Roma 12

U Tunay a Kákkabiyag nu Kristiyano

1Kanya ngane kákkapatkaka ko hide, kinagbiyan kam nu Diyos kaya mákpágguhunák nikam. Nadid a biyag kam palla, iparehu moy u biyag moy tu essa a alay a awan ti kapintasan a iyatád moy tu Diyos para págserbi nikuna mentaras biyag kam. Iye u makapangpasaya nikuna. Sakay iye u tatahoden a págsamba moy nikuna.#12:1 Basaán tu Mateo 16:24-25, Lukas 14:27, Filipos 4:18. 2Dyan moy ahigán u gággimitán nu tolay hide ti munduwan iye. Pabayan moy a baguwán kam nu Diyos tu pamamag-itan nu págbagu na tu isip moy hide, tánni matukuyan moy u kaluuben nu Diyos ni ánya u maganda katanggap-tanggap sakay makasaya nikuna.#12:2 Basaán tu Juan 15:10-14, Efeso 6:6, Santiagu 4:15.

3Dipo tu págpapala a impagkaluub nu Diyos nikán ay piniliyák na para magtoldu tu upos na, kagiyán ko nikam a dyan moy pahalagaan u sadile moy ti mas higit tu nerarapat. Ni awan tenggiyán moy u tunay moy a kakayanan ayun tu pánnampalataya a inyatád nikam nu Diyos. 4Ni kodya a u bággi ay makpal a parte sakay bawat parte ay tehhod a kanya-kanya a tarabaho,#12:4-8 Basaán tu 2 Corinto 12:1. 5konna labe nikitam a manampalataya. Makpal kitam, pero nabuo kitam tu eessa a bággi ni Cristo, sakay balang essa ay parte nu kada essa. 6Iba-iba u kakayanan a inyatád nikitam nu Diyos ayun tu habag na, kanya gamitán tam i kaluuban ina hide. Ni u kaluub nu essa a tolay ay págpahayag tu upos nu Diyos, kailangan ipahayag na iye ayun tu pánnampalataya na. 7Ni u kaluub na ay tumulung tu kapareho, tumulung siya. Ni magtoldu, magtoldu siya, 8ni págpayo, magpayo siya ti maayus, ni pángngatád, mangatád siya tu maluwag tu kaluuben na, ni pámmuno, mamuno siya ti buo a tiyaga. Sakay ni káttulung tu te kailangan, tumulung siya a tehhod a kasayaan.

9Magmahalan kam a tehhod a katapatan. Kaiyamutan moy u madukás sakay palagi kam a maggimet ti maganda.#12:9-10 Basaán tu Juan 15:12-13, Roma 13:8-10, 1 Juan 4:8. 10Magmahalan kam bilang mátkaka ni Cristo sakay pahalagaan moy u agum higit tu págpahalaga moy tu sadile moy. 11Dyan kam magin tamad ni awan magpakasipag kam sakay buo a puso a magserbi tu Panginoon. 12Sakay dipo te pag-asa kam tu biyag magsaya kam. Pagtiisan moy u hirap hide sakay palagi a manalangin.#12:12 Basaán tu Galacia 5:22, 2 Pedro 3:9. 13Tulungan moy u kákkapatkákka moy hide a mánnampalataya a te kailangan, sakay patulusán moy u awan hide ti matulusan.

14Ipagdasal moy tu Diyos a pagpalaán u tolay hide a mangsásseste nikam. Pagpalaán moy hide bakán a sumpaán.#12:14 Basaán tu 1 Corinto 12:3. 15Mákpagsaya kam tu masaya hide, sakay mákpaglungkut kam tu malungkut hide.#12:15-18 Basaán tu Mateo 18:15, Roma 15:5-6, Efeso 4:13. 16Mabiyag kam ti mapayapa tu balang essa. Dyan kam magmadakál, ni awan mákpággagum kam ti maayus tu mababa hide ti kalagayan a tolay. Dyan kam mágmaru-marunung.

17Dyan moy gantiyan ti madukás u maggimet hide ti madukás nikam. Magsikap kam a mabiyag ti marangal. 18Ni maare la nakwa, mákpággagum kam ti mapayapa tu atanan a tolay. 19Mahal ko hide, dyan kam gumante. Ipaubaya moy ina tu Diyos. Dipo kinagi nu Panginoon tu Kasulatan, “Hikán u gumante, hikán be u magparusa.”#12:19 Basaán tu Mateo 5:22-24; Efeso 4:26-27. 20Kanya ni magaláp u kadima mo, pakanán mo siya. Ni mauwaw siya, painumán mo siya. Dipo ni gimitán mo iye hide ay mepasanike siya tu sadile na.#12:20-21 Basaán tu Gimet 7:60. 21Dyan kam magpatalo tu madukás ni awan taluwán moy u madukás tu pamamag-itan nu pággimet ti maganda.

Currently Selected:

Roma 12: MBJC

Highlight

Copy