โรม ปือมือเลา มือญาเระ ดูลู
ปือมือเลา มือญาเระ ดูลู
ซูรัจ โรม อีนี_ เปาโล ฆาแรฮ_ กีเรบ อาตัจ บรี กะ ลูมอฮ นะ ตูฮัด_ ตือปัจ นังฆรี โรม_ บีดา นะ ซียะ ฌาลัด นะ ญา_ นะ ปี ฌือเงาะ ลีฮัจ กูญา. เปาโล เตด ดือละ ปี กะ นังฆรี โรม ลาฆี_ ตาปี วะตู ฆาแรฮ ซูรัจ อีนี_ ญา ตือตู ฮาตี ดัฮ จะ_ นะ ปี มือญาเระ บรีตา นู บาฌิ นะ เยซู_ เดะ นังฆรี ซะเปน. กะฆีเตอ ญา นะ ซีงัฮ เดะ นังฆรี โรม ดูลู_ นะ ดูโดะ ฌางัน โกะ ซือมียา ปือจายา ซา วะตู. เดะ ซูรัจ อีนี_ ญา บรี กูญา ตาฮู ดูลู_ จะ_ บรีตา นู บาฌิ นู ญา มือญาเระ ราตาๆ_ ฌาดี กะฮามี ซูโงฮ.
ลามูลา เตอ_ ญา รือฆัจ ซือกาลี เดะ ตือนอซ 1.17 จะ_ “ตูฮัด เดะ อาตัซ ญา ปลีฮัจ บรี ซัฮ จะ_ นู ญา นะ บูวัจ บรี ลูมอฮ ซือมียา_ นะ บาฌิ ตือปัจ ฌางัน ญา กะฮามี_ ฌาดี จะ_ ซาเบะ ซือมียา อีตู ปือจายา กะ ตูฮัด ดัฮ. ตะเดะ ลามูลา ฌู รอจ กะ ปือญูดัฮ โปด_ ซาเบะ ญา ปือจายา_ ซา ฌาลัด อีตู เลอ.”
ลือปัซ อีตู (ปาซัน 1 - 8) เปาโล บรี ลีฮัจ จะ_ อูมัจ ซือมียา ราตาๆ_ เตด จะ ฌาดี ลูมอฮ บักซา ยิว_ เฆอ จะ_ ฌาดี ลูมอฮ บักซา อาซิก โปด_ ซือมูฮา บือเลฮ บูวัจ ดูซา_ ซือมูฮา นะ กือนา ตูฮัด กรัจ ฮูโกบ กูญา. ตาปี ตูฮัด ญา ฮาลัย บรี ซือลามัจ กะ กูญา กะฆีนี จะ_ ซือมียา ดีฮา นู ปือจายา กะ เยซู คริด_ ตูฮัด กีรา จะ_ ซือมียา อีตู บาฌิ ตือปัจ ดัฮ. ซือมียา นู ปือจายา กะฆีเตอ_ ญา บาฌิ ปาเระ ฌางัน ตูฮัด ดัฮ_ ลือปัซ เดะ ปือมือฆัฮ นะ ลาฆู ดูซา. กะฆีเตอ_ ญา ฆาโดฮ บูวัจ ตูโรจ กะ ตูฮัด_ บือกะ ซือมืองัจ นะ ตูฮัด ตูโลก บือกรือฌา เดะ ฮาตี นะ ญา เลอ.
เปาโล มือเลา ปูลัก_ ปาซัน ลาฆู นะ ลูมอฮ บักซา ยิว (ปาซัน 9 - 11)_ จะ_ กูญา ฌาดี บือแนฮ นะ โกะ ซือมียา นูตู_ นู ซาโมจ ปือมือเลา บือฌาญี นะ ตูฮัด. ตาปี วะตู ตูฮัด บูวัจ ปือมือเลา บือฌาญี อีตู_ บรี ซุจ รือมัก ดัฮ_ ซูโรฮ เยซู มาแรฮ ฌาดี ซือมียา นู ตูโลก บรี ลือปัซ_ กูญา โปด_ เตด บือเลฮ ปือจายา กะ เยซู_ ตีเมา นะ ซาโมจ ลาฆู บาฌิ นะ ตูฮัด. กะฆีเตอ ตูฮัด ตีงัน กูญา_ บรี โกะ บักซา อาซิก ซาโมจ ลาฆู บาฌิ อีตู ดูลู. ตาปี ญา เตด บือเลฮ ตีงัน กูญา บูวัก. อาดา ซา อารี กูญา นะ ปาคัจ มาแรฮ ปือจายา กะ เยซู ฌูฆา.
ลือปัซ อีตู (ปาซัน 12-16)_ เปาโล อาฌัยํ จะ_ กือนา บือกรือฌา บูวัจ ตูโรจ กะ ตูฮัด กะฮามี บาฌิ_ กือนา บรีงัจ กะ โกะ อาดี บราดี นู ปือจายา_ กือนา ตูเฮะ กะ ลูวัก นู ตูฮัด ตืองะ ดัฮ. ญา กีเรบ บรีงัจ กะ โกะ ซือมียา บาญะ อูรัก_ ตือปัจ นังฆรี โรม_ นู ญา กราลา.
เดะ ดาลับ ซูรัจ โรม อีนี_ นะ ดาปัจ ลาฆู กะฆีนี
1. ลาฆู ลามูลา (1.1-17)
2. อูมัจ ซือมียา ราตาๆ บูวัจ ดูซา ดัฮ (1.18—3.20)
3. ตูฮัด นะ ตูโลก อูมัจ ซือมียา กะฮามี (3.21—4.25)
4. ลาฆู ฮีโดะ นู บารู_ ลือกัจ บือซามา ฌางัน เยซู คริด (5.1—8.39)
5. ตูฮัด ซายัก ลูมอฮ บักซา อิซราเอน ฌูฆา (9.1—11.36)
6. ซือมียา ปือจายา นะ บูวัจ ตูโรจ กะฮามี (12.1—15.13)
7. ลาฆู ปือญูดัฮ - ลาฆู กีเรบ บรีงัจ กะ กาวัด (15.14—16.27)
บาจา เลอ_ เดะ ซูรัจ ปือมือเลา นะ ตูฮัด.
Currently Selected:
โรม ปือมือเลา มือญาเระ ดูลู: ULBIBLE
Highlight
Copy
Compare
Share
Want to have your highlights saved across all your devices? Sign up or sign in