Filipos 1

1Mahal ko hide a kákkapatkákka, iye a sulat ay gábwat nikán a ti Pablo sakay ti Timoteo a alipin hide ni Cristo Jesus.

Iye ay para tu atanan a pinile nu Diyos a taga-Filipos a summampalataya hide ni Cristo Jesus, pate u puno hide sakay tu tumulung nide a mangasiwa tu mánnampalataya hide.#1:1 Basaán tu Gimet 16:1, 12-40; Roma 1:1; 2 Corinto 1:1; Galacia 1:10; Colosas 1:1; 1 Tessalonica 1:1; 2 Tessalonica 1:1; Filemon 1:1.

2Nakwa ay atádden kam nu Diyos Ama sakay tu Panginoon tam ati Jesu-Cristo ti kapayapaan, sakay pagpapala.#1:2 Basaán tu Roma 1:7.

U Dasal ni Pablo para tu Kristiyano hide ti Filipos

3Pirmiyák a magpasalamat tu Diyos ko kada maisip takam. 4Kada ipagdasal takam a atanan ay grabi u saya ko 5dipo tu tulung moy tu pángpakapospos tu Maganda a Baheta tungkul ni Cristo, sapul nikuna a tanggapán moy iye hanggan nadid. 6Siguraduwán ko nikam a u maganda a gimet a sinapulan nu Diyos nikam, ay tapusán na hanggan tu aldew nu kássole ni Cristo Jesus. #1:6, 10 Basaán tu 1 Corinto 1:8. 7Dapat la a konna he u kagiyán ko dipo mahal takam a tahod sakay dipo magkaguman kitam a timmanggap tu pagpapala nu Diyos, maski tu itod a malayaák a magpahayag sakay mángtaknág tu Maganda a Baheta hanggan nadid a nakapiresuwák.#1:7 Basaán tu Gimet 21:33, 2 Corinto 7:3, Efeso 6:20. 8Tukoy nu Diyos a grabi dán i ammaw kuwáy dipo dakál u págmahal ko nikam a konna tu págmahal ni Cristo Jesus nikam.

9Idáddasal ko a nakwa ay lalo pa a lumagu u págmahal moy tu balang essa, sakay maaguman ti karunungan sakay madisalad a pákkatukoy. 10Tánni matukuyan moy ni ánya u pinakamaganda a dapat moy a gimitán. Para tu káddemát nu Aldew nu kássole ni Cristo ay demáttan nakam a malinis sakay awan ti kapintasan. 11Nakwa ay maputat u biyag moy tu mágkaganda a ugale a kaluub ni Jesu-Cristo, tán maparangalan sakay mapapuriyan u Diyos.

Ti Cristo u Biyag

12Gusto ko a matukuyan moy, kákkapatkákka ko hide, u nangyare hide nikán ay nakatulung ti dakál tu kállawak nu Maganda a Baheta.#1:12 Basaán tu Lukas 21:13. 13Dipo natukuyan nu atanan a guwardiya tu palasyo sakay tu agum pa hide a katoy he, a nepiresuwák dipo tu kássunud ko ni Cristo.#1:13 Basaán tu Gimet 28:30, 2 Timoteo 2:9. 14Sakay kákpalan tu mánnampalataya hide ay lalo pa a timmatag u pánniwala de tu Panginoon dipo tu kákkepireso ko, sakay bimmegsák u isip de sakay awan ti ánteng a nagbaheta tu Upos nu Diyos.

15Tahod ngane a mangaral u agum tungkul ni Cristo dipo tu sene sakay gustu dila a ipeta a masmalalake hide nikán, pero te mangaral labe a tehhod a katapatan. 16Ipáppangaral de ti Cristo dipo tu págmahal, dipo tukoy de a nepiresuwák tu pánglaban ko tu Maganda a Baheta. 17U agum ay mangaral a awan tapat tu kaluuban de nan tehhod a madukás a layunin, dipo gustuwák dila a pasakitan mentaras a hedák ti piresuwanáy. 18Pero awan ti ányapaman itod hide a atanan nikán. Mahalagaay ay mepangaral ti Cristo maski ánya a kaparaan, tapat man oni awan u layunin de tu pángngaral de.

U essa ku pa a kasayaan 19ay u pag-asa ko a dumemát u aldew a makalayaák a huway tu tulung nu dasal moy sakay tu Banal a Ispirito ni Jesu-Cristo.#1:19 Basaán tu Gimet 16:7, 2 Corinto 1:11. 20U gugusto ko sakay áasaan ko ay awanák nakwa magkulang tu tungkulin ko, nan magkahodák ti begsák ni isip ánya man a odas. Tánni mabiyagák man oni matay dán ay mapapuriyan ti Cristo tu pamamag-itan ko.#1:20 Basaán tu Roma 14:8. 21Dipo para nikán, u biyag ko ay nakalaan dán ni Cristo. Ni matayák dipo nikuna ay mas higit pa u pakinabang ko.#1:21 Basaán tu Galacia 2:20. 22Pero ni magtulos-tulusák padi a mabiyag, ay maganda bi iye dipo makagimiták palla ti mágkaganda a bagay. Awan ko tukoy ni hádya i piliyán kuwáy. 23Ti duwwaan iye a pagpiliyan ay he dák ti ballog: ni mabiyag palla oni matay dán. Gusto ku dán nakwa a matay tánni makaguman ko dán ti Cristo, dipo iye u mas maganda para nikán. 24Pero para tu kapiyyaan moy ay mas maganda ni magtulos-tulusák palla a biyag. 25Dipo ti iye ay nakasiguduwák a mabiyagák palla sakay makaguman moy palla a atanan, tánni matulungan kam a magtulos-tulos a te kasayaan tu pánnampalataya tu Panginoon. 26Sakay ni makasoliyák dán hina nikam ay lalu moy a papuriyan ti Cristo dipo nikán.

27Kaya ngane kákkapatkákka ko hide, pagsikapan moy a mabiyag a ayun tu Maganda a Baheta tungkul ni Cristo. Dipo maski makasoliyák man hina nikam oni awan ay nakasiguduwák a tulos-tulos kam a matatag tu essa a layunin sakay mamágkaguman tu pánglaban tu Maganda a Baheta. 28Diyan kam manteng tu kumalaban hide nikam dipo ni awan kam manteng ay saiye u pakatukuyan de a mepahamak hide pero hikam be ay iligtas nu Diyos.#1:28Basaán tu 2 Tessalonica 1:5. 29Dipo ingkaluub nu Diyos nikam a sumampalataya ni Cristo pero bakán la a ina nan magtiis be ti hirap para nikuna. 30Nadid, danasán moy ngane u pághirap a netan moy a dinanas ko tu itod sakay nabaheta moy a dáddanasán kupa de hanggan nadid.#1:30 Basaán tu Gimet 16:19-40, 1 Tessalonica 2:2.

Currently Selected:

Filipos 1: MBJC

Highlight

Compare

Copy