Hebreo 8

Ti Jesus u Pinakapuno Tam a Saserdote

1Iye u gusto me a kagiyán: tehhod kitam a pinakapuno a saserdote a mággetnod tu kawanan nu trono nu Kataas-taasan a Diyos ti langet. 2Magserbi siya bilang pinakapuno a saserdote hod tu lugar a Banal, lugar a bakán a ginimet ni tolay nan u Panginoon.

3Tungkulin nu essa a pinakapuno a saserdote a magalay ti kaluub sakay alay. Kanya dapat a tehhod be a iyalay u pinakapuno a saserdote tam. 4Ni katoy palla siya ti lutaáy ay awan siya maare a magin saserdote, dipo makpal dán a saserdote a taga-alay tu kaluub hide a ayun tu Kautusan. 5U tungkulin de ay inaheg dila sakay anino nu katoy ti langet. Dipo nikuna a itaknág ni Moises u tolda ay kinagiyan siya nu Diyos, “Gimitán mo u atanan a bagay a ayun tu impeta ko niko tu buked.” 6Pero u tungkulin a neatád ni Jesus, ay mas dakila nan u neatád a tungkulin tu agum a saserdote. Dipo siya u mángtaknág tu bigu a kasunduwan a mas maganda, sakay pinatibay iye nu Diyos tu pananto na.

7Ni awan ti kulang tu dipalongo a kasunduwan, ay awan dán nakwa mangailangan ti kaduwwa. 8Pero netan nu Diyos u liwat nu tolay hide, kanya kinagi na,

“Dumemát u aldew hide,

a mákpagkasunduwanák ti bigu tu Israelita hide

sakay tu lahe ni Juda.

9Bakán a konna tu kasunduwan a ginimet ko tu ninuno de hide,

nikuna a inluwas ko hide ti Egipto.

Dipo awan hide nagin tapat tu pákpagkasundu de nikán,

kanya pinabayan ko hide.” Kagi nu Panginoon.

10“Iye u bigu ko a kasunduwan tu Israelita hide,

káddemát ni aldiwan itod,” Kagi nu Panginoon:

“Ay imula ko tu isip de u utus ko hide,

sakay iyukit ko tu pusu de.

Hikán u magin Diyos de,

sakay hide u magin banuwan ko.

11Awan dán kailangan a tolduwan nu ti deyaman u kasa-banuwan na,

oni kagiyán tu kapatkákka na a,

‘Tenggiyán mo u Panginoon.’

Dipo tenggiyánnák de a atanan,

sapul tu kababaan hanggan tu kataasan.

12Dipo patawadán ko u kadukássan de hide,

sakay limunán ku dán u kasalanan de hide.”

13Nikuna a kagiyán nu Diyos u bigu a kasunduwan, ay pinawanan na ti bisa u date. Sakay u ánya man a mawanan ti bisa sakay dati dán ay adene dán a mawan.

Currently Selected:

Hebreo 8: MBJC

Highlight

Compare

Copy