نامَه اَفسوسی کلیسارا 5
5
محبتی نَه رفتار بکَرَ
1پس هِنتَه خاجَتییَه خِردَنون شیوار، خدا کا سرمشق بیگَرَ. 2و موحبتینه رفتار بکرَ، هته کن مسیح نی اَمَش موحبَت کردَ و اِشتَن جانی، هنته ایلَه قِربونی و عَطرینَه خَلایی شیوار خدارا تقدیم کردش.
3ولی شمَه دلَکا، بی عیفتیکا یا هر مودیل ناپاکیکا یا طمَع کا حتی گَفی مژَنه، اِمی خونه کن اِمِن موقدسَه آدَمون شئَنیکا نیَه. 4بَدَ گفِن و دَدارَ واجی و رَکیکَه گفِن شمَه دِلَکا مبو کن شمَه شَائنیکا نییَه؛ چَی جِگا پی شکر کردِ. 5اِمی خونه کن یقین بزنَه کن هیچ بی عیفت یا جیفینین یا طمعکارَ اینسان، کن هَه بوت پرستین، خدا و مسیح پادیشایی کا رَسَتی نیشَه. 6مرزَ کَسی بَشِمَه دَدارَ گَفونَّه گول بژَنه، چون هِم چییون خونه اَ کن خدا غَضَّب نافِرمونون سَردِرِ آ. 7پس اَوونَّه شریک آنِبَه.
8شمه ایی زمان ظِلَماتیکا بیرون، ولی ایسَه خداوندیکا نوریرون. پس هنته نوری خِردَنون شیوار رفتار بکَرَ. 9اِمی خونه کن نوری بَرَ، هر مودیل چاکی و راستی دِرِستیکا پَیدا آرَب. 10تقلا بکرَ تا سَر آگِنه کن چه چیی ایی خداوندی راضی آرَکَرد. 11ظلَماتی دَدارَ کارونکا شریک آنِبَه، بَسکم اوون دیار آکَرَ. 12چون اَ چیی ایی کن اِنتَرَ آدَمِن نونَکِه بَکنَه حتی زونو سَر وَردِ شرم آورَ. 13ولی هر چیی ایی کن نوری واسیطنَه دیار آبو، اَیر آرَبن. 14چون هر چیی ایی کن دیار آرَبن، نورَ. اِمی خاطر کن واتَشون:
«اَی ته کن خاویکایشَه، پِب،
مردَاون دِنیاکا زندَ آب،
مَسیح اِشتَن نوری، اِشتِه سَردِرِ دَتاوِستییَه.»
15پس، بَرک حواسِرون ببو کن چنترَ رفتار بَکَرون، اَلمندون شیوار رفتار بکرَ نِه نافَمون شیوار. 16اِم وقتی کن دارَ قدری بزنَه، اِمی خونه کن اِم روجِن بَدَ روجِنی هِستینَه. 17پس نافَم مبَه، بَسکم سرآگِنه کن خداوندی ایرادَ چه چییَه. 18شراوی مَست آنِبَه، کن بَشِمَه بدَ کارونرا دَرَراکنِست؛ بَسکم خداروح کا پتلمَه ببَه. 19مزامیرینه، پرستشَه سِرودِن و آوازِنی کن خدا روح کا اَ، یندِنَه گفَه ژَنِه بکرَ و صِدق دلینَه خداوندیرا بوخونه و آهنگ سِی آکَرَ. 20اوزون خدای دَدَ، چَمه خداوند عیسی مسیح نومینَه هَمه چی خونه شکر بواجَه.
21مسیح حورمتی خونه، یَندِ فِرمون ببَه.
22اَی ژِنن، هَتَه کن خداوندیرا فِرمونیرون، اِشتَن شو فِرمون ببَه، 23اِمی خونه کن شو ژِنی سَرَ، هته کن مَسیح کلیسا سَرَ، یعنی چَی تَن، و هَه اِشتَن، کلیسا نیجات اَدَرَ. 24پس هته کن کلیسا مسیح فِرمونَه، ژِنن نی پی هر چیی ایکا اِشتَن شو فِرمون ببون.
25اَی مِردِن، اِشتَن ژِنون رَی بدارَ، هته کن مسیح نی اِشتَن کلیسا رَی داریَه و اِشتَن جانی چَیرا آداشَه، 26تا بَی خدا کلامی آوینَه پاجا آکَرِ و اِنترَکه کلیسا تقدیس بکرِ، 27تا اَ شکوهینَه کن کلیسا بَداشتی، بیدونه هیچ لَک و چین و نقصی ، بَسکم موقدَّس و بی عَیب ببو، اِشتَن وَریکا حاضیر آکرِ. 28هِنترَکه، مِردِن پی اِشتَن ژِنون هنته اِشتَن تَنی شیوار رَی بدارِن. اَ کن اِشتَن ژِنی رَی بَداشتیَه، بَشتن رَی بَداشتی. 29اِمی خونه کن هرگز کَسی اِشتَن جندَکیکا بیزار نییَه، بَسکم بَی هردَ چیی دَرِ و بَی غَم بردی، هته کن مسیح نی کلیسا غَم بردییَه- 30اِمی خونه کن چَی تَنی اَعضا ایمون. 31«اِمی خاطر مِرد، اِشتَن دَدَ و نَه نَه آرَهَشت، و اِشتَن ژِنی دَرَچیکست، و اَ دِ ایلَه تَن آنَّب.» 32اِم راز، برک یالَه- و اِمی کن اَز باتیم مسیح و کلیسا خونه اَ. 33خولاصَه اِمکن، هر کِرَم شمَکا نی پی اِشتَن ژِنی هنتَه اِشتَن جانی شیوار رَی بدارِ، و ژِن پی چَی حواس ببو کن اِشتَن شو حورمتی غَم بَرِ.
Currently Selected:
نامَه اَفسوسی کلیسارا 5: CTB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
