Efeso 4

U Pákpagkaessa tu Ispirito

1Kaya nadid, bilang essa a nakapireso dipo tu págserbi ko tu Panginoon ay mákkekakagbiyák nikam a mabiyag kam a konna tu nerarapat bilang dinulaw hide nu Diyos. 2Magin mapagpakumbaba kam, mabait, sakay matiyaga. Magmahalan kam sakay magpasensiyaan tu balang essa.#4:2 Basaán tu Colosas 3:12-13. 3Pagsikapan moy a mapanatile u págkakaessa moy a gábwat tu Banal a Ispirito tu pamamag-itan nu mapayapa moy a pákpággagum. 4Eessa kitam a bággi sakay te essa be a Banal a Ispirito. Konna be hod, eessa la u pag-asa moy kaligtasan nikuna a dulawán kam nu Diyos.#4:4 Basaán tu Roma 12:6-8. 5Essa la u Panginoon, kanya essa u pánnampalataya sakay essa a bawtismo. 6U Diyos ay eessa la sakay siya u Ama tam a atanan. Siya u kataasan tu atanan. Magahikad siya nikitam sakay mágyan nikitam a atanan.

7Pero u bawat essa nikitam ay inátadden ni Cristo ti kaluub, ayun tu gustu na a inyatád. 8Konna tu kinagi na tu Kasulatan,

“Nikuna summole siya ti langet,

ay ingkuyog na u pireso hide,

Sakay inátadden na ti kaluub u tolay hide.”#4:8 Basaán tu Awit 68:18.

9Ánya u gusto kagiyán nu “Summole siya ti langet?” U gusto kagiyán ni ina ay summidung pa siya ti lutaáy. 10U tolay a immangay ti lutaáy ay siya labe u tolay a immangay tu kataasan a lugar ti langet para siya dán u maghare tu atanan a linalang. 11Sakay te iba-iba a kaluub a inyatád siya nikitam: u agum ay pinagkaluuban na a magin apostol, u agum ay magin prupeta, u agum ay mángngaral tu Maganda a Baheta, u agum ay magin pastor sakay u agum ay tagapagtoldu.#4:11 Basaán tu Roma 12:6-8. 12Ginimet na iye tánni ihanda tu págserbi u pinile na hide tánni lumagu sakay tumatag hide bilang bággi ni Cristo. 13Tánni hikitam a atanan ay magkaessa tu pánnampalataya sakay tu pákkatukoy tu Anak nu Diyos, sakay tánni magin awan kitam ti kapintasan a konna ni Cristo. 14Tánni awan kitamon konna tu anak hide a pabagu-bagu ti isip sakay alisto la a maniwala tu iba-iba a toldu nu tolay hide a mágdaya. Awan kitamon metaw-taw nu tolay hide a u gustu dila ay meangay u tolay tu baka-bakán tu pamamag-itan nu págdaya de. 15Nan manatili kitam tu katutuhanan a tehhod a págmahal tánni tu atanan a bagay ay magin konna kitam ni Cristo a siya u ulo nu atanan nu mánnampalataya hide.#4:15 Basaán tu Colosas 1:18. 16Sakay tu pámmunu na, u atanan nu bahagi nu bággi a awan ti agum nan u mánnampalataya, pinagtongko-tongko na sakay u balang essa ay mamágtulungan. Sakay tu pánggimet nu kada essa tu tungkulin de a tehhod a págmahal, u atanan a parte nu bággi ay lumagu sakay bumegsák.#4:16 Basaán tu Colosas 2:19.

U Bigu a Biyag ni Cristo

17Tu ngahan nu Panginoon, kagiyán ko iye nikam: dyan kamon mabiyag a konna tu tolay a awan nakatengge tu Diyos. Awan ti seserbi u áisipán de. 18Sakay awan hide ti pang-intendi. Dipo awan hide ti tukoy sakay mágkaigát u ulo de, awan hide ti bahagi tu biyag a impagkaluub nu Diyos. 19Nagin alipin hide ni kahalayan, sakay awan dán hide matagama maskin badit. Awan dán hide ti iba a gággimitán nan puro a kalaswaan.

20Pero bakán a konna he u natukuyan moy ni Cristo. 21Ni talaga sinaneg moy u toldu na sakay natolduwan kam tu katutuhanan a katoy ni Jesus, 22ay dapat adággan moy dán u date moy a kákkabiyag dipo iye ay gimet nu date moy a pagkatolay. I pagkatolayan iye u mángpahamak nikam dipo tu mágkadukás a kagustuwan nu bággi a mágdaya nikam.#4:22 Basaán tu Colosas 3:9. 23Nan pakultaden moy a baguwan nu Banal a Ispirito u isip moy sakay tu ugali moy. 24Sakay u dapat a ketan nikam ay u bigu moy a pagkatolay a nilalang a konna tu Diyos a awan ti kapintasan sakay banal.#4:24 Basaán tu Colosas 3:10, Genesis 1:26.

25Kanya adággen moy dán u págbule-bule sakay u tatahoden u ikagi moy tu kákkapátkákka moy hide dipo kabilang kitam tu eessa a bággi.#4:25 Basaán tu Zacarias 8:16, Roma 12:5. 26Ni mágngál kamman ay diyan kam magkasala. Sakay dyan moy dán paalayán u ingál moy,#4:26 Basaán tu Awit 4:4. 27tánni awan moy maatádden ti pagkakataun ti Satanas. 28U mágtakaw ay dyan dán magtakaw; nan magtrabaho siya sakay gamitán na u kamát na tu tarabaho a marangal tánni makatulung siya tu mangailangan hide. 29Dyan kam magupos ti madukás; sikapán moy a palagi a u ikagi moy ay kapiyyaan nu agum sakay neayun tu pagkakataun tánni makinabang u makasaneg hide. 30Sakay dyan moy palungkután u Banal a Spirito, dipo siya u tanda nu Diyos nikam, sakay siya u katibayan nu kaligtasan moy káddemát nu netakda a aldew.#4:30 Basaán tu Genesis 6:6-7. 31Ibutan moy dán u ányaman a saket ni isip, iyamut, pákpágdadima, pánggulo, metmet, págsida tu agum, sakay tu atanan a kalase nu madukás a ugale. 32Nan magin mabait kam sakay makákkagbiyán tu balang essa sakay magpatawadan kam konna tu págpatawad nikam nu Diyos tu pamamag-itan ni Cristo.#4:32 Basaán tu Colosas 3:13.

Currently Selected:

Efeso 4: MBJC

Highlight

Compare

Copy