ปือบูวัจ 27
27
กูญา นะ บาวา เปาโล ปี กะ นังฆรี โรม
1ตานา ตือตู เดะ ฮาตี ดัฮ_ นู กามี นะ ปี กะ นังฆรี อิตาลี_ กูญา อาตัจ เปาโล ฌางัน อูรัก ซาลัฮ อาซิก_ บรี กะ กือปาลา ตาฮัน ซืออูรัก_ ปือนามา ยูลียัด. ญา ฌาดี กือปาลา ตาฮัน เดะ กาวัด ตาฮัน_ นู กือนา ซือโบจ จะ “กาวัด ตาฮัน นะ ราฌา ซีซา”. 2กามี ญาแญะ กาปัน นู ดาตัก มาแรฮ เดะ ตือเปด อัดรามิดทียุม_ นู นะ ปี กะ โกะ ตือเปด ซือตืองัฮ_ เดะ โซะ นังฆรี เอเซีย. อาดา อาริดตาคัด_ ซือมียา เดะ นังฆรี เทซะโลนิกา_ โซะ นังฆรี มาซิโดเนีย_ ญา ปี ซามา. กะฆีเตอ กามี บลายัยํ ปี ดัฮ. 3โซะ ปาฆี_ กาปัน ซีงัฮ เดะ ตือเปด ซัยดอน. กือปาลา ตาฮัน ญา ฮาตี บาฌิ_ ญา บรี เปาโล ตูโรด ปี_ มียา โกะ ฆูๆ นะ ญา_ บีดา กูญา นะ ตูโลก ปือบือลา ญา. 4กาลา กามี ตรือเบะ เดะ ตือเปด อีตู_ กามี บลายัยํ ปี มือญูโซยํ ปูเลา ซัยปรัด_ ซาเบะ มือญางัฮ อาเงน. 5กะฆีเตอ กามี บลายัยํ มือลากัฮ ลาโวจ_ นู ดาปิก กะ นังฆรี ซิลีเซีย_ ฌางัน นังฆรี ปัมฟีเลีย_ บารู มาแรฮ รอจ กะ ตือเปด มีรา ดัฮ_ โซะ นังฆรี ลีซียา. 6ปัจ อีตู_ กือปาลา ตาฮัน ญา ดาปัจ กาปัน ซือบูวัฮ_ ดาตัก เดะ นังฆรี อาเลกซันดรียา_ นู นะ ปี กะ นังฆรี อิตาลี. กะฆีเตอ_ ญา บาวา กามี_ บรี ญาแญะ กะ กาปัน อีตู ดัฮ.
7บาญะ อารี_ กามี บลายัยํ ปี ฮัดปรือฮัด_ ลามัจ นะ รอจ กะ ตูโปะ คือนีดัด_ กรานา อาเงน ตือฆัยํ โตระ. กาลา กามี มือญางัฮ อาเงน เตด บียัซ_ กามี บลายัยํ ปี มือญูโซยํ ปูเลา ครีด_ ปี บือลีนง อาเงน เดะ โซะ ตาโญก ซันโมเน. 8กามี บลายัยํ มือญูโซยํ ปูเลา อีตู ปายัฮ_ มาแรฮ รอจ กะ ตือเปด นู ปือนามา จะ_ “ตือเปด บือลีนง บาฌิ”_ ดาปิก เดะ ตูโปะ ลาเซีย.
9กาลา อีตู_ บาญะ อารี ลือปัซ ดัฮ_ รอจ กะ มูเซด บลายัยํ ปายัฮ โตระ_ ฌาดี จะ_ ลาฆู บรามัย บือตาฮัด โกะ ซือบารัก มากัด นะ บักซา ยิว_ ลือปัซ ปี ดัฮ. กะฆีเตอ เปาโล อูจะ กะ กูญา จะ_ 10“กาเญา เออ_ กู ลีฮัจ จะ_ นู กีตา นะ บลายัยํ ปี ปูลัก เดะ วะตู อีนี_ นะ บูวัจ บรี กีตา มาจับ นะ ฌาฮานัม_ นะ รูฆี โปด_ ฌางัน โกะ ซือบารัก นู ปือโดะ เดะ กาปัน_ ฌางัน กาปัน ตะอาซิก. ตาโกจ จะ_ อาดา ซือมียา นะ มาตี ฌูฆา.”
11มีเซ จะ กะฆีเตอ_ กือปาลา ตาฮัน ญา ปือจายา กะ ปือมือเลา นะ เตกก_ ฌางัน ปือมือเลา นะ ตกเก กาปัน_ ลือเบฮ เดะ ปือจายา กะ ปือมือเลา นะ เปาโล. 12ตือเปด อีตู เตด บราปา บาฌิ. นะ ซีงัฮ กาปัน ปัจ อีตู_ ตือดะ ฮาบิฮ มูเซด บือแฌะ_ ปายัฮ. กะฆีเตอ_ โกะ ซือมียา นู บาญะ_ บรีงัจ นะ ตรือเบะ ปี_ จาดัก นะ บือเลฮ รอจ กะ ตือเปด ฟีนิก_ นะ ดูโดะ ปัจ อีตู_ ตือดะ ฮาบิฮ มูเซด บือแฌะ. ตูโปะ ฟีนิก อีตู_ ฌาดี ตือเปด เดะ ปูเลา ครีด_ นู ลีนง เดะ อาเงน โซะ ตีมอยํ.
กูญา กือนา รีโบจ เดะ ลาโวจ
13ตานา อาดา อาเงน บารัจ ดายา_ นู ซืองะๆ_ กูญา อีงัจ จะ_ “โฌฮ_ ฆามะ จะ บือเลฮ.” กูญา ซีตะ ซาโวฮ_ บลายัยํ มือญูโซยํ ดิกบีดิก ปูเลา. 14ตาปี เตด ลามา_ อาดา อาเงน รีโบจ_ ตูโรด เดะ โซะ ฮูตัด_ นู กือนา บลาโลก จะ_ อาเงน ตีมอยํ ปาดัก. 15ตานา กือนา อาเงน รีโบจ อีตู_ กาปัน นะ มือญางัฮ อาเงน โปด_ เตด บียัซ_ ฆาโดฮ ลารี มือนูโรจ อาเงน. 16ตานา มาแรฮ ลีนง เดะ ปูเลา ดือมิ_ ปือนามา ปูเลา เคาดา_ กามี อาเกะ ปราฮู ดือมิ_ อีกัจ เดะ อาตัซ กาปัน_ ตาปี บูวัจ ปายัฮ เลอ. 17กูญา อาเมด ตาลี มาแรฮ_ บือเละ กาปัน_ อีกัจ บรี กือฌะ. กูญา ตาโกจ นะ ตือกริก เดะ บูโฮยํ_ โซะ นังฆรี ลีบียา. กะฆีเตอ_ กูญา ฆูโลก ลายัยํ_ ปลือปัซ กาปัน_ บรี ฮาญอจ มือนูโรจ อาเงน. 18กือนา รีโบจ โตระ กะฆีนี_ โซะ ปาฆี_ กูญา อาเมด โกะ ซือบารัก นู ปือโดะ เดะ กาปัน_ ซือตืองัฮ_ บูวัก กะ ลาโวจ. 19เดะ อารี ตีฆา_ ฌางัน ตางัน นะ กูญา ตะอาซิก_ กูญา อาเมด โกะ ซือบารัก ซูโรฮ เดะ กาปัน ซือตืองัฮ_ บูวัก กะ ลาโวจ. 20บาญะ อารี ดัฮ_ กามี ลีฮัจ เตด บือฆารี โกะ มาตาอารี_ โกะ บีตัก นามา โปด. กามี กือนา รีโบจ_ ซูซัฮ โตระ_ ฌู ฮอย เตด จาดัก นะ บือเลฮ ปี ลือปัซ เลอ.
21ตานา กูญา บือตาฮัด โกะ ซือบารัก มากัด ลามา ดัฮ_ เปาโล ญา บือดีรี เดะ ตืองัฮ กูญา_ มือเลา จะ_ “กาเญา เออ_ อาดู จะ กาเญา มือนีงัย กะ ปือมือเลา นะ กู ดัฮ_ เตด ตรือเบะ ปี เดะ ปูเลา ครีด เตอ_ กาเญา นะ ฮอย เตด กือนา ลาฆู บือนาซา_ เตด กือนา รูฆี กะฆีนี เลอ. 22ตาปี วะตู อีนี_ กู ปรีงัจ กะ กาเญา จะ_ บรี กาเญา ซือนัง ฮาตี เลอ. ฮอย ซือมียา นะ มาตี_ ซืออูรัก โปด. ตาปี กาปัน นะ บือนาซา ฮาบิฮ. 23กู ฌาดี ซือมียา นะ ตูฮัด เดะ อาตัซ ดัฮ_ ฌาดี ซือมียา บือกรือฌา นะ ญา เตอ. มาลับ อีนี เลอ_ อาดา ฮูลู บาลัก นะ ตูฮัด มาแรฮ บือดีรี ดาปิก กู_ 24มือเลา จะ_ ‘เปาโล เออ_ ฌางัน ตาโกจ เลอ. เกา ฆาโดฮ นะ บือดาปัจ ฌางัน ราฌา ซีซา. นี เลอ_ ตูฮัด เดะ อาตัซ_ ญา บาฌิ ฌางัน เกา_ ญา นะ บูวัจ บรี ลูมอฮ ซือมียา_ นู อาดา บือซามา ฌางัน เกา เดะ กาปัน_ เตด มาตี_ ซืออูรัก โปด.’ ฮูลู บาลัก ญา จะ.
25“กะฆีเตอ กาเญา เออ” เปาโล ญา จะ_ “บรี กาเญา ซือนัง ฮาตี เลอ. กู ปือจายา กะ ตูฮัด_ นู ญา นะ บูวัจ รือมัก_ ฌางัน ปือมือเลา_ นู ญา มือญาเระ ดัฮ. 26ตาปี กีตา ฆาโดฮ นะ กือนา ตีงัน_ เดะ ปูเลา_ ซา ปูเลา ดัฮ.” เปาโล ญา จะ.
27กาลา รอจ กะ ปัจ บือลัซ มาลับ ดัฮ_ นู กามี กือนา อาเงน บาวา ปี มาแรฮ_ เดะ ลาโวจ อาดรียา ดัฮ_ โซะ ตืองัฮ มาลับ_ โกะ อานะ กูลี เดะ กาปัน_ กูญา อาคา จะ_ ฆามะ นะ รอจ กะ ฮูตัด ดัฮ. 28กูญา อาเมด ตาลี_ อีกัจ ตือลาโปก_ อูโกยํ อาเย จะ_ บราปา ดาลับ. ดาปัจ ดัฮ_ ฌาดี ดูวา ปูโลฮ ดือปา. ปี ดีกิ ลาฆี ดัฮ_ กูญา อูโกยํ อาเย ปูลัก_ ฌาดี ลีมา บือลัซ ดือปา ดัฮ. 29กูญา ตาโกจ จะ_ กาปัน นะ ตือญาแญะ เดะ อาตัซ ตูกด_ กูญา ปลือปัซ ซาโวฮ เดะ กือมูดี_ ปัจ ซาโวฮ. กูญา มือเลา เตด บราดู_ นู นะ บรี ซียัก งัจบางัจ. 30ลูมอฮ อานะ กูลี เดะ กาปัน_ อีงัจ นะ ตีงัน กาปัน. กูญา ปือตูโรด ปราฮู ดือมิ เดะ ลาโวจ_ ซืองาฌา นะ ปี ปลือปัซ ซาโวฮ เดะ บอยา โซะ ฮือลด. 31ตาปี เปาโล มือเลา ฌางัน กือปาลา ตาฮัน_ ฌางัน กาวัด ตาฮัน_ จะ_ “ดัฮ กูญา อีนี เตด ดูโดะ เดะ กาปัน_ กาเญา นะ ลือปัซ เตด บือเลฮ.”
32กะฆีเตอ_ โกะ ตาฮัน กรัจ ตาลี นะ ปราฮู ดือมิ_ บรี ญา ลือแงะ ปี เดะ ลาโวจ ดัฮ.
33ตานา บือบีฮัก ดัฮ_ เปาโล ปูโฌะ กูญา ซือมูฮา_ บรี มากัด ซือตืองัฮ_ มือเลา จะ_ “อารี อีนี ฌาดี ปัจ บือลัซ อารี ดัฮ_ นู กาเญา นาตี_ เตด บือเลฮ มากัด มานามา โปด. 34กะฆีเตอ_ กู ปูโฌะ กาเญา_ บรี มากัด ซือตืองัฮ_ บีดา กาเญา นะ ตือฆัยํ อูรัจ. กรานา จะ_ โบะ นะ เตด ฆูรอก เดะ ปาลา นะ กาเญา_ ซา อูรัจ โปด_ ฮอย เลอ.” ญา จะ.
35ตานา มือเลา กะฆีนี ดัฮ_ เปาโล อาเมด ตือโปก โรตี มาแรฮ_ ซือตืองัฮ_ ญา บรี ซือลามัจ กะ ตูฮัด เดะ อาตัซ_ โซะ ฮือลด มูคา นะ กูญา ซือมูฮา. กะฆีเตอ_ ญา ลือแปะ ตือโปก_ ฮึนตะ นะ มากัด.
36กะฆีเตอ_ กูญา ซือมูฮา ซือนัง ฮาตี_ มากัด บือซามา. 37ลูมอฮ กามี เดะ กาปัน ซือมูฮา_ ฌาดี ดูวา ราตุซ ตูโฌฮ ปูโลฮ นัม อูรัก. 38ตานา มากัด กือญัง ดัฮ_ กูญา อาเมด บรัซ_ นู ปือโดะ เดะ กาปัน_ บูวัก กะ ลาโวจ_ บรี กาปัน รีฮัน เลอ.
กาปัน ญา ปือจัฮ เดะ ปาตัย
39ตานา ซียัก ดัฮ_ กูญา เตด กราลา ตือปัจ อีตู. ตาปี กูญา ลีฮัจ ซา ตือโละ_ นู อาดา ปาตัย_ กูญา อีงัจ นะ มาโซะ จรือนิ กาปัน_ บรี ดาปัยํ โซะ อีตู. 40กะฆีเตอ_ กูญา กรัจ ตาลี_ บูวัก โกะ ซาโวฮ เดะ ลาโวจ. กูญา ปลือปัซ ตาลี นู อีกัจ กือมูดี. กูญา อาเกะ ลายัยํ โซะ ฮือลด_ บรี กือนา อาเงน_ อีงัจ นะ จรือนิ กะ ปาตัย. 41กูญา ปี กือนา ตือปัจ นู อูมะ ดูวา บือลัฮ_ ญา บลาฆา. กาปัน ญา ตือกริก เดะ อาตัซ บูโฮยํ โซะ อีตู. โซะ บอยา ลือกัจ เดะ บูโฮยํ ตือโฆฮ ดัฮ_ ตรือเบะ เตด บียัซ. โซะ กือมูดี กือนา อูมะ บือซัยํ_ ตาปัยํ ดัฮ_ บรี กาปัน ปือจัฮ ฮาบิฮ.
42โกะ ตาฮัน อีงัจ นะ บูนอฮ ลูมอฮ อูรัก ซาลัฮ_ ตาโกจ จะ กูญา นะ บือดือนัง ปี_ ลือปัซ ดัฮ. 43ตาปี กือปาลา ตาฮัน บลารัก กูญา_ ตีเมา บรี บูวัจ กะฆีเตอ_ ญา บือคานะ นะ บรี เปาโล นะ ฮีโดะ. ญา ปือซัด จะ_ ซือมียา นู ปานัย บือดือนัง_ บรี กูญา ตรือโฌด กะ ลาโวจ ดูลู_ บือดือนัง ปี กะ ปาตัย. 44บารู บรี โกะ ซือมียา ฆีลาฆี_ งาปอ ปาปัด ซือตืองัฮ_ งาปอ โกะ ซือบารัก นู บือกัซ ปือโดะ เดะ กาปัน ซือตืองัฮ_ ปาคัจ ปี กะ ปาตัย. กะฆีเตอ_ กามี รอจ ดัฮ_ ซือมูฮา. ฮอย ซาปา มาตี_ ซืออูรัก โปด_ ฮอย.
Currently Selected:
ปือบูวัจ 27: ULBIBLE
Highlight
Share
Compare
Copy
Want to have your highlights saved across all your devices? Sign up or sign in
