ปือบูวัจ 25
25
เปาโล มีตา ปี บือดาปัจ ฌางัน ราฌา ซีซา
1ตานา เฟซะตัด มาแรฮ ฌาดี ฮูลู บาลัก_ บือเลฮ ตีฆา อารี ดัฮ_ ญา ตรือเบะ เดะ นังฆรี ซีซาเรีย_ ปี กะ นังฆรี เยรูซาเลม. 2ตือปัจ อีตู_ ลูมอฮ ซามี ซัยํบือซัยํ_ ฌางัน ลูมอฮ กือปาลา บักซา ยิว_ มาแรฮ ดาปัจ ญา_ อาดู ลาฆู นะ เปาโล กะ ญา. กูญา ปูโฌะ ญา_ มีตา จะ_ 3บรี เฟซะตัด นะ ตูโลก กูญา_ ปือซัด บรี อาตัจ เปาโล มาแรฮ_ กะ นังฆรี เยรูซาเลม. กูญา อีงัจ นะ นาตี เดะ ตืองัฮ ฌาลัด_ บีดา นะ บูนอฮ ญา. 4ตาปี เฟซะตัด ตีกัฮ กะ กูญา จะ_ “เปาโล อาดา เดะ ปือฌารา_ เดะ นังฆรี ซีซาเรีย. แกะลาฆี กู นะ บาลิ ปี กะ กียุฮ. 5ดัฮ เปาโล บูวัจ ซาลัฮ นามา โปด_ บรี กือปาลา นะ กาเญา ซือตืองัฮ_ ปี บือซามา ฌางัน กู_ บรี อาดู ญา ปัจ กียุฮ.” ญา จะ.
6กาลา เฟซะตัด ดูโดะ ปัจ อีตู_ บือเลฮ ฆามะ จะ ลาปัด อารี_ ซือปูโลฮ อารี ดัฮ_ ญา บาลิ ปี กะ นังฆรี ซีซาเรีย. โซะ ปาฆี_ ญา ปี ดูโดะ เดะ ตือปัจ บือดะวา กรัจ ฮูโกบ_ ปือซัด บรี อาเมด เปาโล บาวา มาแรฮ. 7ตานา เปาโล มาโซะ ดัฮ_ โกะ บักซา ยิว_ นู มาแรฮ ดาตัก เดะ นังฆรี เยรูซาเลม ดัฮ_ กูญา บือดีรี กือลีลิก ญา_ อาดู ญา_ บาญะ ลาฆู_ บาญะ มาจับ_ นู ซาลัฮ โตระ. ตาปี กูญา ฮอย ปือมือเลา ซะซรี_ นู นะ บูวัจ บรี บือฆารี บือเลฮ. 8เปาโล ตีกัฮ ลาฆู อีตู จะ_ “กู เตด บือเลฮ บูวัจ มานามา โปด_ นู ซาลัฮ เดะ ปือมือเลา ฮูโกบ นะ บักซา ยิว_ นู ซาลัฮ เดะ รูมัฮ มือญือมัฮ ตูฮัด นู ซาลัฮ เดะ ราฌา ซีซา โปด_ ฮอย ลาลู.” ญา จะ.
9ตาปี เฟซะตัด อีงัจ นะ บรี บักซา ยิว ซูกา ฮาตี. กะฆีเตอ ญา มือเลา ฌางัน เปาโล จะ_ “เกา นะ ปี กะ นังฆรี เยรูซาเลม เฆอ_ บีดา กู นะ กรัจ ฮูโกบ เกา ปัจ กียุฮ_ ปาซัน ลาฆู นู กูญา อาดู อีนี?.”
10เปาโล ตีกัฮ จะ_ “กู ตีเมา. กู อาดา บือดีรี โซะ ฮือลด ตือปัจ ดูโดะ กรัจ ฮูโกบ_ นะ ราฌา ซีซา. โซะ อีนี เลอ_ ฆาโดฮ นะ ซาซัจ กรัจ ฮูโกบ ลาฆู นะ กู. อีซี เกา ตะอาซิก ตาฮู จะ_ กู เตด บือเลฮ บูวัจ ซาลัฮ_ ฌางัน ลูมอฮ บักซา ยิว. 11ดัฮ กู บูวัจ ซาลัฮ_ นู ปาโตจ นะ กือนา กรัจ ฮูโกบ บรี มาตี_ กู นะ เตด บือลาวัด_ นะ ปี มาตี กะฆีเตอ. ตาปี ดัฮ กูญา อาดู กู_ ฌาดี ลาฆู เตด ซูโงฮ_ ฮอย ซาปา นู นะ บือเลฮ อาตัจ กู_ บรี กะ กูญา. กู มีตา ปี ดาปัจ ราฌา ซีซา_ เดะ นังฆรี โรม_ บรี ญา นะ กรัจ ฮูโกบ ลาฆู นะ กู.” เปาโล ญา จะ.
12กะฆีเตอ_ เฟซะตัด บือกีรา ลาฆู อีนี_ ฌางัน ลูมอฮ ซือมียา บือกีรา นะ ญา_ ลาลู มือเลา จะ_ “เกา มีตา ปี ดาปัจ ราฌา ซีซา_ กะฆีเตอ_ เกา นะ ปี กะ ราฌา ซีซา เลอ.”
ฮูลู บาลัก เฟซะตัด บือกีรา ลาฆู อีนี ฌางัน ราฌา อาฆริบปา
13ลือปัซ บาญะ อารี ดัฮ_ ราฌา อาฆริบปา ฌางัน บือนิด_ อาดี นีบีนี เดะ ญา_ กูญา มาแรฮ กะ นังฆรี ซีซาเรีย_ บีดา นะ ฌือเงาะ ลีฮัจ ฮูลู บาลัก เฟซะตัด. 14กาลา กูญา ดูโดะ ปัจ อีตู_ บาญะ อารี ดัฮ_ เฟซะตัด มือญาเระ ลาฆู นะ เปาโล_ บรี กะ ราฌา ตาฮู_ มือเลา จะ_ “ตือปัจ อีนี อาดา ซือมียา ซืออูรัก_ นู ฟีลิก ญา กานัก ตีงัน เดะ ปือฌารา ดัฮ. 15กาลา กู ปี กะ นังฆรี เยรูซาเลม เตอ_ ลูมอฮ ซามี ซัยํบือซัยํ_ ฌางัน ลูมอฮ อูรัก ตูฮา นะ บักซา ยิว_ กูญา อาดู ญา_ มีตา บรี กู นะ กรัจ ฮูโกบ ญา. 16ตาปี กู มือเลา ฌางัน กูญา จะ_ ฮาดัจ นะ บักซา โรม บูกัด กะฆีเตอ เลอ. ดัฮ นะ กรัจ ฮูโกบ ซือมียา ดีฮา เตอ_ ซือมียา กือนา อาดู ฌางัน ซือมียา นู อาดู ญา_ กือนา บือดาปัจ บือซูวา มูคา_ บีดา บรี ซือมียา กือนา อาดู อาดา จือลัฮ_ นะ ตีกัฮ ลาฆู_ นู กูญา อาดู อีตู. ดัฮ เตด บูวัจ กะฆีเตอ_ นะ ซรัฮ ซือมียา กือนา อาดู บรี กะ กูญา_ เตด บือเลฮ ดัฮ เลอ.
17“กาลา กูญา มาแรฮ ปัจ อีนี ดัฮ_ กู เตด นาตี ลามา. เดะ โซะ ปาฆี_ กู ปี ดูโดะ เดะ ตือปัจ บือดะวา กรัจ ฮูโกบ_ ปือซัด บรี บาวา อูรัก อีตู มาแรฮ มาโซะ. 18ตานา โกะ ซือมียา อาดู_ บือดีรี อาดู ญา_ กู อีงัจ จะ_ กูญา นะ อาดู ญา_ ฌาดี ลาฆู ฌาฮัจ_ ตาปี บูกัด กะฆีเตอ. 19กูญา อาดา ลาฆู บือตือฆัฮ ฌางัน ญา_ ปาซัน ลาฆู นู กูญา มือญือมัฮ กะ ตูฮัด_ ปาซัน ซือมียา ซืออูรัก ปือนามา เยซู_ นู มาตี ดัฮ. ตาปี เปาโล มือเลา จะ_ ญา อาดา ฮีโดะ ลาฆี. 20ตานา กู บรีงัจ บาญะ_ เตด ตาฮู นะ กรัจ ฮูโกบ ลาฆู อีนี กะฮามี_ กู ตาญา เปาโล จะ_ ญา นะ ปี กะ นังฆรี เยรูซาเลม เฆอ_ บีดา นะ ซาซัจ ลาฆู ปัจ อีตู? 21ตาปี เปาโล มีตา_ บรี ราฌา ซีซา นะ ซาซัจ ลาฆู นะ ญา. กะฆีเตอ_ กู ปือซัด บรี ญา ดูโดะ เดะ ปือฌารา_ ตือดะ กู นะ บือเลฮ อาตัจ ญา_ กะ ราฌา ซีซา.” เฟซะตัด ญา จะ.
22ราฌา อาฆริบปา มือเลา กะ เฟซะตัด จะ_ “กู ซูกา นะ ดืองัยํ ซือมียา อีตู ฌูฆา.”
เฟซะตัด ตีกัฮ จะ_ “มัฮปาฆี เลอ_ เกา นะ บือเลฮ ดืองัยํ ญา.”
กูญา บาวา เปาโล ปี กะ โซะ ฮือลด ราฌา อาฆริบปา
23เดะ โซะ ปาฆี_ ราฌา อาฆริบปา_ ฌางัน บือนิด_ มาแรฮ มาโซะ ดูโดะ เดะ บาลัย กรัจ ฮูโกบ. อาดา ฌางัน บือนา นู บือฆาจะ บือซรี_ อาดา ฌางัน โกะ ปรูโซก แนฮฌือแนฮ. อาดา ลูมอฮ กือปาลา ตาฮัน_ ฌางัน ลูมอฮ ซือมียา ซัยํบือซัยํ นะ นังฆรี อีตู_ มาแรฮ ซามา. เฟซะตัด ปือซัด บรี บาวา เปาโล บือมาแรฮ. 24เฟซะตัด มือเลา จะ_ “ราฌา อาฆริบปา เออ_ ลูมอฮ กาเญา ซือมูฮา เออ_ ลีฮัจ เลอ_ กะ ซือมียา อีนี. ลูมอฮ บักซา ยิว ซือมูฮา_ มาแรฮ อาดู ญา_ เดะ โซะ อีนี_ เดะ โซะ นังฆรี เยรูซาเลม ฌูฆา. กูญา บือซูระ จะ_ ญา เตด บือฆูนา นะ ฮีโดะ ลาฆี. 25ตาปี โซะ กู นี_ ลีฮัจ จะ_ ญา เตด บือเลฮ บูวัจ ซาลัฮ นามา_ นู ปาโตจ นะ กือนา ฮูโกบ มาตี. ตาปี ญา มีตา_ บรี ลาฆู นะ ญา_ นะ ปี กะ ราฌา ซีซา_ นู บือซัยํ. กะฆีเตอ_ กู อีงัจ นะ อาตัจ ญา_ ปี กะ นังฆรี โรม. 26ตาปี กู ฮอย ลาฆู นู ซัฮ_ นู นะ ฆาแรฮ กะ ราฌา ซีซา_ นู ฌาดี ตูฮัด นะ กู. กะฆีเตอ_ กู บาวา ญา_ บรี มาแรฮ ดาปัจ ลูมอฮ กาเญา_ ฌางัน เกา เลอ_ ราฌา อาฆริบปา เออ. กะฆีเตอ_ วะตู ซาซัจ ลาฆู นะ ญา บรี ซือลือซัย ดัฮ_ กู นะ อาดา ลาฆู นู ซัฮ_ นะ ฆาแรฮ. 27กรานา กู ลีฮัจ จะ_ ดัฮ กู อาตัจ อูรัก ซาลัฮ_ ตาปี เตด บรี ตาฮู ลาฆู นู กือนา อาดู ญา_ นะ ฌาดี ลาฆู เตด กือนา เลอ.” เฟซะตัด ญา จะ.
Currently Selected:
ปือบูวัจ 25: ULBIBLE
Highlight
Share
Compare
Copy
Want to have your highlights saved across all your devices? Sign up or sign in
