Roma 13

U Tungkulin tu Puno hide nu Banuwan

1Magpasakup kam a atanan tu namuno hide tu gubiyerno. Dipo awan ni ti deyaman a tolay a maare a mamuno ni awan impakultad nu Diyos, sakay u karapatan nu essa a mamuno ay gábwat tu Diyos.#13:1-7 Basaán tu Gimet 4:18-20; 1 Timoteo 2:1-2. 2Kanya u kumalaban tu gubiyerno ay kumalaban tu intatag hide nu Diyos, sakay parusaan na hide. 3U pinuno hide ay awan dapat a kantingan nu maggimet hide ti maganda. U dapat nide a manteng ay u maggimet hide ti madukás kanya ni gustu mo a awan ka ti kantingan tu namuno hide, gimitán mo u maganda sakay puriyán dika. 4Dipo u pinuno hide tu banuwan ay tagapagserbi hide nu Diyos para tu kapiyyaan tam. Pero ni maggimet ka ti madukás, dapat ka a manteng dipo tehhod hide a kapangyariyan a mangparusa niko. Hide u tagapagserbi nu Diyos a magparusa tu maggimet hide ti madukás. 5Kanya magpasakup kam tu gubiyerno, bakán la a tánni maiwasan u parusa ni awan dipo iye u dapat a gimitán. 6Ina be u dahilan ni bakin magbayad kitam ti buwes. Dipo u pinuno hide ay tagapagserbi nu Diyos sakay inyatád de u buo a panahun tu pángtupad tu tungkulin de. 7Kanya iyatád moy u dapat a iyatád. Magbayad kam tu buwes moy hide, igalang u dapat a igalang, sakay parangalan u dapat a parangalan.

Tungkulin Tam Hide tu Kapareho a Tolay

8Dyan kam manatile a te sagutin ni deyaman, liban tu sagutin moy a magmahalan. Dipo u magmahal tu kapatkákka na ay mangtupad tu Kautusan. 9U utus hide a konna tu, “Dyan ka mangilállake oni mangibábbey, dyan ka mamuno, dyan ka magtakaw, dyan mo angkinán u kao nu iba,” sakay u iba pa hide a utus ay nabuo la ti eessa a utus, “Mahalán mo u kapareho mo a konna tu págmahal mo tu sadile mo.”#13:9 Basaán tu Roma 7:3; Hebreo 13:4. 10U tolay a magmahal ay awan maggimet ti madukás tu kapareho na. Kanya ni magmahalan kitam ay táttupadán tam u buo a Kautusan. 11Dapat moy iye a gimitán dipo tukoy moy a odas dán para lumukag kam. Dipo mas adene dán u odas nu kaligtasan tam kasera nikuna a nagsapul kitam a sumampalataya tu Panginoon. 12Adene dán a lumipas u gibi, sakay magamulaldew dán. Kanya adággen tamon u gimet hide tu kadiklámman sakay isulot tam u maganda a gimet bilang panglaban tam a katoy hide tu demlag.#13:12 Basaán tu Juan 3:19-20; Efeso 5:8. 13Sakay dipo katoy kitam tu demlag, mabiyag kitam ti marangal. Diyan tamon gimitán u páglasing, u magulo hide a págsaya, dyan kitam mangibábbey oni mangilállake, dyan kitam mákdima, sakay diyan kitam be maiyamut tu agum.#13:13 Basaán tu Mateo 5:28; 1 Corinto 5:9-11. 14Ni awan, ahigán moy u halimbawa nu Panginoon Jesu-Cristo, sakay dyan moy sunudán u makamundu a kagustuwan nu pilas.#13:14 Basaán tu Galacia 3:27.

Currently Selected:

Roma 13: MBJC

Highlight

Copy