Efeso 5

Mabiyag a Konna tu Tolay hide a Nademlagan

1Kanya ahigán moy u Diyos dipo atanan moy ay pinakamamahal na a anak. 2Mabiyag kam a tehhod a págmahal tu kapareho moy a konna tu págmahal nikitam ni Cristo. Inyalay na u sadile na para nikitam bilang katanggap-tanggap a alay tu Diyos.#5:2 Basaán tu Exodo 29:18.

3Dipo pinile kam nu Diyos bilang kao na, ay awan dán dapat a ketan nikam u tungkul tu ányaman a kalase ni pángngibábbey oni pángngilállake sakay kalaswaan. 4Sakay awan be nerarapat a masaneg nikam u mágkalaswa hide oni awan ti pinagseserbiyan a uhunan sakay tu págbiro a awan nararapat. Nan, magin mapagpasalamat kam tu Diyos. 5Tukoy moy a awan makaangay tu kahariyan ni Cristo sakay tu Diyos u tolay hide a mángngibábbey oni mangilállake, mágkalaswa, sakay sakim (dipo u kasakiman ay págsamba tu diyos-diyosan.)#5:5 Iye u gusto a kagiyán ni iye: Ni u essa a tolay ay sakim áubusán na u begsák na sakay odas para maalap u bagay a gustu na a alapán, kanya itod dán u magin diyos na. Ina u dahilan ni bakin nakagi ni Pablo a u kasakiman ay essa a kalase ni págsamba tu diyos-diyosan.

6Dyan kam padaya tu maskin ti deya tu pamamag-itan nu pángngatuwiran hide a awan ti kabuluhan tungkul tu mágkadukás de a gimet, dipo u Diyos ay maiyamut tu masásuwayán hide. 7Kaya dyan kam mákpaggagum tu tolay hide a konna he u gággimitán na. 8Tu itod ay nabiyag kam tu kadiklámman pero nadid ay nademlagan kamon dipo katoy kamon tu Panginoon. Kanya ipeta moy tu kákkabiyag moy a nademlagan kamon.#5:8 Basaán tu Awit 82:5. 9Dipo ni u essa a tolay ay nademlagan dán ay ketan tu gimet na u maganda, tama sakay tatahoden. 10Sakay pagadalan moy ni ánya u makasaya tu Panginoon. 11Dyan kam mákbahagi tu gimet nu tolay hide a katoy tu kadiklámman. Nan ikagi moy nide a madukás u gággimitán de. 12Dipo makasanike a banggitán he u bagay hide a gággimitán de ti lihim. 13Pero ni kagiyan moy hide tu mágkadukás de a gággimitán ay matukuyan de a madukás ngane itod.

14Sakay melantad u atanan dipo tu demlag. Kaya kinagi nu Kasulatan,

“Lumukag ka hiko a tidug,

Umikat ka a gábwat tu patay hide

tánni demlagan ka ni Cristo.”

15Kanya ingatan moy ni kodya kam a mabiyag. Dyan kam mabiyag a konna tu mangmang hide nan konna tu mágkalalake hide a nakatukoy tu kaluuban nu Diyos. 16Samantalaán moy u pagkakataun hide a makagimet kam ti maganda. Dipo makpal dán u mágkadukás a gimet ti muduwáy. #5:16 Basaán tu Colosas 4:5. 17Dyan kam umaheg tu mangmang hide. Nan tukuyán moy ni ánya u kaluuban nu Panginoon a gimitan moy.

18Sakay dyan kam máglalasingán, dipo makasida ina ti maganda a kákkabiyag. Nan pilitán moy a u kapangyariyan nu Banal a Spirito u maghare nikam.#5:18 Basaán tu 1 Corinto 6:9-10. 19Tu pággipun-ipun moy ay mágkansiyon kam ti kansiyon a papure para tu Diyos.#5:19 Nabanggit he ni Pablo u kansiyon a nakasulat tu libro nu Kansiyon a katoy tu Date a Tipan. Buo a puso kam a mágkansiyon sakay magpure tu Panginoon.#5:19 Basaán tu Colosas 3:16-17. 20Bilang mánnampalataya tu Panginoon tam ati Jesu-Cristo lagi kam a magpasalamat tu Diyos Ama maski ánya man u mangyare nikam.

Adal tu tehhod hide a Kabanga

21Pasakup kam tu balang essa bilang tanda nu pággalang moy ni Cristo.

22Hikam a bábbey hide, pasakup kam tu kákkabanga moy hide konna tu págpasakup moy tu Panginoon.#5:22 Basaán tu Colosas 3:18, 1 Pedro 3:1. 23Dipo u lállake u ulo nu kabanga na, konna ni Cristo a ulo sakay tagapagligtas nu mánnampalataya hide a bággi na. 24Kanya ni kodya a magpasakup ni Cristo u mánnampalataya hide, ay konna be hod u bábbey hide dapat a pasakup tu kákkabanga de hide tu atanan a bagay.

25Hikam a lállake hide, mahalán moy u kákkabanga moy hide, konna tu págmahal ni Cristo tu mánnampalataya hide. Dipo tu págmahal na ay inyalay na u biyag na para nide.#5:25 Basaán tu Colosas 3:19, 1 Pedro 3:7. 26Ginimet na iye para hikitam a mánnampalataya hide ay magin banal tu atubang nu Diyos dipo hikitam ay imbilang na a nalinisan dán tu pamamag-itan nu pánniwala tam tu upos na kanya hikitam ay nabawtismuwan dán tu dinom. 27Tánni meatubang na u mánnampalataya hide tu sadile na a maganda, banal, awan ti kapintasan sakay ányaman a dangát. 28Kaya dapat a mahalán nu lállake hide u kákkabanga de konna tu págmahal de tu sadile de. Ni deya man u magmahal tu kabanga na ay magmahal be tu sadile na. 29Awan ti tolay a maiyamut tu sadile na, nan pákanán sakay áalagaan na iye. Konna tu gággimitán ni Cristo tu mánnampalataya hide, 30dipo hikitam ay bahagi nu bággi ni Cristo. 31Kinagi nu Kasulatan, “Dipo he, ay lakaden nu lállake u dáddikál na hide sakay magagum hide ay tu kabanga na; sakay magin essa dán hide.”#5:31 Basaán tu Genesis 2:24. 32Iye u dakila a Tatahoden a impahayag nu Diyos: impeta ni iye u kaugnayan ni Cristo sakay tu mánnampalataya hide nikuna. 33Pero iye ay patungkul be tu balang essa nikam: hikam a lállake hide, mahalán moy u kákkabanga moy a konna tu sadili moy; hikam a bábbey hide, igalang moy u kákkabanga moy hide.

Currently Selected:

Efeso 5: MBJC

Highlight

Compare

Copy