โรม 9
9
ตูฮัด ปีเลฮ ลูมอฮ บักซา อิซราเอน ดัฮ
1บือกะ กู อาดา ลือกัจ ฌางัน เยซู คริด เตอ_ กู มือเลา ลาฆู นู ซูโงฮ_ บูกัด มือเลา ลาฆู มืออูปัย เลอ. ซือมืองัจ นะ ตูฮัด ญา บาวา ฮาตี นู ตาฮู ลาฆู ซาลัฮ กือนา นะ กู_ บรี ฌาดี ซะซรี จะ_ กู เตด มือเลา มืออูปัย. 2ลาฆู นู ซูโงฮ อีตู ฌาดี จะ_ กู ซูซัฮ ฮาตี บาญะ_ บาฮาตี โตระ เตด บราดู_ ปาซัน ลูมอฮ ดีบราดี นะ กู_ นู ฌาดี โกะ ซือมียา ซา บักซา ฌางัน กู. 3ซาเบะ กู ซูกา นะ บรี ญาวา นะ กู ตะอาซิก_ นะ กือนา ตูฮัด กรัจ ฮูโกบ ดัฮ_ บรี ปูตุซ เดะ เยซู คริด_ บีดา นะ ตูโลก ลูมอฮ กูญา เลอ. 4กูญา เตอ_ ฌาดี ลูมอฮ บักซา อิซราเอน นู ตูฮัด ปีเลฮ ดัฮ. ตูฮัด ญา บูวัจ บรี ลูมอฮ กูญา ฌาดี โกะ นานะ นะ ญา_ บรี กูญา ลีฮัจ ลาฆู บือซายา บือซรี นะ ญา. ญา ตืองะ โกะ ปือมือเลา บือปาคัจ ฌางัน กูญา_ ญา บรี โกะ ปือมือเลา ฮูโกบ กะ กูญา. ลูมอฮ กูญา เตอ_ นู ตาฮู มือญือมัฮ กะ ตูฮัด_ บือกะ ลาฆู ซูโงฮ_ นู อาดา โกะ ปือมือเลา บือฌาญี นะ ตูฮัด เลอ. 5ลูมอฮ กูญา_ ฌาดี บือแนฮ นะ โกะ บีลาแก เตอ. นู เยซู คริด ฌาดี ซือมียา ดัฮ_ ญา ฌาดี ซือมียา บักซา นะ กูญา ฌูฆา เลอ. ปูฌี เลอ_ กะ ตูฮัด นู อาดา เดะ อาตัซ บือนา ซือมูฮา.#9.5 เฆอ จะ_ “ญา เตอ เลอ_ ฌาดี ตูฮัด เดะ อาตัซ บือนา ซือมูฮา” บรี ซือลามัจ กะ ญา_ ซือมาญัก รอจ เลอ. อาเมน.
6บูกัด จะ_ ปือมือเลา บือฌาญี นะ ตูฮัด เตด ฌาดี นามา ดัฮ. ซาเบะ จะ_ บูกัด ราตา ซือมียา นู บือฌาดี มาแรฮ เดะ บักซา อิซราเอน_ นะ ฌาดี บักซา อิซราเอน นู ตูฮัด ปีเลฮ ดัฮ. 7บูกัด บือแนฮ นะ อับราฮัม ราตา ซือมูฮา_ นู นะ กีรา จะ_ ฌาดี นานะ นะ ญา. ซาเบะ ตูฮัด บือเลฮ มือเลา จะ “โกะ ซือมียา นู ตูโรด มือนูโรด เดะ อีซัก เลอ_ นู นะ กือนา กีรา จะ_ ฌาดี บือแนฮ นะ เกา#ลมล 21.12 .” 8ฌาดี จะ_ บูกัด โกะ นานะ นู บือฌาดี มาแรฮ ตูโรจ กะ ลาฆู นะ ซือมียา_ นู นะ ฌาดี นานะ นะ ตูฮัด_ ตาปี โกะ นานะ นู บือฌาดี มาแรฮ_ ตูโรจ กะ ปือมือเลา บือฌาญี นะ ตูฮัด_ กูญา เลอ_ กือนา กีรา จะ_ ฌาดี บือแนฮ นู ซูโงฮ ดัฮ เลอ. 9ซาเบะ ตูฮัด บือเลฮ บือฌาญี กะฆีนี จะ “เดะ วะตู นู บาฌิ เตอ_ กู นะ บาลิ ปาเระ. กะฆีเตอ ซารา โปด_ นะ บือเลฮ นานะ กีลากี#ลมล 18.10,14.”
10บูกัด ตารา อีตู_ ตาปี เรเบคา โปด_ บือเลฮ นานะ กีลากี บือกือมัยํ_ เดะ กีลากี นู ซา ฌูฆา_ ฌาดี จะ_ อีซัก_ นู บีลาแก นะ กีตา เตอ. 11-12ตานา โกะ นานะ อีตู_ ฮอย เตด ลือปัซ เดะ โปรจ นะ มะ ลาฆี_ ฮอย เตด บือเลฮ บูวัจ บาฌิ_ เฆอ จะ บูวัจ ฌาฮัจ ลาฆี เตอ_ ตูฮัด ญา มือเลา ดูลู ฌางัน เรเบคา จะ “นู กากา นะ ฌาดี ปราโซฮ นะ อาดี#ลมล 25.23.” กะฆีเตอ ญา บรี ลีฮัจ จะ_ ลาฆู นู ตูฮัด บือคานะ นะ ปีเลฮ นานะ นู ซา อีตู เตอ_ ญา อาดา กือฌะ กือมัซ ดัฮ_ บูกัด กรานา ลาฆู ปือบูวัจ นะ นานะ อีตู_ ตาปี กรานา ตูฮัด ปาเงน ญา ดัฮ เลอ. 13บือกะ อาดา ฆาแรฮ เดะ ซูรัจ ปือมือเลา นะ ตูฮัด จะ “ยาโกบ เตอ_ นู กู ซายัก_ ตาปี เอเซา เตอ_ กู บือชี เลอ#มลค 1.2-3.”
14ดัฮ กะฆีเตอ_ กีตา นะ มือเลา กะฮามี เลอ? จะ_ ตูฮัด ญา เตด รือมัก บาฌิ เฆอ? เตด โบะ. ฮอย เตด ฌาดี กะฆีเตอ เลอ. 15ซาเบะ ตูฮัด บือเลฮ มือเลา ฌางัน มูซา จะ “ดัฮ กู นะ ตือจีฮัด กะ ซือมียา ดีฮา_ กู นะ ตือจีฮัด กะ ซือมียา อีตู เลอ. ดัฮ กู นะ บูวัจ บาฌิ ฌางัน ซือมียา ดีฮา_ กู นะ บูวัจ บาฌิ ฌางัน ซือมียา อีตู เลอ#บรล 33.19.” 16กะฆีเตอ เลอ_ นู นะ ปีเลฮ ซือมียา ดีฮา เตอ_ บูกัด กรานา ซือมียา อีตู บือคานะ_ บูกัด กรานา ญา กือวาซา บือกรือฌา โปด_ ตาปี กรานา ตูฮัด ตือจีฮัด กะ ญา เลอ. 17ซาเบะ จะ_ เดะ ซูรัจ ปือมือเลา นะ ตูฮัด_ อาดา นู ตูฮัด มือเลา ฌางัน ราฌา ฟาโร จะ “กู บือเลฮ ตืองะ เกา ฌาดี ราฌา_ กรานา ลาฆู อีนี เลอ_ บีดา นะ ซูโรฮ เกา ปลีฮัจ ลาฆู ปือมือฆัฮ นะ กู_ บีดา นะ มือญาเระ บรี ตาฮู ปือนามา นะ กู_ ราตา เดะ ดือนียา ฌูฆา#บรล 9.16.” 18กะฆีเตอ เลอ_ ตูฮัด นะ ตือจีฮัด กะ ซือมียา ดีฮา_ เฆอ จะ_ นะ บูวัจ บรี ซือมียา ดีฮา ตือฆัยํ ฮาตี เตอ_ ลือเบฮ เดะ ฮาตี นะ ตูฮัด เตอ เลอ.
ตูฮัด กรัจ ฮูโกบ_ ตูฮัด ตือจีฮัด ฌูฆา
19กะฆีเตอ_ ซืออูรัก เดะ ลูมอฮ กาเญา นะ ตาญา กู จะ_ “ดัฮ ฌาดี กะฆีเตอ_ ซาเบะ นามา ตูฮัด ญา ตูโดฮ จะ_ กีตา ซาลัฮ ลาฆี? ซาปา เลอ_ นะ บือเลฮ บือลาวัด ฌางัน ลาฆู นู ตูฮัด บือคานะ ดัฮ?” 20กาวัด เออ_ เกา ฌาดี ซาปา เลอ_ นู นะ ตีกัฮ ปาเระ กะ ตูฮัด เดะ อาตัซ? ปีโยะ ตานัฮ นะ ฮอย เตด มือเลา_ ฌางัน ซือมียา นู บูวัจ ญา จะ_ “ซาเบะ นามา ปะ_ เกา บูวัจ กู_ บรี ฌาดี กะฆีนี?” 21ซือมียา นู บูวัจ โกะ ปีโยะ ตานัฮ เตอ_ ญา นะ อาเมด ตานัฮ ลียัจ_ มาแรฮ บูวัจ ซือบารัก นามา บือเลฮ ฮาปา_ บูกัด เฆอ? ญา นะ อาเมด ตานัฮ ลียัจ ซือกือโตน อีตู_ บูวัจ ซือตืองัฮ บรี ฌาดี ปีโยะ_ นู นะ ซูโรฮ เดะ อารี ซัยํบือซัยํ_ ซือตืองัฮ ฌาดี ปีโยะ_ นู นะ ซูโรฮ เดะ บีลัก อารี_ บือเลฮ นอ?
22ตูฮัด ญา บือเลฮ บูวัจ กะฆีเตอ ฌูฆา. ญา บือคานะ นะ ปลีฮัจ_ ลาฆู นู ญา นะ มูซัยํ กรัจ ฮูโกบ_ ญา นะ บรี ตาฮู_ ลาฆู นู ญา มือฆัฮ ซูโงฮ. กะฆีเตอ ญา บือเลฮ ตาฮัด ฮาตี ลามา_ ฌางัน โกะ ซือมียา นู ญา นะ มูซัยํ กรัจ ฮูโกบ_ นู ซียะ ฆือนะ ดัฮ_ นะ กือนา ลาฆู ฌาฮานัม. 23ญา บือคานะ นะ บรี ลีฮัจ ฌูฆา_ ลาฆู บือซรี บือซายา นู บาฌิ ซูโงฮ นะ ญา_ นู ญา บือเลฮ บรี กะ กีตา_ ซือมียา นู ญา ตือจีฮัด ดัฮ_ นู ญา บือเลฮ ซียะ ตะเดะ ดูลู_ บีดา นะ ซาโมจ ลาฆู บือซรี อีตู. 24กีตา เลอ_ ฌาดี ลูมอฮ ซือมียา นู ญา ปาเงน ดัฮ_ บูกัด เดะ ลูมอฮ บักซา ยิว ซา บักซา_ ตาปี เดะ ลูมอฮ บักซา อาซิก ฌูฆา. 25บือกะ ตูฮัด มือเลา เดะ ซูรัจ นะ โฮเชยา จะ
“ลูมอฮ ซือมียา อีตู_ นู ฮอย เตด ฌาดี ลูมอฮ นะ กู เตอ
กู นะ บลาโลก กะ กูญา จะ
ลูมอฮ นะ กู เลอ.
บักซา อีตู นู กู เตด บือเลฮ ซายัก เตอ
กู นะ บลาโลก กะ กูญา จะ
บักซา นู กู ซายัก เลอ #
ฮชย 2.23
.
26 ตือปัจ อีตู_ นู ตูฮัด บือเลฮ มือเลา ฌางัน กูญา จะ
‘กาเญา เตอ_ กาเญา บูกัด ลูมอฮ นะ กู.’
ตือปัจ อีตู เลอ กูญา นะ กือนา บลาโลก จะ
โกะ นานะ นะ ตูฮัด_ ญา นู อาดา ฮีโดะ ซูโงฮ #
ฮชย 1.10
.”
27อิซายา โปด_ ญา บือซูระ ปาซัน บักซา อิซราเอน จะ “มีเซ จะ ลูมอฮ บักซา อิซราเอน นะ บือฌาดี บาญะ โตระ_ ซือรูปา บือกะ โกะ บีฌี ตานัฮ เดะ บีดิก ลาโวจ เตอ_ ตาปี อาดา โกะ ซือมียา ดีกิ ตอจ_ นู นะ ฮีโดะ ลือปัซ บาฌิ เลอ. 28ซาเบะ ตูฮัด นะ บูวัจ_ บรี ปือมือเลา ฮูโกบ นะ ญา เดะ ดือนียา_ นะ ซือลือซัย ซุจ งัจบางัจ เลอ#อซย 10.22-23.” 29บือกะ ซือรูปา อิซายา บือเลฮ มือเลา ดูลู จะ “ดัฮ ตูฮัด นู มือฆัฮ โตระ_ ญา เตด บือเลฮ ตาโรฮ บือแนฮ ซือตืองัฮ_ บรี กะ กีตา เตอ_ กีตา นะ ฌาฮานัม ดัฮ_ ซือรูปา นังฆรี โซโดม ดัฮ_ ซือรูปา บือกะ นังฆรี โฆโมรา เลอ.#อซย 1.9”
บรีตา นู บาฌิ อาดา บีดา ลูมอฮ บักซา อิซราเอน ฌูฆา
30กะฆีเตอ_ กีตา นะ มือเลา กะฮามี เลอ? จะ_ ลูมอฮ บักซา อาซิก_ นู เตด บือเลฮ มียา ฌาลัด_ นู นะ บาฌิ ตือปัจ ฌางัน ตูฮัด เตอ_ กูญา โปด_ บาฌิ ตือปัจ ฌางัน ตูฮัด ดัฮ_ กรานา กูญา ปือจายา เลอ. 31ตาปี โซะ ลูมอฮ บักซา อิซราเอน_ นู บือเลฮ มียา ฮาดัจ ฮูโกบ_ นู นะ บูวัจ บรี กูญา บาฌิ ตือปัจ ฌางัน ตูฮัด เตอ_ กูญา เตด บือเลฮ ดาปัจ ฮาดัจ ฮูโกบ อีตู เลอ. 32ซาเบะ นามา กะฆีเตอ? ซาเบะ กูญา เตด บือเลฮ ปือจายา_ ตาปี บือกะ บือเลฮ ฮาระ กะ ลาฆู ปือบูวัจ นะ กูญา. กูญา ตือซีปะ ดัฮ_ เดะ บาตู อีตู_ นู นะ บรี ซือมียา รือบัฮ_ 33บือกะ อาดา ฆาแรฮ เดะ ซูรัจ ปือมือเลา นะ ตูฮัด จะ
“ลีฮัจ เลอ_ กู อาเมด บาตู ซือกือโตน
บอฮ เดะ นังฆรี ซีโอน
ฌาดี บาตู นู นะ บรี โกะ ซือมียา ตือซีปะ
ฌาดี บาตู บือซัยํ นู นะ บรี กูญา รือบัฮ.
ตาปี ซือมียา ดีฮา นู ปือจายา กะ ญา เตอ
ฮอย ลาฆู นะ มือญือซัน ลาลู เลอ #
อซย 28.16
.”
Currently Selected:
โรม 9: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
