Popular Bible Verses from โรม 8

Share

กีตา ตาฮู ดัฮ จะ_ ตูฮัด ญา อาดา บือกรือฌา_ บูวัจ บรี บือนา ซือมูฮา ฌาดี บาฌิ ดัฮ_ บีดา โกะ ซือมียา นู ซายัก กะ ญา_ ฌาดี จะ_ โกะ ซือมียา นู ตูฮัด บือเลฮ ปาเงน ดัฮ_ ตูโรจ บือกะ ลาฆู นู ญา กีรา ตือตู ดัฮ.

กู ตือตู ฮาตี จะ_ ฮอย ลาฆู นามา เลอ_ นู นะ บือเลฮ บูวัจ บรี กีตา ปูตุซ_ เดะ ลาฆู นู ตูฮัด ซายัก กีตา_ เตด จะ ลาฆู มาตี_ ลาฆู ฮีโดะ เตอ_ เตด จะ โกะ ฮูลู บาลัก เฆอ จะ โกะ ฌิด โกะ ฮาตู โปด_ เตด จะ ลาฆู เดะ อารี อีนี_ ลาฆู เดะ อารี โซะ ฮือลด เตอ_ เตด จะ โกะ ปือมือฆัฮ มานามา เตด จะ ลาฆู โซะ อาตัซ_ ลาฆู โซะ บาวัฮ โปด. เดะ โกะ ซือบารัก นู ตูฮัด บือฌาดี ดัฮ ซือมูฮา เตอ_ ฮอย นามา เลอ_ นู นะ บือเลฮ บูวัจ บรี กีตา ปูตุซ_ เดะ ลาฆู นู ตูฮัด บือซัยํ เดะ อาตัซ ซายัก กะ กีตา_ บือกะ นู ญา ปลีฮัจ ดัฮ_ เดะ เยซู คริด_ ตูฮัด นะ กีตา เลอ.

กะฆีเตอ ฌูฆา_ ซือมืองัจ นะ ตูฮัด ญา มาแรฮ ตูโลก กีตา_ นู ฌาดี ซือมียา ลือมัฮ ลือเตฮ เตอ. ซาเบะ จะ_ กีตา เตด ตาฮู นะ บือซาโวจ กะฮามี บาฌิ_ ตาปี ซือมืองัจ อีตู โปด_ ญา มือนาแงฮ มือรายู บือซาโวจ_ บือกะ มือเลา เตด ตรือเบะ_ มีตา เดะ ตูฮัด เดะ อาตัซ บีดา กีตา เลอ.

ดัฮ ตาฮู ลาฆู กะฆีเตอ_ กีตา นะ มือเลา กะฮามี เลอ? ดัฮ ตูฮัด เดะ อาตัซ_ อาดา โซะ กีตา เตอ_ ซาปา เลอ_ นู นะ มาแรฮ บือลาวัด?

กะฆีเตอ_ โซะ ลูมอฮ ซือมียา นู ลือกัจ บือซามา ฌางัน เยซู คริด เตอ_ วะตู อีนี_ กูญา นะ ฮอย เตด กือนา กรัจ ฮูโกบ ดัฮ.

กรานา จะ_ นู ฮาตี นะ ลือกัจ_ เดะ ปรางัย นะ อูมัจ ซือมียา เตอ_ นะ บาวา บือปี กะ มาตี เลอ. ตาปี นู ฮาตี ลือกัจ_ เดะ ลาฆู โซะ ซือมืองัจ นะ ตูฮัด เตอ_ ญา นะ บาวา บือปี กะ ลาฆู ฮีโดะ_ นู ซือนัง ซือลามัจ เลอ.

บูกัด กะฆีเตอ เลอ_ ตาปี เดะ ลาฆู อีนี ซือมูฮา_ กีตา ฌือนัฮ ปือนอฮ บาญะ ซูโงฮ_ กรานา เยซู นู ซายัก กะ กีตา ดัฮ.

กู ตือตู ฮาตี จะ_ ลาฆู ซูซัฮ นู กีตา ฆาโดฮ กือนา_ เดะ ฮาดัจ อีนี_ ญา เตด บือฆูนา นะ อาเมด ปี ปือซามา_ ฌางัน ลาฆู บือซรี บือซายา อีตู_ นู ตูฮัด นะ ปลีฮัจ กะ กีตา เลอ.

กะฆีเตอ_ ซาปา เลอ_ นะ บูวัจ บรี กีตา ปูตุซ_ เดะ ลาฆู นู เยซู คริด ซายัก กีตา? ลาฆู นู ซูซัฮ_ นู ฮาฌะ โตระ เตอ_ เฆอ จะ_ นู ซือมียา นะ ปรือกัด กีตา เตอ_ เฆอ จะ_ นู ฮอย ซือบารัก มากัด_ ฮอย กาเยด นะ ปากัย เตอ_ เฆอ จะ_ นู กีตา กือนา ลาฆู นู บรี ตาโกจ_ นู กีตา นะ กือนา บูนอฮ บรี มาตี เตอ? โกะ ลาฆู กะฆีเตอ นะ บูวัจ บรี กีตา ปูตุซ_ เดะ ลาฆู ซายัก อีตู_ บือเลฮ เฆอ?

กะฆีเตอ_ ตูฮัด เดะ อาตัซ เตอ_ ญา นู มือญาซัจ ลีฮัจ ฮาตี นะ โกะ อูมัจ ซือมียา_ ญา ตาฮู ลาฆู นามา_ นู อาดา เดะ ฮาตี นะ ซือมืองัจ นะ ญา_ ซาเบะ จะ_ ซือมืองัจ อีตู_ ญา บือซาโวจ มีตา บีดา โกะ ซือมียา นะ ตูฮัด_ ตูโรจ กะ ฮาตี นะ ตูฮัด เดะ อาตัซ เลอ.

ราตา ซือมียา นู ซือมืองัจ นะ ตูฮัด บาวา บือปี เตอ_ โกะ ซือมียา อีตู เลอ_ ฌาดี นานะ นะ ตูฮัด ดัฮ.

ซาเบะ จะ_ โกะ ซือมียา นู ตูโรจ กะ ปรางัย นะ อูมัจ ซือมียา เตอ_ ฮาตี นะ กูญา ลือกัจ เดะ ลาฆู นะ อูมัจ ซือมียา เลอ. ตาปี โกะ ซือมียา นู ตูโรจ กะ ซือมืองัจ นะ ตูฮัด เตอ_ ฮาตี นะ กูญา ลือกัจ เดะ ลาฆู นะ ซือมืองัจ อีตู เลอ.

ตูฮัด ญา ฮอย เตด มือญือซัน นานะ นะ ญา ตะอาซิก_ ตาปี ญา บือเลฮ ซรัฮ นานะ อีตู บรี มาตี_ กรานา กีตา ซือมูฮา. กะฆีเตอ_ ลาฆู นู บาฌิ ซือมูฮา_ ญา นะ ฮาลัย บรี กะ กีตา_ บือซามา ฌางัน นานะ นะ ญา_ บูกัด เฆอ?

กะฆีเตอ_ ซือมืองัจ นะ ตูฮัด เตอ_ ญา ฌาดี ซะซรี_ บูวัจ บรี ฮาตี นะ กีตา ตาฮู ตือตู จะ_ กีตา เลอ_ ฌาดี นานะ นะ ตูฮัด เดะ อาตัซ. นู กีตา ฌาดี นานะ นะ ตูฮัด ดัฮ_ กีตา นะ บือเลฮ ซาโมจ ปือซากา ฌูฆา_ ฌาดี ลาฆู บาฌิ นู ตูฮัด เดะ อาตัซ อาดา ตาโรฮ ดัฮ_ บีดา นานะ นะ ญา. ปือซากา อีตู_ กีตา นะ ซาโมจ บือซามา ฌางัน เยซู คริด. ซาเบะ จะ_ นู กีตา กือนา ตาฮัด ซูซัฮ ปายัฮ_ บือซามา ฌางัน เยซู เตอ_ กีตา นะ ซาโมจ ลาฆู นู บือซรี บือซายา_ บือซามา ฌางัน ญา ฌูฆา เลอ.

กะฆีเตอ_ ซือมียา นู ฮาตี นะ ญา_ ลือกัจ เดะ ปรางัย นะ อูมัจ ซือมียา เตอ_ ญา บือลาวัด ฌางัน ตูฮัด เลอ_ ซาเบะ ญา เตด บูวัจ ตูโรจ_ กะ ปือมือเลา ฮูโกบ นะ ตูฮัด. โงฮซูโงฮ เลอ_ ญา นะ บูวัจ ตูโรจ เตด บือเลฮ.

ซาเบะ จะ_ โกะ บือนา บารัก นู ตูฮัด บือฌาดี ดัฮ ซือมูฮา_ อาดา บือคานะ ตาฮัด นาตี_ ฌางัน ฮาตี ปือนอฮ ซูโงฮ_ นะ ลีฮัจ อารี อีตู_ นู ลูมอฮ โกะ นานะ นะ ตูฮัด_ นะ ปลีฮัจ ดัฮ.

ซาเบะ กีตา ตาฮู จะ_ ตือดะ รอจ กะ ฮาดัจ อีนี_ โกะ ซือบารัก นู บือฌาดี ดัฮ ซือมูฮา_ อาดา ซือรูปา มือนาแงฮ มือรายู_ ซือรูปา บือกะ นีบีนี_ นู ซาเกะ นะ ดูโดะ เดะ อาปี เลอ.