Hebreo 13

U Pagserbi a Makasaya tu Diyos

1Nadid, tulos-tulos kam a magmahalan bilang mátkaka ni Cristo. 2Diyan moy kalimunan a magpatulos tu dayuhan hide. Tehhod a sangan a naggimet ti konna he, nakapagpatulos hide tu anghel hide a awan de namalayan. 3Isipán moy u nágkepireso hide a kumán a kaguman dikam a nakapireso. Sakay tulungan moy u kákkapatkákka a apiyadu a kumán a hikam u magdanas be ti konna hod.

4Dapat igalang nu atanan u pákkabanga, sakay magin tapat tu balang essa u magkabanga. Dipo hatulan nu Diyos u mangibábbey oni mangilállake.

5Diyan kam kumán a hupa ni pilak; makontento kamon ni ánya u katoy nikam. Dipo kinagi nu Diyos, “Awan taka lakaden oni pabayan.” 6Kanya awan ti pagduwwa-duwwa a makagi tam,

“U Panginoon u tumulung nikán,

awanák manteng. Ánya u magimet nikán nu tolay?”

7Alalahanán moy u nangasiwa hide nikam, a nángpakapospos nikam tu upos nu Diyos. Isipán moy ni kodya hide a nabiyag hanggan a natay ate pánnampalataya. Ahigán moy u pánnampalataya de tu Diyos. 8Maski nikan ay awan magbabagu ti Jesu-Cristo. Ni ánya siya tu itod ay konna labe siya nadid sakay hanggan-hanggan. 9Diyan kam paakit tu sari-sare sakay tu iba hide a adal. Mas maganda para nikitam a mapabegsák u pánnampalataya tam tu pamamag-itan nu kagbi nu Diyos nan tu pamamag-itan nu kássunud tu utus hide tungkul tu makan. U simmunud ti iye hide ay awan ti naalap a pakinabang.

10Tehhod kitam a altar, sakay u saserdote hod hide a magserbi tu págsambaan nu Judio hide ay awan maare a kuman tu alay tam hod. 11Tu itod u dige nu hayup hide ay iyangay nu pinakapuno a saserdote tu lugar a kabanal-banalan tánni iyalay para tu kasalanan, pero u bággi ay táttutudán tu luwas nu banuwan. 12Kaya konna labi hod, natay ti Cristo tu luwas nu banuwan tán malinis na u tolay tu kasalanan de hide tu pamamag-itan nu dige na. 13Kanya umadene kitam nikuna tu luwas nu banuwan sakay magdanas be ti kadustaan a tiniis na. 14Dipo bakán a ti lutaáy u talaga a lugar tam, nan tehod kitam a áohayán a lugar a págyanan tam tu dumemát a panahun. 15Kanya pirmi kitam a magalay ti papure tu Diyos tu pamamag-itan ni Jesus, papure a mángkagi tu pákkatukoy tam tu ngahan na. 16Sakay diyan tam kalimunan a maggimet ti maganda sakay tu káttulung tu agum dipo ina u alay a kasayaan nu Diyos.

17Sumunud kam sakay magpasakup tu mangasiwa hide nikam dipo te pananagutan hide a magbantay nikam, sakay managut hide tu Diyos tungkul ti iye. Ni sunudán moy hide ay masaya hide a gimitán u tungkulin de, pero ni awan ay malungkut hide, sakay ni malungkut hide ay awan iye makatulung nikam.

18Ipagdasal moy kame, makagi me nikam a malinis u konsensiya me, sakay gusto me a mabiyag ti matuwid tu atanan nu panahun. 19Higit tu atanan ay agidán ko a ipagdasalák moy a makasoliyák hina a agad nikam.

Dasal

20U Diyos a ginábwatan nu kapayapaan, sakay nangbiyag a huway tu Panginoon Jesus, a nagin Dakila a Pastol nu tupa hide dipo tu dige na a nangpatibay tu awan ti kahád a kasunduwan, 21u mangkaluub nakwa nikam u atanan a kailangan moy para megimet moy u kaluuben na, sakay tu pamamag-itan ni Jesu-Cristo ay gimitán na nikitam u makasaya nikuna. Puriyán ti Cristo hanggan-hanggan Amen!

Pangkatapusan a Upos

22Ipákpágguhon ko nikam, kákkapatkákka hide, a sanigán moy ti maganda u pangaral ko hide nikam dipo apehet la i sulat kuwáy. 23Gusto ko be a matukuyan moy a nakalaya dán u kapatkákka tam a ti Timoteo. Ni dumemát siya a pagdaka ay ikoyog ko siya káangay ko hina.

24Ikumusta moy kame tu mangasiwa hide nikam sakay tu atanan a kákkapatkákka. Kumustaán kam be nu kákkapatkákka ti Italia.

25Pagpalaán kam a atanan nu Diyos. Amen!

Currently Selected:

Hebreo 13: MBJC

Highlight

Compare

Copy