามา ฌางัน เยซู คริด เตอ_ วะตู อีนี_ กูญา นะ ฮอย เตด กือนา กรัจ ฮูโกบ ดัฮ. 2ซาเบะ จะ_ ลาฆู ฮูโกบ นะ ซือมืองัจ นะ ตูฮัด เตอ_ จะ ซือมืองัจ นู บรี กีตา อาดา ฮีโดะ_ ลือกัจ บือซามา ฌางัน เยซู คริด เตอ_ ญา บือเลฮ บูวัจ บรี เกา#8.2 ซูรัจ ลามา ซือตืองัฮ ฆาแรฮ จะ “กู” ลือปัซ ดัฮ_ เดะ ลาฆู ฮูโกบ นู บูวัจ บรี ซือมียา บือดูซา_ นู บาวา ปี รอจ กะ มาตี. 3ลาฆู อีตู_ นู ปือมือเลา ฮูโกบ บูวัจ เตด บือเลฮ ดัฮ_ กรานา ปรางัย นะ อูมัจ ซือมียา นู ลือมัฮ ลือเตฮ เตอ_ ลาฆู อีตู ตูฮัด เดะ อาตัซ บือเลฮ บูวัจ ดัฮ กะฆีนี เลอ. ญา ซูโรฮ นานะ นะ ญา ตะอาซิก มาแรฮ_ ฌาดี บือกะ ซือรูปา กะ อูมัจ ซือมียา นู บือดูซา_ มาแรฮ ฌาดี ซือบารัก มือนืองะ_ นู บรี ลือปัซ เดะ ดูซา. กะฆีเตอ_ ตูฮัด ญา บือเลฮ ฌือนัฮ เดะ ลาฆู ดูซา_ เดะ ปรางัย นะ อูมัจ ซือมียา เลอ. 4ญา บูวัจ กะฆีเตอ ดัฮ_ บีดา จะ_ ลาฆู นู บาฌิ อีตู_ นู ปือมือเลา ฮูโกบ นะ ตูฮัด ปือซัด ดัฮ เตอ_ กีตา นะ บือเลฮ บูวัจ บรี ซุจ ฮาบิฮ_ บือกะ นู กีตา บือฌาลัด ตูโรจ กะ ซือมืองัจ นะ ตูฮัด_ บูกัด ตูโรจ กะ ปรางัย นะ อูมัจ ซือมียา. 5ซาเบะ จะ_ โกะ ซือมียา นู ตูโรจ กะ ปรางัย นะ อูมัจ ซือมียา เตอ_ ฮาตี นะ กูญา ลือกัจ เดะ ลาฆู นะ อูมัจ ซือมียา เลอ. ตาปี โกะ ซือมียา นู ตูโรจ กะ ซือมืองัจ นะ ตูฮัด เตอ_ ฮาตี นะ กูญา ลือกัจ เดะ ลาฆู นะ ซือมืองัจ อีตู เลอ. 6กรานา จะ_ นู ฮาตี นะ ลือกัจ_ เดะ ปรางัย นะ อูมัจ ซือมียา เตอ_ นะ บาวา บือปี กะ มาตี เลอ. ตาปี นู ฮาตี ลือกัจ_ เดะ ลาฆู โซะ ซือมืองัจ นะ ตูฮัด เตอ_ ญา นะ บาวา บือปี กะ ลาฆู ฮีโดะ_ นู ซือนัง ซือลามัจ เลอ. 7กะฆีเตอ_ ซือมียา นู ฮาตี นะ ญา_ ลือกัจ เดะ ปรางัย นะ อูมัจ ซือมียา เตอ_ ญา บือลาวัด ฌางัน ตูฮัด เลอ_ ซาเบะ ญา เตด บูวัจ ตูโรจ_ กะ ปือมือเลา ฮูโกบ นะ ตูฮัด. โงฮซูโงฮ เลอ_ ญา นะ บูวัจ ตูโรจ เตด บือเลฮ. 8โกะ ซือมียา นู อาดา ตูโรจ กะ ปรางัย นะ อูมัจ ซือมียา เตอ_ นะ บูวัจ บรี ตูฮัด ซูกา ฮาตี_ ฮอย เตด บือเลฮ ดัฮ เลอ.
9ดัฮ ซือมืองัจ นะ ตูฮัด เดะ อาตัซ_ ดูโดะ ปือนอฮ เดะ ฮาตี นะ กาเญา เตอ_ กาเญา นะ เตด ตูโรจ โซะ ปรางัย นะ อูมัจ ซือมียา_ ตาปี นะ ตูโรจ โซะ ซือมืองัจ นะ ตูฮัด อีตู เลอ. ดัฮ ซือมียา ดีฮา ฮอย ซือมืองัจ นะ เยซู คริด_ ซือมียา อีตู_ ญา เตด ฌาดี ซือมียา นะ เยซู เลอ. 10ตาปี ดัฮ เยซู คริด อาดา ดูโดะ เดะ ฮาตี นะ กาเญา เตอ_ มีเซ จะ_ โซะ ญาวา_ กาเญา นะ มาตี ดัฮ_ กรานา ลาฆู ดูซา_ ตาปี โซะ ซือมืองัจ นะ ตูฮัด_ นะ บรี กาเญา ฮีโดะ_ กรานา กาเญา บาฌิ ตือปัจ ฌางัน ตูฮัด. 11ตูฮัด เดะ อาตัซ_ ญา บือเลฮ บูวัจ บรี เยซู ฮีโดะ ปาเระ เดะ มาตี ดัฮ. กะฆีเตอ เลอ_ ดัฮ ซือมืองัจ นะ ตูฮัด อาดา ดูโดะ_ เดะ ฮาตี นะ กาเญา_ ตูฮัด เตอ เลอ_ ญา นะ ซูโรฮ ซือมืองัจ อีตู_ บีดา นะ บูวัจ บรี ญาวา นะ กาเญา นู ฆาโดฮ มาตี_ นะ อาดา ฮีโดะ เลอ.
12กะฆีเตอ เลอ_ โกะ ดีบราดี นะ กู เออ_ กีตา ตือฮูตัก ดัฮ_ ตาปี บูกัด ตือฮูตัก เดะ ปรางัย นะ อูมัจ ซือมียา กีตา_ นู นะ ฆาโดฮ บูวัจ ตูโรจ บือกะ ปรางัย อีตู. 13ซาเบะ จะ_ ดัฮ กาเญา ตูโรจ กะ ปรางัย นะ อูมัจ ซือมียา อีตู เตอ_ กาเญา ฆาโดฮ นะ มาตี. ตาปี ดัฮ ซือมืองัจ นะ ตูฮัด ตูโลก กาเญา_ บรี บูนอฮ โกะ ปือบูวัจ นู บือดูซา นะ กาเญา_ กะฆีเตอ กาเญา นะ อาดา ฮีโดะ ซูโงฮ. 14ราตา ซือมียา นู ซือมืองัจ นะ ตูฮัด บาวา บือปี เตอ_ โกะ ซือมียา อีตู เลอ_ ฌาดี นานะ นะ ตูฮัด ดัฮ. 15กรานา จะ_ ซือมืองัจ นู กาเญา ซาโมจ ดัฮ_ ญา เตด บูวัจ บรี กาเญา ฌาดี ปราโซฮ_ ฌาดี ซือมียา ปือนาโกจ ปูลัก เลอ. ตาปี ซือมืองัจ อีตู_ ญา บูวัจ บรี กาเญา ฌาดี นานะ นะ ตูฮัด ดัฮ. ญา เตอ_ นู บรี กีตา บือซาโวจ_ บลาโลก กะ ตูฮัด จะ_ “อับบา”_ ฌาดี จะ_ “ปะ เออ.” 16กะฆีเตอ_ ซือมืองัจ นะ ตูฮัด เตอ_ ญา ฌาดี ซะซรี_ บูวัจ บรี ฮาตี นะ กีตา ตาฮู ตือตู จะ_ กีตา เลอ_ ฌาดี นานะ นะ ตูฮัด เดะ อาตัซ. 17นู กีตา ฌาดี นานะ นะ ตูฮัด ดัฮ_ กีตา นะ บือเลฮ ซาโมจ ปือซากา ฌูฆา_ ฌาดี ลาฆู บาฌิ นู ตูฮัด เดะ อาตัซ อาดา ตาโรฮ ดัฮ_ บีดา นานะ นะ ญา. ปือซากา อีตู_ กีตา นะ ซาโมจ บือซามา ฌางัน เยซู คริด. ซาเบะ จะ_ นู กีตา กือนา ตาฮัด ซูซัฮ ปายัฮ_ บือซามา ฌางัน เยซู เตอ_ กีตา นะ ซาโมจ ลาฆู นู บือซรี บือซายา_ บือซามา ฌางัน ญา ฌูฆา เลอ.
ลาฆู บือซรี บือซายา_ นู กีตา นะ ซาโมจ
18กู ตือตู ฮาตี จะ_ ลาฆู ซูซัฮ นู กีตา ฆาโดฮ กือนา_ เดะ ฮาดัจ อีนี_ ญา เตด บือฆูนา นะ อาเมด ปี ปือซามา_ ฌางัน ลาฆู บือซรี บือซายา อีตู_ นู ตูฮัด นะ ปลีฮัจ กะ กีตา เลอ. 19ซาเบะ จะ_ โกะ บือนา บารัก นู ตูฮัด บือฌาดี ดัฮ ซือมูฮา_ อาดา บือคานะ ตาฮัด นาตี_ ฌางัน ฮาตี ปือนอฮ ซูโงฮ_ นะ ลีฮัจ อารี อีตู_ นู ลูมอฮ โกะ นานะ นะ ตูฮัด_ นะ ปลีฮัจ ดัฮ. 20โกะ บือนา บารัก นู บือฌาดี ดัฮ อีตู_ ญา กือนา ปรือกัด ดัฮ_ บรี ฌาดี ซือบารัก ฮอย เตด ตือปากัย เลอ_ บูกัด ตูโรจ กะ ฮาตี ตะอาซิก_ ตาปี ตูโรจ ฮาตี นะ ตูฮัด_ นู ปรือกัด ดัฮ เตอ. ตาปี อาดา ตือปัจ จาดัก กะฆีนี จะ_ 21อาดา ซืออารี_ โกะ ซือบารัก นู บือฌาดี ดัฮ เตอ_ ญา โปด_ นะ ลือปัซ ซูโงฮ ดัฮ_ เตด ฆาโดฮ นะ บูโระ บูโซะ ปูลัก เลอ_ ตาปี นะ รอจ กะ ลาฆู ลือปัซ บาฌิ_ ลาฆู บือซรี บือซายา_ บือซามา ฌางัน ลูมอฮ โกะ นานะ นะ ตูฮัด. 22ซาเบะ กีตา ตาฮู จะ_ ตือดะ รอจ กะ ฮาดัจ อีนี_ โกะ ซือบารัก นู บือฌาดี ดัฮ ซือมูฮา_ อาดา ซือรูปา มือนาแงฮ มือรายู_ ซือรูปา บือกะ นีบีนี_ นู ซาเกะ นะ ดูโดะ เดะ อาปี เลอ. 23บูกัด ซา โกะ ซือบารัก อีตู_ ตาปี ลูมอฮ กีตา ฌูฆา. กีตา บือเลฮ ซาโมจ ซือมืองัจ นะ ตูฮัด ฌาดี ซือรูปา บูวัฮ นู ลามูลา_ เดะ ลาฆู บาฌิ นู ตูฮัด นะ บรี กะ กีตา. ตาปี วะตู อีนี_ นู กีตา อาดา นาตี ลาฆู นู ตูฮัด นะ ซาโมจ กีตา_ บรี ฌาดี นานะ นะ ญา เตอ_ ฌาดี จะ_ นะ มือนือบุซ ญาวา กีตา_ บรี ลือปัซ เดะ มาตี ดัฮ_ กีตา โปด ฌูฆา_ อาดา มือนาแงฮ มือรายู เดะ ฮาตี กะฆีเตอ เลอ. 24กรานา จะ_ ตูฮัด บือเลฮ บูวัจ บรี กีตา ฮีโดะ ลือปัซ บาฌิ ดัฮ_ บีดา กีตา นะ จาดัก เดะ ลาฆู กะฆีเตอ บือเลฮ เตอ. ตาปี ดัฮ กีตา นะ บือเลฮ ลีฮัจ ตือปัจ จาดัก นะ กีตา_ บูกัด จะ กีตา จาดัก ซูโงฮ. ซาปา เลอ_ นู จาดัก เดะ ลาฆู นู ญา ลีฮัจ บือฆารี ซัฮ? 25ตาปี ดัฮ กีตา จาดัก เดะ ลาฆู นู กีตา ลีฮัจ เตด บือฆารี เตอ_ กีตา นะ ตาฮัด ฮาตี_ นาตี ลาฆู อีตู เลอ.
26กะฆีเตอ ฌูฆา_ ซือมืองัจ นะ ตูฮัด ญา มาแรฮ ตูโลก กีตา_ นู ฌาดี ซือมียา ลือมัฮ ลือเตฮ เตอ. ซาเบะ จะ_ กีตา เตด ตาฮู นะ บือซาโวจ กะฮามี บาฌิ_ ตาปี ซือมืองัจ อีตู โปด_ ญา มือนาแงฮ มือรายู บือซาโวจ_ บือกะ มือเลา เตด ตรือเบะ_ มีตา เดะ ตูฮัด เดะ อาตัซ บีดา กีตา เลอ. 27กะฆีเตอ_ ตูฮัด เดะ อาตัซ เตอ_ ญา นู มือญาซัจ ลีฮัจ ฮาตี นะ โกะ อูมัจ ซือมียา_ ญา ตาฮู ลาฆู นามา_ นู อาดา เดะ ฮาตี นะ ซือมืองัจ นะ ญา_ ซาเบะ จะ_ ซือมืองัจ อีตู_ ญา บือซาโวจ มีตา บีดา โกะ ซือมียา นะ ตูฮัด_ ตูโรจ กะ ฮาตี นะ ตูฮัด เดะ อาตัซ เลอ.
28กีตา ตาฮู ดัฮ จะ_ ตูฮัด ญา อาดา บือกรือฌา_ บูวัจ บรี บือนา ซือมูฮา ฌาดี บาฌิ ดัฮ_ บีดา โกะ ซือมียา นู ซายัก กะ ญา_ ฌาดี จะ_ โกะ ซือมียา นู ตูฮัด บือเลฮ ปาเงน ดัฮ_ ตูโรจ บือกะ ลาฆู นู ญา กีรา ตือตู ดัฮ. 29โกะ ซือมียา ดีฮา นู ตูฮัด กราลา ดูลู ดัฮ_ ซือมียา อีตู เตอ_ ญา บือเลฮ ตืองะ_ บรี กูญา นะ ฌาดี ซือรูปา บือกะ เยซู_ นานะ นะ ญา_ บีดา เยซู อีตู นะ ฌาดี นานะ ซูโลก_ เดะ ตืองัฮ โกะ อาดี บราดี บาญะ อูรัก เลอ. 30กะฆีเตอ_ ซือมียา ดีฮา นู ตูฮัด บือเลฮ ตืองะ ดัฮ_ ซือมียา อีตู_ ญา บือเลฮ ปาเงน ดัฮ ฌูฆา. ซือมียา ดีฮา นู ญา บือเลฮ ปาเงน ดัฮ เตอ_ ซือมียา อีตู_ ญา บือเลฮ บูวัจ บรี บาฌิ ตือปัจ ฌางัน ญา ดัฮ. ซือมียา ดีฮา นู ญา บือเลฮ บูวัจ บรี บาฌิ ตือปัจ เตอ_ ซือมียา อีตู_ ญา บือเลฮ บูวัจ บรี ฌาดี บือซรี บือซายา ฌูฆา เลอ.
ตูฮัด ซายัก กีตา บาญะ ซูโงฮ
31ดัฮ ตาฮู ลาฆู กะฆีเตอ_ กีตา นะ มือเลา กะฮามี เลอ? ดัฮ ตูฮัด เดะ อาตัซ_ อาดา โซะ กีตา เตอ_ ซาปา เลอ_ นู นะ มาแรฮ บือลาวัด? 32ตูฮัด ญา ฮอย เตด มือญือซัน นานะ นะ ญา ตะอาซิก_ ตาปี ญา บือเลฮ ซรัฮ นานะ อีตู บรี มาตี_ กรานา กีตา ซือมูฮา. กะฆีเตอ_ ลาฆู นู บาฌิ ซือมูฮา_ ญา นะ ฮาลัย บรี กะ กีตา_ บือซามา ฌางัน นานะ นะ ญา_ บูกัด เฆอ? 33กีตา ซือมียา นู ตูฮัด ปีเลฮ ดัฮ เตอ_ ซาปา เลอ_ นู นะ อาดู กีตา? ตูฮัด เดะ อาตัซ เตอ เลอ_ ญา กีรา จะ_ กีตา บาฌิ ตือปัจ ดัฮ. 34ซาปา เลอ_ นู นะ กรัจ ฮูโกบ กีตา? เยซู คริด เตอ_ ญา นู มาตี ดัฮ_ ลือเบฮ เดะ อีตู โปด_ ญา ฮีโดะ ปาเระ เดะ มาตี_ อาดา ดูโดะ โซะ ซือบือลัฮ กานัน_ นะ ตูฮัด เดะ อาตัซ. ญา เลอ_ ตืองัฮ บือซาโวจ มีตา เดะ ตูฮัด_ ปาซัน ลาฆู นะ กีตา ซือมูฮา. 35กะฆีเตอ_ ซาปา เลอ_ นะ บูวัจ บรี กีตา ปูตุซ_ เดะ ลาฆู นู เยซู คริด ซายัก กีตา? ลาฆู นู ซูซัฮ_ นู ฮาฌะ โตระ เตอ_ เฆอ จะ_ นู ซือมียา นะ ปรือกัด กีตา เตอ_ เฆอ จะ_ นู ฮอย ซือบารัก มากัด_ ฮอย กาเยด นะ ปากัย เตอ_ เฆอ จะ_ นู กีตา กือนา ลาฆู นู บรี ตาโกจ_ นู กีตา นะ กือนา บูนอฮ บรี มาตี เตอ? โกะ ลาฆู กะฆีเตอ นะ บูวัจ บรี กีตา ปูตุซ_ เดะ ลาฆู ซายัก อีตู_ บือเลฮ เฆอ? 36ซือรูปา ซูรัจ ปือมือเลา นะ ตูฮัด นู จะ
“กรานา กีตา ตูโรจ กะ ตูฮัด ดัฮ เตอ_ บีลัก อารี โกะ ซือมียา นะ บูนอฮ กีตา เลอ
กูญา กีรา จะ_ กีตา ซือรูปา บือกะ กาเมก_ นู นะ บาวา ปี บูนอฮ #
มปต 44.22 .” ญา จะ.
37บูกัด กะฆีเตอ เลอ_ ตาปี เดะ ลาฆู อีนี ซือมูฮา_ กีตา ฌือนัฮ ปือนอฮ บาญะ ซูโงฮ_ กรานา เยซู นู ซายัก กะ กีตา ดัฮ. 38กู ตือตู ฮาตี จะ_ ฮอย ลาฆู นามา เลอ_ นู นะ บือเลฮ บูวัจ บรี กีตา ปูตุซ_ เดะ ลาฆู นู ตูฮัด ซายัก กีตา_ เตด จะ ลาฆู มาตี_ ลาฆู ฮีโดะ เตอ_ เตด จะ โกะ ฮูลู บาลัก เฆอ จะ โกะ ฌิด โกะ ฮาตู โปด_ เตด จะ ลาฆู เดะ อารี อีนี_ ลาฆู เดะ อารี โซะ ฮือลด เตอ_ เตด จะ โกะ ปือมือฆัฮ มานามา 39เตด จะ ลาฆู โซะ อาตัซ_ ลาฆู โซะ บาวัฮ โปด. เดะ โกะ ซือบารัก นู ตูฮัด บือฌาดี ดัฮ ซือมูฮา เตอ_ ฮอย นามา เลอ_ นู นะ บือเลฮ บูวัจ บรี กีตา ปูตุซ_ เดะ ลาฆู นู ตูฮัด บือซัยํ เดะ อาตัซ ซายัก กะ กีตา_ บือกะ นู ญา ปลีฮัจ ดัฮ_ เดะ เยซู คริด_ ตูฮัด นะ กีตา เลอ.
Currently Selected:
โรม 8: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
