ปือบูวัจ 28
28
กูญา ดูโดะ เดะ ปูเลา มอนตา
1ตานา กามี รอจ กะ ปาตัย ซือนัง ดัฮ_ บารู กามี ตาฮู จะ_ ปูเลา อีตู ปือนามา ปูเลา มอนตา. 2ลูมอฮ ซือมียา เดะ ปูเลา อีตู_ ตือจีฮัด กะ กามี_ ซาโมจ กามี บาฌิ ดัฮ. กูญา รูโมด อาปี_ ซาเบะ อาดา ฮูฌัด บูวัจ บรี กามี บือแฌะ ดัฮ. 3เปาโล ญา บือเลฮ มียา กายู อาปี ซือตืองัฮ_ อาเมด มาแรฮ บอฮ เดะ อาปี. ตานา บาฌิ อาดา อูลัยํ บีซา ซืออีโกยํ_ กือนา อาปี ฮางัจ ดัฮ_ ญา ตรือเบะ มาแรฮ_ ปาโตะ ลือกัจ เดะ ตางัน นะ เปาโล. 4ตานา ลูมอฮ ซือมียา เดะ ปูเลา_ ลีฮัจ อูลัยํ อีตู ลือกัจ โตกฆาโตก_ เดะ ตางัน นะ เปาโล_ กูญา มือเลา บือซามา กูญา จะ_ “ซูโงฮ เลอ_ ซือมียา อีนี_ ฌาดี ซือมียา บูนอฮ กาวัด. มีเซ จะ_ ลือปัซ เดะ ลาโวจ ดัฮ_ ตาปี โฆรฮ นะ ญา_ ตีเมา บรี ลือปัซ เดะ มาตี เลอ.”
5ตาปี เปาโล กือติฮ อูลัยํ อีตู_ บรี ฆูโฆยํ เดะ อาปี. ญา เตด ซาเกะ นามา โปด. 6ตาปี กูญา อีตู_ ตีญุง ลีฮัจ กะ ญา_ อีงัจ จะ_ ญา นะ ฌาดี บาซัน ดัฮ_ นะ รือบัฮ มาตี ดัดดัด. กาลา กูญา บือฆารี ลามา ดัฮ_ ลีฮัจ ญา เตด ซาเกะ นามา_ บารู กูญา บราเลฮ ฮาตี อีงัจ จะ_ ญา ฌาดี ซือมียา ซีดี ซืออูรัก.
7เดะ ตูโปะ อีตู_ อาดา ตือปัจ ตานัฮ นะ ปุบลียัด_ นู ฌาดี กือปาลา เดะ ปูเลา อีตู. ญา ซาโมจ กามี บาฌิ ดัฮ_ ปือบือลา กามี_ ตีฆา อารี ดัฮ. 8อาโปก เดะ ปุบลียัด เตด ซือนัง ญาวา_ ฮูวัจ ดัฮ_ เอฮ ตรือเบะ ดารัฮ. เปาโล มาโซะ ปี ซารี ญา_ บือซาโวจ_ ตืองะ ตางัน เดะ ญาวา ญา. บารู ญา ซือนัง บาฌิ ดัฮ. 9ลือปัซ อีตู_ โกะ ลูมอฮ ซือมียา ฆีลาฆี เดะ ปูเลา_ นู ซาเกะ_ กูญา มาแรฮ ดัฮ. เปาโล ปือบือลา กูญา_ บรี ซือนัง บาฌิ ดัฮ. 10กูญา มือโอจ กะ กามี บาญะ ดัฮ. รอจ วะตู กามี นะ ตรือเบะ เดะ ปูเลา อีตู_ กูญา อาเมด โกะ ซือบารัก มาแรฮ_ บรี กะ กามี มากัด เดะ กาปัน.
กูญา ปี รอจ กะ นังฆรี โรม
11กาลา กามี ดูโดะ ปัจ อีตู_ กือมูฮา ตีฆา บูลัด ดัฮ_ กามี ญาแญะ กาปัน ซือบูวัฮ_ นู อาดา ฆามัยํ “ดาโตะ บือกือมัยํ” เดะ บอยา. ฌาดี กาปัน นู มาแรฮ ดาตัก เดะ นังฆรี อาเลกซันดรียา_ ดูโดะ เดะ ปูเลา_ ฮาบิฮ มูเซด บือแฌะ ดัฮ. กามี บลายัยํ ปี_ 12รอจ กะ ตือเปด ซัยราคิว_ ซีงัฮ ปัจ อีตู_ ตีฆา อารี ดัฮ. 13กามี ตรือเบะ เดะ โซะ อีตู_ ปี รอจ กะ ตือเปด เรฆียุม. เดะ โซะ ปาฆี_ อาดา อาเงน มาแรฮ เดะ โซะ บารัจ ดายา. กามี บลายัยํ ดูวา อารี_ มาแรฮ รอจ กะ ตือเปด โปทิโอลี. 14ตือปัจ อีตู_ กามี ดาปัจ ลูมอฮ ดีบราดี ปือจายา ซือตืองัฮ_ นู บืออาฌะ กามี_ บรี มือนูปัก ดูโดะ บือซามา กูญา_ ตูโฌฮ อารี. กะฆีเตอ_ กามี บือฌาลัด ปี กะ นังฆรี โรม. 15ตานา ลูมอฮ ดีบราดี เดะ นังฆรี โรม_ ดืองัยํ ลาฆู นะ กามี ดัฮ_ กูญา มาแรฮ ซาโมจ กามี_ เดะ ปือกัด อับปียัด ซือตืองัฮ_ เดะ ตูโปะ นู ปือนามา จะ “ตีฆา โรงแรม” ซือตืองัฮ. กาลา เปาโล ลีฮัจ กูญา_ ญา บรี ซือลามัจ กะ ตูฮัด_ บราซา ซือนัง ฮาตี ดัฮ.
เปาโล ดูโดะ เดะ นังฆรี โรม
16ตานา กามี รอจ กะ นังฆรี โรม ดัฮ_ กูญา ยอม บรี เปาโล ดูโดะ ซาญา_ บรี อาดา ตาฮัน ซืออูรัก_ ดูโดะ บือซามา_ ตูงู ญา.
17ลือปัซ ตีฆา อารี_ เปาโล บืออาฌะ ลูมอฮ กือปาลา นะ บักซา ยิว_ บรี มาแรฮ บือมุน บือซามา. บือมุน ดัฮ_ ญา มือเลา ฌางัน กูญา จะ_ “ลูมอฮ ดีบราดี เออ_ กู นี_ เตด ดือละ บูวัจ มานามา นู บือลาวัด ฌางัน บักซา กีตา_ นู บือลาวัด ฌางัน ฮาดัจ นะ โกะ บีลาแก นะ กีตา. ตาปี กู กือนา รีฆะ เดะ นังฆรี เยรูซาเลม_ กือนา อาตัจ กะ ลูมอฮ บักซา โรม. 18ซูดัฮ กูญา อีตู ซาซัจ กู ดัฮ_ กูญา อาดา ฮาตี นะ ปลือปัซ กู_ ซาเบะ ลีฮัจ จะ_ กู เตด บือเลฮ บูวัจ ซาลัฮ นามา นู ปาโตจ นะ กือนา ฮูโกบ บรี มาตี. 19ตานา โกะ บักซา ยิว ซือกัจ มือเลา เตอ_ มีเซ จะ กู ฮอย ปาซัน นามา นะ อาดู บักซา นะ กู_ ตาปี กู ฆาฆัฮ นะ มีตา ปี บือดาปัจ ฌางัน ราฌา ซีซา. 20กะฆีเตอ เลอ_ กู ซูกา นะ ดาปัจ กาเญา_ นะ มือเลา ฌางัน กาเญา กะฆีนี จะ_ อาดา ซา ลาฆู นู บักซา อิซราเอน จาดัก นะ ดาปัจ#28.20 ลาฆู นู กูญา จาดัก นะ ดาปัจ_ ฌาดี จะ_ ราฌา นู บรี ซือลามัจ_ นู ตูฮัด บือฌาญี ดัฮ_ นะ ซูโรฮ มาแรฮ. เตอ_ กรานา ลาฆู อีตู เลอ_ นู กู กือนา ราตัย กะฆีนี.” เปาโล ญา จะ.
21โกะ กือปาลา บักซา ยิว ตีกัฮ กะ ญา จะ_ “โซะ กามี เตอ_ เตด บือเลฮ ซาโมจ ซูรัจ มานามา_ มาแรฮ เดะ นังฆรี ยูเดีย_ ปาซัน ลาฆู นะ เกา. ฮอย ดีบราดี นะ กามี ซือมียา ดีฮา โปด_ บือเลฮ ดาตัก มาแรฮ เดะ โซะ อีตู_ นู มือญาเระ บรีตา_ เฆอ จะ_ มือเลา ลาฆู ฌาฮัจ มานามา_ ปาซัน นะ เกา. 22ตาปี กามี ซูกา นะ ดืองัยํ เกา มือเลา_ ลาฆู นู เกา อีงัจ เดะ ฮาตี_ ซาเบะ กามี ตาฮู จะ_ ราตา ตือปัจ_ อาดา ซือมียา มือเลา บือลาวัด_ ฌางัน ลูมอฮ นะ เกา อีนี เลอ.” กูญา จะ.
23กะฆีเตอ กูญา ตือตู ฌางัน เปาโล จะ_ นะ มาแรฮ มียา ญา_ อารี ดีฮา. อารี อีตู_ อาดา ลูมอฮ กูญา มาแรฮ มียา เปาโล เดะ รูมัฮ_ บาญะ อูรัก. ตะเดะ ปาฆี_ ตือดะ รอจ กะ มาลับ_ ญา มือญาเระ บรี กะ กูญา ตาฮู_ ปาซัน ลาฆู นู ตูฮัด เดะ อาตัซ มาแรฮ ปือบือลา ฌาดี ราฌา กะฮามี. ญา มือเลา ลาฆู_ เดะ ซูรัจ ปือมือเลา ฮูโกบ นะ มูซา_ เดะ ซูรัจ นะ โกะ ซือมียา ตูโดฮ ลาฆู นะ ตูฮัด ฌูฆา_ บือคานะ นะ บรี กูญา ปือจายา_ ลาฆู นะ เยซู. 24ปือมือเลา นะ ญา อีตู_ อาดา ซือมียา ปือจายา_ ซือตืองัฮ_ ซือมียา เตด ปือจายา_ ซือตืองัฮ.
25กะฆีเตอ_ กูญา ฆามะ นะ ตรือเบะ ปี_ ตืองัฮ มือเลา บือตีกัฮ-ตีกัฮ บือซามา. ตาปี เปาโล มือเลา ปือมือเลา_ ซา ปาตัฮ ลาฆี_ จะ_ “ซูโงฮ เลอ_ ปือมือเลา อีตู_ นู ซือมืองัจ นะ ตูฮัด บูวัจ บรี อิซายา ซือมียา ตูโดฮ ลาฆู นะ ตูฮัด_ มือเลา กะ โกะ บีลาแก นะ กาเญา_ ญา รือมัก ดัฮ. 26ญา บือเลฮ มือเลา กะฆีนี จะ
“ ‘ปี เลอ_ มือเลา ฌางัน ลูมอฮ บักซา อีนี จะ
“กาเญา ซือมาตา ดืองัยํ_
ตาปี เตด มาโซะ เดะ ฮาตี เลอ.
กาเญา นะ ฌือเงาะ ลีฮัจ_
ตาปี เตด บือฆารี ดัฮ.”
27 ซาเบะ ลูมอฮ บักซา อีนี เตอ_
ฮาตี นะ กูญา บรีงัจ เตด กือนา ลาฆู
ตือลีงา นะ กูญา_ กูญา ตูโดก ดัฮ.
มาตา นะ กูญา_ กูญา ปือฌับ ดัฮ.
ตาโกจ จะ_
มาตา นะ กูญา_ นะ บือฆารี
ตือลีงา นะ กูญา_ นะ ดืองัยํ
ลาฆู นะ มาโซะ เดะ ฮาตี_ นะ กูญา.
กะฆีเตอ_ กูญา นะ อาเลฮ มาแรฮ ซารี กู.
กู โปด_ นะ ปือบือลา กูญา_
บรี ลือฆา บาฌิ ดัฮ.’ ตูฮัด ญา จะ #
อซย 6.9-10
.”
28-29เปาโล มือเลา ลาฆี จะ_ “กะฆีเตอ เลอ_ กาเญา กือนา ตาฮู จะ_ ปือมือเลา นะ ตูฮัด เดะ อาตัซ_ นู ญา นะ บรี ลูมอฮ ซือมียา ฮีโดะ ลือปัซ บาฌิ ดัฮ_ ปือมือเลา อีตู นะ ปี กะ ลูมอฮ บักซา อาซิก. กูญา อีตู เลอ_ นะ มือนีงัย.” เปาโล ญา จะ.#28.28-29 ซูรัจ ลามา ซือตืองัฮ บือตามัฮ กะฆีนี จะ_ “กาลา ญา มือเลา กะฆีนี_ ฮาบิฮ ดัฮ_ ลูมอฮ บักซา ยิว กูญา ปี ดัฮ_ ตืองัฮ มือเลา บือตือฆัฮตือฆัฮ บือซามา บาญะ.”
30กือมูฮา ดูวา ตาโฮด ดัฮ_ เปาโล ดูโดะ ปัจ อีตู_ เดะ รูมัฮ นู ญา ซีวา ตะอาซิก. ญา ซาโมจ ซือมียา ซือมูฮา_ นู มาแรฮ ซารี ญา. 31ฌางัน ฮาตี บรานี_ ญา มือญาเระ ลาฆู_ ปาซัน นู ตูฮัด เดะ อาตัซ นะ ปือบือลา ฌาดี ราฌา_ ญา อาฌัยํ ลาฆู ปาซัน ตูฮัด เยซู คริด. ฮอย ซาปา บลารัก ดัฮ.
Currently Selected:
ปือบูวัจ 28: ULBIBLE
Highlight
Share
Compare
Copy
Want to have your highlights saved across all your devices? Sign up or sign in
