Santiagu 1

1Hikán ti Santiago a alipin nu Diyos sakay alipin nu Panginoon Jesu-Cristo. Magsulaták tu atanan a Judio a mánnampalataya tu Diyos a katoy tu iba-iba a lugar ti munduway. Kumusta kam la hina a atanan.

U Pánnampalataya sakay Karunungan a Gábwat tu Diyos

2Kákkapatkákka ko hide, magsaya kam ni makadanas kam ti iba-iba a pagsubuk, 3dipo tukoy moy dán a u pagsubuk hide ay máng-atád ti katatagen tu pánnampalataya moy. 4Kanya dapat kam a magtággád ti hirap sakay diyan manghina ti isip tánni magin ganap kam sakay u pánnampalataya moy ay awan ti kulang.

5Ni ti deya man u kulang ti karunungan ay mangaged kam tu Diyos tánni atádden na kam dipo makákkagbiyán siya awan mágkemot sakay awan na ipasanike u magaged nikuna. 6Pero u mangaged ay dapat a magtiwala tu Diyos sakay diyan magduwwa-duwwa, dipo u tolay a magduwwa-duwwa ay kumán a tagmák tu diget a iyáppah nu pahás maskin hadya. 7U tolay a magduwwa-duwwa ay diyan dán umasa a makatanggap ti maskin ánya a gábwat tu Panginoon. 8Dipo ni u essa a tolay ay magduwwa-duwwa, awan be siya mapagkatiwalaan tu gággimitán na.

U Mágkayaman sakay u Mágkahirap hide

9Magsaya kam kákkapatkákka, maskin mahirap kam dipo inlangkaw kam nu Diyos. 10U kákkapatkákka tam a mágkayaman ay dapat a magsaya maskin inbaba nu Diyos u karangalan de, dipo u kayamanan ay lumipas konna tu bulaklak nu lamon.#1:10-11 Basaán tu Isaias 40:6-7. 11Konna be tu lamon a ni makagkag tu masinggit a sinag ay malanás, mahaghag u bulaklak na sakay mawan u ganda na. Konna labe tu tolay a mayaman, mentras a magpayaman matay labe siya.

U Pagsubuk hide Sakay Tokso

12Pinagpala u tolay a manatile a matatag tu pánnampalataya na tu pagsubuk hide sakay kahirapan, dipo ni malampasan de itod ay magkahod hide ti biyag a awan ti kahád a impananto nu Diyos tu atanan a magmahal nikuna. 13Ni u essa a tolay ay matokso tu pagsubuk a dumemát nikuna ay diyan na kagiyán a gábwat itod tu Diyos dipo umád nu Diyos u mágkadukás hide a bagay. Awan siya matokso nu madukás sakay awan na be toksuwán maskin ti deya. 14Matokso u tolay ni maakit siya tu madukás a kagustuwan nu pilas na. 15Sakay ni sunudán na u madukás a kagustuwan na ay magkasala siya, sakay ni itulos-tulos na la u págkakasala na u risulta na ay kamatayan.

U Atanan a Maganda a Bagay ay Gábwat tu Diyos

16Kákkapatkákka ko hide, dyan kam palálloko. 17Atanan a mágkaganda a bagay ay inyatád nu Diyos a nanggimet tu aldew, bulan, biton ay tu langet. Sakay maskin magbagu iye a atanan ay awan siya magbabagu nikitam maskin nikan. 18Ayun tu kaluuban nu Diyos ay ginimet na kitam a anak na hide tu pamamag-itan nu impakapospos na a upos na a tatahoden, tánni magin pinakamahalaga kitam tu atanan a linalang na.

U Págsaneg sakay Págsunud

19Pakatandaan moy iye kákkapatkákka ko hide, dapat kam a handa a mágsaneg, isipán tam pa ti maayus u kagiyán tam bagu a magupos sakay diyan agad a maiyamut. 20Dipo u iyamut ay awan makatulung tu tolay tánni magin matuwid tu pangileng nu Diyos. 21Kanya adággen moy dán u atanan nu kadukássan sakay tu agum pa a mágkadangát a gimet, sakay tanggapán moy dán u upos nu Diyos a indátton na tu isip moy dipo siya u mángligtas nikam.

22Dyan kitam tagapágsaneg la tu upos nu Diyos ni awan sunudán tam u kákkagiyán na, dipo ni awan ay lállokuwán tam la u sadi-sadile tam. 23Dipo ni mágsasanigán kitam la tu upos na sakay awan tam igimet ay kumán kitam la a nággaspeho, 24sakay tu káadág na ay nalimunan narán u idsura na. 25Pero pagpalaán nu Diyos u atanan a gimitán nu tolay a tulos-tulos a magadal sakay mangtupad tu upos nu Diyos a mangpalaya nikitam gábwat tu kasalanan, sakay bakán la tagapágsaneg a makalimon a agad.

26Ni tu pangisip nu tolay ay makidiyos siya pero awan na labe kaya a pugáddán u dila na, ay lállokuwán nala u sadile na, dipo awan ti pinagserserbiyan u pakidiyos na. 27U ibilang nu Diyos a Ama tam a makidiyos ay u tumulung tu ulila sakay tu bábbey hide a bilo tu kahirapan de, sakay awan mák-aheg tu mágkadukás hide a gimet ti munduway.

Currently Selected:

Santiagu 1: MBJC

Highlight

Compare

Copy