ปือบูวัจ 26
26
เปาโล ตีกัฮ ลาฆู บือดะวา โซะ ฮือลด มูคา นะ อาฆริบปา
1ราฌา อาฆริบปา มือเลา ฌางัน เปาโล จะ_ “บรี เกา มือเลา ตีกัฮ ปาซัน ลาฆู นะ เกา เลอ.”
กะฆีเตอ_ เปาโล ลามัย ตางัน_ มือเลา จะ_ 2“ราฌา อาฆริบปา เออ_ กู ลีฮัจ จะ_ บาฌิ ดัฮ เลอ_ นู กู ฆาโดฮ บือดีรี โซะ ฮือลด มูคา เกา_ อารี อีนี_ บรี ตีกัฮ ลาฆู ซือมูฮา_ นู โกะ บักซา ยิว อาดู กู นี. 3เกา เลอ_ ฌาดี ซือมียา นู ปานัย ซูโงฮ_ เดะ โกะ ฮาดัจ นะ บักซา ยิว_ เดะ ลาฆู นู กูญา บือตือฆัฮ_ ซือมูฮา. กะฆีเตอ_ กู มีตา_ บรี เกา ตาฮัด ฮาตี_ ดืองัยํ ลาฆู นะ กู เลอ.
4“ลูมอฮ ยิว ซือมูฮา ตาฮู_ ตะเดะ กู ฌาดี นานะ_ กู อาดา ลาฆู ดูโดะ กะฮามี. กูญา ตาฮู_ ตะเดะ ลามูลา เตอ_ กู บือเลฮ ดูโดะ กะฮามี_ เดะ นังฆรี นะ กู_ เดะ นังฆรี เยรูซาเลม โปด. 5กูญา กราลา กู_ ลามา ดัฮ. ดัฮ กูญา นะ มือเลา ฌาดี ซะซรี_ กูญา ฆาโดฮ ซาโงะ จะ_ ตะเดะ ลามูลา_ กู ฌาดี ซือมียา ลูมอฮ ฟาริซี ซืออูรัก_ ราเฌด ตูโรจ กะ ลาฆู นะ กีตา. 6วะตู อีนี_ กู กือนา บือดีรี ปัจ อีนี_ บรี กือนา ฮูโกบ_ กรานา กู อาดา จาดัก กะฆีนี จะ_ ลาฆู อีตู_ นู ตูฮัด เดะ อาตัซ บือเลฮ บือฌาญี_ ฌางัน โกะ บีลาแก นะ กีตา เตอ_ ญา นะ บูวัจ บรี ซุจ รือมัก ดัฮ. 7ดูวา บือลัซ ปาลัฮ นะ บักซา กีตา_ นู ราเฌด มือญือมัฮ กะ ตูฮัด เดะ อาตัซ_ ซียัก มาลับ_ กูญา โปด_ จาดัก นะ ซาโมจ_ บือกะ ปือมือเลา บือฌาญี อีตู_ รือมัก ดัฮ. ราฌา เออ_ กรานา กู จาดัก กะฆีนี เลอ_ นู ลูมอฮ ยิว อาดู กู นี. 8กาเญา ซือมูฮา เออ_ บูวัจ นามา เลอ_ กาเญา ปาคัจ อีงัจ จะ_ นู ตูฮัด เดะ อาตัซ_ นะ บูวัจ บรี ซือมียา ฮีโดะ ปาเระ เดะ มาตี เตอ_ ฌาดี ลาฆู นู ปือจายา เตด บือเลฮ ดัฮ?
9“ตาปี อีซี กู ตะอาซิก_ ดูลู เตอ_ กู บือเลฮ ตือตู เดะ ฮาตี_ นู กู ฆาโดฮ บูวัจ ลาฆู มานามา_ บาญะ มาจับ_ นู นะ บือลาวัด ฌางัน ลาฆู นะ เยซู_ ซือมียา ตูโปะ นาซาเรด อีตู. 10กะฆีเตอ_ กู บือเลฮ บูวัจ กะฆีเตอ_ เดะ นังฆรี เยรูซาเลม. ลูมอฮ ซามี ซัยํบือซัยํ กูญา ปือซัด กะ กู จะ_ บรี กู รีฆะ โกะ ซือมียา นะ ตูฮัด_ บาญะ อูรัก_ กานัก เดะ ปือฌารา. กาลา กูญา กือนา กรัจ ฮูโกบ บรี มาตี_ กู โปด ลีฮัจ บาฌิ บือซามา. 11บาญะ กาลี_ กู ปี กะ รูมัฮ บือมุน_ โซะ อีนี_ โซะ อีตู_ บูวัจ บรี กูญา กือนา ฮูโกบ. กู กือวาซา นะ บูวัจ บรี กูญา นะ มือเลา ตะอารัฮ กะ ตูฮัด เดะ อาตัซ. กู บืออีเซด โตระ ฌางัน กูญา_ ฌู กู ตูโรจ กูญา ปี กะ นังฆรี อาซิก ฌูฆา_ บีดา นะ ปรือกัด กูญา.” เปาโล ญา จะ.
เปาโล จรือตา นู ญา ดาปัจ เยซู กะฮามี
(ปือบูวัจ 9.1-19; 22.6-16)
12เปาโล มือเลา ลาฆี จะ_ “กรานา กะฆีเตอ เลอ_ กู ปี กะ นังฆรี ดามัดกัด_ อาดา ซูรัจ ปือมือซัด นะ ลูมอฮ ซามี ซัยํบือซัยํ. 13โอ ราฌา เออ_ ตานา กู ฌาลัด ปี_ วะตู ตืองัฮ อารี_ กู ลีฮัจ จรัฮ ซูโลฮ มาแรฮ ดาตัก เดะ โซะ ลาแงะ_ โซะ กือลีลิก กู_ ฌางัน กาวัด นู ปี ซามา. จรัฮ อีตู_ บือซายา ลือเบฮ เดะ มาตา อารี ดัฮ. 14กามี ซือมูฮา รือบัฮ กะ ตานัฮ. กู ดืองัยํ ซือวารา มือเลา ฌางัน กู_ ฌาดี บาซา ฮีบรู_ นู จะ_ ‘เซาโล_ เซาโล เออ_ บูวัจ นามา ปะ เกา ตืองัฮ ปรือกัด กู? ซาเบะ กะฆีเตอ เกา ซูซัฮ ดัฮ เลอ_ ซือรูปา กะ กรือเบา ซืออีโกยํ_ นู ซีปะ ตูกัจ นะ ตกเก ญา.’ 15โซะ กู_ ตาญา จะ_ ‘ตูฮัด เออ_ เกา ฌาดี ซาปา?’ ตูฮัด ญา ตีกัฮ จะ_ ‘กู ฌาดี เยซู_ นู เกา ตืองัฮ ปรือกัด เลอ. 16ตาปี บีกัซ บือดีรี เลอ. กู มาแรฮ ปลีฮัจ กะ เกา_ บีดา นะ ตืองะ เกา_ ฌาดี ซือมียา บือกรือฌา นะ กู_ บรี เกา นะ มือเลา ฌาดี ซะซรี_ ปาซัน ลาฆู นู เกา ลีฮัจ กู ดัฮ_ ปาซัน ลาฆู นู กู นะ ปลีฮัจ กะ เกา_ โซะ ฮือลด ฌูฆา. 17กู นะ ตูโลก เกา_ บรี ลือปัซ เดะ ลูมอฮ บักซา ยิว_ เดะ ลูมอฮ บักซา อาซิก โปด. กู นะ ซูโรฮ บรี เกา ปี กะ กูญา. 18เกา นะ บูวัจ บรี กูญา ญรือลัก มาตา ดัฮ_ บีดา บรี กูญา นะ อาเลฮ มาแรฮ_ เดะ โซะ กือลับ_ รอจ กะ โซะ จรัฮ_ นะ อาเลฮ มาแรฮ เดะ ตางัน นะ กือปาลา ฮาตู ซีตัด รอจ กะ ตูฮัด เดะ อาตัซ. กรานา กูญา ปือจายา กะ กู_ กู นะ อาเกะ ดูซา นะ กูญา_ นะ บรี กูญา อาดา บาฮาเฆด_ บือซามา ฌางัน โกะ ซือมียา นู กู ปีเลฮ ดัฮ_ บรี ฌาดี ลูมอฮ ซือมียา นะ กู.’ ตูฮัด ญา จะ.
เปาโล มือญาเระ ลาฆู กรือฌา นะ ญา
19“กะฆีเตอ เลอ_ ราฌา อาฆริบปา เออ_ กู ฆางู บูวัจ ตูโรจ กะ ลาฆู นู ปลีฮัจ กะ กู เดะ โซะ ลาแงะ. 20กู ฮึนตะ เดะ นังฆรี ดามัดกัด_ เดะ นังฆรี เยรูซาเลม_ ลาลู กู ปี กะ นังฆรี บักซา ยิว ราตา_ กะ ลูมอฮ บักซา อาซิก ฌูฆา. กู ปี มือญาเระ กะ กูญา_ นู กูญา กือนา บราเลฮ ฮาตี_ กือนา อาเลฮ มาแรฮ ซารี ตูฮัด เดะ อาตัซ_ กือนา บูวัจ ตูโรจ ลาฆู นู บรี ลีฮัจ จะ_ กูญา บราเลฮ ฮาตี ดัฮ. 21กรานา ลาฆู กะฆีเตอ เลอ_ ลูมอฮ ยิว รีฆะ กู เดะ ลามัน รูมัฮ มือญือมัฮ ตูฮัด. กูญา อีงัจ นะ บูนอฮ กู. 22ตาปี รอจ กะ อารี อีนี_ ตูฮัด เดะ อาตัซ_ ญา ตูโลก กู ดัฮ. กะฆีเตอ กู อาดา บือดีรี ตือปัจ อีนี_ มือเลา ฌาดี ซะซรี กะ ลูมอฮ ซือมียา ฮาฌะ_ ฌางัน ลูมอฮ ซือมียา ซัยํบือซัยํ_ ซือมูฮา. นู กู มือญาเระ อีตู_ ฌาดี ซา ลาฆู ฌางัน ปือมือเลา นะ โกะ ซือมียา ตูโดฮ ลาฆู นะ ตูฮัด_ ฌางัน ปือมือเลา นะ มูซา ฌูฆา. กูญา อีตู บือเลฮ ตูโดฮ ลาฆู นู นะ ฌาดี โซะ ฮือลด_ นู จะ_ 23ราฌา นู บรี ซือลามัจ เตอ_ ญา ฆาโดฮ นะ ตาฮัด ซูซัฮ. ญา เตอ_ นะ ฌาดี ซือมียา ลามูลา_ นู ฮีโดะ ปาเระ เดะ มาตี. กะฆีเตอ_ นะ บรี ลูมอฮ บักซา ยิว ฌางัน ลูมอฮ บักซา อาซิก นะ ลีฮัจ ซายา จรัฮ_ นู นะ บรี กูญา ฮีโดะ ลือปัซ บาฌิ.” ญา จะ.
24ตานา เปาโล ตีกัฮ ลาฆู นะ ญา กะฆีนี_ ฮูลู บาลัก เฟซะตัด มือเลา กะ ญา_ ซือวารา บือซัยํ_ จะ_ “เปาโล เออ_ เกา ฆีลา ดัฮ เลอ. นู เกา บลาฌัยํ บาญะ ดัฮ_ บูวัจ บรี เกา ฆีลา ดัฮ.” ญา จะ.
25เปาโล ตีกัฮ จะ_ “โอ เฟซะตัด_ นู ฌาดี ซือมียา ซัยํบือซัยํ เออ_ กู ฮอย เตด ฆีลา ดัฮ เลอ_ ตาปี กู มือเลา ปือมือเลา นู ซูโงฮ_ ปือมือเลา นู บาฌิ บือฆูนา. 26โซะ ราฌา เตอ_ ญา ตาฮู ลาฆู อีนี_ บาฌิ ดัฮ. กะฆีเตอ_ กู บรานี มือเลา ฌางัน ญา. กู ปือจายา ซูโงฮ จะ_ ลาฆู อีนี ซือมูฮา_ ญา ลีฮัจ บาฌิ ดัฮ. กรานา ลาฆู อีนี_ เตด บือเลฮ บือฌาดี เดะ ตือปัจ ลีนง เลอ. 27ราฌา อาฆริบปา เออ_ เกา ปือจายา ปือมือเลา_ นะ โกะ ซือมียา ตูโดฮ ลาฆู นะ ตูฮัด เฆอ? กู ตาฮู นู เกา ปือจายา ดัฮ เลอ.” เปาโล ญา จะ.
28ราฌา อาฆริบปา ตีกัฮ กะ เปาโล จะ_ “ฌางัน ปือมือเลา ดีกิ ตอจ กะฆีนี_ เกา อีงัจ นะ บูวัจ บรี กู ฌาดี อูรัก คริดเตียน เฆอ?”
29เปาโล ตีกัฮ กะ ราฌา จะ_ “เตด จะ_ ปือมือเลา ดีกิ ตอจ_ ปือมือเลา บาญะ โปด_ กู มีตา เดะ ตูฮัด เดะ อาตัซ_ บรี เกา ฌางัน ลูมอฮ กาเญา ซือมูฮา นู ดืองัยํ กู_ อารี อีนี_ นะ ฌาดี ซือรูปา บือกะ กู ฌาดี เลอ. ตาปี ตีเมา บรี กาเญา กือนา ราตัย กะฆีนี_ ซือรูปา กู.” ญา จะ.
30กะฆีเตอ ราฌา ฌางัน ฮูลู บาลัก กูญา บือดีรี_ ฌางัน บือนิด ฌางัน ลูมอฮ ซือมียา นู ดูโดะ บือซามา. 31กูญา ตรือเบะ ปี_ บือกีรา บือซามา_ มือเลา จะ_ “ซือมียา อีนี เตด บือเลฮ บูวัจ ซาลัฮ นามา_ นู ฆาโดฮ นะ บรี มาตี_ นู ปาโตจ นะ กือนา ราตัย โปด_ ฮอย.”
32ราฌา อาฆริบปา มือเลา_ ฌางัน ฮูลู บาลัก เฟซะตัด_ จะ_ “ดัฮ ซือมียา อีนี_ เตด บือเลฮ มีตา นะ ดาปัจ ราฌา ซีซา เตอ_ นะ ปลือปัซ ญา โปด_ บือเลฮ.”
Currently Selected:
ปือบูวัจ 26: ULBIBLE
Highlight
Share
Compare
Copy
Want to have your highlights saved across all your devices? Sign up or sign in
