Filipos 2

U Halimbawa a Inwahak ni Cristo

1Nadid, dipo makapangatád ti begsák isip u biyag moy a nakaugnay ni Cristo, sakay tehhod kam a kasayaan tu págmahal na, sakay nákpagkaessa kam tu Banal a Ispirito, sakay te soh kam a tumulung tu agum,#2:1 Basaán tu 2 Corinto 13:14. 2dapat ay magkahod kam ti essa a pággisipan, sakay magmahalan kam tu balang essa sakay magkaessa kam ti essa a layunin. Ni konna hod ay magin ganap i kasayaan kuwáy dipo nikam. 3Dyan kam maggimet ti ánya man a bagay dipo la tu kagustuwan moy a metanyag, nan magpakababa kam sakay ituring moy a mas higit u agum kasera nikam. 4Bakán la u sadile moy a kapiyyaan u isipán moy nan pate be u kapiyyaan nu agum.#2:4 Basaán tu Roma 12:10, 15:1-2. 5Nakwa magkahod kam ti pággisipan a konna ni Cristo.

6Maskin tunay siya a Diyos ay awan na impilit a manatile a kapantay nu Diyos.

7Nan nagpakababa siya sakay nabiyag a konna tu essa a alipin nikuna siya ay nagin tolay a kapareho tam.

8Sakay nikuna a nagin tolay siya ay nagpakababa siya sakay nagin masássunudán siya tu Diyos hanggan kamatayan, maski pa u kákkatay na tu kudus.#2:8 Basaán tu Mateo 11:29, 20:28, Juan 1:1, 2 Corinto 8:9, Hebreo 5:8.

9Kanya inlangkaw siya nu Diyos tu kataasan sakay inyatád na nikuna u ngahan a higit tu atanan a ngahan.#2:9-11 U gustu a kagiyán ni iye ay inyatád nikuna nu Diyos u pinakamataas a posisiyon. Basaán tu Roma 10:9, 14:9, Efeso 1:20-21.

10Tánni atanan nu katoy ti langet sakay katoy ti lutaáy, u katoy tu disalad ni lutaáy ay lumuhud tán sumamba nikuna.#2:10-11Basaán tu Isaias 45:23.

11Sakay ipakapospos nu atanan a tolay a ti Jesu-Cristo u Panginoon, para tu kapuriyan nu Diyos Ama.

Magdemlag a konna tu Simbuwan

12Kanya ngane, mahal ko hide a kákkapatkákka, ni kodyaák moy a lagi a sássunudán nikuna mamágkaguman kitam palla ay nakwa lalo kam pa a masássunudán nadid maski ni adeyuwák nikam. Pagsikapan moy a mabiyag a neayun tu kaligtasan a tinanggap moy, sakay gimitán moy iye ate hod a ánteng sakay pággalang tu Diyos. 13Dipo u Diyos u mangatád nikam ti soh sakay kakayanan a magimet u kaluuban na.#2:13 Basaán tu 1 Corinto 15:10.

14Gimitán moy u atanan a bagay a awan ti reklamo sakay pamágtabbegan. 15Tánni magin malinis kam sakay awan ti kapintasan bilang anak nu Diyos, nadid a kaguman moy palla u tolay hide a liwat sakay mágkadukás ti kákkabiyag. Tánni tu konna hod ay magin demlag kam nide a konna tu biton a maggehab ti langitáy,#2:15 Basaán tu Deuteronomio 32:5, Mateo 5:45, 48. 16mentras a ipakapospos moy nide u Maganda a Baheta a makapangatád ti biyag a awan ti kahád. Tánni tu káddemát ni Cristo ay mepagmadakál takam dipo awan nawanan ti kabuluhan u págpagud ko.

17U págserbi moy a bunga nu pánnampalataya moy ay kumán a alay moy tu Diyos. Ni kailangan a mebuhus u digi ko, masayaák pade; dipo tu kamatayan ko ay kumán a mebuhus u digi ko kaguman nu alay moy. Sakay dipo ti ina ay mákpagsayaák nikam. 18Kanya dapat magsaya kambe sakay mákpagsaya kam be nikán.

Di Timoteo sakay ti Epafrodito

19Maniwalaák a kaluuban nu Panginoon Jesus a mapaangay ko hina a pagdaka ti Timoteo tánni masayaák be ni ibaheta na u kalagayan moy hina. 20Awan dán ti iba a kapareho na tu pákpagkaessa na nikán tu págmalasakit tu kapiyyaan moy. 21Dipo u agum ay awan ti iba a áisipán ni awan u sadile di la a kapiyyaan bakán a u para ni Jesu-Cristo. 22Hikamon be u nakatukoy tu katapatan ni Timoteo. Kaguman ko siya tu pángngaral tu Maganda a Baheta. Tinulunganák na, a konna tu káttulung nu essa a anak tu ama na. 23Kanya balak ko siya a paangayán hina, ni matukuyan ku dán u hatul he nikán. 24Umasaák tu tulung nu Panginoon a awan magmalay ay makaangayák be hina.

25Naisip ko a kailangan dán hina a pasoliyán ti Epafrodito, u kapatkákka tam tu Panginoon a konna labe nikán a manggagawa sakay sundalo nu Diyos a pinaangay moy he para makatulung ko. 26Dipo tunay dán u soh na a ketan nakam hina a atanan, mabalisa siya a tahod dipo natukuyan na a nabaheta moy a nagkasakit siya. 27Nagkasakit ngane siya ti grabi a ngahe-ngahe na dán a ikatay pero kinagbiyan siya nu Diyos sakay pati be hikán. Kinagi ko a pati hikán, dipo tu págpiyya na ay neligtasák be tu matindi a kalungkutan. 28Kanya ngani gusto ku dán be a makasole siya hina dipo tukoy ko a masaya kam a ketan siya a huway. Tánni mabawasan dán be i balisa kuwáy. 29Kanya tanggapán moy siya a tehhod a kasayaan bilang tunay a tagapagserbi tu Panginoon. Igalang moy u tolay hide a konna nikuna. 30Dipo ngahe-ngahe dán siya a matay para tu págserbi ni Cristo. Intaya na u biyag na para matulunganák na bilang kapalit moy a magserbi nikán.

Currently Selected:

Filipos 2: MBJC

Highlight

Compare

Copy