2 Corinto 2

1Kanya naisip ko a dyanák palla hina umangay ni makapagpalungkut la nikam i káangay kuwe hina. 2Dipo ni atádden takam ti kalungkutan, deya pa i mangpasayaay nikán? Awan beman hikam la be?#2:2-5 Basaán tu Genesis 26:35, Roma 9:2. 3Kaya nagsulaták pa nikam. Tánni, káangay ko hina ay bakán dán a lungkut u iyatád moy nikán, nan hikamon u mangpasaya nikán. Dipo maniwalaák a u kasayaan ko ay kasayaan moy be. 4Dipo nikuna sulatan takam, ay grabiyák ti lungkut sakay balisa, magtákták luwa kuwáy mentras magsulaták. Sinulatan takam bakán a para atádden ti kalungkutan nan para ipabate ko nikam ni sa kodya ti kadakál u págmahal ko.

Patawadán u Nagkasala

5U essa hina a kapatkákka moy a nagkasala, bakán la a hikán u pinasakitan na. Bakán be a padakállán ko i bagayan iye, pero u tatahoden, hikam a atanan u pinasakitan na.#2:5-11 Basaán tu Mateo 18:15-18, 1 Corinto 5:1-13. 6Pero sapat dán u págparusa a ginimet nikuna nu kakpalan nikam. 7Kaya patawadán moy dán siya sakay tulungan moy siya a magin matatag tu pánnampalataya na tánni awan siya matuluyan a manghina ti isip dipo tu matindi a kalungkutan.#2:7 Basaán tu Genesis 37:34-35, Juan 11:19. 8Kaya mákkekakagbiyák nikam a ipabate moy nikuna a mahal moy padi siya. 9Dipo iye u dahilan ni bakin a nagsulaták nikam, para matukuyan ko ni sássunudán moy ti husto u atanan a impáppangaral ko. 10Ni deya man u pinatawad moy ay pinatawad ko dán be. Ni nagpatawadák man tistigu ko ti Cristo a ginimet ko itod alang-alang nikam.#2:10-11 Basaán tu Genesis 3:1-6, Mateo 24:23-24. 11Dapat la a magpatawad kitam tánni awan kitam malinlang ni Satanas. Dipo tukoy tam u plano na a madukás.

Mabalisa ti Pablo ti Troas

12Nikuna immangayák ti Troas para mangaral tu Maganda a Baheta tungkul ni Cristo, ay inatáddinák nu Panginoon ti maganda a pagkakataun para magimet ku itod.#2:12-13 Basaán tu 1 Samuel 9:20, Lukas 10:41. 13Pero awanák labe ti kapayapaan dipo awan ko netan hod u kapatkákka ko a ti Tito. Kaya nagpaalamák nide sakay dummiretso ti Macedonia.

Nagtagumpay Dipo ni Cristo

14Pero magpasalamaták tu Diyos dipo siya u mángdipalongo tu págserbi me ni Cristo kaya lagi kame a magtagumpay. Hádya kami man a umangay ay gamitán kame nu Diyos para ipakilala ti Cristo tu tolay hide iye ay mehalimbawa tu kákkalat nu masáppot a ahob. 15Dipo konna kame tu masáppot a handug a iyáalay ni Cristo para tu Diyos. Sakay maahob iye nu nágkaligtas dán hide sakay tu mágkepahamak hide. 16Tu mágkepahamak hide, iye ay essa a makatay a ahob, pero tu nágkaligtas dán hide, iye ay sáppot a mangatád ti biyag. Deya u tehhod a sapat a kakayanan a makagimet ti konna hina a págserbi? 17Dipo awan kame konna tu agum a gággimitán de a negosyo u upos nu Diyos. Tukoy me a áelingán kame nu Diyos kaya bilang mánnampalataya ni Cristo sakay tagapagserbi nu Diyos, ay tapat kame a mangaral tu upos na.

Currently Selected:

2 Corinto 2: MBJC

Highlight

Copy