Efeso 6
6
Toldu tu Dáddakál sakay tu Anak hide
1Nadid, hikam a anak hide, sunudán moy u dáddakál moy hide, dipo iye u nerarapat a gimitán nu mánnampalataya hide tu Panginoon.#6:1 Basaán tu Colosas 3:20. 2“Igalang moy u dáddakál moy hide.” Iye u kadipalonguwan a utus a tehhod a pananto. Iye u pananto:#6:2 Basaán tu Exodo 20:12. 3“Tánni gumanda u biyag mo sakay umatakdug u biyag mo ti lutaáy.”#6:3 Basaán tu Deuteronomio 5:16.
4Hikam a dáddakál hide, dyan moy masiyado a págngállan u anak moy hide ti ipagribeldi de. Padakállán moy hide a tehhod a disiplina sakay tolduwan moy tu adal nu Panginoon.#6:4 Basaán tu Colosas 3:21.
Toldu tu Alipin Sakay tu Amo hide
5Hikam a alipin hide, sunudán moy u amo moy hide a tehhod a pággalang, ánteng sakay katapatan a kumán be ati Cristo u pinagserbiyan moy. 6Gimitán moy iye, te maketa man oni awan bakán a para puriyán nu tolay hide nan dipo tagapagserbi kam ni Cristo sakay sumássunud ti buu a puso tu kaluuban nu Diyos.#6:6 Basaán tu Awit 40:8. 7Magserbi kam a tehhod a kasayaan a kumán a u Panginoon a mismo u pagserbiyan moy bakán a u tolay. 8Dipo átádden nu Panginoon ti gantimpala u balang essa ayun tu ginimet na a maganda, alipin man oni bakán a alipin.#6:5-8 Basaán tu Colosas 3:22-25.
9Sakay hikam a amo hide, mákpággagum kam ti maganda tu alipin hide. Dyan moy hide pakantingán, dipo tukoy moy a pareho kam la a alipin nu eessa a Panginoon a katoy ti langet sakay pantay u pangileng na tu balang essa.#6:9 Basaán tu Colosas 4:1, Deuteronomio 10:17, Colosas 3:25.
U Gamit hide a Panglaban a Inyatád nu Diyos
10Iye u dimodyan ko a kagiyán: Magpakatibay kam tu pánnampalataya moy tu Panginoon tu pamamag-itan nu dakila na a kapangyariyan. 11Gamitán moy u atanan a armas a inyatád nu Diyos nikam tánni malabanan moy u patibung hide nu diyablo. 12Dipo u kalaban tam ay bakán a katolayan, nan u magkadukás hide a ispirito tu panganurin; hide iye u pinuno, u te kapangyariyan hide, sakay u mamahala hide tu mágkadukás a mámmagyan ti munduwáy.#6:12 Basaán tu Juan 15:18-19. 13Kanya isulot moy u atanan a armas a inyatád nu Diyos nikam. Tánni tu aldew a dumemát u kadukássan ay magimet moy a mákpaglaban. Sakay káttapos nu pákpaglaban moy ay matatag kam padi tu pánnampalataya moy.
14Kaya konna tu essa a sundalo, dapat lagi kam a handa: U tatahoden la u dapat moy a isipán oni kagiyán a magesinturon moy. Sakay dapat u magada la u gimitán moy a kumán a iye u pangtakláb moy tu hakaw moy.#6:14 Basaán tu Isaias 11:5, 59:17, 1 Tesalonica 5:8. 15Kailangan a lagi kam a handa a ipangaral u Maganda a Baheta a mangatád ti kapayapaan; kumán iye a sapatus moy.#6:15 Basaán tu Isaias 52:7. 16Pero bakán la a ina. Nan kailangan a lagi kam a matatag tu pánnampalataya moy, dipo iye u magekalasag moy a pangsalag moy tu atanan a tokso ni Satanas a kumán a magapoy-apoy a pana a ipana na nikam. 17Lagi kambe a manalig a natanggap moy dán u kaligtasan moy a gábwat ni Cristo kanya hikam ay ligtas dán, konna tu essa a sundalo a manalig dipo tukoy na ate helmet siya a pangdipensa na tu ulu na. Sakay dapat lagi kam a handa a magpahayag tu upos nu Diyos a itoldu nikam nu Banal a Ispirito, dipo iye u kumán moy a áttak.#6:17 Basaán tu Isaias 59:17. 18Sakay palagi kam a magdasal tu Diyos a tulungan nakam, sakay diyan kam magpabaya nan ipagdasal moy u atanan nu mánnampalataya hide ni Cristo, sakay palagi moy a sunudán u pággiya nu Banal a Ispirito nikam tu págdasal moy.#6:18 Basaán tu Lukas 11:13. 19Ipagdasalák moy be a nakwa kada magtolduwák ay atáddinák nu Diyos ti tama hide a upos tánni mepahayag ko a tehhod a begsák isip u Maganda a Baheta a nesekreto tu itod. 20Dipo inutusanák nu Diyos para ipangaral u Maganda a Baheta sakay iye u dahilan ni bakin a nakapiresuwák nadid. Kaya ipagdasal moy a mepahayag ko iye a tehhod a begsák isip dipo iye u nerarapat.
Pangdimodyan a Pángngumusta
21Ti Tiquico, a mahal tam a kapátkákka sakay matapat a tagapagserbi nu Panginoon, u mángbaheta nikam tu atanan a bagay tungkul tu kalagayan sakay gággimitán ko. 22Iye u dahilan ni bakin a paangayán ko siya hina, tánni matukuyan moy u kalagayan mi he sakay mapabegsák be u isip moy.#6:21-22 Basaán tu Colosas 4:7-8.
23Kákkapatkákka ko hide, nakwa ay atádden kam nu Diyos Ama sakay tu Panginoon tam ati Jesu-Cristo ti kapayapaan, págmahal tu balang essa sakay pánnampalataya moy nikuna. 24Pagpalaán nakwa nu Panginoon a ti Jesu-Cristo u atanan a magmahal nikuna ti tapat.
Currently Selected:
Efeso 6: MBJC
Highlight
Share
Compare
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
