نامَه اَفسوسی کلیسارا 3
3
اِنجیلی راز دیار آرَب
1اِمی خاطر اَز، پولوس، کن شمَه غَیر یهودیون خونه مسیح عیسی زیندانی ایمَه-
2و بیدون شک شمه حتما اِم موضوع درَستَرونه کن خدا فیضی سَر نیظارَت، شمَه خیدمتی خونه، بَمِنِشون دوعَیه. 3کن چنتَه اَ راز، موکاشفَه نَه مِرا دیار آبَیه، هَته کن تلَکه ایی چَی خونه شِمَرا نوشتَمه، 4چَی خندِ نَه، بَشارون سَر آگنِستِه کن چنته مَسیح رازی فَهمستِمَه، 5اَ رازی کن گذَشته اودومونکا آدَمون زوعَه اونرا دیار آنِبَه، اَتَه کن ایسَه خدا موقدسَه روح واسیطنَه چَی موقدسَه رسولونرا و پَیغَبرونرا دیار آبَیه. 6اَ راز اِمَه کن غَیر یهودییِن مَسیح عیسی دلَکا اِنجیلی واسیطنَه، هَم اِرثین و هَه تَنی اَعضا هِستینَه و خدا وعدَکا شَریکین.
7اَز، خدا فیضی خَلا واتنَه، کن چَی خِنَری اَعمالی واسیطنَه بَمنِشون دوعَه، اِم انجیلی پاسَری آبیمَه. 8هر چَنَه کن موقدسَه آدَمون دلَکا گِچ تَرینیم، اِم فیضی بَمِنِشون دوعَه کن مسیح وِرَ گنجون خبَری غَیر یَهودیونرا اییلام بکَم، 9و گِردیرا آمونِم کن خدا نَقشَه چنترَ اَنجوم آرَب. خدایی کن گردِ چییِنِش خلق کردَیه اِشتَن اِم رازی گِذَشتَکا نون آکَردَش بَه. 10تا ایسَه کلیسا واسیطنَه خدا موختَلیفَه حیکمَتِن، و قودرَتونرا و رَئَیسونرا، آستامونیَه جگا اونکا دیار آبو. 11اِم هدفی بَه کن ههَ شِروو کا خدا داری، کن خدا اَی چَمَه خداوند مسیح عیسا کا اَنجوم داشَه. 12اَمه مسیح دلَکا بَی ایمان داشتِه واسیطنَه، بَشامونه جورئَتینه و ایطمینانینَه خِداکا نِزِک آبه. 13پس اَ رنجِنی خاطر کن شمَه خونه تاو بوعردیمَه خاشتو خازِمَه، دلسرد آنِبَه، چیرا کن اَیِن شمه ایفتخار کردِ باعیث بَبی.
روحانیَه زِبقی خونه دوا
14اِمی خاطر، اَز آستامونیَه دَدَ ناریکا زِنگ بَژَم 15آستامونیکا و زَمینی سَردِرِ هر خانیوادَ ایی، چَی نومی بوعَردین، 16کن اِشتَن شکوه جلالی خاطر، بَشِمَه دولتمندی بِدرِ کن اِشتَن باطنیکا خدا روح کاریَرینَه قودور و زاکیندار آبَه، 17تا ایمان داشتِه واسیطنَه مسیح شمَه دلونکا بومونِه و موحبَتیکا ریشَه بژَنه، و آمبَست آبَه، 18تا زبق بیگِرَ کن گردِ موقدسَه آدَمونَّه، مسیح موحَبتی درازی و وشایی و عومقی و بِلَندی کا سَر آگِنَه 19و مسیح موحبتی کن اینسانیَه مَریفَتیکا کفاتَرَ، آزنَه- تا کامیلا خدا کامیل بِه کا پَتلمَه آبه.
20ایسَه شکوه جلال خدارا ببو کن بَشایَه اَ خِنَری واسیطنَه کن چَمه دلَکا کار بَکَی، هر چیی ایکا کن اَمه بَپیمون یا فکر بَکمون، خَیلی ویشتَر، عمل بکَرِ. 21کلیسا دلَکا و مسیح عیسی کا، گِردِ اودومنکا، تا ابد خدارا شکوه و جلال ببو، آمین.
Currently Selected:
نامَه اَفسوسی کلیسارا 3: CTB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
